Share

ಗಂಡು ಗಂಡೆಂದು ಬೀಗಿ…
ಕಾದಂಬಿನಿ ಕಾಲಂ

 

 

 

 

 

 

 

 

 

 

ಬೈಕ್ ಮೆಲ್ಲ ಓಡಿಸು ಮಗೂ
ಎನ್ನುತ್ತೇನೆ ನಾನು,
ನನ್ನಂತಹ ಎಲ್ಲ ತಾಯಿಯರೂ
ಮತ್ತು ಗಹಗಹಿಸಿ ನಗುತ್ತಾರೆ
ನನ್ನ ಮಗುವಿನಂತಹ ಆ ಎಲ್ಲ ಹುಡುಗರೂ…!

 

 

ಕ್ಕೆಲಗಳಲ್ಲೂ ಗಬ್ಬು ವಾಸನೆಯ ಕಸದ ರಾಶಿಗಳಿರುವ ಧೂಳಿನ ರಸ್ತೆಯನ್ನು ಹಾದು ನಾಲ್ಕೈದು ಅಂತಸ್ತಿನ ಆ ಕಟ್ಟಡದ ಹಿಂಭಾಗದಿಂದ ಇರುವ ಸ್ಟೇರ್ ಕೇಸನ್ನು ಹತ್ತತೊಡಗಿದೆ. ಅದರ ಮೆಟ್ಟಿಲುಗಳ ಸಿಮೆಂಟು ಕಿತ್ತು ಹೊಂಡಗಳಾಗಿದ್ದವು. ಮೇಲೆ ಕಿತ್ತುಹೋದ ಮಾಸಲು ಟೈಲ್ಸುಗಳ ಕಿರಿದಾದ ಓಣಿಯನ್ನು ಹಾದು ಬಾಗಿಲು ತಟ್ಟಿ ತೆರೆಯುವುದನ್ನೇ ಕಾಯುತ್ತಾ ಕಟ್ಟಡದ ದುರ್ಗತಿಯನ್ನು ನೋಡುತ್ತಿದ್ದೆ. ಅಲ್ಲೇ ಇಟ್ಟಿಗೆ ಜೋಡಿಸಿ ಒಲೆ ಉರಿಸಲಾದ ಕುರುಹು, ಮಸಿಮೆತ್ತಿದ ಖಾಲಿ ಅಲ್ಯೂಮೀನಿಯಮ್ ಚರಿಗೆ, ಅರೆ ಬರೆ ಉರಿದು ಸರಿದುಬಿದ್ದಿರುವ ಕಟ್ಟಿಗೆ. ಅದರ ಬೂದಿಯಲ್ಲಿ ಸುತ್ತಿ ಮಲಗಿದ ಕೆಂಬಣ್ಣದ ಹೆಣ್ಣುನಾಯಿ, ಮಲೆನಾಡ ಮಳೆಗೆ ಕಪ್ಪಿಟ್ಟ ದೊಡ್ಡ ದೊಡ್ಡ ಬಿರುಕುಗಳುಳ್ಳ ಗೋಡೆ, ಬಣ್ಣಗೆಟ್ಟ ಲಡಾಸು ಬಾಗಿಲು ಮತ್ತದರ ಎಡಕ್ಕೆ ಒಂದು ನೇತುಹಾಕಿದ ಹಲಗೆ. ರಂಗಪ್ಪ, ಆರಕ್ಷಕರು ಎಂದು ಅದರ ಮೇಲೊಂದು ಬರಹ.

ಒಳಗೆ ಇನ್ನು ಹೇಗಿರಬಹುದಪ್ಪಾ ಎಂದು ಯೋಚಿಸುವಾಗಲೇ ಬಾಗಿಲು ತೆರೆಯಿತು. ಗುಳಿಬಿದ್ದ ಕಣ್ಣು ನಿರಿಗೆಗಟ್ಟಿದ ಚರ್ಮದ ಬಡಕಲು ದೇಹದ ಪೋಲೀಸರ ಪತ್ನಿ ನಿಂತಿದ್ದರು. ನಾನು ಎರಡು ಸಲ ನಮ್ಮ ವಾಹನಗಳು ಅಪಘಾತವಾದಾಗ ಸಹಾಯಕ್ಕೆ ಬಂದ ಪೋಲಿಸ್ ರಂಗಪ್ಪನವರ ಉಪಕಾರ ಸ್ಮರಿಸಿ, ‘ಹೀಗೆಯೇ ಈ ಹಾದಿಯಾಗಿ ಹಾದುಹೋಗುವಾಗ ಮಾತಾಡಿಸಿಹೋಗೋಣವೆಂದು ಬಂದೆ’ ಎಂದು ಬಂದ ಕಾರಣ ಅರುಹಿದೆ. ‘ಓಹೋಹೋ ನೀವಾ ಬನ್ನಿ ಬನ್ನಿ.. ನಮ್ಮ ಮನೆಯವರು ನಿಮ್ಮ ಬಗ್ಗೆ ತುಂಬ ಹೇಳ್ತಿದ್ರು’ ಎಂದು ಅದೆಷ್ಟೋ ಪ್ರೀತಿಯಿಂದ ಕರೆದು ಕೂಡಿಸಿ ಉಪಚರಿಸತೊಡಗಿದರಾಕೆ. ನಾನೀಗ ಕೇವಲ ಮೂರು ಚಿಕ್ಕ ಕೋಣೆಗಳ ಹಂದಿಯ ಗೂಡಿನಂತಹ ಮನೆಯೊಳಗನ್ನು ನೋಡುತ್ತಿದ್ದೆ. ಪೋಲೀಸರು ನಿಜಕ್ಕೂ ಇಷ್ಟು ಕೆಟ್ಟ ಮನೆಗಳಲ್ಲಿ ವಾಸಿಸುತ್ತಾರಾ ಎಂದು ನನಗೆ ಅಚ್ಚರಿ, ನೋವು. ಆ ಮನೆಯ ನಿರಾಳ ಉಸಿರಾಡುವುದೂ ಕಷ್ಟವಾಗುವಂತಹ ಪರಿಸರದಲ್ಲಿ ಮಕ್ಕಳು ಹೇಗೆ ಓದುತ್ತಾರೆ, ಕುಟುಂಬವೊಂದು ಹೇಗೆ ಜೀವಿಸುತ್ತದೆ ಎಂದು ಆತಂಕಗೊಳ್ಳುತ್ತಿದ್ದೆ. ರಂಗಪ್ಪ ಮನೆಯಲ್ಲಿ ಇಲ್ಲದಿದ್ದರೂ ಆಕೆ ಅದೆಷ್ಟು ಪ್ರೀತಿಯಿಂದ ನೋಡಿಕೊಂಡರೆಂದರೆ ಕೆಲವೇ ಕ್ಷಣಗಳ ಒಳಗೆ ಗಾಢ ಸ್ನೇಹಬಂಧವೊಂದು ನಮ್ಮ ನಡುವೆ ಏರ್ಪಟ್ಟಿತು.

