Share

ಪುರುಷ ವ್ಯವಸ್ಥೆಯನ್ನು ಪ್ರಶ್ನಿಸುವ ಅವಳ ಕವಿತೆ
ನಾಗರಾಜ್ ಹರಪನಹಳ್ಳಿ

ಪುಸ್ತಕ ಪರಿಚಯ

————–

ಅವಳ ಕವಿತೆ (2015-16)
ಸಂ: ಡಾ.ಸಬಿತಾ ಬನ್ನಾಡಿ
ಪ್ರ: ಕವಿ ಪ್ರಕಾಶನ, ಕವಲಕ್ಕಿ, ಹೊನ್ನಾವರ
ಬೆಲೆ: ರೂ.140/-

ನ್ನಡ ಕಾವ್ಯ ಯಾವ ಹಾದಿಯಲ್ಲಿದೆ ಎಂಬುದನ್ನು ಮನಗಾಣಬೇಕಾದರೆ ಅವಳ ಕವಿತೆ 2015-16 ಪುಸ್ತಕವನ್ನು ಒಮ್ಮೆ ಆವಲೋಕಿಸಬೇಕು. 2017ರಲ್ಲಿ ಬಿಡುಗಡೆಯಾದ ಈ ಕವಿತಾ ಸಂಕಲನದಲ್ಲಿ ಕನ್ನಡ 56 ಕವಯತ್ರಿಯರ 112 ಕವಿತೆಗಳಿವೆ. ಮುಂಬಯಿನಲ್ಲಿರುವ ಕನ್ನಡ ಕವಯತ್ರಿಯರ ಕವಿತೆಗಳು ಇಲ್ಲಿವೆ. ಮಹಿಳಾ ಕಾವ್ಯವನ್ನು ಸಂಗ್ರಹಿಸಿರುವ ಡಾ.ಸಬಿತಾ ಬನ್ನಾಡಿ ಅವರು ಮಹಿಳಾ ಕಾವ್ಯದ ಸೂಕ್ಷ್ಮಗಳನ್ನು ಕುರಿತು ಬರೆದಿರುವ ಮುನ್ನುಡಿ ಇಲ್ಲಿನ ಕವಿತೆಗಳನ್ನು ಅರ್ಥ ಮಾಡಿಕೊಳ್ಳಲು ದಾರಿಯೊಂದನ್ನು ತೆರೆದಿಡುತ್ತದೆ. ಪುರುಷ ಪ್ರಧಾನ ವಿಮರ್ಶೆಯ ನೆಲೆಯನ್ನು ಧಿಕ್ಕರಿಸಿ ಮಹಿಳೆ ತನ್ನಷ್ಟಕ್ಕೆ ತಾನು ಬರೆದು ತನ್ನ ನೆಲೆಯನ್ನು ವಿಸ್ತರಿಸಿಕೊಂಡಿರುವ ಬಗೆ, ಮಹಿಳಾ ಕಾವ್ಯದ ಇತಿಹಾಸ ಇಲ್ಲಿದೆ. ಕಾವ್ಯ ವರ್ತಮಾನಕ್ಕೆ ಮುಖಾಮುಖಿಯಾಗಬೇಕು. ಭೂತವನ್ನು ಮುರಿದು ಕಟ್ಟಬೇಕು. ಭವಿಷ್ಯದ ದಾರಿಯನ್ನು ಸಹ ಸಾಧ್ಯವಿರುವಷ್ಟು ಮಟ್ಟಿಗೆ ಈಗಲೂ ಪುರುಷ ಪ್ರಧಾನ ವ್ಯವಸ್ಥೆ ಮಹಿಳೆಗೆ ನಿರಾಕರಿಸುತ್ತಲೇ ಬಂದಿದೆ. ನಿರ್ಲಕ್ಷಿಸಲ್ಪಡುತ್ತಿರುವ ಮಹಿಳೆ, ಅದರಲ್ಲೂ ಉದ್ಯೋಗಸ್ಥ ಅಕ್ಷರಸ್ಥ ಮನಸ್ಸು; ಕಾವ್ಯದ ಮೂಲಕ ಒಂದು ಸ್ಥಾಪಿತ ವ್ಯವಸ್ಥೆಯನ್ನು ದಾಟುವ ಬಗೆಗಳು ಇಲ್ಲಿವೆ. ಇಲ್ಲಿನ ಕವಿತೆಗಳ ಆಲೋಚನಾ ಕ್ರಮವೇ ಕ್ರಾಂತಿಕಾರಕವಾಗಿದೆ. ವಚನ ಚಳುವಳಿಯ ಮರುಹುಟ್ಟು ಇಲ್ಲಿನ ಕವಿತೆಗಳಲ್ಲಿದೆ. ಕನ್ನಡ ಕಾವ್ಯ ಲೋಕದ ಮಹಿಳಾ ಬರಹಗಾರ್ತಿಯರ ಕವಿತೆಗಳನ್ನು ಸಂಗ್ರಹಿಸಿರುವ ಡಾ.ಸಬಿತಾ ಬನ್ನಾಡಿ ಅವರ ಮಾತನ್ನೇ ಇಲ್ಲಿ ಉಲ್ಲೇಖಿಸುವುದಾದರೆ; ಕವಿತೆ ಹೆಣ್ಣಿನ ಭಾಷೆ. ಒಡಲ ಹಾಡು ಮತ್ತು ಮಡಿಲ ಮಗು ಬೇರೆಬೇರೆಯೇನಲ್ಲ. ತನ್ನ ಬದುಕನ್ನು ತಾನೇ ಕಟ್ಟಿಕೊಳ್ಳಲು ನಿರಾಕರಿಸಲಾದ ಕಾಲದಿಂದಲೂ ಹೆಣ್ಣು ತನ್ನ ಕನಸುಗಳನ್ನು ತನ್ನ ಹಾಡುಗಳ ಮರೆಯಲ್ಲಿ ಕಾಪಿಟ್ಟುಕೊಂಡಿದ್ದಾಳೆ.

