Share

ಆ ಒಬ್ಬನಿಗಾಗಿ ಅದೆಷ್ಟು ಕಾಯುತ್ತಿದ್ದೆ ಗೊತ್ತಾ?
ವಾಸುದೇವ ನಾಡಿಗ್, ನೆಲಮಂಗಲ

ಅಕ್ಷರ ಸಹವಾಸದಲ್ಲಿನ ನಿಮ್ಮ ನೆನಪುಗಳ ಬುತ್ತಿಯನ್ನೊಮ್ಮೆ ಬಿಡಿಸಿ ನೋಡಿ. ಅಲ್ಲಿನ ಖುಷಿ, ಪುಳಕವನ್ನು ನಮ್ಮೊಂದಿಗೆ ಹಂಚಿಕೊಳ್ಳಿ. ಇದು ಕನೆಕ್ಟ್ ಕನ್ನಡದ ಈ ಕೋರಿಕೆ.

ಇಲ್ಲಿದೆ ಕವಿ ವಾಸುದೇವ್ ನಾಡಿಗ್ ಬರಹ.

——————–

ಸುಮ್ಮನೆ ಆಗಾಗ ಕಣ್ಣು ಮುಚ್ಚಿಕೊಂಡು ಬರಹ ಲೋಕದಲ್ಲಿ ನನ್ನ ಪ್ರವೇಶದ ದಿನಮಾನಗಳನ್ನು ನೆನಪು ಮಾಡಿಕೊಳ್ಳುವ ಪುಳಕಕ್ಕೆ ಬೀಳುತ್ತೇನೆ. ಅಗಾಧ ಜೀವನ ಪರಿಧಿಯಲ್ಲಿ ಓದು ಬರಹ ಮತ್ತು ಕಾವ್ಯವೆಂಬ ಪುಟ್ಟ ಅಂಗಳದಲ್ಲಿ ನನ್ನನ್ನು ಗುರುತಿಸಿಕೊಂಡ ಈ ಹೊತ್ತಿಗೆ ನೆನಪಾಗುವುದು ಇಲ್ಲಿಗೆ ಎಳೆತಂದ ಕೆಲವು ಸೆಳೆತಗಳು. ಪಕ್ಕಾ ನೆನಪಿದೆ ಅಥವಾ ಇಂತಹ ಗಳಿಗೆಗಳನ್ನು ಗಾಢವಾಗಿ ಅನುಭವಿಸಿರುವುದರಿಂದ ಮರೆಯಲಿಕ್ಕೆ ಕಾರಣಗಳೇ ಉಳಿಯೋಲ್ಲ. ಅದು ಹಾಗೇ ಅಲ್ಲವೆ? ಗಾಢವಾಗಿ ಒಪ್ಪಿಕೊಂಡ ಮತ್ತು ಎದೆಗೆ ತಂದುಕೊಂಡ ದಿನಮಾನಗಳು ಮಾಸುವುದೇ ಇಲ್ಲ. ಮರೆಯಲಾಗದ ಸಿನಿಮಾವೊಂದು ಆಗಾಗ ಕಲಕುವಂತೆ ತಳವನ್ನು ತುಳುಕಿಸಿಕೊಂಡ ಮನ ಸರೋವರದಂತೆ.

