Share

ಕೊಲ್ಲುವುದಕ್ಕೆಂದೇ ಪಂದ್ಯ ಕಟ್ಟಿದವನ ಇದಿರು…
ವೆಂಕಟ್ರಮಣ ಗೌಡ

ಬ್ಬ ರಾಜ ಇದ್ದ. ಅವನಿಗೆ ಕಥೆಗಳ ಹುಚ್ಚು. ಕಥೆ ಹೇಳುವವರು ಬೇಕು. ಬರೀ ಹೇಳಿದರೆ ಸಾಲದು; ಅವನನ್ನು ಕಥೆಗಳ ಮೂಲಕ ಸಂತುಷ್ಟಪಡಿಸಬೇಕು. ಹಾಗೆ ಸಂತುಷ್ಟಗೊಳಿಸಲು ಆಗದಿದ್ದರೆ ಅವರ ತಲೆ ಹೋಗುತ್ತಿತ್ತು. ಕಥೆ ಹೇಳಿ ಅವನನ್ನು ಸಾಕು ಎನ್ನಿಸುವಂತೆ ಮಾಡಿದರೆ ಅರ್ಧ ರಾಜ್ಯ ಉಂಬಳಿಯಾಗಿ ಕೊಡಲು ತಯಾರಿರುವಷ್ಟು ಮಟ್ಟಿಗೆ ಅವನು ಕಥಾನುರಾಗಿ ಅಥವಾ ಹಾಗೆ ನಟಿಸುವವನು.

ಯಾವ ಕಥಾ ಪ್ರವೀಣನೂ ಅರ್ಧ ರಾಜ್ಯ ತನ್ನದಾಗಿಸಿಕೊಳ್ಳುವಷ್ಟು ಅದೃಷ್ಟವಂತನಾಗಿರಲಿಲ್ಲ. ಬದಲಾಗಿ, ಕಥೆ ಹೇಳಬಲ್ಲ ತಮ್ಮ ತಾಕತ್ತು ನೆಚ್ಚಿಕೊಂಡು ಹೋದವರೆಲ್ಲ ಆ ರಾಜನ ಸಿಟ್ಟಿಗೆ ತುತ್ತಾಗಿ ತಲೆಕೊಡಬೇಕಾಗಿ ಬರುತ್ತದೆ. ಯಾವ್ಯಾವುದೋ ರಾಜ್ಯಗಳಿಂದ ಕಥೆ ಹೇಳಲು ಬಂದವರು ಸಾವಿನ ಮನೆಯ ಪಾಲಾಗುತ್ತಾರೆ. ರಾಜನ ಕಥೆಗಳ ಹಸಿವು ಮಾತ್ರ ಇಂಗುವುದೇ ಇಲ್ಲ.

ಕಥೆ ಹೇಳಿ ತನ್ನನ್ನು ತೃಪ್ತಿಪಡಿಸಬಲ್ಲವರಿಗಾಗಿ ಆತ ಡಂಗುರ ಸಾರುತ್ತಾನೆ. ಒಂದಿನ ಒಬ್ಬ ಬರುತ್ತಾನೆ. ಯಾವುದೋ ಹಳ್ಳಿಯ ರೈತ. ಹರಕು ಬಟ್ಟೆಯ, ಹೆಗಲ ಮೇಲೊಂದು ಕಂಬಳಿ ಹೇರಿಕೊಂಡ ಅವನನ್ನು ನೋಡಿಯೇ ನಕ್ಕುಬಿಡುತ್ತಾನೆ ರಾಜ. “ನೀನು ನನ್ನನ್ನು ಕಥೆ ಹೇಳಿ ಸೋಲಿಸುತ್ತಿಯೇನೋ ಹೆಡ್ಡ?” ಎಂದು ವ್ಯಂಗ್ಯ ಮಾಡುತ್ತಾನೆ. “ಎಂಥೆಂಥವರೋ ಬಂದು ಸತ್ತುಹೋದರು. ನಿನಗೂ ಯಾಕಪ್ಪಾ ಸಾವಿನ ಮನೆ ಕದ ತಟ್ಟುವ ಉಸಾಬರಿ? ಹೋಗಿ ಬದುಕಿಕೋ ಮಗನೆ” ಅನ್ನುತ್ತಾನೆ ಅಹಂಕಾರದಿಂದ. ರೈತ ಶಾಂತವಾಗಿಯೇ, ಆದರೆ ಅಷ್ಟೇ ದೃಢತೆಯಿಂದ ಉತ್ತರಿಸುತ್ತಾನೆ: “ನಿಮಗಾಗಿ ಕಥೆ ಹೇಳುವುದಕ್ಕೆ ಬಂದಿದ್ದೇನೆ; ಕಥೆ ಹೇಳಿಯೇ ಹೋಗುತ್ತೇನೆ”. “ಸರಿ ಬಿಡಪ್ಪಾ. ನಿನಗೇ ಸಾಯಲು ಅಷ್ಟೊಂದು ಅವಸರವಿದ್ದರೆ ನಾನಾದರೂ ಏನು ಮಾಡಲಿ?” ಎಂದು ರಾಜ ಮತ್ತೂ ವ್ಯಂಗ್ಯವಾಡಿ ಅವನ ಕಥೆ ಕೇಳಲು ತಯಾರಾಗುತ್ತಾನೆ.