ಅವಳನ್ನು ವಿವರಿಸುವ ಕೆಲಸವನ್ನು ಅವನೇ ಮಾಡಿದ ಕಾಲವನ್ನು, ಮಿತಿಯನ್ನು ಮುರಿದು ಹಾಕುವ ಈ ಸಂಕಲನದ ಬಹುತೇಕ ಕವಿತೆಗಳು ‘ಅವನನ್ನು ವಿವರಿಸುವ ಅವಳು’ ಅವನನ್ನು ಗ್ರಹಿಸುವ ಬಗೆ ಇಲ್ಲಿನ ಕವಿತೆಗಳಲ್ಲಿ ಕಾಣಸಿಗುತ್ತದೆ. ಕನ್ನಡ ಸಮಾಜದಲ್ಲಿ ಸೂಕ್ಷ್ಮ ಮನಸ್ಸಿನ ಮಹಿಳೆಯ ಆಲೋಚನಾ ಕ್ರಮ ಮತ್ತು ಬಂಡಾಯ ಹಾಗೂ ಪ್ರತಿಭಟನೆ, ಸ್ವಗತ ಸಹ ಕನ್ನಡ ಕಾವ್ಯದಲ್ಲಿ ಹೇಗಿದೆ ಎಂಬುದು ಒಂದೆಡೆ ಸಿಗುವ ವೈವಿಧ್ಯತೆ ಇಲ್ಲಿ ಓದುಗನಿಗೆ ದಕ್ಕುತ್ತದೆ. ಇದು ಕನ್ನಡ ಅಭಿವ್ಯಕ್ತಿ ಕ್ರಮ ಎಂದು ಪುರುಷ ಪ್ರಭಾವದ ವಿಮರ್ಶಾ ಲೋಕ ಇತಿಹಾಸದಲ್ಲಿ ಒಪ್ಪಿಕೊಳ್ಳಲೇಬೇಕಾದ ಸತ್ಯದ ದಾಖಲೆ ಈ ಕಾವ್ಯ ಸಂಗ್ರಹವಾಗಿದೆ.

ಮೊದಲ ಓದಿಗೆ ದಕ್ಕಿದ್ದನ್ನು ಇಲ್ಲಿ ಪ್ರಸ್ತಾಪಿಸುವುದಾದರೆ ಕನ್ನಡ ಮಹಿಳಾ ಕಾವ್ಯಕ್ಕೆ ಪ್ರತಿಭಾ ನಂದಕುಮಾರ್ ಮತ್ತು ಲಲಿತಾ ಸಿದ್ಧಬಸವಯ್ಯ ಅವರ ಕವಿತೆಗಳು ಸ್ಪಷ್ಟವಾಗಿ ಎರಡು ವಿಭಿನ್ನ ನೆಲೆಗಳನ್ನು ಕಟ್ಟಿಕೊಡುತ್ತವೆ. ಪ್ರತಿಭಾ ಅವರು ನಗರ ಭಾರತವನ್ನು ಕಟ್ಟಿಕೊಟ್ಟರೆ, ಲಲಿತಾ ಸಿದ್ಧಬಸವಯ್ಯ ಅವರು ಗ್ರಾಮೀಣ ಭಾರತವನ್ನು ನಮ್ಮ ಮುಂದಿಡುತ್ತಾರೆ. ಆಧುನಿಕ ಕನ್ನಡವನ್ನು ಮಡಿವಂತಿಕೆಯ ಚೌಕಟ್ಟು ಮುರಿದು ಕವಿತೆಯಲ್ಲಿ ಒಬ್ಬರು ದಾಖಲಿಸಿದರೆ, ಲಲಿತಾ ಅವರು ಆಡು ಭಾಷೆಯನ್ನು, ಗ್ರಾಮೀಣ ಕನ್ನಡವನ್ನು ದಾಖಲಿಸುತ್ತಾರೆ. ಇವರಿಬ್ಬರ ಕಾವ್ಯದಲ್ಲಿ ಕ್ರಮವಾಗಿ ಅಕ್ಷರಸ್ಥ ಲೋಕ, ಅನಕ್ಷರಸ್ಥ ಲೋಕ, ಮನಸ್ಸಿನ ವ್ಯಾಪಾರ ಮತ್ತು ನೆಲದ ಕನಸು ಮತ್ತು ಕಸುವನ್ನು, ಶೋಷಣೆಯ ಸಂಘರ್ಷವನ್ನು ಕವಿತೆಯಲ್ಲಿ ದಾಖಲಿಸುವ ಪರಿ ಅಚ್ಚರಿ ಮೂಡಿಸುತ್ತದೆ.

ಪ್ರತಿಭಾ ನಂದಕುಮಾರ್ ಅವರ ಕವಿತೆ ಗಮನಿಸಿ: ನಾವು ಕಚ ಕುಚಗಳ ಬಗ್ಗೆ ಬರೆಯಬಾರದು, ನೀವು ಅದನ್ನು ವಿರೂಪಗೊಳಿಸಬಹುದು!
ನಾವು ತೊಡೆ ಜಘನ ನಾಭಿ ಸ್ಥಳಗಳನ್ನು ಕಾಣಿಸಬಾರದು
ನೀವದನ್ನು ಅತಿಕ್ರಮಿಸಿ ಸ್ಥಾಪಿತರಾಗಬಹುದು
ನಾವು ಯೋನಿಗೆ ಅಪಚಾರವಾಗದಂತೆ ಕಾಯ್ದಿರಿಸಿಕೊಳ್ಳಬೇಕು
ನೀವದರ ಅತ್ಯಾಚಾರಕ್ಕೆ ಸದಾ ಹಾತೊರೆಯಬಹುದು!…. (ನಾವು ಕಚ ಕುಚಗಳ ಬಗ್ಗೆ ಬರೆಯಬಾರದು)

