Share

ಕಾಸರಗೋಡಿನಲ್ಲಿ ಕಂಡ ಕನ್ನಡ ಮುಖಗಳು
ನಾಗರಾಜ್ ಹರಪನಹಳ್ಳಿ, ಕಾರವಾರ

  • Page Views 164
  • “ಥೇಟ್ ನಮ್ಮ ಕರಾವಳಿಯ ಹಾಗೆ ಇರುವ ಕಾಸರಗೋಡು ಪರಕೀಯ ಎನ್ನಿಸಲಿಲ್ಲ. ಕಾಸರಗೋಡು, ಮಂಜೇಶ್ವರದಲ್ಲಿ, ಬದಿಯಡ್ಕದಲ್ಲಿ, ಬೇಕಲ್ ಕೋಟೆ, ಕಾಸರಗೋಡು ರೈಲ್ವೆ ನಿಲ್ದಾಣದಲ್ಲಿ ಸಿಕ್ಕವರೆಲ್ಲಾ ಕನ್ನಡದಲ್ಲೇ ಮಾತಾಡಿದ್ರು. ಅದು ವಿಶೇಷ. ಕನ್ನಡ ಬದುಕಿರುವುದು ಹಾಗೆ. ಕಾಸರಗೋಡು ಕನ್ನಡ ತಾಯಿಯ ಒಡಲ ಸೆರಗು ಎಂಬುದಕ್ಕೆ ಬೇರೆ ಸಾಕ್ಷಿ ಬೇಕಿರಲಿಲ್ಲ.”

    * ಕಾಳಿ ನದಿ ದಂಡೆಯಿಂದ ಚಂದ್ರಗಿರಿ ನದಿ ತೀರದವರೆಗೆ ಮನಸುಗಳನ್ನು ಬೆಸೆದದ್ದು ಸಾಹಿತ್ಯ. ಕವಿತೆ ಮತ್ತು ಕವಿಗಳು ಹಾಗೂ ಗಾಯಕರು, ಕಲಾವಿದರು. ಬದುಕಿನಲ್ಲಿ ಪ್ರೀತಿ ಮತ್ತು ಕ್ರಿಯಾಶೀಲತೆ ಹಾಗೂ ಕನ್ನಡಕ್ಕಾಗಿ ಹಿಂದೆ ದುಡಿದವರ ನೆನೆಯುವುದು, ಅವರ ಬದುಕಿದ್ದ ಊರು ಮನೆಗಳಲ್ಲಿ ಹೆಜ್ಜೆ ಹಾಕುವುದು ಎಂದರೆ ಅದು ಸಂಭ್ರಮ. ಜೀವನಕ್ಕೆ ಚೆಲುವು ನೀಡಿದ ಘಳಿಗೆ ಅವಾಗಿದ್ದವು, ಮಂಜೇಶ್ವರದ ಗಿಳಿವಿಂಡು ಮನೆಯಲ್ಲಿ, ಕಯ್ಯಾರ ಕಿಞಣ್ಣ ಅವರ ಮನೆಯಲ್ಲಿ ಪಟ್ಟ ಖುಷಿ, ಕವಿ ಬದುಕಿದ್ದ ಮನೆಯ ಉಸಿರನ್ನು ನಮ್ಮ ಎದೆಗೆ ತುಂಬಿಕೊಂಡದ್ದು ರೋಮಾಂಚಕ ಅನುಭವ.