ಪುಟ್ಟ ಹುಡುಗ ನಾನು. ಬಹುಶಃ ಏಳನೇ ತರಗತಿಯ ಕೊನೇ ಹಂತ. ಅಪ್ಪ ಕೆಲಸ ಮಾಡುತ್ತಿದ್ದ ಹಳ್ಳಿ ಕೃಷಿ ತರಬೇತಿ ಸಂಸ್ಥೆಯ ಆವರಣದಲ್ಲಿನ ಕ್ಯಾಂಪಸಿನ ಮನೆ. ಸಿಟಿಯಿಂದಲೇ ಪೋಸ್ಟ್ ಮತ್ತು ಪತ್ರಿಕೆಗಳು ಬರಬೇಕಿತ್ತು. ತಿಂಗಳ ಮೊದಲ ವಾರದ ಸಂತಸವೇ ಚೆಂದ. ಪತ್ರಿಕೆಯ ಜೊತೆಗೆ ಮಾಸಿಕ ಪತ್ರಿಕೆಗಳ ಕಟ್ಟನ್ನು ತರುತ್ತಿದ್ದ ಪೇಪರ್ ಅಣ್ಣ. ಸುಧಾ, ಮಂಗಳ, ಬಾಲಮಿತ್ರ, ಚಂದಮಾಮ ಹೀಗೆ ಒಂದೊಂದೇ ಪುಸ್ತಕಗಳನ್ನು ತೆರೆದು ತೆರೆದು ಕೊಡುತ್ತಿದ್ದವನ ಕೈಯ ಕಡೆಗೇ ಗಮನ. ಅದು ಈ ಎಲ್ಲ ಪುಸ್ತಕಗಳ ಮಧ್ಯೆ ತೂರಿಕೊಂಡು ಕೂತ ಮಕ್ಕಳ ಪಾಕ್ಷಿಕ ಮ್ಯಾಗಜಿನ್ ‘ಪುಟಾಣಿ’! ಅದನ್ನು ಬೇಗ ತೆರೆದು ಓದುವಲ್ಲೇ ಸುಖದ ಪಾರಮ್ಯತೆ. ಅದಕ್ಕೆ ಮುಖ್ಯ ಕಾರಣ ಪ್ರತಿ ಹದಿನೈದು ದಿನಕ್ಕೊಮ್ಮೆ ಬರುತ್ತಿದ್ದ ಒಂದು ಎರಡು ಅಪೂರ್ಣ ಕತೆಗಳನ್ನು ಪೂರ್ಣ ಮಾಡುವ ಸ್ಪರ್ಧೆ. ಈ ಪೇಪರ್ ಅಣ್ಣ ನನಗೆ ಪುಟಾಣಿಯನ್ನು ತಂದು ಕೊಡುತ್ತಿದ್ದುದೇ 5 ಅಥವ 6ನೇ ತಾರೀಕು! ಕತೆ ಪೂರ್ಣ ಮಾಡಿ ಕಳಿಸಲು ಇರುವ ಕೊನೆಯ ದಿನಾಂಕ 10. ಕತೆ ಓದಿ ಅಪ್ಪನ ಮನವೊಲಿಸಿ 2 ರೂಪಾಯಿಯ ಎನವಲಪ್ ಕವರ್ ಪಡೆದುಕೊಂಡು ಕತೆಯನ್ನು ಮತ್ತೆ ಮತ್ತೆ ಬರೆದು ಅಕ್ಷರ ಸರಿಪಡಿಸಿ ಕಣ್ಣಿಗೊತ್ತಿಕೊಂಡು ಅಂಚೆ ಡಬ್ಬಕ್ಕೆ ಹಾಕುವಷ್ಟರಲ್ಲಿ ಮುಗೀತು ಕತೆ!

ಪ್ರತಿ 15 ದಿನಕೊಮ್ಮೆ ಇದೇ ಕಾಯುವಿಕೆ. ಪೋಸ್ಟ್ ಮ್ಯಾನ್ ಮತ್ತು ಪೇಪರ್ ಅಣ್ಣನಿಗೆ ಕಾದಷ್ಟು ನಾನು ಜೀವನದಲ್ಲಿ ಯಾರಿಗೂ ಕಾದಿಲ್ಲ! ಡಬ್ಬಕ್ಕೆ ಹಾಕಿದ ಪತ್ರವನ್ನು ಅಂಚೆಯವ ತೆಗೆದುಕೊಂಡು ಹೋಗುವನೋ ಇಲ್ಲವೋ ಎಂದು ಡಬ್ಬದ ಬಳಿಯೇ ನಿಂತು ಕಾದು ನಂಬಿಕೆ ಬರಿಸಿಕೊಂಡದ್ದಿದೆ. ಇನ್ನು ನಾನೇ ಪೂರ್ಣಗೊಳಿಸಿದ್ದ ಕತೆ ಬಹುಮಾನಕ್ಕೆ ಪ್ರಕಟಣೆಗೆ ಆಯ್ಕೆ ಆಯಿತೆ ಎಂದು ಕಾಯುವ ಸಂಭ್ರಮ. ಜೊತೆಗೆ ಹಿತವಾದ ಹಿಂಸೆ ಕೂಡ.
15/20 ಬಾರಿ ನನ್ನ ಬರಹ ಆಯ್ಕೆಯಾಗದೆ ಅಪ್ರಕಟಿತಗೊಂಡಾಗ ನೊಂದದ್ದೂ ಇದೆ. ಪೇಪರಣ್ಣನಿಗೆ ಕೈಮುಗಿದು ಬೇಡಿಕೊಂಡದ್ದಿದೆ. ಪುಟಾಣಿಯನ್ನು 1ನೇ ತಾರೀಕು ತರಲು. ಬಹುಶಃ ನನ್ನ ಕತೆ ಆಯ್ಕೆಯಾಗದಿರಲು ಕಾರಣ ನಿಗದಿತ ದಿನಾಂಕದೊಳಗೆ ತಲುಪದೆ ಇರುವುದು ಎಂದು ಮನವರಿಕೆಯಾಗಿದೆ. ಏಕೆಂದರೆ ಆಯ್ಕೆಯಾದ ಬೇರೆಯವರು ಪೂರ್ಣಗೊಳಿಸಿದ ಕತೆಗಳು ನಾನು ಯೋಚಿಸಿದಂತೆ ಇರುತ್ತಿದ್ದವು. ಆದರೂ ಪ್ರಕಟವಾಗುತ್ತಿರಲಿಲ್ಲ.