ಹೀಗೆ ಶಬ್ದಶೀಲ ಚೌಕಟ್ಟನ್ನು ಮುರಿದು ಬಂಡೇಳುವ ಗುಣವೇ ಆಕರ್ಷಕವೂ, ಕಾಲದ ಅನಿವಾರ್ಯತೆಯೂ ಆಗಿದೆ. ಶಬ್ದ ಮತ್ತು ಭಾಷಾರ್ಥಗಳ ಬಳಕೆಯ ಹೊಳಹು, ಓದುಗರಲ್ಲಿ ಹುಟ್ಟಿಸುವ ಕೆಚ್ಚು ಕಾವ್ಯದ ಶಕ್ತಿಯನ್ನು ಇಮ್ಮಡಿಸುವ ಪರಿ ಅನನ್ಯವಾದುದು. ಲಲಿತಾ ಸಿದ್ಧಬಸವಯ್ಯ ಅವರು ಕಥನ ಕಾವ್ಯದ ಶೈಲಿಯಲ್ಲಿ ಬದುಕನ್ನು ಸತ್ವಯುತ ಗ್ರಾಮದ ಕಡೆಗೆ ಎಳೆದೊಯ್ಯುವ ತುಡಿತ ಸಹ ಕಾವ್ಯ ಓದುಗರಲ್ಲಿ ಉಳಿಯುವಂತಹದ್ದು. “ಏನ್ ಬೇವರ್ಸಿ ಊರೇ ಇದು ನಂ ಬಾಸೆ ಆಡೋ ಒಂದ್ ನಾಯ್ಕುನ್ನಿ ಸೈತ ಇಲ್ಲ” ನಗರದ ಜೊತೆಗಿನ ಸಂಘರ್ಷ ಸಹ ಅವರ ಕಾವ್ಯದ ಕಸುವನ್ನು ದಾಖಲಿಸುತ್ತದೆ.

ಇನ್ನು ಈ ಸಂಗ್ರಹದಲ್ಲಿನ ಡಾ. ಅನುಪಮಾ ಎಚ್.ಎಸ್. ಅವರ ‘ಕುದಿ’ ಕವಿತೆ. ಈ ಕವಿತೆಯಲ್ಲಿ ಬರುವ ನೀರು, ಒಲೆ, ಕುದಿ, ಬೆಂಕಿ, ಪಾತ್ರೆ, ಒಲೆ ಸುಡುವುದು ಹೆಣ್ಣಿನ ಚರಿತ್ರೆಯನ್ನೇ ದಾಖಲಿಸುತ್ತವೆ. ‘ದೇವರು ಕಾಡಿನಲ್ಲಿ ಮೂಕ ಬಾಲಕಿಯ ಬಿಕ್ಕು’ ಕವಿತೆಯಲ್ಲಿ ಸಹ ಮಾನವ ಸಂತತಿ ಅಯೋನಿಜವಾಗಲಿ ಎಂಬ ಕವಿತೆಯ ಕೊನೆಯ ಸಾಲು ಹೆಣ್ಣಿನ ನಿಟ್ಟುಸಿರೇ ಆಗಿದೆ. ಕವಯತ್ರಿ ಡಾ.ಅನುಸೂಯ ಕಾಂಬ್ಳೆ ಕೃಷ್ಣನನ್ನು ವಿಡಂಬಿಸುವ ಪರಿ “ಸೀರೆ ಕದ್ದವನು ನೀನೆ” ಕವಿತೆಯಲ್ಲಿ ವ್ಯಂಗ್ಯವಾಗಿ ಬಂದಿದೆ. ಹಾಗೂ ದೇಹ ಮನಸುಗಳ ನಡುವೆ ಕವಿತೆಯಲ್ಲಿ ಜಾನಪದ ಹಾಡಿನ ದಾಟಿಯಲ್ಲಿ ಶೋಷಣೆಯನ್ನು ಪ್ರಜೆಂಟ್ ಮಾಡುವ ಕ್ರಮವನ್ನು ಕಾಣಬಹುದಾಗಿದೆ.

ಮಾಲತಿ ಎಸ್.ಸಾಗರ ಅವರ ಇಲ್ಲದ ದೇವರು ಕವಿತೆ ಆಶಯ ಅದ್ಭುತವಾಗಿದೆ. ಆದರೆ ಕವಿತೆ ವಾಚ್ಯ ಎನಿಸಿದೆ. ಹೇಗೆ ಹೇಳಬೇಕೆಂಬುದು ಮುಖ್ಯವಲ್ಲ, ಏನನ್ನು ಮಹಿಳೆ ಹೇಳಬೇಕಾಗಿದೆ ಎಂಬುದೇ ಮುಖ್ಯ ಎಂದು ಸವಿತಾ ಬನ್ನಾಡಿ ಅವರ ವಾದವನ್ನು ಇಟ್ಟು ಇಲ್ಲಿನ ಕವಿತೆಗಳನ್ನು ಗಮನಿಸಿದರೆ ಅಭಿವ್ಯಕ್ತಿ ಕ್ರಮಕ್ಕಿಂತ ಮಹಿಳಾ ಕಾವ್ಯ ಏನನ್ನು ಹೇಳಹೊರಟಿದೆ ಎಂಬ ನೆಲೆಯಲ್ಲಿ ಗ್ರಹಿಸಿದರೆ ಕವಿತೆಗಳ ವಸ್ತು ಮುಖ್ಯ, ಅಭಿವ್ಯಕ್ತಿಯ ಕ್ರಮವಲ್ಲ ಎನ್ನಬಹುದು. ಕನ್ನಡ ಮಹಿಳಾ ಕಾವ್ಯದ ತೀರಾ ಮುಖ್ಯ ಧಾರೆಯೊಂದು ಇಲ್ಲಿ ದಾಖಲಾಗಿದೆ. ಮಾಲತಿ ಪಟ್ಟಣಶೆಟ್ಟಿ ಅವರ ‘ವಿಧವೆ ಎಂಬ ಶಬುದ ಹೊರಲಾರೆ’ ಕವಿತೆ ಗಮನ ಸೆಳೆವ ಕವಿತೆಯಾಗಿದೆ.