    *

    ವತ್ತು ಶುಕ್ರವಾರ, ಜುಲೈ 28. ಸಂಜೆ 7ರವರೆಗೆ ಪತ್ರಿಕೆಗೆ ಸುದ್ದಿ ರವಾನಿಸಿ, ಕಾರವಾರದಿಂದ ಕುಮಟಾ ತಲುಪಬೇಕಿತ್ತು. ಮೊದಲೇ ನಿಗದಿಯಾಗಿದ್ದಂತೆ ಉತ್ತರ ಕನ್ನಡ ಜಿಲ್ಲೆಯ ಕನ್ನಡ ಸಾಹಿತ್ಯ ಪರಿಷತ್ ಬಳಗದ ಸದಸ್ಯರು ಕೇರಳದ ಕಾಸರಗೋಡಿಗೆ ತಲುಪಬೇಕಿತ್ತು. ರಾತ್ರಿ 9.30ಕ್ಕೆ ಕುಮಟಾ ರೈಲು ನಿಲ್ದಾಣಕ್ಕೆ ಬರುವಂತೆ ಗೆಳೆಯ, ಜಿಲ್ಲಾ ಕಸಾಪ ಅಧ್ಯಕ್ಷ ಅರವಿಂದ ಕರ್ಕಿಕೋಡಿ ಸೂಚಿಸಿದ್ದರು. ಉದ್ದೇಶ ಜು.29 ಕನ್ನಡದ ಪ್ರಥಮ ರಾಷ್ಟ್ರಕವಿ ಗೋವಿಂದ ಪೈ ಮನೆಯಲ್ಲಿ ಶ್ರಾವಣದ ಕುಶಲೋಪರಿ ಕಾರ್ಯಕ್ರಮ. ರಂಗ ಚಿನ್ನಾರಿಯ ಬೇರು ಮತ್ತು ಚಿಗುರು ಆಗಿರುವ ಕಾಸರಗೋಡು ಚಿನ್ನ ಅವರು ಎರಡು ಜಿಲ್ಲೆಗಳ ಕನ್ನಡ ಮನಸುಗಳನ್ನು ಒಟ್ಟುಗೂಡಿಸಿ, ಕನ್ನಡ ಕವಿಗಳ ಕವಿತೆಗಳನ್ನು ಹಾಡಿಸಲು ಯೋಜಿಸಿದ್ದರು. ಕನ್ನಡ ಸಂಸ್ಕೃತಿ ಇಲಾಖೆ ಹಾಗೂ ಗೋವಿಂದ ಪೈ ಟ್ರಸ್ಟ್ ಸಹಕಾರ ನೀಡಿದ್ದವು. ನನಗೆ ಗೋವಿಂದ ಪೈ ಬದುಕಿದ್ದ ಮನೆಯಲ್ಲಿ ಪೈಗಳ ಉಸಿರು ಮತ್ತು ಹೆಜ್ಜೆಗಳನ್ನು ಹುಡುಕುವ ತವಕ. ನನ್ನ ಜೊತೆಗಿದ್ದ ಗೆಳೆಯರಿಗೂ ಸಹ ಇದೇ ರೋಮಾಂಚನವಿತ್ತು. ಶಿಕ್ಷಕರು, ಉಪನ್ಯಾಸಕರು, ವಿದ್ಯಾರ್ಥಿಗಳು,ಪತ್ರಕರ್ತರು ಇದ್ದ ನಮ್ಮ ಟೀಂನಲ್ಲಿ ಗೋವಿಂದ ಪೈ ಮನೆಯನ್ನು ಕಾಣುವ ಕುತೂಹಲ ತುಂಬಿ ತುಳುಕುತ್ತಿತ್ತು. ಕನ್ನಡದ ನೆಲದಲ್ಲಿ ಕನ್ನಡದ ಸಾಂಸ್ಕøತಿಕ ಲೋಕದಲ್ಲಿ ಬೆರೆವುದರ ಜೊತೆಗೆ ಕನ್ನಡಿಗರಾಗಿಯೂ ಕನ್ನಡದ ಗಡಿಯಾಚೆ ಕನ್ನಡತನವನ್ನು ಉಳಿಸಿಕೊಂಡಿರುವ ಮನಸುಗಳನ್ನು ಮುಟ್ಟಿ ಮಾತಾಡಿಸುವ ಬಯಕೆ ಹೆಮ್ಮರವಾಗಿತ್ತು. ಕೇರಳ ಪ್ರವಾಸವನ್ನೊಮ್ಮೆ ಮಾಡಿದ್ದರೂ ಕಾಸರಗೋಡನಲ್ಲಿ ಇಳಿದು ಕನ್ನಡದ ಕವಿಗಳ ಮನೆ ನೋಡಿರಲಿಲ್ಲ. ಕಯ್ಯಾರ ಕಿಞಣ್ಣ ಅವರ ಮನೆ ನೋಡುವ ತವಕ ಬೇರೆ. ಅಂತೂ ಕಾರವಾರದಿಂದ 7.30ಕ್ಕೆ ಕುಮಟಾ ಕಡೆ ಸಾಗುವ ಬಸ್ ಹಿಡಿದಾಯ್ತು. ಅಂಕೋಲಾದಿಂದ ಗೆಳೆಯ ಪ್ರಕಾಶ್ ನಾಯಕ ಜೊತೆಯಾದರು. ಕುಮಟಾ ತಲುಪಿದಾಗ 9 ಗಂಟೆ. ಕುಮ್ಟಿ ಬಸ್ ನಿಲ್ದಾಣದ ಹೋಟೆಲ್‍ಗೆ ನುಸುಳಿ ರಾತ್ರಿ ಊಟ ಮುಗಿಸಿ ರೈಲ್ವೆ ನಿಲ್ದಾಣದತ್ತ ಹೆಜ್ಜೆಹಾಕಿದೆವು. ಅಲ್ಲಿಗೆ ಆಗಲೇ ಭಟ್ಕಳದಿಂದ ಉಮೇಶ್ ಮುಂಡಳ್ಳಿ ಕುಟುಂಬ, ಹೊನ್ನಾವರದ ಕಲ್ಪನಾ ಹೆಗಡೆ, ಕೃತಿ, ಕಾಂತಿ, ಭಟ್ಕಳದ ತಿಲೋತ್ತಮೆ, ಕುಮಟಾದ ಶ್ರೀಧರ ಉಪ್ಪಿನ ಗಣಪತಿ, ಎಂ.ಜಿ.ನಾಯ್ಕ ತಲುಪಿದ್ದರು. ಹಳದೀಪುರದಿಂದ ಅರವಿಂದ ಕರ್ಕಿಕೋಡಿ, ಹೊನ್ನಾವರದ ಪ್ರಶಾಂತ ಮೂಡಲಮನೆ, ಜನಾರ್ಧನ ಹರಿನೀರು ಜೊತೆಯಾದರು. ಅಂತೂ ಕಾಸರಗೋಡಿಗೆ ಟಿಕೆಟ್ ತೆಗೆದಾಯಿತು. ರಾತ್ರಿ 11.30ಕ್ಕೆ ಬಂದ ನಿಜಾಮುದ್ದೀನ-ತಿರುವಂತನಪುರ ಎಕ್ಸಪ್ರೆಸ್ ರೈಲು ಹಿಡಿದು ಬೆಳಗಿನ ಜಾವ 3.30ಕ್ಕೆ ಕಾಸರಗೋಡು ತಲುಪಿದ್ದಾಯಿತು. ನಿದ್ದೆಯನ್ನು ಗೆದ್ದಿದ್ದ ಆಟೋ ಚಾಲಕರು ಕನ್ನಡದಲ್ಲೇ ಎಲ್ಲಿಗೆ ಬಿಡಬೇಕು ಎಂದಾಗ ಅಚ್ಚರಿ. ಸಣ್ಣಗೆ ಸುರಿವ ಮಳೆ. ವಿಶಾಲ ರಸ್ತೆಗಳಲ್ಲಿ ಹೆಜ್ಜೆ ಹಾಕಿದೆವು. ಮಾಲಿ ಎಂಬ ವಸತಿ ಗೃಹದಲ್ಲಿ ಕಾಸರಗೋಡು ಚಿನ್ನ ವಸತಿ ವ್ಯವಸ್ಥೆ ಮಾಡಿದ್ದರು. ಬೆಳಿಗ್ಗೆ 7.30ರ ತನಕ ಗಡದ್ ನಿದ್ದೆ ಮಾಡಿದ್ದಾಗಲೇ ಬಂದ ನಟ, ನಿರ್ದೇಶಕ ಕಾಸರಗೋಡು ಚಿನ್ನನ ಸ್ನೇಹಿತರು, ಬೇಗ ಬೇಗ ಸ್ನಾನ ಮಾಡಿ ಸಿದ್ಧರಾಗಿ. ಮಂಜೇಶ್ವರಕ್ಕೆ 40 ನಿಮಿಷದ ಪ್ರಯಾಣ ಎಂದರಲ್ಲದೇ, ಬೆಳಗಿನ ಉಪಹಾರ ಇಡ್ಲಿ ದೋಸೆ ಸಂಬಾರು ತಂದಿಟ್ಟದ್ದರು.

