Share

ಟೀವಿಯಿರದಿದ್ದರೂ ಹೆಂಗಸರ ಮಾತಿನ ಚಾವಡಿಯಿತ್ತಲ್ಲ!
ನಾಗರೇಖಾ ಗಾಂವಕರ

 

 

ಬಾಲ್ಯ ಬಂಗಾರ

 

 

 

ಬಾಲ್ಯ ಯೌವನದಲ್ಲಿ ಇಲ್ಲದ ಅದ್ಯಾವುದೋ ಕೊರಗು ಮಧ್ಯವಯಸ್ಸಿನಲ್ಲಿ ಮನುಷ್ಯನ ಕಾಡುವುದು. ಅದಕ್ಕೆ ಕಾರಣ ಹಾರ್ಮೋನುಗಳ ವೈಪರೀತ್ಯವೆಂದು ವೈದ್ಯಕೀಯ ಜಗತ್ತು ವಿವರಣೆ ನೀಡಿದರೂ ಜವಾಬ್ದಾರಿಗಳ ಹಾಗೂ ಕೆಲಸದ ಒತ್ತಡಗಳಿಂದ ಜರ್ಜರಿತಗೊಳ್ಳುವ ಕಾಲವದು. ಮನಸ್ಸಿನ ಉಲ್ಲಸಿತತೆಗೆ ಕಾರಣವಾಗುವ ಸಂಗತಿಗಳ ಆದು ಬಯಸತೊಡಗುತ್ತದೆ. ಅದು ಸಿಗದಿದ್ದಾಗ ಹತಾಶೆಗೊಳ್ಳುವುದು. ಏನು ತಿಂದರೂ, ಗಳಿಸಿದರೂ, ಐಶಾರಾಮದ ಮಹಲಲ್ಲಿ ಮೃದು ತಲ್ಪದಲ್ಲಿ ಮಲಗಿದರೂ ನಿದ್ದೆ ಬಾರದು.

ಅದೇ ಬಾಲ್ಯದಲ್ಲಿ ಹುಲ್ಲಿನ ರಾಶಿಯ ಮೇಲೆ ಮಲಗಿ ನಿದ್ರಿಸಿದ ಅದೆಷ್ಟು ದಿನಗಳಿರಲಿಲ್ಲ. ಸಾಕರಿ ಕಟ್ಟು ಬಡಿಯುವ ಸಮಯದಲ್ಲಂತೂ ಮನೆ ತುಂಬಾ ಹುಲ್ಲಿನದೇ ಹಾವಳಿ. ಕುತ್ತರಿ ಬಿಚ್ಚಿ ಭತ್ತ ಸಹಿತ ಇರುವ ಹುಲ್ಲಿನ ಕಟ್ಟನ್ನು ಖಡಕಿ ಮೇಲೆ ಬಡಿಯುವ ಕಾಲ. ಸುಗ್ಗಿ ಸಮಯಕ್ಕೆ ಕೊಂಚ ಮುಂಚೆ ಬಣವೆಗಳ ಬಿಚ್ಚಿ ಹರಡಿ ಹುಲ್ಲು ತೊಳುವ ಕಾಲ. ಉಕ್ಕಲಿ ಹೊಡೆಯುವ, ಬಿದ್ದ ಭತ್ತವನ್ನೆಲ್ಲಾ ಹೆಣ್ಣಾಳುಗಳು ಕೇರುವ ಗೇರುವ, ಕೃಷಿಯ ಹತ್ತಾರು ಕೆಲಸಗಳು ಒಮ್ಮೆಲೇ ಮುಗಿಬಿದ್ದು ಕೃಷಿಕರ ಬದುಕಿನ ಕಾರ್ಯ ಬಾಹುಳ್ಯದ ಸಮಯವದು. ಕೃಷಿಯ ಬದುಕಿನಲ್ಲಿ ಇವೆಲ್ಲ ಪ್ರತಿವರ್ಷ ಬರುವ ಒಂದು ಚಕ್ರ. ಆಗೆಲ್ಲ ನಮಗೆ ಕೆಲಸಗಳು ಬಹಳವಿದ್ದರೂ ಮನೆ ತುಂಬಾ ಗದ್ದೆಯ ತುಂಬಾ ಜನರು ಓಡಾಡಿಕೊಂಡಿರುವುದೇ ಖುಷಿಯ ವಿಚಾರ. ಕೆಲಸದಾಳುಗಳಿಗೆ ಬೆಲ್ಲ ನೀರು ಕೊಟ್ಟು ಬರುವ, ಅವಲಕ್ಕಿ ಚಾ ಸಪ್ಲೈ ಮಾಡುವ ಕೆಲಸಗಳೆಲ್ಲ ಬಹಳ ಇಷ್ಟದವು. ಅವರ ಜೊತೆಗೆ ನಮ್ಮ ತಿಂಡಿಪಾಲನ್ನು ಹೊತ್ತು ಹೋಗಿ ಅಲ್ಲಿ ಅವರೊಂದಿಗೆ ಬೆರೆತು ತಿನ್ನುವುದು ಅವರ ಕಥೆ ನಗು ಜೋಕಿನಲ್ಲಿ ನಾವೂ ಶಾಮೀಲಾಗಿ ನಕ್ಕು ಹಗುರಾಗಿ ಬರುವುದು ಎಂಥಾ ಜೀವನಾನುಭವ ತಂದುಕೊಟ್ಟಿತ್ತೆಂದರೆ ಕೆಲಸಕ್ಕಿಂತ ಮಾತಲ್ಲಿ ಪ್ರವೀಣರಾಗುತ್ತಿದ್ದೆವು.