ಅಂತೂ ಇಂತೂ ಪೇಪರಣ್ಣ ನನ್ನ ಸಂಕಟ ನೋಡಲಾರದೇ ಖುದ್ದಾಗಿ ಆಸಕ್ತಿವಹಿಸಿ ಬೇಗ ಪುಟಾಣಿ ತಲುಪಿಸಲು ಸಫಲನಾದುದ್ದು, ಅನಂತರ ನಾನು ಪೂರ್ಣಗೊಳಿಸಿದ ಕತೆಗಳು ನಿರಂತರವಾಗಿ ಬರಲು ಆರಂಭವಾದದ್ದು, ಮನೀ ಆರ್ಡರ್ ರಸೀತಿಯಲ್ಲಿ ಸಹಿ ಮಾಡಿ 25 ರೂಪಾಯಿ ಪಡೆದದ್ದು ಎಲ್ಲ ದೊಡ್ಡ ಕಾದಂಬರಿ!

ನನ್ನ ಪ್ರಕಟಿತ ಬರಹದ ಹಾಳೆಯನ್ನು ಸವರಿ ಸವರಿ ನೋಡುವುದು, ಮೂಸುವುದು, ಹೆಸರಿನ ಮೇಲೆ ಬೆರಳಾಡಿಸಿ ಬೆರಗಾಗುವುದು ಭಾರತರತ್ನ ಪಡೆದಂತಹ ಖುಷಿಯಲ್ಲಿ ಮನಿ ಆರ್ಡರ್ ರಸೀತಿಯಲ್ಲಿ ಸಹಿ ಮಾಡಿ 25 ರೂ ಪಡೆಯುವುದು. ಹೇ ಇದು ಪದಗಳು ಸೋಲುವ ಹೊತ್ತು!