    ಆಪ್ತ ಎನಿಸಿದ್ದು…

    ಗೋವಿಂದ ಪೈ ಮನೆ ತಲುಪಿದಾಗ ಬೆಳಿಗ್ಗೆ 10.30. ಪೈ ಟ್ರಸ್ಟ್‍ನ ಪ್ರಮುಖರು, ರಂಗ ಚಿನ್ನಾರಿ ಬಳಗದ ಸ್ನೇಹಿತರು, ಸುಗಮ ಸಂಗೀತದ ಖ್ಯಾತಿಯ ಮುದ್ದುಕೃಷ್ಣ, ಸಾಹಿತಿ, ವಿಮರ್ಶಕ ನಾದ (ನಾ.ದಾಮೋದರ ಶೆಟ್ಟಿ), ಗಾಯಕಿ ಸೀಮಾ ರಾಯ್ಕರ್, ಗಾಯಕ ದಯಾನಂದ ಪ್ರಭು, ಕಿಶೋರ್ ಪೆರ್ಲ ಉತ್ತರ ಕನ್ನಡದ ಸಾಹಿತ್ಯ ಬಳಗವನ್ನು ಆತ್ಮೀಯತೆಯಿಂದ ಬರಮಾಡಿಕೊಂಡರು. ಗೋವಿಂದ ಪೈಗಳ ಬಗ್ಗೆ, ಅಲ್ಲಿನ ಯಕ್ಷಗಾನ ಮ್ಯೂಜಿಯಂ ಬಗ್ಗೆ, ಮನೆಯ ರಕ್ಷಣೆಗೆ ಆದ ಕೆಲಸಗಳನ್ನು ತಿಳಿದಾಯ್ತು. ಗೋವಿಂದ ಪೈ ಸ್ಮಾರಕ ಕಾಲೇಜಿನ ವಿದ್ಯಾರ್ಥಿನಿಯರಿಂದ ತಾಯಿ ಬಾರೆ ಮೊಗವ ತೋರೆ ಕನ್ನಡಿಗರ ಮಾತೆಯೇ….ಸುತರ ಕಾಯೆ…ಹರಸು ತಾಯೆ…ಹಾಡನ್ನು ಸುಶ್ರಾವ್ಯವಾಗಿ ಹಾಡಿದಾಗ ಕವಿ ಜನ್ಮ ಸಾರ್ಥಕ ಎನಿಸಿತು. ಕರ್ನಾಟಕ ಸರ್ಕಾರ, ಕೇರಳ ಸರ್ಕಾರ ಗೋವಿಂದ ಪೈ ಸಂಶೋಧನಾ ಕೇಂದ್ರ ಸ್ಥಾಪನೆಗೆ ಆಸಕ್ತಿ ತೋರಿರುವ ಹಾಗೂ ಪೈ ನೆನಪಿನ ಸಭಾ ಭವನ ನಿರ್ಮಾಣ ಕಾರ್ಯದ ಮಾಹಿತಿ ಪಡೆದಾಯಿತು. ಅಲ್ಲಿಂದ ಕನ್ನಡದ ಬಗ್ಗೆ ಇರುವ ಸವಾಲುಗಳ ಚರ್ಚೆಯ ನಂತರ ಕನ್ನಡದ ಕವಿಗಳ ಗಾಯನ ಮನಸು ತುಂಬಿತು. ಕುವೆಂಪು ಅವರ ಜೈ ಭಾರತ ಜನನಿಯ ತುನುಜಾತೆ ಯಿಂದ ಹಿಡಿದು, ಬೇಂದ್ರೆ ಅವರ ಘಮಘಮಾಡಸ್ತಾವ ಮಲ್ಲಿಗೆ, ನೀ ಹೋರಟಿದ್ದೆ ಈಗ ಎಲ್ಲಿಗೆ ಹಾಡು, ಕೆಎಸ್ ನರಸಿಂಹ ಸ್ವಾಮಿ ಅವರ ಮೈಸೂರು ಮಲ್ಲಿಗೆ, ಬಿಆರ್ ಲಕ್ಷ್ಮಣರಾವ್ ಅವರ ಕರ್ನಾಟಕ ಎಂಬುದು ಬರೀ ನಾಡಲ್ಲ…..ಹಾಗೂ ಕುರುಬರೋ ನಾವ್ ಕುರುಬರೋ…. ಹಾಡುಗಳನ್ನು ತಮ್ಮ ಮಧುರ ಕಂಠದಿಂದ ಹಿರಿಯರೂ ಹಾಗೂ ಗಾಯಕರಾದ ಮುದ್ದು ಕೃಷ್ಣ, ಸೀಮಾ ರಾಯ್ಕರ್,ದಯಾನಂದ ಪ್ರಭು, ಕಿಶೋರ್ ಪೆರ್ಲ ಹಾಡಿದರು.