ರೈತ ಕಥೆ ಶುರು ಮಾಡುತ್ತಾನೆ: “ದೊರೆಯೆ, ಒಂದು ದೊಡ್ಡ ಕಣಜ. ಅದರ ತುಂಬಾ ರಾಗಿ. ಒಂದು ಇರುವೆ ಬಂತು; ಒಂದು ರಾಗಿ ಕಾಳು ಹೊತ್ತುಕೊಂಡು ಹೋಯ್ತು. ಇನ್ನೊಂದಿರುವೆ ಬಂತು; ಇನ್ನೊಂದು ರಾಗಿಕಾಳು ಹೊತ್ತುಕೊಂಡು ಹೋಯ್ತು. ಮತ್ತೊಂದಿರುವೆ ಬಂತು; ಮತ್ತೊಂದು ರಾಗಿಕಾಳು ಹೊತ್ತುಕೊಂಡು ಹೋಯ್ತು…” ದಿನಗಟ್ಟಲೆ ಕಥೆ ಹೇಳಿದರೂ ಕೇಳಿ ಸೋಲದಿರುತ್ತಿದ್ದ ರಾಜನಿಗೆ ಕೆಲವೇ ನಿಮಿಷಗಳಲ್ಲಿ ತಲೆಚಿಟ್ಟು ಹಿಡಿಯುವುದಕ್ಕೆ ಶುರುವಾಗುತ್ತೆ. “ಮುಂದೆ ಹೇಳಪ್ಪಾ” ಅನ್ನುತ್ತಾನೆ. “ಹೇಳ್ತಾ ಇದ್ದೀನಲ್ಲ ದೊರೆಯೆ. ಅಷ್ಟು ದೊಡ್ಡ ಕಣಜ. ಅದರ ತುಂಬಾ ರಾಗಿ. ಆ ಇರುವೆ ದಂಡು ಅದಷ್ಟನ್ನೂ ಸಾಗಿಸಬೇಕಲ್ಲವೇ ದೊರೆಯೇ?” ಎಂದು ಮತ್ತೆ ಮುಂದುವರೆಸುತ್ತಾನೆ: “ಒಂದಿರುವೆ ಬಂತು; ಒಂದು ರಾಗಿಕಾಳು ತಗೊಂಡು ಹೋಯ್ತು. ಮತ್ತೊಂದಿರುವೆ ಬಂತು; ಮತ್ತೊಂದು….” ರಾಜನಿಗೆ ಒಂದಂತೂ ಅರ್ಥವಾಗಿಬಿಡುತ್ತದೆ. ಇದು ಮುಗಿಯುವುದಕ್ಕೆ ಶುರುವಾಗಿರೋ ಕಥೆಯಲ್ಲ ಅನ್ನೋದು.

ಅರೇಬಿಯನ್ ನೈಟ್ಸ್ ಕಥೆಗಳ ಶೆಹೆರಾಜಾದೆ ಕೂಡ ದೊರೆಯೊಬ್ಬನ ಭ್ರಮೆ, ಹುಂಬತನ ಮತ್ತು ಅವಿವೇಕವನ್ನು ತನ್ನ ಕಥೆಗಾರಿಕೆಯ ಪ್ರತಿಭೆಯಿಂದಲೇ ಕಳಚಿಬೀಳುವಂತೆ ಮಾಡುತ್ತಾಳೆ. ತನ್ನ ಅತ್ತಿಗೆ ತನ್ನ ಅಣ್ಣನಿಗೆ ನಿಷ್ಠಳಾಗಿ ನಡೆದುಕೊಳ್ಳಲಿಲ್ಲ ಅಂತಲೂ, ತನ್ನ ಹೆಂಡತಿ ತನ್ನನ್ನು ವಂಚಿಸಿದಳು ಅಂತಲೂ ಷಹರ್ಯಾರ್ ಇಡೀ ಹೆಣ್ಣುಕುಲದ ಮೇಲೆಯೇ ಸೇಡು ತೀರಿಸಿಕೊಳ್ಳಲು ಹೊರಡುತ್ತಾನೆ. ಒಬ್ಬೊಬ್ಬಳೇ ಹೆಣ್ಣನ್ನು ಒಂದು ರಾತ್ರಿ ಬಳಸಿಕೊಂಡು ಮರುದಿನ ಅವಳ ಶಿರಚ್ಛೇದ ಮಾಡಿಸುವುದು. ಹೀಗೆ ಒಂದು ಸಾವಿರ ಹೆಣ್ಣುಮಕ್ಕಳು ಅವನ ವಿಕಾರ ಮನಃಸ್ಥಿತಿಗೆ ಬಲಿಯಾಗಿಹೋಗುತ್ತಾರೆ.