ಆಕೆ ಹೇಳತೊಡಗಿದರು. ಮಗಳು ಚಂದ ಓದುತ್ತಾ ಅವಳ ಚಿಂತೆ ತಮಗಿಲ್ಲವೆಂದೂ ಪಿಯುಸಿಯಲ್ಲಿ ಶೇ.96 ತೆಗೆದ ಹುಡುಗ ಪದವಿ ಮುಗಿಸಲಿಲ್ಲವೆಂದೂ, ಬೈಕ್ ಏರಿ ಗೆಳೆಯರ ಜೊತೆ ಹಾದಿ ಬೀದಿ ಸುತ್ತುತ್ತಾ ಮುರಿದ ಪ್ರೇಮಕ್ಕೂ ಪ್ರೇಮಾಂಕುರಕ್ಕೂ ಒಂದೇ ಮದ್ದೆಂಬಂತೆ ಕುಡಿಯುವುದು, ಡ್ರಗ್ಸ್ ದುರಭ್ಯಾಸ ಕಲಿತು ಒಂದು ಬಾರಿ ಅಪಘಾತದಲ್ಲಿ ಮುರಿದ ಕಾಲಿಗೆ ರಾಡ್ ಹಾಕಬೇಕಾಯಿತೆಂದೂ ಈ ಸಲ ಮೂಗು ಒಡೆದುಕೊಂಡು ಪ್ಲ್ಯಾಸ್ಟಿಕ್ ಸರ್ಜರಿಯ ಅಗತ್ಯವಿದೆಯೆಂದೂ, ಯಾರು ಯಾರಲ್ಲೋ ಸಾಲ ಮಾಡಿ ತಲೆಗೆ ತಂದಿಟ್ಟಿದ್ದಾನೆಂದೂ ನಾನು ಬುದ್ಧಿ ಹೇಳಿದರೆ ಅವನು ನನ್ನ ಮಾತನ್ನು ಖಂಡಿತಾ ಕೇಳುವನೆಂದೂ ಅತ್ತತ್ತು ಹೇಳಿದರು. ಆ ತಾಯಿಯ ರೋದನೆಯನ್ನು ನೋಡುವಾಗ ಬಯಸೀ ಬಯಸಿ ಹೆತ್ತ ಮಗ ಹೀಗಾದ ನೋವು ಹೇಗೆಲ್ಲ ಕಾಡಿದ್ದೀತು ಈ ಹೆಣ್ಣನ್ನು ಎಂದು ಯೋಚಿಸುತ್ತಿದ್ದೆ.