ಬಣವೆಯ ಬಿಚ್ಚಿ ಹುಲ್ಲಿನ ಪಿಂಡಿಗಳ ಮಾಡಿ ಗಂಡಾಳುಗಳು ಖಡಕಿಯ ಮೇಲೆ ಬಡಿದಾದ ಮೇಲೆ ಹೆಂಗಸರು ಆ ಪಿಂಡಿಗಳ ಮತ್ತೆ ಬಿಚ್ಚಿ ಸಣ್ಣ ಸಣ್ಣ ಕಟ್ಟುಗಳ ಮಾಡುತ್ತಿದ್ದರು. ಅದಕ್ಕೆ ಸಾಕರಿ ಕಟ್ಟು ಎಂದು ನಮ್ಮಲ್ಲಿ ಕರೆಯುವುದು ವಾಡಿಕೆ. ಆ ಸಣ್ಣ ಕಟ್ಟುಗಳಲ್ಲಿ ಗಂಡಸರು ಬಡಿಯುವಾಗ ಉದುರದೇ ಉಳಿದ ಭತ್ತಗಳ ಸಣ್ಣಕೋಲಿನಿಂದ ಬಡಿದು ಬಡಿದು ಉದುರಿಸುವುದು ಹೆಂಗಸರ ಕೆಲಸ. ಗಂಡಸರು ನಿಂತು ಭತ್ತ ಬಡಿದರೆ ಹೆಂಗಸರು ಆರಾಂ ಆಗಿ ಕೂತೇ ಕೆಲಸ. ಎದುರು ಬದಿರು ಕೂತು ಹುಲ್ಲಿನ ಕಟ್ಟು ಬಿಚ್ಚಿದ ಹಾಗೆಲ್ಲ ನಮ್ಮೂರಿನ ಮನೆಮನೆಯ ಕಥೆಗಳು, ಬ್ರಾಹ್ಮಣರ ಮನೆಯ ಕಥೆಯೂ ಸೇರಿದಂತೆ ಅಲ್ಲಿ ಬಿಚ್ಚಿಕೊಳ್ಳುತ್ತಿದ್ದವು.

ಯಾರ್ಯಾರ ಮನೆಯಲ್ಲಿ ಹೇಗ್ಹೇಗೆ? ತಿಳಿಯಬೇಕೆಂದರೆ ಅವರ ಮಾತಿಗೆ ಕಿವಿಯಾದರೆ ನಮ್ಮ ಹಳ್ಳಿಯ ಮನೆಮನೆಯ ಇತಿಹಾಸ ಸ್ಥಳಪುರಾಣಗಳು ಎಲ್ಲವೂ ತೆರೆದುಕೊಳ್ಳುತ್ತಿದ್ದವು. ಸಿನೇಮಾ ಕಥೆಗಳಲ್ಲಿಯ ನಾಯಕ ನಾಯಕಿಯರು ಖಳನಾಯಕರು ಎಲ್ಲ ನಮ್ಮೂರಿನಲ್ಲಿ ಇರುವುದು ತಿಳಿದು ಆ ಕಾಲಕ್ಕೆ ಎಳೆಯರಾದ ನಾವು ಆಶ್ಚರ್ಯಪಡುತ್ತಿದ್ದೆವು. ಆಗಾಗ ನಮ್ಮಮ್ಮ ಹೆಂಗಸರ ಪಂಚಾಯತಿ ಕೇಳುವುದು ಎಳೆಯರಾದ ನಮಗೆ ಒಳ್ಳೆಯದಲ್ಲವೆಂದೂ ಗದರುತ್ತಿದ್ದರು. ಕೆಲಕಾಲ ಎದ್ದು ಹೋದಂತೆ ಮಾಡಿ ಪುನಃ ಯಾವುದೋ ನೆವ ತೆಗೆದು ಆ ಮಾತಿನ ಚಾವಡಿಯ ಕಳದೊಳಗೆ ನಿಧಾನ ಸೇರಿಕೊಳ್ಳುತ್ತಿದ್ದೆವು. ಯಾರ ಮನೆಯಲ್ಲಿ ಹೆಚ್ಚು ತಿನ್ನುತ್ತಾರೆ. ವಾರಕ್ಕೆ ಹೆಚ್ಚು ದಿನ ಮೀನು ತರುವ ಕುಟುಂಬ ಯಾವುದು, ಬರೀ ಸೊಪ್ಪು ಸೊದೆ ತಿನ್ನುವ, ಕೆಲವೊಮ್ಮೆ ಹೊಟ್ಟೆಗೂ ತಿನ್ನದ ಖಂಜೂಷ ಕೃಪಣಾಧೀಶರು ಯಾರು? ಯಾರ ಮನೆಹೆಂಗಸು ಹೆಚ್ಚು ವೈಯ್ಯಾರಿ, ಯಾರು ಸಭ್ಯಸ್ಥೆ? ಆ ಮನೆ ಈ ಮನೆಯ ಬೇಡದ ಸಂಬಂಧಗಳು, ಹಳಸಿದ ಸಂಬಂಧಗಳು, ಯಾರ ಮನೆ ಮಗಳು ಯಾರೊಂದಿಗೆ ಓಡಿ ಹೋದಳು? ಹೀಗೆ ಹತ್ತು ಹಲವು ಸಂಗತಿಗಳು ಅಲ್ಲಿ ಪ್ರತಿ ವರ್ಷವೂ ಚರ್ಚೆಯಾಗಲೇ ಬೇಕಿತ್ತು. ಇದರೊಂದಿಗೆ ಒಳ್ಳೆಯ ಕೆಲಸ ಮಾಡಿದ ಸಜ್ಜನರ, ಹೆಚ್ಚು ಪಗಾರ ಕೊಡುವ ಒಡೆಯನ ಗುಣಗಾನ ಎಲ್ಲವೂ ಇರುತ್ತಿತ್ತು.