ಈ ಹಂತದಲ್ಲಿ ಅವನ ಅರಮನೆಗೆ ಒಂದು ರಾತ್ರಿ ಕಳೆಯಲು ಹೋಗುವವಳೇ ಶೆಹೆರಾಜಾದೆ. ಆ ರಾತ್ರಿ ಕಳೆದು ಬೆಳಗಾದರೆ ತನ್ನ ವಧೆಯಾಗುತ್ತದೆ ಎಂಬುದು ಗೊತ್ತು ಅವಳಿಗೆ. ಆ ರಾತ್ರಿ ಅವಳೊಂದು ಕಥೆ ಹೇಳುತ್ತಾಳೆ. ಆದರೆ ಒಂದು ಕುತೂಹಲಕಾರಿ ಘಟ್ಟದಲ್ಲಿ ಕಥೆಯನ್ನು ನಿಲ್ಲಿಸಿಬಿಡುತ್ತಾಳೆ. ಕಥೆಯನ್ನು ಮುಗಿಸಲು ಹೇಳುತ್ತಾನೆ ದೊರೆ. ಆದರೆ ಬೆಳಗಾಗಿರುವುದರಿಂದ ಈಗ ಅದನ್ನು ಮುಗಿಸಲು ಸಮಯವಿಲ್ಲ ಎನ್ನುತ್ತಾಳೆ ಜಾಣೆ ಶೆಹೆರಾಜಾದೆ. ಅವನಿಗೆ ಕುತೂಹಲಕರ ಹಂತದಲ್ಲಿ ನಿಂತಿರುವ ಕಥೆಯ ಅಂತ್ಯ ತಿಳಿಯುವ ಕಾತರ. ಹಾಗಾಗಿ ಅವಳನ್ನು ಕೊಲ್ಲದೆ ಬಿಡುತ್ತಾನೆ. ಮುಂದಿನ ರಾತ್ರಿ ಅವಳು ಆ ಕಥೆಯನ್ನು ಮುಗಿಸಿ ಮತ್ತೊಂದು ಕಥೆ ಶುರುಮಾಡುತ್ತಾಳೆ. ಅದನ್ನೂ ಬೆಳಗಾಗುವ ಹೊತ್ತಿಗೆ ಕುತೂಹಲದ ಘಟ್ಟದಲ್ಲಿ ನಿಲ್ಲಿಸಿಬಿಡುತ್ತಾಳೆ. ಆ ಕಥೆಯ ಅಂತ್ಯ ತಿಳಿಯಲು ಅವಳನ್ನು ಮುಂದಿನ ರಾತ್ರಿಯೂ ಉಳಿಸಿಕೊಳ್ಳುವುದು ಅವನಿಗೆ ಅನಿವಾರ್ಯವೆನ್ನಿಸಿಬಿಡುತ್ತದೆ.

ಹೀಗೆ ಸಾವಿರದೊಂದು ರಾತ್ರಿಗಳು. ಆ ರಾತ್ರಿ ಕಥೆ ಮುಗಿಸಿದ ಶೆಹೆರಾಜಾದೆ, ಇನ್ನು ತನ್ನ ಬಳಿ ಹೇಳಲು ಕಥೆಗಳಿಲ್ಲ ಎನ್ನುತ್ತಾಳೆ. ಆದರೆ ಅಷ್ಟು ಹೊತ್ತಿಗಾಗಲೇ ಪೂರ್ತಿಯಾಗಿ ಅವಳ ಪ್ರೇಮಪಾಷದಲ್ಲಿ ಬಿದ್ದಿದ್ದ ಷಹರ್ಯಾರ್. ಅವಳ ಬುದ್ಧಿವಂತಿಕೆ ಮತ್ತು ಅವಳ ಸೌಂದರ್ಯ ಅವನನ್ನು ಬದಲಿಸಿಬಿಟ್ಟಿರುತ್ತವೆ. ಅವಳನ್ನು ರಾಣಿಯಾಗಿ ಸ್ವೀಕರಿಸುತ್ತಾನೆ.

ಹೆಣ್ಣಿನ ಸಂತತಿಯನ್ನೇ ದ್ವೇಷಿಸತೊಡಗಿದ್ದವನು ಮತ್ತು ಅದಕ್ಕಾಗಿ ಒಬ್ಬೊಬ್ಬಳೇ ಕನ್ಯೆಯನ್ನು ಬಳಸಿಕೊಂಡು ಕೊಲ್ಲತೊಡಗಿದ್ದವನು ಅದರಿಂದ ವಿಮುಖನಾಗುವಂತಾಗಲು ಸಾಧ್ಯವಾಗುವಂಥ ಕುತೂಹಲವನ್ನು ಹುಟ್ಟಿಸಿದ ಶೆಹೆರಾಜಾದೆಯ ಕಥಾ ಸೌಂದರ್ಯ ದೊಡ್ಡದು; ಒಂದು ಕ್ರೂರ ಮನೋಭಾವವನ್ನು ಮಣಿಸಿದ ಕಲೆಗಾರಿಕೆ ಅವಳದು.