    ಕಯ್ಯಾರ ಮನೆಯಲ್ಲಿ…

    ಮಧ್ಯಾಹ್ನ ಊಟದ ನಂತರ ಕವಿ ಕಯ್ಯಾರ ಕಿಞಣ್ಣ ಅವರ ಮನೆ ತಲುಪಿದೆವು. ಕಯ್ಯಾರ ಅವರ ಮಗ ರವಿ ಮತ್ತು ಅವರ ಸೊಸೆ ಹಾಗೂ ಮತ್ತೊಬ್ಬ ಮಗ ಪ್ರಸನ್ನ ಅವರು ಸ್ವಾಗತಿಸಿದರು. ಆತ್ಮೀಯತೆಯಿಂದ ತಂದೆ ಕಯ್ಯಾರರ ವಿವರಗಳನ್ನು ನೀಡಿದರು. ಕರಾವಳಿಯಲ್ಲಿನ ಮನೆಗಳ ಶೈಲಿಯ ಕಯ್ಯಾರ ಹಳೆಯ ಮನೆ, ಅವರ ಪುಸ್ತಕ ಸಂಗ್ರಹ, ಅವರು ಕೃಷಿ ಮಾಡಿದ ಭೂಮಿ ತೋಟ, ಕುಳಿತುಕೊಳ್ಳುತ್ತಿದ್ದ ಕುರ್ಚಿ ಎಲ್ಲವನ್ನು ನೋಡಿಯಾಯಿತು. ಅಲ್ಲಿಂದ ಬೇಕಲ್ ಕೋಟೆ ನೋಡುವ ಆಸೆಯಿಂದ ತೆರಳಿದಾಗ ಸಂಜೆಯಾಗಿತ್ತು. ಕೋಟೆ ಪ್ರವೇಶದ ಸಮಯ ಮುಗಿದಿದ್ದ ಕಾರಣ ಮರಳಿ ಕಾಸರಗೋಡಿನತ್ತ ಹೊರಟಾಯಿತು, ದಾರಿಯಲ್ಲಿ ಸಿಕ್ಕ ಚಂದ್ರಗಿರಿ ನದಿಯನ್ನು ಸೇತುವೆಯ ಮೇಲಿಂದ ವೀಕ್ಷಿಸಿದ್ದಾಯಿತು. ನಂತರ ರಂಗಭೂಮಿಯ ಚೆಲುವುಬಲ್ಲ ನಟ, ನಿರ್ದೇಶಕ ಕಾಸರಗೋಡು ಚಿನ್ನ ಅವರ ಮನೆಯಲ್ಲಿ ಹರಟೆಯಾಯಿತು. ಅವರ ಮನೆಯ ಪದ್ಮ ಕುಟೀರದಲ್ಲಿ ಕಿಶೋರ್ ಪೆರ್ಲ, ಸೀಮಾ, ಮುದ್ದುಕೃಷ್ಣ, ಉಮೇಶ್ ಹಾಡಿ ಕನ್ನಡ ಸುಗಮ ಸಂಗೀತ ಲೋಕಕ್ಕೆ ಕರೆದೊಯ್ದರು.
    ರಾತ್ರಿ ಚಿನ್ನಾ ಅವರ ಮನೆಯಲ್ಲಿ ಭಕ್ಷಭೋಜನ ಸಮಾರಾಧನೆ ಆಯಿತು. ಉತ್ತರ ಕನ್ನಡದ ಸಾಂಸ್ಕೃತಿಕ ಸಾಹಿತ್ಯ ಲೋಕ ಹಾಗೂ ಕಾಸರಗೋಡನ್ನು ಬೆಸೆಯುವ ಬಗ್ಗೆ ಮಾತುಕತೆ ಸಹ ಆಯಿತು. ಸ್ನೇಹ ಪ್ರೀತಿಯ ಎಳೆಯಿಂದ ಇಂಥದ್ದನ್ನು ಕಟ್ಟಲು ಸಾಧ್ಯ ಎಂದು ಹಿರಿಯರಾದ ಮುದ್ದುಕೃಷ್ಣ ಮತ್ತು ನಾದ ಸಲಹೆ ಸೂಚನೆ ನೀಡಿದರು.