———–

vnnವಾಸುದೇವ ನಾಡಿಗ್ ಹುಟ್ಟಿದ್ದು ಶಿವಮೊಗ್ಗ ಜಿಲ್ಲೆಯ ಭದ್ರಾವತಿಯಲ್ಲಿ. ಕುವೆಮಪು ವಿಶ್ವವಿದ್ಯಾಲಯದಿಂದ ಕನ್ನಡ ಸಾಹಿತ್ಯದಲ್ಲಿ ಸ್ನಾತಕೋತ್ತರ ಪದವಿ. ಕೇಂದ್ರ ಸರಕಾರದ ವಸತಿ ಶಾಲೆ ಜವಾಹರ ನವೋದಯ ವಿದ್ಯಾಲಯದಲ್ಲಿ ಕನ್ನಡ ಶಿಕ್ಷಕರಾಗಿದ್ದು, ಪ್ರಸ್ತುತ ಉತ್ತರಪ್ರದೇಶದ ಓರೈನಲ್ಲಿ ವಾಸ. ‘ವೃಷಭಾಚಲದ ಕನಸು’ (ಬೇಂದ್ರೆ ಅಡಿಗ ಕಾವ್ಯ ಪ್ರಶಸ್ತಿ), ‘ಹೊಸ್ತಿಲು ಹಿಮಾಲಯದ ಮಧ್ಯೆ’, ‘ಭವದ ಹಕ್ಕಿ’ (ಮುದ್ದಣ ಕಾವ್ಯ ಪ್ರಶಸ್ತಿ), ‘ವಿರಕ್ತರ ಬಟ್ಟೆಗಳು’, ‘ನಿನ್ನ ಧ್ಯಾನದ ಹಣತೆ’ (ಕಡೆಂಗೋಡ್ಲು ಕಾವ್ಯ  ಪ್ರಶಸ್ತಿ), ‘ಅಲೆ ತಾಕಿದರೆ ದಡ’ ಪ್ರಕಟಿತ ಕವನಸಂಕಲನಗಳು. ಕ್ರೈಸ್ಟ್‌ ಕಾಲೇಜು ಸ್ಪರ್ಧೆ ಮತ್ತು ಪ್ರಜಾವಾಣಿ ದೀಪಾವಳಿ ಕಾವ್ಯಸ್ಪರ್ಧೆಯಲ್ಲೂ ಬಹುಮಾನಿತರು.

Share

2 Comments For "ಆ ಒಬ್ಬನಿಗಾಗಿ ಅದೆಷ್ಟು ಕಾಯುತ್ತಿದ್ದೆ ಗೊತ್ತಾ?
ವಾಸುದೇವ ನಾಡಿಗ್, ನೆಲಮಂಗಲ
"

  1. Pavan kumar kv
    9th December 2016

    ಬರಹ ಓದಿಸಿಕೊಂಡು ಹೋಗುತ್ತದೆ
    ಪವನ ಕುಮಾರ ಕೆ ವಿ ಬಳ್ಳಾರಿ

    Reply
  2. nagarekha
    9th December 2016

    Chennagi moodibandide.
    Nenapugal matu madhur

    Reply

Leave a comment

Your email address will not be published. Required fields are marked *

Recent Posts More

  • 1 week ago No comment

    ನಮ್ಮ ಕಣ್ಣುಗಳೇಕೆ ಭಾರವಾಗುತ್ತಿವೆ?

          ಕವಿಸಾಲು           ತಿರುಕನ ಕನಸಲ್ಲ ನನ್ನದು ತಿರುಕನಲ್ಲ ಕಣ್ರಿ ನಾನು ನಿಮ್ಮ ಮರುಕ ಗಿರುಕ ಎಲ್ಲಾ ನನಗೆ ಹಿಡಿಸಲ್ಲ ಅವ್ರು ಕೋಟೆ ಕಟ್ಟಿ ನ್ಯಾಯ ನೀತಿಗಳ ತಮ್ಮಲ್ಲೆ ಬಚ್ಚಿಟ್ಟು ಒಳಗೆ ಬೆಚ್ಚಗೆ ಕೂತಿರಬಹುದು ನ್ಯಾಯಕ್ಕೆ ಕನ್ನ ಹಾಕೋ ನಾನು ತಿರುಕ ಹೇಗೆ ಆಗಬೇಕು? ತಿರುಕನದೇನೋ ಕನಸಿತ್ತು ನನ್ನದು ಕೂಡಾ ಕನಸೆಂದು ಆ ಕೋಟೆ ಒಳಗಿರುವವರು ಕನವರಿಸುತ್ತಿರಬಹುದು ಬೂದಿ ಮುಚ್ಚಿದ ...