ಸಾಕರಿ ಕಟ್ಟು ಬಡಿಯುವ ಕೆಲಸಕ್ಕೆ ಬರುವ ಹೆಣ್ಣಾಳುಗಳಲ್ಲಿ ಒಂದೇ ಕುಟುಂಬದ ನಾಲ್ಕು ಹೆಂಗಸರು ಬರುತ್ತಿದ್ದರು. ಅವರೆಲ್ಲ ಮನೆ ಮನೆಯ ಕಥೆಗಳ ಮಹಾನ್ ಕತೆಗಾರ್ತಿಯರು. ತಮ್ಮ ಮನೆಯ ವಿಚಾರ ಬಿಟ್ಟು ಇಡೀಯ ಹಳ್ಳಿಯ ಪ್ರಪಂಚ ಜಾಲಾಡುತ್ತಿದ್ದರು. ಅದನ್ನು ಕೇಳುವ ಹುಚ್ಚು ನಮ್ಮದು. ಯಾಕೆಂದರೆ ಈಗಿನಂತೆ ಯಾವಾಗ ಬೇಕೆಂದರೆ ಆವಾಗ ಮನೋರಂಜನೆ ನೀಡುವ ಮೂರ್ಖರ ಪೆಟ್ಟಿಗೆ ಟಿ.ವಿ.ಯಾಗಲೀ ಮೊಬೈಲುಗಳಾಗಲೀ ಇರಲಿಲ್ಲ. ಅದಕ್ಕೆಂದೇ ಈ ಮಾತಿನ ಚಾವಡಿಯನ್ನು ಅಲ್ಲಿಯ ತಮಾಷೆಯನ್ನು ನಾವು ತಪ್ಪಿಸಿಕೊಳ್ಳಲು ಬಯಸುತ್ತಿರಲಿಲ್ಲ.

ಪುಸ್ತಕಗಳ ಓದುವುದು, ಆಗಾಗ ಪಟ್ಟಣಗಳಿಗೆ ಹೋಗಿ ಸಿನೇಮಾ ನೋಡುವುದು, ಸುಗ್ಗಿ ಮುಗಿದ ಮೇಲೆ ನಡೆವ ಬಯಲಾಟಗಳು, ಆಗಾಗ ಬರುವ ಥೇಟರ್ ನಾಟಕಗಳು, ಊರ ದೇವಿಯ ಪೂಜೆ ಸಮಯದಲ್ಲಿ ನಡೆವ ಸಾಂಸ್ಕೃತಿಕ ಚಟುವಟಿಕೆಗಳಲ್ಲಿ ಹಳ್ಳಿಯ ಹಗರಣಗಳು ಹೀಗೆ ಮನೋರಂಜನೆಗೆ ನಿರ್ದಿಷ್ಟ ಸಮಯ ಸಂದರ್ಭಗಳು ಇದ್ದವು. ಯಾವುದಾದರೂ ಬೀದಿ ನಾಟಕವೋ ಇನ್ನಾವುದೋ ಬಂದರೂ ಸಾಕು ಊರ ಜನ ಮುಗಿಬಿದ್ದು ಬಂದು ಸೇರುತ್ತಿದ್ದರು. ಆದರಿಂದು ಹಳ್ಳಿಯ ಜೀವನ ವಿಧಾನ ಐಶಾರಾಮದ ವಿಚಾರದಲ್ಲಿ ಹಿಂದಿಗಿಂತ ಬಹಳ ಬದಲಾಗಿದೆ.