    ಮರುದಿನ ಸಾಂಸ್ಕೃತಿಕ ಸಾಹಿತ್ಯದ ವಿನಿಮಯ:

    ಜು.30 ಸಂಸ್ಕೃತಿ ಕುಶಲೋಪರಿ. ಅರವಿಂದ ಕಾರ್ಯಕ್ರಮ ಉದ್ಘಾಟಿಸಿದ್ರು. ಕೇರಳದಲ್ಲಿನ ಕನ್ನಡತನವನ್ನು ಉಳಿಸಿಕೊಂಡು, ಕೇರಳ ಸರ್ಕಾರದ ಜೊತೆ ಕನ್ನಡ ಶಾಲೆಗಳ ಉಳಿವಿನ ಬಗ್ಗೆ ಸಹ ಚಿಂತನೆ ಅಗತ್ಯ ಎಂದರು. ಮಲೆಯಾಳಂ ಮಾದ್ಯಮವನ್ನು ಕನ್ನಡದ ಮಕ್ಕಳ ಮೇಲೆ ಹೇರಿ, ಕನ್ನಡ ಶಾಲೆಗಳು ಮುಚ್ಚುವಂತೆ ಮಡಬಾರದು ಎಂದು ಮುದ್ದು ಕೃಷ್ಣ ಅವರು ಕೇರಳ ಸರ್ಕಾರಕ್ಕೆ ಎಚ್ಚರಿಕೆ ಸಹ ನೀಡಿದರು. ಕರ್ನಾಟಕ ಸರ್ಕಾರದ ಜವಾಬ್ದಾರಿಯನ್ನು ಸಹ ನೆನಪಿಸಿದ್ರು. ಉಮಾಶ್ರೀ ಅವರ ಜೊತೆ ರಂಗಭೂಮಿಯ ನಂಟನ್ನು ಕಾಸರಗೋಡು ಚಿನ್ನ ನೆನಪಿಸಿಕೊಂಡರು. ಸಚಿವೆ ಆದ ಮೇಲೆ ಸಹ ಕಾಸರಗೋಡಿಗೆ ಬಂದು ಸರಳತೆ ಮೆರೆದದ್ದನ್ನು ಚಿನ್ನ ಮೆಲುಕುಹಾಕಿದ್ರು. ಸಭಾ ಕಾರ್ಯಕ್ರಮ ಸಹ ಅಚ್ಚುಕಟ್ಟು. ಇದನ್ನು ಕಾಸರಗೋಡಿನ ಕನ್ನಡಿಗರಿಂದ ಕಲಿತದ್ದು, ಎಲ್ಲವೂ ಸಮಯಕ್ಕೆ ಸರಿಯಾಗಿ, ಕೊಟ್ಟ ಜವಾಬ್ದಾರಿ ಮತ್ತು ಸಮಯ ಮೀರಿ ಮಾತಾಡುವಂತಿಲ್ಲ. ಕಾಸರಗೋಡಿನ ಸಾಹಿತ್ಯ ಸಂಸ್ಕೃತಿ ಕುರಿತು ಗೆಳೆಯ ಕವಿ ರಾಧಾಕೃಷ್ಣ ಕೆ. ಉಳಿಯತ್ತಡ್ಕ ಮಾತಾಡಿದ್ರು. ಉತ್ತರ ಕನ್ನಡ ಸಾಹಿತ್ಯ ಸಂಸ್ಕೃತಿ ಪರಂಪರೆ ಕುರಿತು ನಾನು ಮಾತಾಡಿದೆ. ನಂತರ ಕನ್ನಡ ಕವಿಗಳ ಗಾಯನ. ಗೋವಿಂದ ಪೈ, ಕಯ್ಯಾರ ಕಿಞಣ್ಣ, ಕುವೆಂಪು, ಬೇಂದ್ರೆ, ಕೆ.ಎಸ್. ನರಸಿಂಹಸ್ವಾಮಿ, ಶಿಶುನಾಳ ಷರೀಫ್ ಎದುರಿಗೆ ಬಂದಂತೆ ಗಾಯಕರು ಹಾಡಿದರು. ಎರಡು ತಾಸು ಕವಿತೆಗಳ ಜೊತೆ ಪಯಣ. ಅದ್ಭುತ ಭಾವಯಾನ ಅದಾಗಿತ್ತು. ಕೊನೆಯಲ್ಲಿ ಚಿನ್ನ ಅವರು ರಂಗ ಚಿನ್ನಾರಿ ಬಳದ ಎಲ್ಲಾ ಗೆಳೆಯರನ್ನು ಉತ್ತರ ಕನ್ನಡದ ಗೆಳೆಯರಿಗೆ ಪರಿಚಯಿಸಿದ್ರು. ಉತ್ತರ ಕನ್ನಡದ ಗೆಳೆಯರನ್ನು ಚಿದಾನಂದ ಭಂಡಾರಿ ಕಾಸರಗೋಡಿನವರಿಗೆ ಪರಿಚಯಿಸಿದ್ರು. ಸ್ನೇಹವನ್ನು ಬೆಸೆದುಕೊಂಡು ಭಾರ ಮನಸ್ಸಿನಿಂದ ಹೊರಟಿದ್ದಾಯಿತು. ಜು.30 ತಿರುವನಂತಪುರದಲ್ಲಿ ನಡೆದ ಕೊಲೆಯೊಂದರ ಕಾರಣ ಕೇರಳ ಬಂದ್ ಇತ್ತು. ಆದರೆ ಸಂಸ್ಕೃತಿ ಕುಶಲೋಪರಿ ಕಾರ್ಯಕ್ರಮ ನಿಗದಿಯಂತೆ ನಡೆಯಿತು. ಸಂಜೆ 4ರಿಂದ ನಮ್ಮೂರ ಕಡೆಗೆ ಬರುವ ರೈಲಿಗಾಗಿ ಕಾದೆವು. 6-50ಕ್ಕೆ ಕಾಸರಗೋಡು ರೈಲು ನಿಲ್ದಾಣದಿಂದ ರೈಲು ದಕ್ಷಿಣ ಕನ್ನಡ, ಉಡುಪಿಯನ್ನು ಹಾಯ್ದು ಉತ್ತರ ಕನ್ನಡ ಪ್ರವೇಶಿಸಿತು. ಆ ತನಕ ನಿಲ್ದಾಣದಲ್ಲಿ, ರೈಲಿನಲ್ಲಿ ಮಾತು ಕತೆ ಹಾಡು,ಜೋಕ್ಸ್, ಸಾಹಿತ್ಯ, ರಾಜಕಾರಣದ ಚರ್ಚೆಗಳಾದವು. ಎಲ್ಲವೂ ಮರೆಯದ ನೆನಪುಗಳಾಗಿ ಎದೆಯಲ್ಲಿ ಉಳಿದವು. ಪ್ರವಾಸ, ಕವಿ, ಸಾಹಿತ್ಯ, ಸ್ನೇಹ ಸಂಬಂಧಗಳು, ಪೈ ಮತ್ತು ಕಯ್ಯಾರರ ಮನೆ, ಅವರ ಬದುಕು, ಚಂದ್ರಗಿರಿ ನದಿ ಸ್ಮೃತಿಪಟಲ ಸೇರಿಯಾಗಿದೆ. ಮತ್ತೊಂದು ಸಾಹಿತ್ಯದ ಪಯಣಕ್ಕೆ ಮನಸು ಹಂಬಲಿಸುತ್ತಿದೆ…