ನನ್ನ ಮನೆಯ ಸಮೀಪದ ಇನ್ನೊಂದು ಹುಡುಗ ಸತತ ನಾಲ್ಕು ಸಲ ಬೈಕ್ ಅಪಘಾತ ಮಾಡಿಕೊಂಡಿದ್ದ. ಮೂರು ಸಲದ ಅಪಘಾತಗಳಲ್ಲೂ ದೇಹದ ಅನೇಕ ಮೂಳೆಗಳು ಮುರಿತಕ್ಕೊಳಗಾಗಿದ್ದವು. ನಾಲ್ಕನೇ ಸಲ ತಲೆ ಪೆಟ್ಟಾಗಿ ಮುಖದ ಮೂಳೆಯೊಂದನ್ನು ತೆಗೆದದ್ದರಿಂದ ಚಂದದ ಮುಖವು ವಿಕಾರವಾಗಿ ಆಗಾಗ ಮತಿಭ್ರಮಣೆಯಾದಂತೆ ವರ್ತಿಸುತ್ತಾನೆಂದು ಕೇಳಿದ್ದೆ. ನಾನು ಈ ತರುಣರನ್ನು ಗಮನಿಸುವಾಗ ನನಗೆ ಅಪಘಾತವನ್ನೇ ಮಾಡಿಕೊಳ್ಳದ ಹುಡುಗರೇ ಸಿಕ್ಕಿದ್ದಿಲ್ಲ. ತೀರಾ ಮೊನ್ನೆ ಮೊನ್ನೆ ಇಬ್ಬರು ಮಾರಣಾಂತಕ ಪೆಟ್ಟುಗಳಿಂದ ಚಿಕಿತ್ಸೆಗೂ ಹಣವಿಲ್ಲದೆ ಚಂದಾ ಎತ್ತುವ ಆ ಹುಡುಗರ ಗೆಳೆಯನ ಫೇಸ್ಬುಕ್ ಪೋಸ್ಟೊಂದನ್ನು ನೋಡಿದೆ. ಕಳೆದ ವರ್ಷ ಒಬ್ಬ ಕಡುಬಡವಿ ವಿಧವೆಯ ಮಗ ಹೀಗೆ ಅಪಘಾತ ಮಾಡಿಕೊಂಡು ಚಿಕಿತ್ಸೆಗೂ ಹಣವಿಲ್ಲದೆ ಪ್ರಜ್ಞಾಹೀನನಾಗಿ ಆಸ್ಪತ್ರೆಯಲ್ಲಿದ್ದಾಗ ನಾನು ಒಂದಷ್ಟು ಹಣವನ್ನು ಆ ತಾಯಿಯ ಕೈಗಿತ್ತದ್ದು ಆಕೆ ಮಾತಿಗಾದರೂ ಬೇಡವೆನ್ನಲಾಗದ ಹೀನಾಯ ಸ್ಥಿತಿ ನನ್ನನ್ನು ಪರಿಪರಿಯಾಗಿ ಕಾಡಿದ್ದು, ಆನಂತರ ನಾನೊಂದು ಕವಿತೆ ಬರೆದಿದ್ದು ನನಗೆ ನೆನಪಿಗೆ ಬಂದಿತು.

‘ಬೈಕ್ ಮೆಲ್ಲ ಓಡಿಸು ಮಗೂ…’
ನನ್ನ ಮಾತಿಗೆ
ಜೋರಾಗಿ ನಕ್ಕೇಬಿಟ್ಟ ಹುಡುಗ
‘ಆಂಟೀ ಹೊರ ಪ್ರಪಂಚ
ಅದೆಷ್ಟು ವೇಗವಾಗಿದೆ
ಒಮ್ಮೆಹೋಗಿ ನೋಡಿ!’
ಒಮ್ಮೆ ಹೋಗಿ ನೋಡಬೇಕು ನಾನೀಗ
ಆಸ್ಪತ್ರೆಯ ತೀವ್ರ ನಿಗಾ ಘಟಕದಲ್ಲಿ
ಈಗಲೋ ಆಗಲೋ
ಎನ್ನುವಂತಿರುವ ಆ ಕಂದನನ್ನು!

* * *

ಜನ ಈ ಮೊದಲು ಆಕೆಯನ್ನು
ಕೂಲಿಯವಳನ್ನಾಗಿ,
ಕತ್ತೆ ಚಾಕರಿಯವಳನ್ನಾಗಿ
ಕಂಡಿದ್ದರೇ ಹೊರತು
ಭಿಕ್ಷುಕಿಯನ್ನಾಗಿ ಎಂದೂ ಕಂಡದ್ದಿರಲಿಲ್ಲ
ಅವಳ ಮಗ ಬೈಕ್ ಅಪಘಾತದಲ್ಲಿ
ನಜ್ಜುಗುಜ್ಜಾಗಿ ಪ್ರಜ್ಞಾಹೀನ ಸ್ಥಿತಿಯಲ್ಲಿ
ಆಸ್ಪತ್ರೆಯ ತೀವ್ರ ನಿಗಾಘಟಕದಲ್ಲಿ
ಹೀಗೆ ಬಿದ್ದುಕೊಳ್ಳುವವರೆಗೂ!

* * *

ಐದೈದು ಲಕ್ಷದ ಐದೈದು
ಶಸ್ತ್ರಕ್ರಿಯೆಗಳಾಗಲಿಕ್ಕಿದ್ದು
ಹಣವಿಲ್ಲದ ಕಾರಣ
ನಗರದ ದೊಡ್ಡಾಸ್ಪತ್ರೆಯಿಂದ
ಊರಿನ ಸರಕಾರಿ ಆಸ್ಪತ್ರೆಗೆ
ಆ ಹುಡುಗನನ್ನು ಸಾಗಹಾಕಲಾಗಿದೆ
ಮತ್ತು
ಊರ ಶಾಲೆಗಳಲಿ ಎತ್ತಿದ
ಚಂದಾ ಹಣ
ಒಂದೂವರೆ ಲಕ್ಷ ದಾಟುವ
ಭರವಸೆಯೂ ಹುಸಿಯಾಗಿದೆ!