ನಾವು ತುಂಬಾ ಚಿಕ್ಕವರಿದ್ದಾಗ ನಮ್ಮೂರಿಗೆ ವಾರ್ತಾ ಇಲಾಖೆಯ ಮೋಟಾರ ಸಿನೇಮಾಗಳು ಬರುತ್ತಿದ್ದವು. ಅದು ಕೂಡಾ ಅಪರೂಪಕ್ಕೆ ಅಪರೂಪ. ಹಾಗೆ ಬಂದಾಗಲೆಲ್ಲ ಸರಕಾರ ಸಾಧನೆ ಅದೂ ಇದೂ ಬಿಂಬಿಸುವ ಚಿತ್ರಗಳ ಜೊತೆ ಒಂದು ಕಥೆಯನ್ನು ತೋರಿಸುತ್ತಿದ್ದರು. ಆಗೆಲ್ಲ ನಮಗೆ ಅದೊಂದು ದೊಡ್ಡ ವಿಸ್ಮಯ. ಹಾಗೆ ಆಗಾಗ ಊರಿನವರೇ ಪಟ್ಟಣದಿಂದ ಟಿ.ವಿ ತರಿಸಿ ಒಂದೇ ರಾತ್ರಿ ಎರಡು ಸಿನೇಮಾ ತೋರಿಸುತ್ತಿದ್ದರು.ಅದಕ್ಕೆ ತಲೆಗೆ ಐದು ಎರಡು ರೂಪಾಯಿಗಳು. ಬಯಲು ಜಾಗದಲ್ಲಿ ಟಿ.ವಿ ಇಟ್ಟು ಕ್ಯಾಸೆಟ್‍ಗಳ ಹಾಕಿ ಸಿನೇಮಾ ಪ್ರದರ್ಶನವಾಗುತ್ತಿತ್ತು. ಕೆಲವೊಮ್ಮೆ ಕರೆಂಟು ಕೈಕೊಟ್ಟರಂತೂ ಸೇರಿದ ಹೆಂಗಳೆಯರ ಬಾಯಿಂದ ವಿದ್ಯೂತ್ ಇಲಾಖೆಗೆ, ಜೊತೆ ಅಲ್ಲಿಯ ಲೈನಮ್ಯಾನ್‍ಗೆ ಹಿಡಿಹಿಡಿ ಶಾಪ ಪುಂಖಾನುಪುಂಖವಾಗಿ ಬರುತ್ತಿತ್ತು. ಅಲ್ಲಿಗೆ ತರುವ ಸಿನೇಮಾಗಳು ಹೆಚ್ಚಾಗಿ ಕೌಟುಂಬಿಕ ಸಿನೇಮಾಗಳಾಗಿರುತ್ತಿದ್ದು ಅಳುಮುಂಜಿ ಪಾತ್ರದ ಶ್ರುತಿ, ವಿನಯಾಪ್ರಸಾದ್, ಲಕ್ಷ್ಮೀ, ಮುಂತಾದವರ ಸಿನೇಮಾಗಳು ಬಂದರೆ ಸಾಕು ಹೆಂಗಸರೆಲ್ಲ ಮೈಯೆಲ್ಲಾ ಕಿವಿಯಾಗಿ ತಲ್ಲೀನರು. ಅಲ್ಲಿಯ ಖಳನಾಯಕ ನಾಯಕಿ ಪಾತ್ರಗಳಿಗೆ ಕೂತಲ್ಲಿಯೇ ಶಾಪ ಹಾಕುವ ಹೆಂಗಸರು, ಅಜ್ಜಿಯಂದಿರು ಇದ್ದು, ನಾಯಕ ನಾಯಕಿ ಯುಗಳ ಗೀತೆ ಹಾಡುತ್ತಿದ್ದರೆ ಪಾತ್ರದ ಪಾತ್ರವೇ ತಾವಾಗುವ ಪ್ರಾಯದ ತರುಣಿಯರು ಇರುತ್ತಿದ್ದರು.

ನಾವು ಹತ್ತು ಹನ್ನೆರಡು ವರ್ಷ ಪ್ರಾಯದ ಕಿಶೋರಿಯರು. ಆಗಲೇ ಕಣ್ಣುಗಳಲ್ಲಿ ಕನಸು ಉಕ್ಕುವ ಕಾಲ. ಸಿನೇಮಾ ನೋಡಿ ಬಂದ ಒಂದೆರಡು ದಿನ ನಾವು ಕನಸು ಕಾಣಲು ಪ್ರಯತ್ನಿಸುತ್ತಿದ್ದೆವು. ಅಲ್ಲಿಯ ದುಃಖದ ಸನ್ನಿವೇಶಗಳು ಸಾವು ನೋವುಗಳು ಮಾನಸಿಕ ಕ್ಷೋಭೆಯನ್ನು ನೀಡಿದ ಉದಾಹರಣೆಗಳು ಇದ್ದವು. ಸ್ವಭಾವತಃ ಭಾವಜೀವಿಯಾದ ನನಗಂತೂ ನಟಿಮಣಿಗಳ ಕಣ್ಣೀರು ಕೋಡಿ ನನ್ನ ಕಣ್ಣಲ್ಲೂ ಗಂಗೆಯನ್ನ ಹರಿಸುತ್ತಿದ್ದಿತು. ಆದರೆ ಸ್ವಲ್ಪ ದಿನಗಳಿಗೆ ಅದು ಮತ್ತೆ ಮರೆತು ಹೋಗುತ್ತಿತ್ತು. ಹೈಸ್ಕೂಲು ಓದುವ ಹೊತ್ತಿಗೆ ಪಟ್ಟಣದ ಗೆಳತಿಯರ ಮನೆಗಳಲ್ಲಿ ಟಿ.ವಿ. ವಿರಾಜಮಾನವಾಗಿತ್ತು. ಪದವಿ ಮುಗಿಯುವ ಹೊತ್ತಿಗೆ ಮನೆಗೆ ಟಿ.ವಿ ಬಂದಿತ್ತು. ದೊಡ್ಡ ಕೊಡೆ ಹೊತ್ತು. ಮತ್ತೆ ನೋಡಿದ ಸಿನೇಮಾಗಳಿಗೆ ಲೆಕ್ಕವಿಲ್ಲ. ಆಗಾಗ ಅಣ್ಣಂದಿರು ಕ್ಯಾಸೆಟ್ಟು ತಂದು ಸಿನೇಮಾ ಹಾಕುತ್ತಿದ್ದರು. ಬಾಲ್ಯದಲ್ಲಿ ತಮಾಷೆ, ಮನೋರಂಜನೆ ಹುಚ್ಚಾಟಗಳು, ಕಚ್ಚಾಟಗಳು, ಇವೇ ಬಹುದೊಡ್ಡ ಬದುಕಿನ ಸಂಪತ್ತುಗಳು. ಯಾವ ಜಂಜಾಟಗಳ ಮನಸ್ಸಿಗೆ ಹಚ್ಚಿಕೊಳ್ಳದೇ ಬಂದುದ್ದನ್ನು ಬಂದಂತೆ ಸ್ವೀಕರಿಸುವ ಗುಣ, ಕಳೆದುಕೊಂಡಿದ್ದಕ್ಕೂ ನೋವಿಗೂ ಕ್ಷಣಕಾಲದ ವ್ಯಥೆ ಮತ್ತೆ ಯಥಾ ಪ್ರವೃತ್ತಿ ಬಾಲ್ಯದ ಕಸುವು. ಅದೇ ಇಂದು ಸಣ್ಣ ಪುಟ್ಟ ಸಂಗತಿಗಳು ಮನಸ್ಸನ್ನು ಕೆಡಿಸಿ ಮೃದುತಲ್ಪವೂ ನಿದ್ದೆ ತರದು ಅಲ್ಲವೇ? ಅದಕ್ಕೇ ಬಾಲ್ಯ ಬಂಗಾರ….