    ————-

    ನಾಗರಾಜ್ ಹರಪನಹಳ್ಳಿ

    nhಹರಪನಹಳ್ಳಿ ಹುಟ್ಟೂರು. ಹರಪನಹಳ್ಳಿ ತಾಲೂಕಿನ ಮೈದೂರು-ಚಿಗಟೇರಿ  ಬೆಳೆದ ಊರು. ಪಿಯು ಓದಿದ್ದು ಕೊಟ್ಟೂರಿನಲ್ಲಿ. ಧಾರವಾಡದ ಕರ್ನಾಟಕ ಕಾಲೇಜಿನಲ್ಲಿ ಬಿ.ಎ., ಕವಿವಿಯಲ್ಲಿ ಕನ್ನಡ ವಿಷಯದಲ್ಲಿ ಸ್ನಾತಕೋತ್ತರ ಪದವಿ. ದಾವಣಗೆರೆ, ಸದಾಶಿವಗಡ ಮತ್ತು ಭಟ್ಕಳದಲ್ಲಿ ಕನ್ನಡ ಉಪನ್ಯಾಸಕರಾಗಿ ಕೆಲಸ ನಿರ್ವಹಿಸಿ, ಸದ್ಯ ಕಾರವಾರದಲ್ಲಿ ಪತ್ರಕರ್ತರಾಗಿ ಕೆಲಸ ಮಾಡುತ್ತಿದ್ದಾರೆ. ಜನವಾಹಿನಿ, ಜನಾಂತರಂಗ, ಲೋಕದರ್ಶನ ಪತ್ರಿಕೆಗಳಲ್ಲಿ ಕಾರ್ಯನಿರ್ವಹಿಸಿದ  ಇವರು, ಈ ಟಿವಿ ಕನ್ನಡ ನ್ಯೂಸ್ ಚಾನೆಲ್ಲಿಗೆ ವರದಿಗಾರಿಕೆ ಬಳಿಕ ಈಗ ಉದಯವಾಣಿ ಪತ್ರಿಕೆಗೆ ವರದಿಗಾರರಾಗಿದ್ದಾರೆ. 2009ರಲ್ಲಿ ‘ಕಡಲದಂಡೆಗೆ ಬಂದ ಬಯಲು’ ಎಂಬ ಕಥಾ ಸಂಕಲನ, 2013ರಲ್ಲಿ ‘ಬಿಸಿಲ ಬಯಲ ಕಡಲು’ ಎಂಬ ಕವಿತಾ ಸಂಕಲನ ಪ್ರಕಟಣೆ.