* * *

ಬೈಕು ಮಿತಿಮೀರಿದ ವೇಗದಲ್ಲಿ ಬಂದು
ಕಲ್ಲಿಗೆ ಬಡಿದು ಬಿದ್ದ ಕಾರಣ
ಹೆತ್ತವಳಿಗೆ ಹೆಗಲಾಗಬೇಕಾದ
ಚಿಗುರು ಮೀಸೆಯ ಹುಡುಗನ
ತಲೆಯ ಚಿಪ್ಪೊಡೆದು ಹಾರಿಹೋಗಿದೆ
ಪಕ್ಕೆಲುಬು ಮುರಿದು
ಕಾಲ ಗಂಟುಗಳು ಪುಡಿಯೆದ್ದು
ನೆತ್ತರು ದೇಹದೊಳಗಿಂದ
ಸೋರಿ ಬರಿದಾಗಿದೆ
‘ಬದುಕಿದರೂ ಮೊದಲಿನಂತಾಗಲಾರ’
ಎಂದು ವೈದ್ಯಕೀಯ ಲೋಕ
ಕೈ ಚೆಲ್ಲಿದೆ
ಮತ್ತವಳು ಎದೆ, ಹೊಟ್ಟೆ ಬಡಿದುಕೊಳ್ಳುತ್ತ
ಮೊರೆಯಿಟ್ಟು ಪ್ರಲಾಪಿಸುತ್ತಾಳೆ –
‘ನೀನೊಮ್ಮೆ ಬದುಕಿದರೆ ಸಾಕು ಕಂದಾ
ಕೂಲಿ ನಾಲಿ ಮಾಡಿ ನಿನ್ನ ಸಾಕುವೆ!’

* * *

ಅದೇಕೆ ಅಷ್ಟು ವೇಗವಾಗಿ
ಓಡುತ್ತಿತ್ತು ಜಗ
ಹದಿಹರೆಯದ ಮಗ
ಬೈಕ್ ಏರಿ ಹಾರಿಹೋಗುವಾಗೆಲ್ಲ!
ಮತ್ತೀಗ ತೀವ್ರ ನಿಗಾಘಟಕದ
ಗಾಜಿನೊಳಗಿಂದ ಗೋಚರಿಸುವ
ದೇಹ ಎಳೆವ ಕ್ಷೀಣ ಉಸಿರ ಏರಿಳಿತವೂ
ನಿಂತೇಬಿಟ್ಟ ಗಡಿಯಾರದ ಹಾಗೆ
ಅದೇಕಿಷ್ಟು ನಿಧಾನ!

* * *

ಬೈಕ್ ಮೆಲ್ಲ ಓಡಿಸು ಮಗೂ
ಎನ್ನುತ್ತೇನೆ ನಾನು,
ನನ್ನಂತಹ ಎಲ್ಲ ತಾಯಿಯರೂ
ಮತ್ತು ಗಹಗಹಿಸಿ ನಗುತ್ತಾರೆ
ನನ್ನ ಮಗುವಿನಂತಹ ಆ ಎಲ್ಲ ಹುಡುಗರೂ…!

ಹೀಗೆ ಕವಿತೆಯನ್ನೇನೋ ಬರೆದು ಅದೆಷ್ಟೋ ಮೆಚ್ಚುಗೆ ಗಳಿಸಿದ್ದೆ. ಈ ಸಾಲುಗಳನ್ನು ಪ್ರತಿ ಕಾಲೇಜಿನಲ್ಲೂ ಹಂಚಬೇಕೆಂದು ಯಾರೋ ಕಮೆಂಟು ಬರೆದದ್ದೂ ನೆನಪಾಯಿತು. ಆದರೆ ಈ ಹುಡುಗ ಯಾರ ಯಾರದೋ ಧನಸಹಾಯದಿಂದ ಅವೆಷ್ಟೋ ಶಸ್ತ್ರಚಿಕಿತ್ಸೆಗಳನ್ನು ಮಾಡಿಸಿಕೊಂಡ ತರುವಾಯ ನಿಧಾನ ಚೇತರಿಸಿಕೊಂಡು ತನ್ನ ತಾಯಿಯಲ್ಲಿ ತನ್ನ ಅಪಘಾತವಾದ ಬೈಕನ್ನು ಮಾರಿದ್ದೇಕೆಂದೂ ಕೂಡಲೇ ಹೊಸ ಬೈಕನ್ನು ಕೊಡಿಸಬೇಕೆಂದೂ ಹಟಮಾಡಿ ಕೂತಿದ್ದ!

ನನಗೆ ತಿಳಿದಂತೆ ಎಷ್ಟೋ ತಾಯಿಯರು ಹಗಲೂ ರಾತ್ರಿ ಮಗ ಮನೆ ಸೇರಿಲ್ಲವೆಂದು ಎಲ್ಲಿ ಕೆಟ್ಟ ಸುದ್ಧಿ ಬರುವುದೋ ಎಂದು ಆತಂಕದಿಂದ ಕಾಯುತ್ತಿರುತ್ತಾರೆ. ‘ದೇವರ ದಯೆಯಿಂದ ನಮಗೆ ಗಂಡು ಹುಟ್ಟಲಿಲ್ಲ ಮಾರಾಯರೇ.. ಇಲ್ಲವೆಂದರೆ ನಿಮ್ಮ ಹಾಗೆ ನಾವೂ..’ ಎಂದು ಕುಟುಕಿಬಿಡುವ ಹೆಣ್ಣು ಹೆತ್ತವರನ್ನೂ ಕಂಡಿದ್ದೇನೆ ನಾನು.