——————–

ನಾಗರೇಖಾ ಗಾಂವಕರ

ಉತ್ತರ ಕನ್ನಡ ಜಿಲ್ಲೆ ದಾಂಡೇಲಿಯ ಪದವಿಪೂರ್ವ ಮಹಾವಿದ್ಯಾಲಯದಲ್ಲಿ ಆಂಗ್ಲಭಾಷಾ ಉಪನ್ಯಾಸಕಿ. ಕಥೆ, ಕವನಗಳು, ಲೇಖನಗಳು, ವಿಮರ್ಶಾ ಬರಹಗಳ ಮೂಲಕ ಪರಿಚಿತರು. ‘ಏಣಿ’, ‘ಪದಗಳೊಂದಿಗೆ ನಾನು’ ನಾಗರೇಖಾ ಅವರ ಪ್ರಕಟಿತ ಕವನ ಸಂಕಲನಗಳು.

Share

2 Comments For "ಟೀವಿಯಿರದಿದ್ದರೂ ಹೆಂಗಸರ ಮಾತಿನ ಚಾವಡಿಯಿತ್ತಲ್ಲ!
ನಾಗರೇಖಾ ಗಾಂವಕರ
"

  1. BHAGYAMMA GV Lecturer
    30th October 2017

    Really so sentimental. ತುಂಬಾ ಚೆನ್ನಾಗಿದೆ. ನಿಮ್ಮ ಈ ಲೇಖನ ನಮ್ಮ ಎಲ್ಲರ ಬಾಲ್ಯದ ಸುಂದರ ದಿನಗಳನ್ನು ನೆನಪಿಸಿ,ಆನಂದ ಭಾಷ್ಪ ತರುವಂತೆ ಮಾಡಿತು

    Reply
  2. sanjay
    31st October 2017

    thumba chennagide lekhana 🙂

    Reply

Leave a comment

Your email address will not be published. Required fields are marked *

Recent Posts More

  • 2 weeks ago No comment

    ಕವಿಸಾಲು | ಇಂಡೋನೇಶಿಯಾ

        ಕವಿಸಾಲು         ಕಿಚ್ಚೆದ್ದು ಕುಣಿವ ನೀರು ಬಿರುಗಾಳಿ ತುಂಬಿದ ಒಡಲು ಎತ್ತೊಯ್ದು ಬಿಸಾಡಿ ಇಳೆಗೆ ಎದೆಯಿಳಿಸಿದೆ ಕಡಲು ನಡುಗಿಬಿಟ್ಟಳೆ ವಸುಂಧರೆ ಶತಕೋಟಿ ಬಿರುಕು ಬಿಟ್ಟು ಸುನಾಮಿಯ ಕೋಪಕ್ಕೆ ವಿಕಾರವಾಗಿ ಬೊಬ್ಬಿರಿದು ಊಳಿಟ್ಟು ಜೀವ ಜಲ, ಉಸಿರ ಗಾಳಿ ಹುಚ್ಚೆದ್ದು ಕುಣಿದು ಅಪ್ಪಳಿಸಿದ ಆಘಾತಕ್ಕೆ ಕಂಗೆಟ್ಟು ತತ್ತರಿಸಿವೆ ಪ್ರಾಣಿ, ಮನುಜ ಕುಲ ಮಾಡು ಹಾರಿ, ಕಂಬಗಳು ಕುಸಿದು ನೆಲಕಚ್ಚಿವೆ ಮಾನವನ ಬೀಡು ಕತ್ತರಿಸಿ ...