ಈ ಮಥುರೆಯಲ್ಲಿ
ಇಂದಿಗೂ ನಿನ್ನ ಹೆಸರು ಹೇಳಿಕೊಂಡು
ಭಿಕ್ಷೆ ಬೇಡುತ್ತಿರುವ ವಿಧವೆಯರು ನಾವು
ಈ ನಿನ್ನ ಮೃಗನಯನಿಯರು
ಕಾಲವ್ಯಾಘ್ರನ ದವಡೆಗೆ ಸಿಕ್ಕ ಮೃಗ!
ರಾಸಕ್ರೀಡೆಯ ರಸಿಕತೆಯಲ್ಲಿ ತೊಯ್ದವರು
ಇಂದು ಧನ್ಯತೆಯ ಪಾತಾಳದಲ್ಲಿ ನೀರಾದ ನೀರೆಯರು?
ಮಥುರೆಯ ಬೀದಿ ಬೀದಿ ನಿನ್ನನರಸುತ್ತ
ತೊಟ್ಟಿಯೆಂಜಲು ಪ್ರಸಾದವೆಂದು ತಿಂದು
ಭಕ್ತರ ಕಾಲಕಸದಲ್ಲೇ ದಿನನೂಕುತ್ತ
ಬೀದಿಗೆ ಬಿದ್ದ ದರವೇಸಿಗಳು! (ವಿಧವೆಯೆಂಬ ಶಬುದ ಹೊರಲಾರೆ)

‘ಒಮ್ಮೆ ನಕ್ಕುಬಿಡು’ ಎನ್ನುವ ಮಮತಾ ಅರಸಿಕೇರಿ ಅವರ ನವಿರು ಭಾವದ ಕವಿತೆ ಸಹ ಕಠೋರ ಕಾವ್ಯದ ನಡುವೆ ತಣ್ಣಗೆ ಹರಿವ ಝರಿಯಂತಿದೆ. ಬಿ.ಟಿ.ಲಲಿತಾ ನಾಯ್ಕ ಅವರ ‘ಪಣತಿ’ ಕವಿತೆಯ ಆಶಯ ಮತ್ತು ಜಾನಪದ ಶೈಲಿ ಸೊಗಸಾಗಿದೆ. ಕಾವ್ಯಶ್ರೀ ಅವರ ‘ಯಯಾತಿಯ ಇತ್ತ ಕಳುಹಿ’ ಕವಿತೆಯಲ್ಲಿ ಸಂಪ್ರದಾಯ ಮೀರುವ ಹಂಬಲವಿದೆ. ಅಕ್ಷತಾ ಹುಂಚದಕಟ್ಟೆ ಅವರ ‘ನನ್ನ ಸಾವು’ ಕವಿತೆ ಹೊಸತನದಿಂದ ಕೂಡಿದೆ. ದೀಪಾ ಗಿರೀಶ್ ಅವರ ‘ಹೊಕ್ಕಳ ಬಾಧೆ’ ಕವಿತೆ ಹೆಣ್ಣಿನ ಸ್ಥಿತಿಯ ಸಂಘರ್ಷವನ್ನು ಕಟ್ಟಿಕೊಟ್ಟಿದೆ.

ಈ ಸಂಕಲನದಲ್ಲಿ ನಳಿನಾ ಡಿ ಅವರ ‘ಅತ್ತರಿನ ಪ್ರೀತಿ’ ಕವನ ತುಂಬಾ ಪ್ರಮುಖ ಕವನ:

ಸಾಬರ ಹುಡಗನ
ಕಣ್ಣಲ್ಲಿ
ಪ್ರೀತಿ ಕಾಣಬಾರದಾಗಿ
ಸುತ್ತಲು ಹರಡುವ ಅತ್ತರಿನ ಘಮಲು
ಮುಂಜಾನೆಯ ಅಲ್ಹಾಹುವಿನ ಪ್ರಾರ್ಥನೆಗೆ
ಓಗೊಡುವ ಒಳಮನಸು…(ಅತ್ತರಿನ ಪ್ರೀತಿ)

ಹಾಗೆಯೇ ರಜಿಯಾ ಡಿ.ಬಿ. ಅವರ ಕವಿತೆ ತಿಳಿಯದವಳು …
ದ್ವಂದ್ವ ನೀತಿಗಳ ಧರ್ಮ ಆಕೆಗೆ ತಿಳಿದಿರಲಿಲ್ಲ/ಹೀಗಾಗಿ ಆಕೆ ದೀಪ ಧೂಪ/ಗಂಟೆ ಆರತಿಗಳನ್ನು/ ನೋಡುತ್ತಾ ಬೆಳೆದಳು/ನಾಗರ ಪಂಚಮಿಗೆ ಹಾಲು ಎರೆದು/ಯುಗಾದಿಯಂದು ಬೇವು ಬೆಲ್ಲ/ ಹದವಾಗಿ ಬೆರೆಸುತ್ತಾ/ ಬದುಕಿನ ಪಾಠವ ಪಾಲಿಸುತ್ತ/ ಜಂಗಮ ಫಕೀರನನ್ನು / ಒಂದೇ ಎಂಬಂತೆ ಅರಿತವಳು/ ಅಜಾನ್ ಅವಾಜಿಗೆ ನಮಾಜಿಗೆ/ಹೊತ್ತಾಯಿತು ಎನ್ನುತ್ತ/ಹೊತ್ತು ಹೊತ್ತಿಗೆ ಅಲ್ಲಾನ ಅಂತರಂಗದೊಳು/ಧ್ಯಾನಿಸುವಳು