ಮೊನ್ನೆ ನಮ್ಮ ಕಾರಿನ ಡ್ರೈವರ್ ನನ್ನ ಇನ್ನೊಬ್ಬ ಪರಿಚಿತ ಯುವಕನ ಕಥೆ ಹೇಳಿದ. ಆ ಹುಡುಗ ಅತ್ಯಂತ ಚೆಲುವನಾಗಿದ್ದು ಕಾಲೇಜು ಕಾರಿಡಾರ್ ಏರಿದ ದಿನಗಳಲ್ಲೇ ಗೆಳೆಯರೊಂದಿಗೆ ಹೊಡೆದಾಡಿ ವಿಷ ಸೇವಿಸಿದ ದಾಖಲೆಯ ನಂತರ ಅವೆಷ್ಟೋ ಪ್ರೇಮಪ್ರಕರಣಗಳಾಗಿ ಒಂದು ಬೈಕ್ ಅಪಘಾತದಲ್ಲಂತೂ ಹಲ್ಲಿನ ಇಡೀ ಸೆಟ್ಟೇ ಕಳಚಿ ಸತ್ತೂ ಸತ್ತೂ ಬದುಕಿಬಿಟ್ಟಿದ್ದ. ಅದಾದ ನಂತರವೂ ಒಮ್ಮೆ ಹೀನಾಯವಾಗಿ ಮೈಕೈ ತುಂಬ ಬ್ಯಾಂಡೇಜು ಸುತ್ತಿಕೊಂಡ ಸ್ಥಿತಿಯಲ್ಲೇ ನನ್ನಲ್ಲಿಗೆ ಲಕ್ಷಗಳ ಮೊತ್ತದ ಸಾಲ ಕೇಳಲು ಬಂದಿದ್ದು, ಅವನ ತಾಯಿ ನನಗೆ ಕರೆ ಮಾಡಿ ಅಳುತ್ತಾ ತನ್ನ ಮಗನಿಗೆ ಯಾವ ಕಾರಣಕ್ಕೂ ಒಂದು ರುಪಾಯಿ ಸಾಲ ಕೊಡಕೂಡದೆಂದು ಹೇಳಿದ್ದೂ ಇತ್ತು.

ಇದಾದ ಎರಡೇ ದಿನಗಳಲ್ಲೇ ದೊಡ್ಡ ಕಾರೊಂದನ್ನು ವೇಗವಾಗಿ ತಂದು ನನ್ನ ಕಾರಿನೆದುರೇ ನಿಲ್ಲಿಸಿ ದುಬಾರಿ ಫೋನಲ್ಲಿ ಯಾರೊಂದಿಗೋ ಮಾತಾಡುತ್ತಲೇ ನನ್ನಡೆಗೆ ನಗೆಯೊಂದನ್ನು ಬೀಸಿದ್ದು ನನಗೆ ನೆನಪಿತ್ತು. ಅಷ್ಟಾದರೂ ಅಲ್ಲಿ ಇಲ್ಲಿ ಸಿಕ್ಕಾಗ ನಾನು ‘ಮಗೂ ಹಾಗೆಲ್ಲ ಮಾಡಬೇಡ’ ಎಂದು ಬುದ್ಧಿ ಹೇಳುವುದೂ ಅವನು ನಕ್ಕು ಹೋಗಿಬಿಡುವುದೂ ಇರುತ್ತಿತ್ತು. ಈ ಹುಡುಗ ಅದೆಷ್ಟು ಚಾಲಾಕಿ ಎಂದರೆ ತನಗೆ ಬೇಕನಿಸಿದ್ದನ್ನು ಮಾಡಿಯೇ ತೀರುತ್ತಾನೆಂದೂ ಹೊಸದೊಂದು ಫೋನ್ ಕಣ್ಣಿಗೆ ಬಿತ್ತೆಂದರೆ ನೆನ್ನೆ ಮೊನ್ನೆ ಐವತ್ತು ಅರವತ್ತು ಸಾವಿರ ಕೊಟ್ಟು ಕೊಂಡ ಫೋನನ್ನೂ ಮೂರೋ ನಾಲ್ಕೋ ಸಾವಿರಕ್ಕೆ ಮಾರಿ ಹೊಸದನ್ನು ಕೊಂಡೇ ತೀರುತ್ತಾನೆಂದೂ ಹಣಕ್ಕಾಗಿ ಅವನು ಮಾಡುವ ತಂತ್ರಗಳು ಒಂದೆರಡಲ್ಲವೆಂದೂ ಇತ್ತೀಚೆ ತಾನು ಕೇಟರರ್ಸ್ ಕೆಲಸ ಮಾಡುವುದಾಗಿ ಪಾತ್ರೆ ಅಂಗಡಿಯೊಂದರಲ್ಲಿ ಸಾಲಾಗಿ ಪೇರಿಸಿಟ್ಟ ಪಾತ್ರೆಗಳ ಫೋಟೋ ತೆಗೆದು ಬ್ಯಾಂಕಿನಿಂದ ದೊಡ್ಡ ಮೊತ್ತದ ಸಾಲ ಪಡೆದಿದ್ದಾನೆಂದೂ ನಮ್ಮ ಡ್ರೈವರ್ ಹೇಳಿದ್ದ.