  • 2 weeks ago No comment

    ಕವಿಸಾಲು | ತಡವಿಲ್ಲದಿರಲಿ ಇನ್ನು…

        ಕವಿಸಾಲು         ದಾಳಿಗಳಿಗೆ ಮುಕ್ಕಾದ ಮಂದಿರವಿದು ಕುಸಿದು ಕುಳಿತ ದ್ವಾರಪಾಲಕರು ಎತ್ತರದ ಗೋಡೆಗಳ, ಎಚ್ಚರಿಕೆಯ ಗಂಟೆಗಳು ಕೂಡ ಮೌನವಿಂದು ಮನ ನಿರ್ಮಿಸಿದ ಹೆಬ್ಬಾಗಿಲುಗಳು ಒಲವ ಸಿರಿಗೆ ಚೇತರಿಸಿ ತೆರೆದ ಗಳಿಗೆ ಎತ್ತರದ ಹೊಸ್ತಿಲುಗಳ ತಡೆಯ ದಾಟಿ ತಲುಪಬೇಕಿದೆಯಷ್ಟೆ ಬಯಕೆ ಗುರಿಯನ್ನು ದಟ್ಟ ಹಸಿರಿನ ಕಾಡು, ಆಗಸದ ನೀಲಿ ಬಿಳಿಯ ಮೋಡಗಳ, ಬಿಸಿಲ ಬೆಳಕಿನ ನಡುವೆ ಬಯಲ ಸ್ವೇಚ್ಛೆಯ, ತಿಳಿಗಾಳಿ ತವಕದಲಿ ಬಂಧನಗಳ ...

  • 4 weeks ago No comment

    ಸ್ವಿಟ್ಜರ್ಲ್ಯಾಂಡಿನ ಕಣ್ಮಣಿ – ಲ್ಯೂಸರ್ನ್

        ನಾನಾ ಆಕರ್ಷಣೆಗಳಿರುವ ಈ ನಗರ ಪ್ರವಾಸಿಗರನ್ನು ಸೂಜಿಗಲ್ಲಿನಂತೆ ಆಕರ್ಷಿಸುತ್ತದೆ. ಸ್ವಲ್ಪವೂ ಬೇಸರ ತರಿಸದ ಸುಂದರ ಸ್ವಿಸ್ ನಗರಿ.         “ನಾಳೆ ಸ್ವಿಟ್ಜರ್ಲ್ಯಾಂಡ್” ಎಂದ ಕೂಡಲೇ ಬಸ್ಸಿನಲ್ಲಿ ಹರ್ಷೋದ್ಗಾರ! ಯೂರೋಪಿನ ಪ್ರವಾಸದಲ್ಲಿದ್ದ ನಮಗೆಲ್ಲ ಸ್ವಿಟ್ಜರ್ಲ್ಯಾಂಡ್ ಹೆಸರು ಇಂಪಾಗಿ ಕೇಳಿಸಲು ಕಾರಣಗಳು ಹಲವು. ಮೈಲುಗಟ್ಟಲೆ ಹಸಿರು ನೆಲ, ಹಚ್ಚಹಸಿರು ತುಂಬಿದ ಬೆಟ್ಟಗಳು, ಪರ್ವತಗಳಲ್ಲಿನ ಹಿಮ ಕರಗಿ ಜುಳಜುಳನೆ ಹರಿವ ತಿಳಿ ಬೂದು, ಬಿಳಿ ಬಣ್ಣದ ...

  • 1 month ago No comment

    ಕವಿಸಾಲು | ಒಲವಿನಾಟ

        ಕವಿಸಾಲು       ಶರದೃತು ತೂರಿದ ಪುಂಡ ಗಾಳಿಗೆ ಎಲೆಗಳೆಲ್ಲ ಹಾರಿ ಉದುರಿ ಮಳೆಗೆ, ಬಿಸಿಲ ಝಳಕ್ಕೆ ಒಡಲನೊಡ್ಡಿ ಹಾಡೋ ಹಕ್ಕಿಯ ಗೂಡು ಬರಿದು ಮೈಯ ಕೊಂಕಿಸಿ, ತಲೆಯ ಹೊರಳಿಸಿ ಚಳಿಯ ಮುಸುಕಿನಲ್ಲಿ ಕಂಪಿಸಿದ ಮರಕ್ಕೆ ಚಿಗುರ ಬಯಕೆಯ ನಸು ಪುಳಕ ಹಸಿರ ಉಸಿರಿನ, ಹಕ್ಕಿ ಹಾಡಿನ ಕನಸ ಹೊದಿಕೆಯ ಬಿಸಿ ಒಡಲು ತುಂಬಲು ಬಯಕೆಯಾಗಿ ಟೊಂಗೆ-ರೆಂಬೆಗಳಲಿ ಕವನ ಸದ್ದು ಗದ್ದಲವಿಲ್ಲದೆ ಇತ್ತ ಒಲವಿನೋಲೆಯ ...