ಆದರೆ ಶೆಹೆರಾಜಾದೆಯ ಬುದ್ಧಿವಂತಿಕೆಗಿಂತ ಮೊದಲ ಕಥೆಯ ರೈತನ ಭಂಡತನ ಹೆಚ್ಚಿನದು ಎನ್ನಿಸುತ್ತದೆ ನನಗೆ. ಇಬ್ಬರೂ ಹಲವು ಹತ್ಯೆಗಳ ರಕ್ತ ಅಂಟಿಸಿಕೊಂಡಿದ್ದ ಕ್ರೂರಿ ದೊರೆಗಳನ್ನು ಒಂದು ಸವಾಲು ಸ್ವೀಕರಿಸಿದವರಂತೆ ಮುಖಾಮುಖಿಯಾದವರೇ. ಇಬ್ಬರಿಗೂ ತಮ್ಮ ತಲೆ ಕಾಯ್ದುಕೊಳ್ಳುವ ತಂತ್ರದ ಅನಿವಾರ್ಯತೆಯಿದ್ದುದೂ ನಿಜ. ಆದರೆ, ಶೆಹೆರಾಜಾದೆಗೆ ಇದ್ದ ಅನುಕೂಲವೆಂದರೆ, ಬೇರೆಯ ಕಾರಣಕ್ಕೆ ಕ್ರೂರಿಯಾದವನ ಮುಂದೆ ಕಥೆಯನ್ನು ಒಂದು ತಂತ್ರವಾಗಿ ಮಾಡಿಕೊಳ್ಳುವ ಸಾಧ್ಯತೆ ಕಂಡಿತ್ತು. ಮತ್ತು ಆ ಕಥೆಯಲ್ಲಿ ಕುತೂಹಲವನ್ನು ಕಟ್ಟಿದ್ದು ಅವಳ ಸ್ವೋಪಜ್ಞತೆ. ಆದರೆ, ಕಥೆಯೆಂದರೇ ಕಾಲಕಸ ಎಂಬಂತೆ ಭಾವಿಸಿ, ಅದೆಷ್ಟೋ ಕಲಾಕಾರರನ್ನು ಕೊಂದು ಮುಗಿಸಿದ್ದವನ ಮುಂದೆ ಬಂದು ನಿಂತಿದ್ದ ರೈತನದ್ದು ಅಷ್ಟು ಸುಲಭದ ದಾರಿಯಾಗಿರಲಿಲ್ಲ.

ಷಹರ್ಯಾರ್ ಮಾನಸಿಕ ಆಘಾತದಿಂದ ಕ್ರೂರಿಯಾದವನಾದರೂ, ಕಥೆಗೆ ಪರವಶನಾಗಬಲ್ಲ ಸಹಜ ದೌರ್ಬಲ್ಯವುಳ್ಳವ. ಆದರೆ ಕಥೆ ಹೇಳಿ ತನ್ನನ್ನು ಸೋಲಿಸಿ ಇಲ್ಲವೇ ತಲೆ ಕೊಡಲು ತಯಾರಾಗಿ ಎಂದು ಸೃಜನಶೀಲತೆಯ ಮೇಲೆಯೇ ದಬ್ಬಾಳಿಕೆಗೆ ಹೊರಟವನಂತೆ ಇದ್ದ ಮತ್ತೊಬ್ಬ ರಾಜ ಮೂಲತಃ ಕ್ರೂರಿ ಎಂಬುದರಲ್ಲಿ ಎರಡು ಮಾತಿಲ್ಲ. ಅಂಥವನ ಮುಂದೆ ಕಥೆಯ ಮರ್ಮ ತೆರೆಯುತ್ತ ಅವನ ಮನಸ್ಸನ್ನು ಗೆಲ್ಲುವುದು ಸಾಧ್ಯವಿತ್ತಾ? ಅಂಥ ಸವಾಲು ರೈತನ ಎದುರಿಗಿತ್ತು.

ಗೊತ್ತಿರದ ಕುತೂಹಲಗಳ ಕೊನೆಗಾಣದ ವರ್ತುಳಗಳಲ್ಲಿ ದೊರೆಯನ್ನು ಸುತ್ತಿಸುವ ಜಾಣ್ಮೆಯನ್ನು ಶೆಹೆರಾಜಾದೆ ತೋರಿದರೆ, ಗೊತ್ತಿರುವ ಕ್ಷುಲ್ಲಕ ಸಂಗತಿಗಳ ಇಷ್ಟೇ ಇಷ್ಟು ಸಣ್ಣ ಜಾಗದಲ್ಲೇ ದೊರೆಯನ್ನು ಗಿರಕಿ ಹೊಡೆಸುವ ತಂತ್ರವನ್ನು ರೈತ ಬಳಸುತ್ತಾನೆ.