  • 2 weeks ago No comment

    ಕೊಂಕಣಿ ಪ್ರತಿಭೆಯನ್ನರಸಿ ಕರ್ನಾಟಕಕ್ಕೆ ಬಂದ ಪ್ರಶಸ್ತಿ

        ಅತಿಥಿ           ಈ ಬಾರಿ ಕರ್ನಾಟಕವು ಎರಡು ಕೇಂದ್ರ ಸಾಹಿತ್ಯ ಅಕಾಡೆಮಿ ಯುವ ಪುರಸ್ಕಾರಗಳನ್ನು ತನ್ನ ಮಡಿಲಿಗೆ ಹಾಕಿಕೊಂಡಿತು ಎಂದರೆ ಅಚ್ಚರಿಯಾಗಬಹುದು. ಆದರೂ ಇದು ಸತ್ಯ. ಪ್ರಮಾದವೇನಾದರೂ ಆಯಿತೇ? ಒಂದೇ ಪುರಸ್ಕಾರವನ್ನು ಇಬ್ಬರಿಗೆ ಹಂಚಿರಬಹುದೇ? ಎಂದೆಲ್ಲ ಯೋಚಿಸಿ ತಲೆ ಕೆರೆದುಕೊಳ್ಳುತ್ತಿದ್ದೀರಾ? ಇಲ್ಲಿದೆ ನೋಡಿ ಉತ್ತರ. ಕನ್ನಡಕ್ಕೆ 2018ರ ಕೇಂದ್ರಸಾಹಿತ್ಯ ಅಕಾಡೆಮಿಯ ಯುವ ಪುರಸ್ಕಾರ ಘೋಷಣೆಯಾದಾಗಲೇ ಕರ್ನಾಟಕದ ಕೊಂಕಣಿ ಕವಯತ್ರಿ ವಿಲ್ಮಾ ...

  • 2 weeks ago No comment

    ಸಾಹಸದ ಆ ನಿಮಿಷಗಳು

            ಮೊದಲ ಬಾರಿಯಾದ್ದರಿಂದ ಕೆಲವೇ ನಿಮಿಷಗಳ ಈ ಜಿಗಿತದ ರೋಚಕತೆ ಒಂದು ತಿಂಗಳ ಕಾಲ ನನ್ನನ್ನು ಆವರಿಸಿದ್ದು ಸುಳ್ಳಲ್ಲ.         ಬ್ಯಾಂಕರುಗಳು, ಅಕೌಂಟೆಂಟುಗಳು ವರ್ಷದ ಮೊದಲಿಂದ ಹಿಡಿದು ಮಾರ್ಚಿ ತಿಂಗಳವರೆಗೆ ಭಾರೀ ಬ್ಯುಸಿಯಾಗುವಂತೆ ಇಂಗ್ಲೆಂಡಿನ ಸರ್ಕಾರೀ ದಂತ ವೈದ್ಯಕೀಯ ರಂಗದಲ್ಲೂ ಧಾವಂತ ಕಾಣಿಸಿಕೊಳ್ಳುತ್ತದೆ. ಸರ್ಕಾರದಿಂದ ಗುತ್ತಿಗೆ ಪಡೆದ ಕೆಲಸವನ್ನು ಮಾರ್ಚಿಯ ಕೊನೆಗೆ ಪೂರ್ತಿಗೊಳಿಸದಿದ್ದರೆ ಮುಂದಿನ ವರ್ಷದ ಕಾಂಟ್ರಾಕ್ಟ್ ನ್ನು ಕಳೆದುಕೊಳ್ಳುವ ...

  • 3 weeks ago No comment

    ಪ್ರಸಾದ್ ಪಟ್ಟಾಂಗ | ಫಿಫಾ ಫಿವರ್

    ಅಂದು ಎಲ್ಲರ ಕಣ್ಣುಗಳೂ ಬೇರೇನನ್ನೋ ದಿಟ್ಟಿಸುತ್ತಿದ್ದವು. ಅದೊಂದು ಸುಂದರ ರೆಸ್ಟೊರೆಂಟ್. ಆವರಣದ ಒಳಗೂ ಹೊರಗೂ ಬಂದವರಿಗೆ ಕುಳಿತುಕೊಳ್ಳಲು ಸಾಕಷ್ಟು ಜಾಗವಿರುವಂಥದ್ದು. ಜೊತೆಗೇ ಒಂದು ಪುಟ್ಟ ಮೈದಾನದಂತಿರುವ ಜಾಗವನ್ನೂ, ಈಜುಕೊಳವನ್ನೂ ಹೊಂದಿರುವ ಸುಸಜ್ಜಿತ ರೆಸ್ಟೊರೆಂಟ್. ನಾನು ಪ್ರತೀ ತಿಂಗಳು ಲುವಾಂಡಾಗೆ ಬಂದಿಳಿದಾಗಲೆಲ್ಲಾ ಇಲ್ಲಿಯ ಸಿಬ್ಬಂದಿಯೇ ನನಗೆ ಅನ್ನದಾತರು. ಹೀಗಾಗಿ ಎಲ್ಲೆಲ್ಲೂ ನನಗೆ ಪರಿಚಿತ ಮುಖಗಳೇ. ಅಂದು ಮಾತ್ರ ಸಿಬ್ಬಂದಿಯೊಬ್ಬ ಗಡಿಬಿಡಿಯಲ್ಲಿ ನನ್ನ ಆರ್ಡರ್ ಬರೆದುಕೊಂಡು ಅಷ್ಟೇ ಅವಸರದಲ್ಲಿ ಖಾದ್ಯಗಳನ್ನು ತಂದಿಟ್ಟು ...