  • 1 month ago No comment

    ಕವಿಸಾಲು | ನಕ್ಷತ್ರ ನಾವೆ

      ಕವಿಸಾಲು       ಮೋಡವೇ ಮನೆಯೊಳಗೆ ಇಳಿದಂತೆ ದಟ್ಟವಾದ ಹೊಗೆ ಮನೆಜಂತಿಗಳ ತುಂಬಾ ನೇತುಕೊಂಡಿದೆ ಚುಕ್ಕಿಗಳೇ ಮನೆಯ ಜಂತಿಗಳಲಿ ಯಾತ್ರೆ ಹೊರಟಂತೆ ಕಂಡರು ಮಿನುಕು ಹುಳುಗಳ ಹಾಗೆ ಚಿಮಣಿದೀಪದ ನೆರಳು ಸದಾ ಬೆನ್ನಿಗೆ ಗೋಡೆಗಳು ಅಕ್ಷರಶಃ ಬೂದಿಗುಡ್ಡದಂತೆ ಕಪ್ಪುಕಾಡಿಗೆಗಳ ಹಾಗೆ ಗೋಚರ ಬಾಗಿಲು ಕಿಟಕಿಗಳ ಮೂಲಕ ಬುಸುಗುಡುವ ಹೊಗೆ ಉಗಿಬಂಡಿಯ ಕಾಲಚಕ್ರದಲಿ ದಿನಗಳ ದೂಡಿದಂತೆ ಹೊಗೆಯ ಬೇಗೆಯಲಿ ಅವಳೆಂದೂ ಎದೆಗುಂದಲಿಲ್ಲ ಹಣೆಯ ಬೆವರಿನ ಗಟ್ಟಿ ತಾಜಾತನದ ...


Editor's Wall

  • 31 August 2018
    2 months ago No comment

    ಪ್ರಸಾದ್ ಪಟ್ಟಾಂಗ | ಓದು ಮಗು ಓದು…

        “ಮಕ್ಕಳಿಗಾಗಿ ಒಂದು ಪುಸ್ತಕ ಮಾಡಬೇಕಲ್ಲಾ… ಪಠ್ಯದಾಚೆಗೂ ಅವರು ಏನೇನು ಓದಬಹುದು ಎಂಬುದರ ಬಗ್ಗೆ ತಿಳಿಸುವಂಥದ್ದು” ಎಂದು ಟೆಲಿಫೋನ್ ಕರೆಯ ಮತ್ತೊಂದು ತುದಿಯಲ್ಲಿ ಅಂದು ಹೇಳುತ್ತಿದ್ದರು ಮಿತ್ರರಾದ ಗಣೇಶ್ ಕೋಡೂರು. ಓದು, ಬರವಣಿಗೆ, ಫೋಟೋಗ್ರಫಿ, ಪ್ರವಾಸ, ಕಾರ್ಯಕ್ರಮ, ಸಮಾಜಸೇವೆ, ಪ್ರಕಟಣೆ… ಹೀಗೆ ಎಲ್ಲದರಲ್ಲೂ ತೊಡಗಿಕೊಂಡಿರುವ ಗಣೇಶ್ ಅವರದ್ದು ಇದೊಂದು ಹೊಸ ಪ್ರಾಜೆಕ್ಟ್ ಇರಬೇಕು ಎಂದು ತಕ್ಷಣ ಅಂದುಕೊಂಡೆ ನಾನು. ಸದಾ ಕ್ರಿಯಾಶೀಲರಾಗಿರುವ ಗಣೇಶ್ ಕೋಡೂರು ಒಂದಲ್ಲಾ ಒಂದು ...

  • 30 August 2018
    2 months ago No comment

    ಕಾದಂಬಿನಿ ಕಾಲಂ | ತಮ್ಮ ಶವಪೆಟ್ಟಿಗೆಗೆ ತಾವೇ ಹೊಡೆದುಕೊಂಡ ಮೊದಲ ಮೊಳೆ

                        ಬಹುದೊಡ್ಡ ಪ್ರಜಾಪ್ರಭುತ್ವದ ಅಖಂಡ ಭಾರತವನ್ನು ಅಷ್ಟು ಸುಲಭವಾಗಿ ಸರ್ವಾಧಿಕಾರದ ಹಿಡಿತದಲ್ಲಿ ಬಂಧಿಸುವುದು ಸಾಧ್ಯವಿಲ್ಲ.   2019ರ ಲೋಕಸಭಾ ಚುನಾವಣೆಯ ಪೂರ್ವದಲ್ಲಿ ಅತ್ಯಂತ ಕಳವಳಕಾರಿ ಘಟನಾವಳಿಗಳು ಜರುಗುತ್ತಾ ಈ ದೇಶದ ಪ್ರಜ್ಞಾವಂತ ನಾಗರೀಕರ ಕಣ್ಣೆದುರು ಭಯದ ನೆರಳು ಕವಿಯುವಂತೆ ಮಾಡುತ್ತಿವೆ. ದೇಶದೊಳಗೆ ಕೊಲೆ, ಹಲ್ಲೆ, ಅತ್ಯಾಚಾರ, ಗಲಭೆ, ಸುಳ್ಳು ಸುದ್ಧಿ ಹಬ್ಬಿಸುವುದು, ಆತಂಕ ಸೃಷ್ಟಿಸುವುದು ಇನ್ನೂ ...