ಹೀಗೆ ಭಾವೈಕ್ಯತೆಯನ್ನು ಮಹಿಳಾ ಕಾವ್ಯ ಪ್ರತಿಪಾದಿಸಿರುವುದು ಬಹುಮುಖ್ಯವಾದುದು. ವಚನ ಚಳುವಳಿಯನ್ನು, ಕನ್ನಡದ ಸೌಹಾರ್ದತೆಯ ಮನೋಧರ್ಮವನ್ನು, ಮಾನವೀಯತೆಯನ್ನು ಕನ್ನಡದ ಮಹಿಳಾ ಕಾವ್ಯ ಬಿಟ್ಟು ಹೊರ ನಡೆದಿಲ್ಲ. ಪ್ರಶ್ನಿಸುವ ಮೂಲಕವೇ ಬದುಕನ್ನು ಕಟ್ಟಿಕೊಂಡಿರುವುದು ಇಲ್ಲಿನ ಕಾವ್ಯ ಇತಿಹಾಸದಲ್ಲಿ ಎದ್ದುಕಾಣುವ ಗುಣವಾಗಿದೆ.

————-

ನಾಗರಾಜ್ ಹರಪನಹಳ್ಳಿ

nhಹರಪನಹಳ್ಳಿ ಹುಟ್ಟೂರು. ಹರಪನಹಳ್ಳಿ ತಾಲೂಕಿನ ಮೈದೂರು-ಚಿಗಟೇರಿ  ಬೆಳೆದ ಊರು. ಪಿಯು ಓದಿದ್ದು ಕೊಟ್ಟೂರಿನಲ್ಲಿ. ಧಾರವಾಡದ ಕರ್ನಾಟಕ ಕಾಲೇಜಿನಲ್ಲಿ ಬಿ.ಎ., ಕವಿವಿಯಲ್ಲಿ ಕನ್ನಡ ವಿಷಯದಲ್ಲಿ ಸ್ನಾತಕೋತ್ತರ ಪದವಿ. ದಾವಣಗೆರೆ, ಸದಾಶಿವಗಡ ಮತ್ತು ಭಟ್ಕಳದಲ್ಲಿ ಕನ್ನಡ ಉಪನ್ಯಾಸಕರಾಗಿ ಕೆಲಸ ನಿರ್ವಹಿಸಿ, ಸದ್ಯ ಕಾರವಾರದಲ್ಲಿ ಪತ್ರಕರ್ತರಾಗಿ ಕೆಲಸ ಮಾಡುತ್ತಿದ್ದಾರೆ. ಜನವಾಹಿನಿ, ಜನಾಂತರಂಗ, ಲೋಕದರ್ಶನ ಪತ್ರಿಕೆಗಳಲ್ಲಿ ಕಾರ್ಯನಿರ್ವಹಿಸಿದ  ಇವರು, ಈ ಟಿವಿ ಕನ್ನಡ ನ್ಯೂಸ್ ಚಾನೆಲ್ಲಿಗೆ ವರದಿಗಾರಿಕೆ ಬಳಿಕ ಈಗ ಉದಯವಾಣಿ ಪತ್ರಿಕೆಗೆ ವರದಿಗಾರರಾಗಿದ್ದಾರೆ. 2009ರಲ್ಲಿ ‘ಕಡಲದಂಡೆಗೆ ಬಂದ ಬಯಲು’ ಎಂಬ ಕಥಾ ಸಂಕಲನ, 2013ರಲ್ಲಿ ‘ಬಿಸಿಲ ಬಯಲ ಕಡಲು’ ಎಂಬ ಕವಿತಾ ಸಂಕಲನ ಪ್ರಕಟಣೆ.

Share

Leave a comment

Your email address will not be published. Required fields are marked *

Recent Posts More

  • 2 days ago No comment

    ಸವಿತಾ ನಾಗಭೂಷಣ ಪ್ರವಾಸ ಕಥನ | ದಾರಿಯೇ ದೈವ… ವೈಷ್ಣೋದೇವಿ

    ಪ್ರವಾಸಿ ಸವಿತಾ ಕಂಡ ಇಂಡಿಯಾ   ಇದು ನಾನು 2011ರ ಮಾರ್ಚ್ ತಿಂಗಳಲ್ಲಿ ನನ್ನ ಕೆಲ ಗೆಳತಿಯರೊಂದಿಗೆ ಒಂದು ಜನಸಾಮಾನ್ಯರ ಸಮೂಹದೊಂದಿಗೆ ಸಾಮಾನ್ಯ ದರ್ಜೆಯ ರೈಲು ಪ್ರಯಾಣದ ಮೂಲಕ ಕೈಗೊಂಡ ಭಾರತ ಯಾತ್ರೆಯ ಸಂದರ್ಭದಲ್ಲಿ ಮಾಡಿಕೊಂಡ ಟಿಪ್ಪಣಿಗಳನ್ನು ಆಧರಿಸಿ ಬರೆದ ಪುಟ್ಟ ಪ್ರವಾಸ ಕಥನ. ಇದು ಈಗಾಗಲೇ 12 ಭಾಗಗಳಲ್ಲಿ ಡಿ ಎಸ್ ನಾಗಭೂಷಣ ಅವರ ಸಂಪಾದಕತ್ವದ ‘ನವ ಮಾನವ’ ಸಮಾಜವಾದಿ ಮಾಸಿಕದ (ಈ ಪತ್ರಿಕೆ ನವೆಂಬರ್ 2011ರ ...