ಅಂಥ ಹುಡುಗ ಮೊನ್ನೆ ಒಂದು ಆಟೋ ಮಾಡಿಕೊಂಡು ಮನೆ ಸೇರಿದನಂತೆ. ಕೂಡಲೆ ಅವನ ತಾಯಿ ಸಿಕ್ಕ ಸಿಕ್ಕದ್ದರಲ್ಲಿ ಮಗನಿಗೆ ಮನಸೋಯಿಚ್ಛೆ ಬಡಿದು ಊರು ಹಾರಿಹೋಗುವಂತೆ ಅತ್ತು ಎತ್ತಲೋ ನಡೆದುಬಿಟ್ಟಳಂತೆ. ಈ ಹುಡುಗ ರಿಕ್ಷಾದವನೆದುರು ಅಪಮಾನವಾಯ್ತೆಂದು ಒಳಗೆ ಹೋದವನೇ ಪಿನಾಯಿಲ್ ಕುಡಿದು ವಿಪರೀತ ಹೊಟ್ಟೆ ಉರಿಯತೊಡಗಿದ್ದೇ ರಿಕ್ಷಾದವನಿಗೆ ಕರೆ ಮಾಡಿದನಂತೆ. ರಿಕ್ಷಾದವ ಇವನನ್ನು ಕರೆತಂದ ತಪ್ಪಿಗೆ ಬಾಡಿಗೆ ಹಣವೂ ಸಿಕ್ಕದೆ ತನ್ನನ್ನೇ ಹಳಿದುಕೊಳ್ಳುತ್ತ ವಾಪಸ್ ಹೋಗುತ್ತಿದ್ದವನು ‘ನೀನು ಸತ್ರೆ ಸಾಯಿ ನಾನು ಬರಲ್ಲ’ ಎಂದನಂತೆ. ಕೂಡಲೇ ಹುಡುಗ 108ಕ್ಕೆ ಕರೆ ಮಾಡಿ ತಾನೇ ಆಸ್ಪತ್ರೆ ಸೇರಿಕೊಂಡನಂತೆ. ಹೀಗೆ ನಮ್ಮ ಡ್ರೈವರ್ ಜೋರು ನಗುತ್ತ ಇಷ್ಟುದ್ದ ಕಥೆ ಹೇಳಿದ್ದ.

ಅರೆಬರೆ ಓದಿಕೊಂಡು ಮೊಬೈಲ್ ಫೋನ್ ಅಂಗಡಿಯನ್ನೋ ಇನ್ನೇನೋ ಸಣ್ಣ ಪುಟ್ಟ ಬಿಜಿನೆಸ್ ಮಾಡಲು ಸಾಲಕ್ಕಾಗಿ ಅಂಡಲೆಯುವ ದೊಡ್ಡ ದೊಡ್ಡ ಕನಸಿನ ಯುವಕರೊಂದಷ್ಟು, ಧರ್ಮದ ವಿಷ ತುಂಬಿಕೊಂಡು ಹಾಳಾಗುತ್ತಿರುವ ಯುವಕರೊಂದಷ್ಟು, ಬೈಕ್ ಕ್ರೇಜ್, ಕುಡಿತ, ಮೋಜು, ಜೂಜು, ನಶೆಗಳಲ್ಲಿ ತೇಲುವ ಯುವಕರೊಂದಷ್ಟು, ಅಪಘಾತಗಳಲ್ಲಿ ಸಾಯುವ, ನರಳುವ ಯುವಕರೊಂದಷ್ಟು, ಆತ್ಮಹತ್ಯೆಗೆ ಇಳಿದುಬಿಡುವ, ಅಪರಾಧ ಜಗತ್ತಿಗೆ ನಡೆದುಬಿಟ್ಟ ಹುಡುಗರೊಂದಿಷ್ಟು, ಹಾಸ್ಟೆಲುಗಳೆಂಬ ಜೈಲುಗಳಲ್ಲಿ ಬಂಧಿಯಾಗಿ ಹೊರ ಜಗತ್ತಿನ ಸಂಪರ್ಕವೇ ಇಲ್ಲದಂತಿದ್ದು ಇಂಜಿನಿಯರು ಡಾಕ್ಟರು ಅಥವ ಇನ್ನೇನೋ ಆಗುವ ಮೂಲಕ ಜೀವನ ಪಾವನವಾಯ್ತೆಂದು ಪೋಷಕರು ನಿಟ್ಟುಸಿರಿಡುವುದಕ್ಕೆ ಕಾರಣರಾಗುವ ಹುಡುಗರು ಮತ್ತೊಂದಷ್ಟು. ಇವುಗಳ ನಡುವೆ ಅಪರೂಪಕ್ಕೆ ಸಹಜವಾಗಿ, ಆರೋಗ್ಯಕರವಾಗಿ, ಸಜ್ಜನರಾಗಿ ಬೆಳೆಯುತ್ತಿರುವ ಕೆಲವೇ ಕೆಲವರು ಯುವಕರು!