ಕೊಲ್ಲುವುದಕ್ಕೆಂದೇ ಪಂದ್ಯ ಕಟ್ಟಿದವನ ಇದಿರು ಇದು ಪ್ರತಿಭಟನೆಯ ಒಂದು ಸಾಧ್ಯತೆಯೂ ಹೌದು. ತೃಪ್ತಿಪಡಿಸಿ ಗೆಲ್ಲುವ ಸವಾಲು ಹಾಕಿದವನನ್ನು, ಅವನು ನಿರೀಕ್ಷಿಸಿಯೇ ಇರದ ಬಗೆಯಲ್ಲಿ ನಿರಾಸೆಗೊಳಿಸುವುದೇ ದೊಡ್ಡ ಗೆಲುವು. ಹೀಗೆ ಗೆದ್ದ ಆ ಸಾಮಾನ್ಯ ರೈತನನ್ನು, ಇವತ್ತಿನ ಪ್ರಜಾಪ್ರಭುತ್ವದಲ್ಲಿ ಆಳುವವರನ್ನು ನಿರ್ಧರಿಸುವ ವರ್ಗ ತನ್ನೊಳಗೆ ಆವಾಹಿಸಿಕೊಳ್ಳಬೇಕಾದ ಜರೂರು ಇದೆ.

Share

One Comment For "ಕೊಲ್ಲುವುದಕ್ಕೆಂದೇ ಪಂದ್ಯ ಕಟ್ಟಿದವನ ಇದಿರು…
ವೆಂಕಟ್ರಮಣ ಗೌಡ
"

  1. ನಾಗರಾಜ ಹರಪನಹಳ್ಳಿ
    22nd August 2016

    ಇವತ್ತಿನ ರಾಜಕಾರಣವನ್ನು ನಮ್ಮ ಜನ ಶೆಹೆರಾಜಾದೆ ತರಹ ಬಗ್ಗಿಸಿದರೆ ಸಾಕು.ಈ ದೇಶ ಉಳಿಯುತ್ತದೆ.

    Reply

Leave a comment

Your email address will not be published. Required fields are marked *

Recent Posts More

  • 1 day ago No comment

    ಕಾದಂಬಿನಿ ಕಾಲಂ | ವೇದಿಕೆ, ಶಾಲು, ಸನ್ಮಾನ, ಬಿರುದು ಬಾವಲಿ ಇತ್ಯಾದಿ

                        ಕವಿತೆಯ ಬಗ್ಗೆ ಇರುವ ಆಸಕ್ತಿ ಆ ದೀನ ಹೆಣ್ಣುಮಗಳ ಮಾತು ಆಲಿಸುವುದರಲ್ಲಿ ಇಲ್ಲವೆಂಬುದು ಲೈಕು ಕಮೆಂಟುಗಳಿಂದಲೇ ಸಾಬೀತಾಯಿತು. ಉಳ್ಳವರ ಜಗಮಗಿಸುವ ಲೋಕದಲ್ಲಿ ಒಬ್ಬ ನಿರಾಶ್ರಿತ ಅಲೆಮಾರಿ ಜನಾಂಗದ ನಿರ್ಗತಿಕ ಹೆಣ್ಣಿನ ಅಳಲಿಗೆ ಯಾವ ಜಾಗವಿದೆ ಎನ್ನುವುದನ್ನು ಅದು ನನಗೆ ಮನಗಾಣಿಸತೊಡಗಿತು.   ಮೊನ್ನೆ ಒಬ್ಬ ಕವಿಯ ಜೊತೆ ಬೇಸರದಿಂದ ಮಾತಾಡಿಬಿಟ್ಟೆ. ‘ಶುಭಾಶಯಗಳು. ಆದರೆ ಇಂಥ ...

  • 2 days ago No comment

    ಹುಲ್ಲಿನ ಕಡ್ಡಿ

      ಕವಿಸಾಲು       ಜೋಪಡಿ ತುಂಬಾ ಮಂಪರುಗಣ್ಣಲ್ಲಿ ನೇತಾಡುವ ಚುಕ್ಕಿಗಳು ಚಂದಿರನ ಅಂಗಳ ಸೃಷ್ಟಿಸಿದ್ದವು ಗುಡಿಸಲು ಕಣ್ಣೊಳಗೆ ಜಾತಿ ಧರ್ಮದ ಹಂಗು ತೊರೆದು ನಡು ಮನೆಯ ದೀಪವಾಗಿ ಬೆಳಗಿದ ಕಸಬರಿಗೆಯ ನಾಡಿಗಳು ಹಲವು ಬಗೆಯ ರಕ್ತ ಬಸಿದವರ ರೂಪಾಂತರ ಸಾಲು ನದಿಗಳ ಸರಪಳಿಯಂತೆ ಬೆಸೆದುಕೊಂಡ ಹುಲ್ಲಿನ ಕಡ್ಡಿಗಳು ಹೊಗೆ ಜಂತಿಯ ಮನೆಯೊಳಗೆ ಜಪ್ಪೆನ್ನದ ತಪೋ ವನಗಳು ಮಳೆ ಗುಡುಗು ಬಿರುಗಾಳಿಯ ಅಬ್ಬರದೊಳಗೂ ಸದಾ ಕುದಿಯುತ್ತಾ ಹದಗೊಳ್ಳೊ ...