  • 1 week ago One Comment

    ಅಜ್ಜಿಗೇನು ಬೇಕು ಅಂತ ಅಜ್ಜಂಗೇನು ಗೊತ್ತು!

            ಕಥನ         ಅಜ್ಜ ಪೆನ್ಷನ್ ತರೋದಕ್ಕೆ ಅಂತ ಪೇಟೆಗೆ ಹೋಗಿದ್ದ. ಅಷ್ಟರಲ್ಲಿ ಮನೆ ಬಾಗಿಲಲ್ಲಿ ಕಾರು ಬಂದು ನಿಂತಿತು. ಕಾರಲ್ಲಿ ಅಜ್ಜಿಯ ಮಗ, ಸೊಸೆ ಮತ್ತೆ ಆರು ವರ್ಷದ ಮೊಮ್ಮಗ ಬಂದಿದ್ರು. ಅಜ್ಜಿಗೆ ಖುಷಿ ತಡೆಯಕ್ಕಾಗದೇ ಅಡಿಗೆ ಮನೆ ಸಂದಿ ಮೂಲೇನೆಲ್ಲಾ ಹುಡುಕಿದ್ಲು. ದಡಾ ಬಡಾ ಸದ್ದು ಮಾಡಿದ್ಲು, ಸರಾಪರಾ ಸದ್ದು ಮಾಡಿದ್ಲು. ಅಡುಗೆ ಮನೆಯಿಂದ ಕೊತಾಕೊತಾ ಸದ್ದು ...

  • 1 week ago No comment

    ವಸಂತದ ನೆನಪು; ಮಾಗುವ ಹುರುಪು!

      ಜಗತ್ತಿನ ಬಗ್ಗೆ ತಿಳಿಯುತ್ತ ಸಾಗಿ, ನಮಗೆ ಈ ಜಗತ್ತು ಹೀಗೆ ನಡೆಯುತ್ತಿದೆ ಅಂತ ಅರಿತುಕೊಳ್ಳುವವರೆಗಿನದು ಮಧ್ಯವಯಸ್ಸಿನ ಕಾಲ. ನಾವು ಅಲ್ಲಿಯವರೆಗೆ, ಕಲಿತದ್ದು, ಕೇಳಿದ್ದು, ನಮಗೆ ತಿಳಿದಿದ್ದು ಎಲ್ಲವೂ ಬದಲಾಗುವ ವೇಳೆಗೆ ನಮಗೆ ವಯಸ್ಸಾಗಿಬಿಟ್ಟಿರುತ್ತದೆ. ಕಾಲದಲ್ಲಿ ಹೊಸ ಚಿಗುರು ಟಿಸಿಲೊಡೆದಿರುತ್ತದೆ.     ಕುಣಿದಾಡುವಷ್ಟು ಚೈತನ್ಯವಿರುವ ಯೌವನಕ್ಕೂ, ಕುಂದಿದ ಶಕ್ತಿಯ ಇಳಿಗಾಲದ ವೃದ್ಧಾಪ್ಯಕ್ಕೂ ನಡುವೆ ಬರುವುದು ಮಧ್ಯವಯಸ್ಸು! ಹುಟ್ಟು, ಬದುಕು ,ಸಾವು ಎಲ್ಲರಿಗೂ ಬರುತ್ತದೆ. ಬದುಕನ್ನು ಹಲವರು ಸಾಧನೆಗಳ ...

  • 1 week ago No comment

    ಸವಿತಾ ನಾಗಭೂಷಣ ಪ್ರವಾಸ ಕಥನ | ಬಂಗಾರದ ಹೊಳಪು, ಬೇಗುದಿಯ ನೆನಪು…

    ಪ್ರವಾಸಿ ಸವಿತಾ ಕಂಡ ಇಂಡಿಯಾ   ಇದು ನಾನು 2011ರ ಮಾರ್ಚ್ ತಿಂಗಳಲ್ಲಿ ನನ್ನ ಕೆಲ ಗೆಳತಿಯರೊಂದಿಗೆ ಒಂದು ಜನಸಾಮಾನ್ಯರ ಸಮೂಹದೊಂದಿಗೆ ಸಾಮಾನ್ಯ ದರ್ಜೆಯ ರೈಲು ಪ್ರಯಾಣದ ಮೂಲಕ ಕೈಗೊಂಡ ಭಾರತ ಯಾತ್ರೆಯ ಸಂದರ್ಭದಲ್ಲಿ ಮಾಡಿಕೊಂಡ ಟಿಪ್ಪಣಿಗಳನ್ನು ಆಧರಿಸಿ ಬರೆದ ಪುಟ್ಟ ಪ್ರವಾಸ ಕಥನ. ಇದು ಈಗಾಗಲೇ 12 ಭಾಗಗಳಲ್ಲಿ ಡಿ ಎಸ್ ನಾಗಭೂಷಣ ಅವರ ಸಂಪಾದಕತ್ವದ ‘ನವ ಮಾನವ’ ಸಮಾಜವಾದಿ ಮಾಸಿಕದ (ಈ ಪತ್ರಿಕೆ ನವೆಂಬರ್ 2011ರ ...