  • 26 August 2018
    2 months ago No comment

    ಗೆದ್ದು ಬೀಗುತ್ತಿರುವ ದುಷ್ಟ ರಾಜಕೀಯ ಮತ್ತು ಅಮರ್ತ್ಯ ಸೇನ್ ಮಾತುಗಳು

        ಜನರನ್ನೇ ಕೊಲ್ಲಲು ಜನಪ್ರಭುತ್ವವನ್ನು ದುರ್ಬಳಕೆ ಮಾಡಿಕೊಳ್ಳುವ ದುಷ್ಟತನಕ್ಕೆ ಕೊನೆಗಾಲ ಯಾವಾಗ?     “ಪ್ರಜಾಪ್ರಭುತ್ವ ಅಪಾಯದಲ್ಲಿರುವ ಈ ಹೊತ್ತಿನಲ್ಲಿ ಎಲ್ಲ ಕೋಮುವಾದಿಯೇತರ ಮತ್ತು ಬಿಜೆಪಿಯೇತರ ಶಕ್ತಿಗಳು ಒಂದಾಗಿ 2019ರ ಲೋಕಸಭಾ ಚುನಾವಣೆಯನ್ನು ಎದುರಿಸಬೇಕಿದೆ ಮತ್ತು ಇವುಗಳ ಜೊತೆಗೂಡಲು ಎಡಪಕ್ಷಗಳು ಹಿಂಜರಿಯಕೂಡದು.” ಇವು ನೊಬೆಲ್ ಪ್ರಶಸ್ತಿ ಪುರಸ್ಕೃತ ಅರ್ಥಶಾಸ್ತ್ರಜ್ಞ ಅಮರ್ತ್ಯ ಸೇನ್ ಅವರ ಮಾತುಗಳು. “ನಾವು ಸರ್ವಾಧಿಕಾರವನ್ನು, ಸರ್ವಾಧಿಕಾರಿ ಧೋರಣೆಯನ್ನು ವಿರೋಧಿಸಲೇಬೇಕಾಗಿದೆ. ಕೋಮುವಾದಿ ಬಲಪಂಥೀಯ ಪಡೆಗಳನ್ನು ವಿರೋಧಿಸಲು ...

  • 26 August 2018
    2 months ago No comment

    ಕಡು ಭಯಂಕರ ಕತ್ತಲೊಳಗೆ ಅವಳಂಥ ಅದೆಷ್ಟು ಜೀವಗಳೊ!

      ಅವಳೊಳಗೀಗ ಕನಸುಗಳೇ ಇಲ್ಲ. ಮಿಂಚು ಸ್ಫುರಿಸಬೇಕಿದ್ದ ಕಣ್ಣುಗಳಲ್ಲಿ ನಾಳೆಗಳನ್ನು ಚಿಂತಿಸುವ ಯಾತನೆ ಮಾತ್ರವೇ ಸರಿದಾಡುತ್ತಿದೆ.       ಒಂದು ವರದಿಯ ಪ್ರಕಾರ, ಕಳೆದ ಏಪ್ರಿಲ್ ಹೊತ್ತಿಗೆ ಹತ್ತಿರ ಹತ್ತಿರ ಏಳು ಲಕ್ಷದಷ್ಟು ರೋಹಿಂಗ್ಯಾಗಳು ಬಾಂಗ್ಲಾದೇಶದೊಳಕ್ಕೆ ಸೇರಿಕೊಂಡಿದ್ದಾರೆ. ಅವರಲ್ಲಿ ಅರ್ಧಕ್ಕರ್ಧದಷ್ಟು ಮಕ್ಕಳೇ. ಆ ಮಕ್ಕಳೆಲ್ಲ ಒಂದಲ್ಲ ಒಂದು ರೀತಿಯಲ್ಲಿ ದೈಹಿಕವಾಗಿ ಮತ್ತು ಭಾವನಾತ್ಮಕವಾಗಿ ದಮನಿತರು. ಆ ಮಕ್ಕಳ – ಅದರಲ್ಲೂ ಹೆಣ್ಣುಮಕ್ಕಳ ಬದುಕು ಎಂಥ ನರಕಮಯ ಎಂಬುದನ್ನು ...

  • 23 August 2018
    2 months ago No comment

    ಕಾದಂಬಿನಿ ಕಾಲಂ | ದುರ್ಬಲ ಗಳಿಗೆಗಳನ್ನೇ ಹೊಂಚುವ ಹದ್ದುಗಣ್ಣುಗಳೆದುರು ಹೆಣ್ಣು ದೇಹ

                        ಲೋಕದ ನೀತಿಯೇ ಅದಲ್ಲವೇ? ತನ್ನ ಮೂಗಿನ ನೇರಕ್ಕೆ ನ್ಯಾಯ ವಿತರಿಸುವುದು ಮತ್ತು ದುರ್ಬಲರನ್ನೇ ಅಲ್ಲವೇ ಬಲಿಗಂಬಕ್ಕೇರಿಸುವುದು?   ‘ಟೈಟಾನಿಕ್’ ಎನ್ನುವುದು ವಿಕೋಪದ ಸಂದರ್ಭದಲ್ಲಿ ಬಲಿಷ್ಠರ ಕೈ ಹೇಗೆ ಮೇಲಾಗುತ್ತದೆನ್ನುವುದಕ್ಕೆ ಒಂದು ಸಶಕ್ತ ರೂಪಕ. ಅಂಥಲ್ಲಿ ಕೆಳಗಿನವರನ್ನು ತುಳಿಯುವ, ಅವರ ಸವಲತ್ತುಗಳನ್ನು ಕಬಳಿಸಲು ಹವಣಿಸುವ ವಿಕರಾಳ ಆಟವೊಂದು ನಿರಾತಂಕವಾಗಿ ಜರುಗುತ್ತದೆ. ನೆನ್ನೆ ರಾತ್ರಿ ಒಬ್ಬ ಯುವಕ ...