  • 4 weeks ago No comment

    ಸವಿತಾ ನಾಗಭೂಷಣ ಪ್ರವಾಸ ಕಥನ | ದಾರಿಯೇ ದೈವ… ವೈಷ್ಣೋದೇವಿ

    ಪ್ರವಾಸಿ ಸವಿತಾ ಕಂಡ ಇಂಡಿಯಾ   ಇದು ನಾನು 2011ರ ಮಾರ್ಚ್ ತಿಂಗಳಲ್ಲಿ ನನ್ನ ಕೆಲ ಗೆಳತಿಯರೊಂದಿಗೆ ಒಂದು ಜನಸಾಮಾನ್ಯರ ಸಮೂಹದೊಂದಿಗೆ ಸಾಮಾನ್ಯ ದರ್ಜೆಯ ರೈಲು ಪ್ರಯಾಣದ ಮೂಲಕ ಕೈಗೊಂಡ ಭಾರತ ಯಾತ್ರೆಯ ಸಂದರ್ಭದಲ್ಲಿ ಮಾಡಿಕೊಂಡ ಟಿಪ್ಪಣಿಗಳನ್ನು ಆಧರಿಸಿ ಬರೆದ ಪುಟ್ಟ ಪ್ರವಾಸ ಕಥನ. ಇದು ಈಗಾಗಲೇ 12 ಭಾಗಗಳಲ್ಲಿ ಡಿ ಎಸ್ ನಾಗಭೂಷಣ ಅವರ ಸಂಪಾದಕತ್ವದ ‘ನವ ಮಾನವ’ ಸಮಾಜವಾದಿ ಮಾಸಿಕದ (ಈ ಪತ್ರಿಕೆ ನವೆಂಬರ್ 2011ರ ...


Editor's Wall

  • 11 May 2018
    2 months ago No comment

    ಕಾಂಗ್ರೆಸ್ ನಾಯಕರು ಜೈಲಲ್ಲಿ ಭಗತ್ ಸಿಂಗ್ ಭೇಟಿಯಾಗಿರಲಿಲ್ಲವಾ?

    ಭಾರತದ ಪ್ರಥಮ ಪ್ರಧಾನಿ ಜವಾಹರಲಾಲ್ ನೆಹರೂ ಅವರ ಆತ್ಮಚರಿತ್ರೆಯಲ್ಲಿಯೇ, ಅವರು ಭಗತ್ ಸಿಂಗ್ ಭೇಟಿಯಾಗಿದ್ದರೆಂಬುದರ ಕುರಿತ ವಿವರ ಸಿಗುತ್ತದೆ. “ಭಾರತದ ಸ್ವಾತಂತ್ರ್ಯಕ್ಕಾಗಿ ಹೋರಾಡಿದ್ದ ಭಗತ್ ಸಿಂಗ್, ಬಟುಕೇಶ್ವರ್ ದತ್, ವೀರ್ ಸಾವರ್ಕರ್ ಜೈಲಿನಲ್ಲಿದ್ದಾಗ ಅವರನ್ನು ಯಾರಾದರೊಬ್ಬ ಕಾಂಗ್ರೆಸ್ ನಾಯಕರು ಹೋಗಿ ಕಂಡಿದ್ದರಾ? ಆದರೆ ಕಾಂಗ್ರೆಸ್ ನಾಯಕರು ಭ್ರಷ್ಟನೊಬ್ಬ ಜೈಲಿನಲ್ಲಿದ್ದರೆ ಅವನನ್ನು ನೋಡಲು ಹೋಗುತ್ತಾರೆ” ಎಂದು ಪ್ರಧಾನಿ ನರೇಂದ್ರ ಮೋದಿ ಕರ್ನಾಟಕದ ಚುನಾವಣೆ ಪ್ರಚಾರ ಸಭೆಯಲ್ಲಿ ವಾಗ್ದಾಳಿ ನಡೆಸಿದ್ದರು. ಬ್ರಿಟಿಷ್ ...