  • 2 weeks ago No comment

    ಪ್ರಸಾದ್ ನಾಯ್ಕ್ ಪಟ್ಟಾಂಗ | ನನಗೂ ಒಬ್ಬ ಗೆಳೆಯ ಬೇಕು…

    ಆ ಘಟನೆಯನ್ನು ನೆನಪಿಸಿಕೊಂಡಾಗಲೆಲ್ಲಾ ಈಗಲೂ ನಗು ಉಕ್ಕುಕ್ಕಿ ಬರುತ್ತದೆ. ಅಂದು ವಿಚಿತ್ರ ಘಟನೆಯೊಂದು ನಡೆದಿತ್ತು. ಅವು ನನ್ನ ಕಾಲೇಜಿನ ದಿನಗಳು. ಮಂಗಳೂರಿನ ಶಾಪಿಂಗ್ ಮಾಲ್ ಒಂದಕ್ಕೆ ಮಧ್ಯಾಹ್ನದ ಊಟಕ್ಕೆಂದು ಬಂದಿದ್ದ ನಾನು ಫುಡ್ ಕೋರ್ಟಿನಲ್ಲಿ ಸುಮ್ಮನೆ ಅಡ್ಡಾಡುತ್ತಿದ್ದೆ. ಎತ್ತ ಹೋಗಬೇಕೆಂದು ತಿಳಿಯದೆ ಸುಮ್ಮನೆ ಒಂದು ಕೌಂಟರಿನತ್ತ ನಡೆದು ಬೇಕಿದ್ದದ್ದನ್ನು ಆರ್ಡರ್ ಮಾಡಿದೆ. ಕೆಲಸವಿಲ್ಲದೆ ನೊಣ ಹೊಡೆಯುತ್ತಿದ್ದ ಆ ಹೆಂಗಸಿಗೆ ನನ್ನ ಆಗಮನವು ಅಂಥಾ ಉತ್ಸಾಹವೇನೂ ತರಲಿಲ್ಲವಾದರೂ ನಾನು ಹೇಳಿದ್ದನ್ನೆಲ್ಲಾ ...


Editor's Wall

  • 11 May 2018
    2 months ago No comment

    ಕಾಂಗ್ರೆಸ್ ನಾಯಕರು ಜೈಲಲ್ಲಿ ಭಗತ್ ಸಿಂಗ್ ಭೇಟಿಯಾಗಿರಲಿಲ್ಲವಾ?

    ಭಾರತದ ಪ್ರಥಮ ಪ್ರಧಾನಿ ಜವಾಹರಲಾಲ್ ನೆಹರೂ ಅವರ ಆತ್ಮಚರಿತ್ರೆಯಲ್ಲಿಯೇ, ಅವರು ಭಗತ್ ಸಿಂಗ್ ಭೇಟಿಯಾಗಿದ್ದರೆಂಬುದರ ಕುರಿತ ವಿವರ ಸಿಗುತ್ತದೆ. “ಭಾರತದ ಸ್ವಾತಂತ್ರ್ಯಕ್ಕಾಗಿ ಹೋರಾಡಿದ್ದ ಭಗತ್ ಸಿಂಗ್, ಬಟುಕೇಶ್ವರ್ ದತ್, ವೀರ್ ಸಾವರ್ಕರ್ ಜೈಲಿನಲ್ಲಿದ್ದಾಗ ಅವರನ್ನು ಯಾರಾದರೊಬ್ಬ ಕಾಂಗ್ರೆಸ್ ನಾಯಕರು ಹೋಗಿ ಕಂಡಿದ್ದರಾ? ಆದರೆ ಕಾಂಗ್ರೆಸ್ ನಾಯಕರು ಭ್ರಷ್ಟನೊಬ್ಬ ಜೈಲಿನಲ್ಲಿದ್ದರೆ ಅವನನ್ನು ನೋಡಲು ಹೋಗುತ್ತಾರೆ” ಎಂದು ಪ್ರಧಾನಿ ನರೇಂದ್ರ ಮೋದಿ ಕರ್ನಾಟಕದ ಚುನಾವಣೆ ಪ್ರಚಾರ ಸಭೆಯಲ್ಲಿ ವಾಗ್ದಾಳಿ ನಡೆಸಿದ್ದರು. ಬ್ರಿಟಿಷ್ ...

  • 10 May 2018
    2 months ago No comment

    ಒಂದು ಪುಸ್ತಕ; ವಾರವಿಡೀ ಬಿಡುಗಡೆ!

    ಪುಸ್ತಕವೊಂದನ್ನು ಪ್ರಕಟಿಸಿದ ಬಳಿಕ ಅದರ ಬಿಡುಗಡೆ ಕಾರ್ಯಕ್ರಮವೂ ಕಡ್ಡಾಯವೆಂಬಂಥ ಕಾಲವಿತ್ತು. ಈಗಲೂ ಇಲ್ಲವೆಂದಲ್ಲ. ಆದರೆ ಸಾವಿರ, ಲಕ್ಷದ ಲೆಕ್ಕದಲ್ಲಿ ಹಣ ಸುರಿದು ವ್ಯವಸ್ಥೆ ಮಾಡುವ ಬಿಡುಗಡೆ ಕಾರ್ಯಕ್ರಮವು ಒಂದು ಪುಸ್ತಕದ ಕುರಿತ ಮಾತಿಗೆ ಬೇಕಾದ ಆಪ್ತ ವಾತಾವರಣವನ್ನು ಕಟ್ಟಿಕೊಡುತ್ತದೆಯೇ? ದುಡ್ಡಿನ ವಿಚಾರಕ್ಕಿಂತ ಹೆಚ್ಚಾಗಿ ಕಾರ್ಯಕ್ರಮ ಆಯೋಜನೆ ಬೇಡುವ ಶ್ರಮ ಬಹಳ ದೊಡ್ಡದು. ಹಾಲ್ ಬುಕ್ ಮಾಡಬೇಕಾದಲ್ಲಿಂದ ಹಿಡಿದು, ಅತಿಥಿಗಳನ್ನು ಗೊತ್ತುಮಾಡುವುದು, ಅವರಿಗೆಲ್ಲರಿಗೂ ಹೊಂದುವಂತೆ ದಿನಾಂಕ ನಿಗದಿಪಡಿಸುವುದು, ಆಮಂತ್ರಣ ಪತ್ರಿಕೆ ಪ್ರಕಟಿಸುವುದು, ...