  • 1 week ago No comment

    ಕಾದಂಬಿನಿ ಕಾಲಂ | ಕಸದ ತೊಟ್ಟಿಯಲ್ಲಿ ಸಿಕ್ಕ ಒಂದು ಹೆಣ್ಣು ಶಿಶುವಿನ ಕಥೆ

                        ಬಾಣಲೆಯಿಂದ ಬೆಂಕಿಗೆ ಬಿದ್ದಂತೆ ಕೆಲ ಪುನರ್ವಸತಿ ಕೇಂದ್ರಗಳ ಪಾಲಾದ ಬಾಲಕಿಯರು ಗಂಡಿನ ಕಾಮದ ದಳ್ಳುರಿಯ ಕೊಂಡಕ್ಕೆ ದೂಡಲ್ಪಟ್ಟ ಕಡು ಹೇಯ, ಭೀಬತ್ಸ್ಯಕರ ಕಥೆಗಳನ್ನು ನಾವಿಂದು ಕಾಣುತ್ತಿದ್ದೇವೆ. ಆದರೆ ಹೀಗೆ ಅನಾಥಾಲಯ, ಪುನರ್ವಸತಿ ಕೇಂದ್ರಗಳಿಗೆ ದಾಖಲಾಗುವ ಮುನ್ನಿನ ಆ ಒಂದೊಂದು ಮಗುವಿನ ಕಥೆಯೂ ಅಷ್ಟೇ ಯಾತನಾಪೂರಿತವಾಗಿರುತ್ತವೆ.   ಮೊನ್ನೆ ಮೊನ್ನೆ ಬಿಹಾರದ ಮುಜಫರ್ ನಗರದ ಪುನರ್ವಸತಿ ...

  • 1 week ago No comment

    ಪ್ರಸಾದ್ ಪಟ್ಟಾಂಗ | ಅರ್ಥ ಅರಿಯದವರಿಗೆ ಸ್ವಾತಂತ್ರ್ಯವೂ ಅಗ್ಗವೇ!

      ನಾವಿಂದು ಸವಿಯುತ್ತಿರುವ ಸ್ವಾತಂತ್ರ್ಯದ ಹಿಂದೆ ಅದೆಷ್ಟೋ ಜೀವಗಳ ಬಲಿದಾನದ ಇತಿಹಾಸವಿದೆ, ಮುತ್ಸದ್ದಿಗಳ ಕನಸಿದೆ, ಧೀಮಂತ ನಾಯಕರ ದೂರದೃಷ್ಟಿಯ ಹಿನ್ನೆಲೆಗಳಿವೆ. ಇವೆಲ್ಲದರ ಬಗ್ಗೆ ಒಂದಿಷ್ಟಾದರೂ ನಮಗೆ ಕೃತಜ್ಞತೆಯ ಭಾವವಿರಬೇಕಷ್ಟೇ.   ಅದೊಂದು ಟೆಲಿವಿಷನ್ ಕಾರ್ಯಕ್ರಮ. ಸುದ್ದಿವಾಹಿನಿಯೊಂದು ನಮ್ಮ ದೇಶದ ಸ್ವಾತಂತ್ರ್ಯ ಹೋರಾಟಗಾರರ ಬಗ್ಗೆ, ಪ್ರಸ್ತುತ ರಾಜಕೀಯ ನಾಯಕರ ಬಗ್ಗೆ… ಹೀಗೆ ಸಾಮಾನ್ಯಜ್ಞಾನ ಎಂದು ಕರೆಯಬಹುದಾದ ಹಲವು ಪ್ರಶ್ನೆಗಳನ್ನು ತರುಣ-ತರುಣಿಯರಲ್ಲಿ ಕ್ಯಾಮೆರಾ ಮುಂದೆ ಕೇಳುತ್ತಿತ್ತು. ಮಹಾತ್ಮಾ ಗಾಂಧಿಯವರ ಸಂಪೂರ್ಣ ಹೆಸರೇನು? ...