  • 10 May 2018
    2 months ago No comment

    ಒಂದು ಪುಸ್ತಕ; ವಾರವಿಡೀ ಬಿಡುಗಡೆ!

    ಪುಸ್ತಕವೊಂದನ್ನು ಪ್ರಕಟಿಸಿದ ಬಳಿಕ ಅದರ ಬಿಡುಗಡೆ ಕಾರ್ಯಕ್ರಮವೂ ಕಡ್ಡಾಯವೆಂಬಂಥ ಕಾಲವಿತ್ತು. ಈಗಲೂ ಇಲ್ಲವೆಂದಲ್ಲ. ಆದರೆ ಸಾವಿರ, ಲಕ್ಷದ ಲೆಕ್ಕದಲ್ಲಿ ಹಣ ಸುರಿದು ವ್ಯವಸ್ಥೆ ಮಾಡುವ ಬಿಡುಗಡೆ ಕಾರ್ಯಕ್ರಮವು ಒಂದು ಪುಸ್ತಕದ ಕುರಿತ ಮಾತಿಗೆ ಬೇಕಾದ ಆಪ್ತ ವಾತಾವರಣವನ್ನು ಕಟ್ಟಿಕೊಡುತ್ತದೆಯೇ? ದುಡ್ಡಿನ ವಿಚಾರಕ್ಕಿಂತ ಹೆಚ್ಚಾಗಿ ಕಾರ್ಯಕ್ರಮ ಆಯೋಜನೆ ಬೇಡುವ ಶ್ರಮ ಬಹಳ ದೊಡ್ಡದು. ಹಾಲ್ ಬುಕ್ ಮಾಡಬೇಕಾದಲ್ಲಿಂದ ಹಿಡಿದು, ಅತಿಥಿಗಳನ್ನು ಗೊತ್ತುಮಾಡುವುದು, ಅವರಿಗೆಲ್ಲರಿಗೂ ಹೊಂದುವಂತೆ ದಿನಾಂಕ ನಿಗದಿಪಡಿಸುವುದು, ಆಮಂತ್ರಣ ಪತ್ರಿಕೆ ಪ್ರಕಟಿಸುವುದು, ...

  • 03 May 2018
    3 months ago No comment

    ಕಾದಂಬಿನಿ ಕಾಲಂ | ಏನಿಲ್ಲದಿದ್ದರೂ ಬದುಕು ದೂಡಬೇಕು

                      ಆಗೆಲ್ಲ ತಪಸ್ಸು ಮಾಡುವ, ದೇವರು ಪ್ರತ್ಯಕ್ಷವಾಗುವ ಮತ್ತು ಕೇಳಿದ ವರ ಕೊಡುವ ಕಥೆಗಳು ಮಸ್ತು ಚಾಲ್ತಿಯಲ್ಲಿದ್ದ ಕಾರಣ ನಾನು ದೇವರನ್ನು ಕಾಣುವ ಹಟಕ್ಕೆ ಬಿದ್ದು ತಪಸ್ಸು ಮಾಡುತ್ತಿದ್ದೆ.   ನನ್ನ ಜೊತೆ ಇವೆಲ್ಲ ಯಾವ ಕಾರಣಕ್ಕೆ ಘಟಿಸಿತ್ತೋ ಅರಿಯೆ. ಬಾಲ್ಯದಲ್ಲಿ ನಮ್ಮ ಮನೆಗೆ ನೆರೆಮನೆಯ ಒಬ್ಬ ಹೆಂಗಸು ಬರುತ್ತಿದ್ದರು. ಮೂಕಕ್ಕ ಎಂದು ಅವರನ್ನು ಎಲ್ಲರೂ ಕರೆಯುತ್ತಿದ್ದುದು. ...