    Share

    One Comment For "ಕಾಸರಗೋಡಿನಲ್ಲಿ ಕಂಡ ಕನ್ನಡ ಮುಖಗಳು
    ನಾಗರಾಜ್ ಹರಪನಹಳ್ಳಿ, ಕಾರವಾರ
    "

    1. ಬಸವರಾಜ. ಬೂದಿಹಾಳ. ಗೋವಾ.
      5th August 2017

      ಕಾಸರಗೋಡಿನಲ್ಲಿರುವ ಕನ್ನಡದ ಘಮಘಮ ಗೋವಾದಲ್ಲೂ ಪಸರಿಸಲಿ. ಕಾಸರಗೋಡಿನ ಕನ್ನಡ ಪರಿಮಳದ ಊದಬತ್ತಿಯು ನಿರಂತರ ಉರಿಯುತ್ತಿರಲಿ.

      Reply

    Leave a comment

    Your email address will not be published. Required fields are marked *

    Recent Posts More

    • 4 days ago No comment

      ಮತ್ತೆ ಮರಳಲಿಲ್ಲ

      ಸೊಂಟದಿ ತಂಪಾಗಿ ಪವಡಿಸಿದ ಕೊಳಲು ಕೆಂದುಟಿಗೆ ತಾಕಿದೊಡೆ ಚಿಗುರೆಲೆಯಂತಹ ಎಳಸು ಬೆರಳ ಜೋಡಿಯು ತಿಲ್ಲಾನ ಹಾಡಿದವು.. ಅಲೆಅಲೆಯಾಗಿ ತೇಲಿ ಬಂದ ಮೋಹನರಾಗದ ಮೋಡಿಗೆ ದುಂಡು ಮಲ್ಲಿಗೆ ದಂಡೆಯ ಹೆಣೆಯುವ ಕೈಗಳು ತಲ್ಲಣಿಸಿದವು.. ಮನ ಕೇಳಲಿಲ್ಲ ತನು ನಿಲ್ಲಲಿಲ್ಲ ನಲಿದೋಡಿದೆ ರಾಗದ ಜಾಡಿಡಿದು ಶ್ಯಾಮ‌ಸುಂದರನ ಸೇರಲು.. ನವಿಲಿನ ಜೋಡಿಗಳೆರಡು ನಲಿವಿನಿಂದ ಕುಣಿತಿವೆ ಜಿಂಕೆ ಹಿಂಡುಗಳೆಲ್ಲಾ ತನ್ಮಯವಾಗಿ ನಿಂತಿವೆ.. ಅಗೋ ಅಲ್ಲಿ ಗೋಪಿಕೆಯರೆಲ್ಲಾ ನರ್ತಿಸ ತೊಡಗಿದ್ದಾರೆ ಒಬ್ಬಳ ಸೆರಗು ಜಾರಿ ಮೊಲೆಹಾಲು ...

    • 4 days ago No comment

      ಕೆನ್ನೆಯ ಮೇಲಿನ ಚಿತ್ರದ ಆವಿಯಲ್ಲೂ…

      ತುಟಿಗೆ ತಲುಪದ ನಿನ್ನ ಮುತ್ತು ಮುಡಿಯದ ಕೆಂಡಸಂಪಿಗೆಯ ಘಮ, ಕಂಪನದ ಒಗಟನು ಬಿಡಿಸದ ಕೆನ್ನೆಯ ಮೇಲಿನ ಚಿತ್ರದ ಆವಿಯಲ್ಲೂ ನಿನದೆ ನಾದನರ್ತನ ಕೈ ಬೆಸೆದರೆ ತಲ್ಲಣಕೆ ಮುಕ್ತಿ ಭಾವ ಮತ್ತೆ ಮತ್ತೆ ಬಂಧಿ, ಕಾದ ಕಾವಲಿಗೆ ನೀರಿಗಿಂತ ಉರಿಯೆ ತಂಪು, ಕಣ್ಣು ತೆರೆದ ಮೌನದ ಮೇಲೆ ಮಾತ ಬಿಂಬದ ಅಚ್ಚು, ಸುಗಂಧ ಮೆತ್ತಿದ ನೆನಪು ತೊಳೆದಷ್ಟೂ ಝಳಪಿಸುವ ಕತ್ತಿಯಲಗಿನಂತೆ, ಗಂಟಿಲ್ಲದ ಮನಸ ಪೋಣಿಸಿದಷ್ಟೂ ನುಣುಚಿಕೊಂಡರೆ ಹೆಣಿಗೆ ಶೂನ್ಯ ಬರೀ ...