  • 03 May 2018
    2 months ago No comment

    ಕಾದಂಬಿನಿ ಕಾಲಂ | ಏನಿಲ್ಲದಿದ್ದರೂ ಬದುಕು ದೂಡಬೇಕು

                      ಆಗೆಲ್ಲ ತಪಸ್ಸು ಮಾಡುವ, ದೇವರು ಪ್ರತ್ಯಕ್ಷವಾಗುವ ಮತ್ತು ಕೇಳಿದ ವರ ಕೊಡುವ ಕಥೆಗಳು ಮಸ್ತು ಚಾಲ್ತಿಯಲ್ಲಿದ್ದ ಕಾರಣ ನಾನು ದೇವರನ್ನು ಕಾಣುವ ಹಟಕ್ಕೆ ಬಿದ್ದು ತಪಸ್ಸು ಮಾಡುತ್ತಿದ್ದೆ.   ನನ್ನ ಜೊತೆ ಇವೆಲ್ಲ ಯಾವ ಕಾರಣಕ್ಕೆ ಘಟಿಸಿತ್ತೋ ಅರಿಯೆ. ಬಾಲ್ಯದಲ್ಲಿ ನಮ್ಮ ಮನೆಗೆ ನೆರೆಮನೆಯ ಒಬ್ಬ ಹೆಂಗಸು ಬರುತ್ತಿದ್ದರು. ಮೂಕಕ್ಕ ಎಂದು ಅವರನ್ನು ಎಲ್ಲರೂ ಕರೆಯುತ್ತಿದ್ದುದು. ...

  • 30 April 2018
    2 months ago No comment

    ಅತ್ಯಾಚಾರ, ಹೋರಾಟದ ಐದು ವರ್ಷಗಳು ಮತ್ತು ಆ ಪುಟ್ಟ ಗೂಡು

    ತನ್ನ ಬದುಕಿನ ಅಮೂಲ್ಯ ಘಳಿಗೆಯೇ ಇಂಥದೊಂದು ಘಟನೆಗೆ ಬಲಿಯಾದ ಆಘಾತದಲ್ಲಿರುವ ಆಕೆ ಒಮ್ಮೆ ಗೆಲುವಾದವಳಂತೆ ಕಂಡರೂ ಮತ್ತೆ ಗಂಭೀರಳಾಗುತ್ತಾಳೆ. ಎಷ್ಟು ಬೇಕೋ ಅಷ್ಟೇ ಮಾತು. ಕಟ್ಟಿಕೊಂಡಿದ್ದ ಕನಸೂ ಒಡೆದುಹೋಗಿದೆ.   ಅನ್ಯಾಯದ ವಿರುದ್ಧದ ಹೋರಾಟ, ಸಮಾಜದೆದುರು ದೊಡ್ಡ ಮನುಷ್ಯನಂತೆ ಕಾಣಿಸಿಕೊಳ್ಳುವ ಮುಖವಾಡ ತೊಟ್ಟುಕೊಂಡ ಮತ್ತು ಸಾಧ್ಯವಿರುವಷ್ಟೂ ವಾಮಮಾರ್ಗಗಳಿಂದ ಎಲ್ಲರನ್ನೂ ಎಲ್ಲವನ್ನೂ ನಿಯಂತ್ರಣದಲ್ಲಿಟ್ಟುಕೊಳ್ಳಬಲ್ಲಂಥ ಅತ್ಯಂತ ಬಲಿಷ್ಠ ದುಷ್ಟನೊಬ್ಬನನ್ನು ಎದುರುಹಾಕಿಕೊಳ್ಳುವ ದಿಟ್ಟತನ ಹೇಗೆ ಅಗಾಧ ಸಾಗರದ ನಟ್ಟ ನಡುವಿನ ಒಂದು ಸಣ್ಣ ...

  • 28 April 2018
    2 months ago No comment

    ಮೈಬಣ್ಣವೆಂಬ ಮಾನದಂಡ ಮತ್ತು ‘ವಿಪ್ಲವ’ ಮನಃಸ್ಥಿತಿಯ ರಾಜಕಾರಣ

    ಈ ‘ವಿಪ್ಲವ’ ಮನಃಸ್ಥಿತಿ ಅಧಿಕಾರಸ್ಥವಾದುದಾಗಿದೆ. ದೇವರು, ಧರ್ಮದ ಹೆಸರಲ್ಲಿ ಒಡೆಯುವುದನ್ನು ತನ್ನ ಪರಮೋನ್ನತಿ ಎಂಬಂತೆ ಭ್ರಮಿಸುವ ಈ ಕುರೂಪವು ಮನುಷ್ಯರ ಮೇಲೆ ಮನುಷ್ಯರನ್ನು ಎತ್ತಿಕಟ್ಟುತ್ತದೆ. ಹೆಣ್ಣಿನ ಮೇಲೆ ಹೆಣ್ಣನ್ನೇ ಅಸ್ತ್ರವಾಗಿ ಪ್ರಯೋಗಿಸುವ ಹುನ್ನಾರಗಳ ಮೂಲಕ, ನಿಜವಾದ ಸೌಂದರ್ಯವನ್ನು ನಾಶಗೈಯುತ್ತಿದೆ. 21 ವರ್ಷಗಳ ಕೆಳಗೆ ಅಂದರೆ 1997ರಲ್ಲಿ ವಿಶ್ವಸುಂದರಿ ಪಟ್ಟ ಗೆದ್ದ ಡಯಾನಾ ಹೇಡನ್ ಮೈಬಣ್ಣದ ಬಗ್ಗೆ ಅತಿ ಕೀಳು ಅಭಿರುಚಿಯಿಂದ ಮಾತನಾಡಿದ ತ್ರಿಪುರಾ ಮುಖ್ಯಮಂತ್ರಿ ವಿಪ್ಲವ್ ಕುಮಾರ್ ದೇವ್ ...