  • 30 April 2018
    3 months ago No comment

    ಅತ್ಯಾಚಾರ, ಹೋರಾಟದ ಐದು ವರ್ಷಗಳು ಮತ್ತು ಆ ಪುಟ್ಟ ಗೂಡು

    ತನ್ನ ಬದುಕಿನ ಅಮೂಲ್ಯ ಘಳಿಗೆಯೇ ಇಂಥದೊಂದು ಘಟನೆಗೆ ಬಲಿಯಾದ ಆಘಾತದಲ್ಲಿರುವ ಆಕೆ ಒಮ್ಮೆ ಗೆಲುವಾದವಳಂತೆ ಕಂಡರೂ ಮತ್ತೆ ಗಂಭೀರಳಾಗುತ್ತಾಳೆ. ಎಷ್ಟು ಬೇಕೋ ಅಷ್ಟೇ ಮಾತು. ಕಟ್ಟಿಕೊಂಡಿದ್ದ ಕನಸೂ ಒಡೆದುಹೋಗಿದೆ.   ಅನ್ಯಾಯದ ವಿರುದ್ಧದ ಹೋರಾಟ, ಸಮಾಜದೆದುರು ದೊಡ್ಡ ಮನುಷ್ಯನಂತೆ ಕಾಣಿಸಿಕೊಳ್ಳುವ ಮುಖವಾಡ ತೊಟ್ಟುಕೊಂಡ ಮತ್ತು ಸಾಧ್ಯವಿರುವಷ್ಟೂ ವಾಮಮಾರ್ಗಗಳಿಂದ ಎಲ್ಲರನ್ನೂ ಎಲ್ಲವನ್ನೂ ನಿಯಂತ್ರಣದಲ್ಲಿಟ್ಟುಕೊಳ್ಳಬಲ್ಲಂಥ ಅತ್ಯಂತ ಬಲಿಷ್ಠ ದುಷ್ಟನೊಬ್ಬನನ್ನು ಎದುರುಹಾಕಿಕೊಳ್ಳುವ ದಿಟ್ಟತನ ಹೇಗೆ ಅಗಾಧ ಸಾಗರದ ನಟ್ಟ ನಡುವಿನ ಒಂದು ಸಣ್ಣ ...

  • 28 April 2018
    3 months ago No comment

    ಮೈಬಣ್ಣವೆಂಬ ಮಾನದಂಡ ಮತ್ತು ‘ವಿಪ್ಲವ’ ಮನಃಸ್ಥಿತಿಯ ರಾಜಕಾರಣ

    ಈ ‘ವಿಪ್ಲವ’ ಮನಃಸ್ಥಿತಿ ಅಧಿಕಾರಸ್ಥವಾದುದಾಗಿದೆ. ದೇವರು, ಧರ್ಮದ ಹೆಸರಲ್ಲಿ ಒಡೆಯುವುದನ್ನು ತನ್ನ ಪರಮೋನ್ನತಿ ಎಂಬಂತೆ ಭ್ರಮಿಸುವ ಈ ಕುರೂಪವು ಮನುಷ್ಯರ ಮೇಲೆ ಮನುಷ್ಯರನ್ನು ಎತ್ತಿಕಟ್ಟುತ್ತದೆ. ಹೆಣ್ಣಿನ ಮೇಲೆ ಹೆಣ್ಣನ್ನೇ ಅಸ್ತ್ರವಾಗಿ ಪ್ರಯೋಗಿಸುವ ಹುನ್ನಾರಗಳ ಮೂಲಕ, ನಿಜವಾದ ಸೌಂದರ್ಯವನ್ನು ನಾಶಗೈಯುತ್ತಿದೆ. 21 ವರ್ಷಗಳ ಕೆಳಗೆ ಅಂದರೆ 1997ರಲ್ಲಿ ವಿಶ್ವಸುಂದರಿ ಪಟ್ಟ ಗೆದ್ದ ಡಯಾನಾ ಹೇಡನ್ ಮೈಬಣ್ಣದ ಬಗ್ಗೆ ಅತಿ ಕೀಳು ಅಭಿರುಚಿಯಿಂದ ಮಾತನಾಡಿದ ತ್ರಿಪುರಾ ಮುಖ್ಯಮಂತ್ರಿ ವಿಪ್ಲವ್ ಕುಮಾರ್ ದೇವ್ ...