  • 2 weeks ago No comment

    ಕಾದಂಬಿನಿ ಕಾಲಂ | ಕೊನೆಗೂ ಒಂಟಿಯಾಗಿ ಉಳಿದುಬಿಟ್ಟವಳು

                        ಈಗ ಆಗಿನಂತೆ ನಗು ಬರಲಿಲ್ಲ. ಅವಳ ಬದುಕಲ್ಲೂ ಅದೇ ಘಟಿಸಿಹೋದ ಚೋದ್ಯಕ್ಕೆ ಏನು ಹೇಳುವುದು?   ಮೊನ್ನಿನ ಮುಂಜಾವಲ್ಲಿ ನಾನು ಎಚ್ಚರಗೊಂಡದ್ದೇ ಅವಳ ಫೋನ್ ಕರೆಯಿಂದ. ‘ನಾನ್ ಕಣೇ ರಾಜಿ’ ಎಂದರೆ ನಾನು, ‘ರಾಣಿನಾ?’ ಅನ್ನುತ್ತಿದ್ದೆ. ಅಷ್ಟರಲ್ಲಿ ‘ರಾಜಿ ಮಾರಾಯ್ತೀ ಮರೆತುಬಿಟ್ಯಲ್ಲ’ ಆಪಾದಿಸಿದಳು. ರಾಣಿ ನನ್ನ ಮನೆಯ ಎಡಕ್ಕಿದ್ದ ಗೆಳತಿ. ರಾಜಿ ಬಲಕ್ಕಿದ್ದವಳು. ಇಬ್ಬರ ...


Editor's Wall

  • 15 August 2018
    1 day ago No comment

    ಕಾದಂಬಿನಿ ಕಾಲಂ | ವೇದಿಕೆ, ಶಾಲು, ಸನ್ಮಾನ, ಬಿರುದು ಬಾವಲಿ ಇತ್ಯಾದಿ

                        ಕವಿತೆಯ ಬಗ್ಗೆ ಇರುವ ಆಸಕ್ತಿ ಆ ದೀನ ಹೆಣ್ಣುಮಗಳ ಮಾತು ಆಲಿಸುವುದರಲ್ಲಿ ಇಲ್ಲವೆಂಬುದು ಲೈಕು ಕಮೆಂಟುಗಳಿಂದಲೇ ಸಾಬೀತಾಯಿತು. ಉಳ್ಳವರ ಜಗಮಗಿಸುವ ಲೋಕದಲ್ಲಿ ಒಬ್ಬ ನಿರಾಶ್ರಿತ ಅಲೆಮಾರಿ ಜನಾಂಗದ ನಿರ್ಗತಿಕ ಹೆಣ್ಣಿನ ಅಳಲಿಗೆ ಯಾವ ಜಾಗವಿದೆ ಎನ್ನುವುದನ್ನು ಅದು ನನಗೆ ಮನಗಾಣಿಸತೊಡಗಿತು.   ಮೊನ್ನೆ ಒಬ್ಬ ಕವಿಯ ಜೊತೆ ಬೇಸರದಿಂದ ಮಾತಾಡಿಬಿಟ್ಟೆ. ‘ಶುಭಾಶಯಗಳು. ಆದರೆ ಇಂಥ ...

  • 09 August 2018
    1 week ago No comment

    ಕಾದಂಬಿನಿ ಕಾಲಂ | ಕಸದ ತೊಟ್ಟಿಯಲ್ಲಿ ಸಿಕ್ಕ ಒಂದು ಹೆಣ್ಣು ಶಿಶುವಿನ ಕಥೆ

                        ಬಾಣಲೆಯಿಂದ ಬೆಂಕಿಗೆ ಬಿದ್ದಂತೆ ಕೆಲ ಪುನರ್ವಸತಿ ಕೇಂದ್ರಗಳ ಪಾಲಾದ ಬಾಲಕಿಯರು ಗಂಡಿನ ಕಾಮದ ದಳ್ಳುರಿಯ ಕೊಂಡಕ್ಕೆ ದೂಡಲ್ಪಟ್ಟ ಕಡು ಹೇಯ, ಭೀಬತ್ಸ್ಯಕರ ಕಥೆಗಳನ್ನು ನಾವಿಂದು ಕಾಣುತ್ತಿದ್ದೇವೆ. ಆದರೆ ಹೀಗೆ ಅನಾಥಾಲಯ, ಪುನರ್ವಸತಿ ಕೇಂದ್ರಗಳಿಗೆ ದಾಖಲಾಗುವ ಮುನ್ನಿನ ಆ ಒಂದೊಂದು ಮಗುವಿನ ಕಥೆಯೂ ಅಷ್ಟೇ ಯಾತನಾಪೂರಿತವಾಗಿರುತ್ತವೆ.   ಮೊನ್ನೆ ಮೊನ್ನೆ ಬಿಹಾರದ ಮುಜಫರ್ ನಗರದ ಪುನರ್ವಸತಿ ...