ನಾನು ಯೋಚಿಸುತ್ತೇನೆ, ಇದು ಹೀಗೆಯೇ ಮುಂದುವರೆದರೆ ಆಗಲೂ ಹುಟ್ಟುವ ಮಗು ಗಂಡೇ ಆಗಬೇಕೆಂದು ಬಯಸುತ್ತಾರಾ? ಹರಕೆ ಹೊರುತ್ತಾರಾ? ಲಾಡು ಹಂಚುತ್ತಾರಾ? ಗಂಡು ಮಗುವೆಂದು ಬೀಗುತ್ತಾ ಹೆಣ್ಣಿಗೂ ಗಂಡಿಗೂ ನಡುವೆ ತಾರತಮ್ಯ ಎಸಗುತ್ತಾ ಬೆಳೆಸುತ್ತಾರಾ? ಗಂಡು ಹೆರದ ಹೆಣ್ಣನ್ನು ಬಡಿಯುವುದು ನಿಲ್ಲಿಸುತ್ತಾರಾ? ಸಧ್ಯ ಗಂಡು ಹುಟ್ಟಲಿಲ್ಲವಲ್ಲಾ ಎಂದು ನಿಡುಸುಯ್ಯುತ್ತಾರಾ? ಹುಟ್ಟುವ ಮಗು ಹೆಣ್ಣೇ ಆಗಿರಲೆಂದು ಹಂಬಲಿಸುತ್ತಾರಾ? ಈಗಿರುವ ಎಲ್ಲವೂ ತಿರುವು ಮುರುವು ಆಗುವುದಾ? ಅಥವ ಇದೆಲ್ಲ ಎಲ್ಲಿಗೆ ಹೋಗಿ ಮುಟ್ಟೀತು? ಹೀಗೆ ಇದೆಲ್ಲ ಎಲ್ಲಿಗೆ ಮುಟ್ಟಿದರೂ ಆರೋಗ್ಯಕರ ಸಮಾಜಕ್ಕೆ ಇದು ತಕ್ಕುದಾದೀತಾ? ಎಂದು ಯೋಚಿಸಿದಷ್ಟೂ ಸಂಕಟವಾಗುತ್ತದೆ…!

—-

ಕಾದಂಬಿನಿ

ಹೈಡ್ರೋ ಇಂಜಿನಿಯರ್ಸ್ ಕಂಪನಿಯಲ್ಲಿ ಆಫೀಸ್ ಎಕ್ಸಿಕ್ಯೂಟೀವ್. ಬಿಡುವಿನ ವೇಳೆಯಲ್ಲಿ ಬರೆಯುವ ಹವ್ಯಾಸ. ಕೆಲವು ಪತ್ರಿಕೆಗಳಲ್ಲಿ ಬರಹಗಳು ಪ್ರಕಟವಾಗಿವೆ.

Share

Leave a comment

Your email address will not be published. Required fields are marked *

Recent Posts More

  • 1 week ago No comment

    ನಮ್ಮ ಕಣ್ಣುಗಳೇಕೆ ಭಾರವಾಗುತ್ತಿವೆ?

          ಕವಿಸಾಲು           ತಿರುಕನ ಕನಸಲ್ಲ ನನ್ನದು ತಿರುಕನಲ್ಲ ಕಣ್ರಿ ನಾನು ನಿಮ್ಮ ಮರುಕ ಗಿರುಕ ಎಲ್ಲಾ ನನಗೆ ಹಿಡಿಸಲ್ಲ ಅವ್ರು ಕೋಟೆ ಕಟ್ಟಿ ನ್ಯಾಯ ನೀತಿಗಳ ತಮ್ಮಲ್ಲೆ ಬಚ್ಚಿಟ್ಟು ಒಳಗೆ ಬೆಚ್ಚಗೆ ಕೂತಿರಬಹುದು ನ್ಯಾಯಕ್ಕೆ ಕನ್ನ ಹಾಕೋ ನಾನು ತಿರುಕ ಹೇಗೆ ಆಗಬೇಕು? ತಿರುಕನದೇನೋ ಕನಸಿತ್ತು ನನ್ನದು ಕೂಡಾ ಕನಸೆಂದು ಆ ಕೋಟೆ ಒಳಗಿರುವವರು ಕನವರಿಸುತ್ತಿರಬಹುದು ಬೂದಿ ಮುಚ್ಚಿದ ...

  • 2 weeks ago No comment

    ಕೊಂಕಣಿ ಪ್ರತಿಭೆಯನ್ನರಸಿ ಕರ್ನಾಟಕಕ್ಕೆ ಬಂದ ಪ್ರಶಸ್ತಿ

        ಅತಿಥಿ           ಈ ಬಾರಿ ಕರ್ನಾಟಕವು ಎರಡು ಕೇಂದ್ರ ಸಾಹಿತ್ಯ ಅಕಾಡೆಮಿ ಯುವ ಪುರಸ್ಕಾರಗಳನ್ನು ತನ್ನ ಮಡಿಲಿಗೆ ಹಾಕಿಕೊಂಡಿತು ಎಂದರೆ ಅಚ್ಚರಿಯಾಗಬಹುದು. ಆದರೂ ಇದು ಸತ್ಯ. ಪ್ರಮಾದವೇನಾದರೂ ಆಯಿತೇ? ಒಂದೇ ಪುರಸ್ಕಾರವನ್ನು ಇಬ್ಬರಿಗೆ ಹಂಚಿರಬಹುದೇ? ಎಂದೆಲ್ಲ ಯೋಚಿಸಿ ತಲೆ ಕೆರೆದುಕೊಳ್ಳುತ್ತಿದ್ದೀರಾ? ಇಲ್ಲಿದೆ ನೋಡಿ ಉತ್ತರ. ಕನ್ನಡಕ್ಕೆ 2018ರ ಕೇಂದ್ರಸಾಹಿತ್ಯ ಅಕಾಡೆಮಿಯ ಯುವ ಪುರಸ್ಕಾರ ಘೋಷಣೆಯಾದಾಗಲೇ ಕರ್ನಾಟಕದ ಕೊಂಕಣಿ ಕವಯತ್ರಿ ವಿಲ್ಮಾ ...