    • 7 days ago No comment

      ಎದೆಯೊಳಗೆ ಕುದಿವ ಅಗ್ನಿಕುಂಡ; ಕಣ್ಣಲ್ಲಿ ಬೆಳಕು ತುಂಬಿಕೊಂಡ ಕವಿತೆಗಳು

      ಪುಸ್ತಕ ಅವಲೋಕನ ————- ಬೆಂಕಿಗೆ ತೊಡಿಸಿದ ಬಟ್ಟೆ ಲೇ: ಆರೀಫ್ ರಾಜಾ ಪ್ರ: ಪಲ್ಲವ ಪ್ರಕಾಶನ,ಚೆನ್ನಪಟ್ಟಣ. ಬೆಲೆ: ರೂ.100 ಕನ್ನಡದಲ್ಲಿ ಕಾವ್ಯದ ಹೊಳಹು ಮತ್ತು ವೈವಿಧ್ಯಮಯ ಅಭಿವ್ಯಕ್ತಿಯನ್ನು ನೋಡಬೇಕೇ? ಕಾವ್ಯ ವರ್ತಮಾನಕ್ಕೆ ಮುಖಾಮುಖಿಯಾಗಬೇಕೆ? ಆರೀಫ್ ರಾಜಾ ಎಂಬ ಕವಿಯ ಕವಿತೆಗಳನ್ನು ಓದಬೇಕು. ಕಾವ್ಯ ಹರಿವ ನದಿಯಂತೆ. ಕವಿತೆ ಅಂದರೆ ಬೆಂಕಿ ಮತ್ತು ಬೆಳಕು. ಕಾವ್ಯ ಕ್ಷಣ ಭಂಗುರವನ್ನು ಗೆಲ್ಲುವ ಪ್ರಕ್ರಿಯೆ, ಸಾವನ್ನು ಮುಂದೂಡುವ ಶಕ್ತಿ ಉಳ್ಳದ್ದು….ಹೀಗೆ ಏನೆಲ್ಲಾ ಕವಿತೆಯನ್ನು ...

    • 7 days ago No comment

      ಕಿಡಿ

      ಯಾವುದು-ಯಾರದ್ದು ? ಹೇಗೋ? ಯಾರು ಎಲ್ಲಿಂದ ಏನ ತಂದರೋ? ಬೆತ್ತಲೆಯಾಗಿ ಬಂದವರು ಗಡಿ-ಗಡಿಗೆ ಸಮರ ನಟ್ಟನಡುರಾತ್ರಿಯಲ್ಲಿ ಬಡಿದೆಬ್ಬಿಸುವ ಯುದ್ಧ ಬೇಲಿ-ಬೇಲಿಯ ಮಧ್ಯ ತನ್ನದ್ದಲ್ಲದ್ದಕ್ಕೆ ನನ್ನದು ಭಾವನೆಯ ಜೂಜಾಟ ನಿತ್ಯ ಸ್ಮಶಾನದಲ್ಲಿ ಜೀವಂತ ನೆರಳುಗಳು ಬೊಬ್ಬಿಟ್ಟು ಸಾರಿವೆ ಗತವ ಆಲಿಸದ ಕಿವಿಗಳಲ್ಲಿ ದುಡ್ಡಿನ ದೊಂಬರಾಟ ಸತ್ತ ದೇಹ ಮಣ್ಣಾಗುವಾಗ ಮತ್ತೆ ಬೆತ್ತಲೆ.

    • 1 week ago No comment

      ಸ್ವಾತಂತ್ರ್ಯದ ಸೊಬಗು

      ಅಲ್ಲಿ ಆಗುತ್ತಿರುವ ಬೆಳವಣಿಗೆಗಳನ್ನು ನಾನು ಗಮನಿಸುತ್ತಲೇ ಇದ್ದೆ. ವಾಗ್ವಾದಕ್ಕೆ ಮೆಲ್ಲಗೆ ಬಿಸಿಯೇರತೊಡಗಿತ್ತು. ಆತ ಚೀನಾ ಮೂಲದ ಧಣಿ. ಈತ ಅಂಗೋಲಾದ ಸ್ಥಳೀಯ ಕಾರ್ಮಿಕ. ಚೀನೀಯ ಈ ಆಫ್ರಿಕನ್ ಕಾರ್ಮಿಕನಿಗೆ ಕೆಲಸವೊಂದನ್ನು ಕೊಟ್ಟಿದ್ದಾನೆ. ಆದರೆ ಈತ ಅದನ್ನು ಸರಿಯಾಗಿ ಮಾಡದೆ ಧಣಿಯ ಕಣ್ಣಿಗೆ ಮಣ್ಣೆರಚುತ್ತಿದ್ದಾನೆ. ಒಂದೆರಡು ಬಾರಿ ನನ್ನ ಸಮ್ಮುಖದಲ್ಲೇ ಆತ ಈ ಬಗ್ಗೆ ಕಾರ್ಮಿಕನನ್ನು ಎಚ್ಚರಿಸಿದ್ದಾನೆ. ನಂತರವೂ ಆ ಕಾರ್ಮಿಕ ತನ್ನ ಕಣ್ಣೆದುರಿಗೇ ಮೈಗಳ್ಳತನವನ್ನು ಮುಂದುವರಿಸಿದಾಗ ಆತನಿಗೆ ಪಿತ್ತ ...


    POPULAR IN CONNECTKANNADA