  • 01 August 2018
    2 weeks ago No comment

    ಕಾದಂಬಿನಿ ಕಾಲಂ | ಕೊನೆಗೂ ಒಂಟಿಯಾಗಿ ಉಳಿದುಬಿಟ್ಟವಳು

                        ಈಗ ಆಗಿನಂತೆ ನಗು ಬರಲಿಲ್ಲ. ಅವಳ ಬದುಕಲ್ಲೂ ಅದೇ ಘಟಿಸಿಹೋದ ಚೋದ್ಯಕ್ಕೆ ಏನು ಹೇಳುವುದು?   ಮೊನ್ನಿನ ಮುಂಜಾವಲ್ಲಿ ನಾನು ಎಚ್ಚರಗೊಂಡದ್ದೇ ಅವಳ ಫೋನ್ ಕರೆಯಿಂದ. ‘ನಾನ್ ಕಣೇ ರಾಜಿ’ ಎಂದರೆ ನಾನು, ‘ರಾಣಿನಾ?’ ಅನ್ನುತ್ತಿದ್ದೆ. ಅಷ್ಟರಲ್ಲಿ ‘ರಾಜಿ ಮಾರಾಯ್ತೀ ಮರೆತುಬಿಟ್ಯಲ್ಲ’ ಆಪಾದಿಸಿದಳು. ರಾಣಿ ನನ್ನ ಮನೆಯ ಎಡಕ್ಕಿದ್ದ ಗೆಳತಿ. ರಾಜಿ ಬಲಕ್ಕಿದ್ದವಳು. ಇಬ್ಬರ ...

  • 25 July 2018
    3 weeks ago No comment

    ಕಾದಂಬಿನಿ ಕಾಲಂ | ಚೌಕಟ್ಟಿನೊಳಗಿರುವುದು ಚಿತ್ರವಲ್ಲ; ಸುಡುಸುಯ್ಲು!

                        ಹೃದಯ ಭಾರವಾಗುತ್ತದೆ. ಚೌಕಟ್ಟಿನೊಳಗಿನ ಸುಡುಸುಯ್ಲುಗಳು ಇಷ್ಟೇಕೆ ಸುಡುತ್ತವೆ? ಹೊರ ಲೋಕಕ್ಕೆ ಅದೇಕೆ ತಣ್ಣಗೆ ತಣಿದುಬಿಟ್ಟ ಮಂಜುಬೆಟ್ಟಗಳಂತೆ ಗೋಚರಿಸುತ್ತದೆ?   ಆ ದಂಪತಿ ಪ್ರಯಾಣಿಸುತ್ತಿದ್ದ ಕಾರಿನ ಚಾಲಕ ಹಾಡು ಹಾಕಿದಂತೆಲ್ಲ ಪತಿ ಅದನ್ನು ಆಫ್ ಮಾಡುತ್ತಿದ್ದ. ಚಾಲಕನಿಗೆ ವಿಚಿತ್ರವೆನಿಸಿರಬೇಕು. ‘ಏನ್ ಸಾರ್ ನಿಮಗೆ ಹಾಡು ಕೇಳುವ ಹವ್ಯಾಸ ಇಲ್ವಾ’ ಅಂದಾಗ ‘ಇಲ್ಲ ಅದರಿಂದೇನು ಸಿಗುತ್ತೆ?’ ಎಂದಿದ್ದ ...

  • 11 May 2018
    3 months ago No comment

    ಕಾಂಗ್ರೆಸ್ ನಾಯಕರು ಜೈಲಲ್ಲಿ ಭಗತ್ ಸಿಂಗ್ ಭೇಟಿಯಾಗಿರಲಿಲ್ಲವಾ?

    ಭಾರತದ ಪ್ರಥಮ ಪ್ರಧಾನಿ ಜವಾಹರಲಾಲ್ ನೆಹರೂ ಅವರ ಆತ್ಮಚರಿತ್ರೆಯಲ್ಲಿಯೇ, ಅವರು ಭಗತ್ ಸಿಂಗ್ ಭೇಟಿಯಾಗಿದ್ದರೆಂಬುದರ ಕುರಿತ ವಿವರ ಸಿಗುತ್ತದೆ. “ಭಾರತದ ಸ್ವಾತಂತ್ರ್ಯಕ್ಕಾಗಿ ಹೋರಾಡಿದ್ದ ಭಗತ್ ಸಿಂಗ್, ಬಟುಕೇಶ್ವರ್ ದತ್, ವೀರ್ ಸಾವರ್ಕರ್ ಜೈಲಿನಲ್ಲಿದ್ದಾಗ ಅವರನ್ನು ಯಾರಾದರೊಬ್ಬ ಕಾಂಗ್ರೆಸ್ ನಾಯಕರು ಹೋಗಿ ಕಂಡಿದ್ದರಾ? ಆದರೆ ಕಾಂಗ್ರೆಸ್ ನಾಯಕರು ಭ್ರಷ್ಟನೊಬ್ಬ ಜೈಲಿನಲ್ಲಿದ್ದರೆ ಅವನನ್ನು ನೋಡಲು ಹೋಗುತ್ತಾರೆ” ಎಂದು ಪ್ರಧಾನಿ ನರೇಂದ್ರ ಮೋದಿ ಕರ್ನಾಟಕದ ಚುನಾವಣೆ ಪ್ರಚಾರ ಸಭೆಯಲ್ಲಿ ವಾಗ್ದಾಳಿ ನಡೆಸಿದ್ದರು. ಬ್ರಿಟಿಷ್ ...