  • 2 weeks ago No comment

    ಸಾಹಸದ ಆ ನಿಮಿಷಗಳು

            ಮೊದಲ ಬಾರಿಯಾದ್ದರಿಂದ ಕೆಲವೇ ನಿಮಿಷಗಳ ಈ ಜಿಗಿತದ ರೋಚಕತೆ ಒಂದು ತಿಂಗಳ ಕಾಲ ನನ್ನನ್ನು ಆವರಿಸಿದ್ದು ಸುಳ್ಳಲ್ಲ.         ಬ್ಯಾಂಕರುಗಳು, ಅಕೌಂಟೆಂಟುಗಳು ವರ್ಷದ ಮೊದಲಿಂದ ಹಿಡಿದು ಮಾರ್ಚಿ ತಿಂಗಳವರೆಗೆ ಭಾರೀ ಬ್ಯುಸಿಯಾಗುವಂತೆ ಇಂಗ್ಲೆಂಡಿನ ಸರ್ಕಾರೀ ದಂತ ವೈದ್ಯಕೀಯ ರಂಗದಲ್ಲೂ ಧಾವಂತ ಕಾಣಿಸಿಕೊಳ್ಳುತ್ತದೆ. ಸರ್ಕಾರದಿಂದ ಗುತ್ತಿಗೆ ಪಡೆದ ಕೆಲಸವನ್ನು ಮಾರ್ಚಿಯ ಕೊನೆಗೆ ಪೂರ್ತಿಗೊಳಿಸದಿದ್ದರೆ ಮುಂದಿನ ವರ್ಷದ ಕಾಂಟ್ರಾಕ್ಟ್ ನ್ನು ಕಳೆದುಕೊಳ್ಳುವ ...

  • 3 weeks ago No comment

    ಪ್ರಸಾದ್ ಪಟ್ಟಾಂಗ | ಫಿಫಾ ಫಿವರ್

    ಅಂದು ಎಲ್ಲರ ಕಣ್ಣುಗಳೂ ಬೇರೇನನ್ನೋ ದಿಟ್ಟಿಸುತ್ತಿದ್ದವು. ಅದೊಂದು ಸುಂದರ ರೆಸ್ಟೊರೆಂಟ್. ಆವರಣದ ಒಳಗೂ ಹೊರಗೂ ಬಂದವರಿಗೆ ಕುಳಿತುಕೊಳ್ಳಲು ಸಾಕಷ್ಟು ಜಾಗವಿರುವಂಥದ್ದು. ಜೊತೆಗೇ ಒಂದು ಪುಟ್ಟ ಮೈದಾನದಂತಿರುವ ಜಾಗವನ್ನೂ, ಈಜುಕೊಳವನ್ನೂ ಹೊಂದಿರುವ ಸುಸಜ್ಜಿತ ರೆಸ್ಟೊರೆಂಟ್. ನಾನು ಪ್ರತೀ ತಿಂಗಳು ಲುವಾಂಡಾಗೆ ಬಂದಿಳಿದಾಗಲೆಲ್ಲಾ ಇಲ್ಲಿಯ ಸಿಬ್ಬಂದಿಯೇ ನನಗೆ ಅನ್ನದಾತರು. ಹೀಗಾಗಿ ಎಲ್ಲೆಲ್ಲೂ ನನಗೆ ಪರಿಚಿತ ಮುಖಗಳೇ. ಅಂದು ಮಾತ್ರ ಸಿಬ್ಬಂದಿಯೊಬ್ಬ ಗಡಿಬಿಡಿಯಲ್ಲಿ ನನ್ನ ಆರ್ಡರ್ ಬರೆದುಕೊಂಡು ಅಷ್ಟೇ ಅವಸರದಲ್ಲಿ ಖಾದ್ಯಗಳನ್ನು ತಂದಿಟ್ಟು ...

  • 4 weeks ago No comment

    ಸವಿತಾ ನಾಗಭೂಷಣ ಪ್ರವಾಸ ಕಥನ | ದಾರಿಯೇ ದೈವ… ವೈಷ್ಣೋದೇವಿ

    ಪ್ರವಾಸಿ ಸವಿತಾ ಕಂಡ ಇಂಡಿಯಾ   ಇದು ನಾನು 2011ರ ಮಾರ್ಚ್ ತಿಂಗಳಲ್ಲಿ ನನ್ನ ಕೆಲ ಗೆಳತಿಯರೊಂದಿಗೆ ಒಂದು ಜನಸಾಮಾನ್ಯರ ಸಮೂಹದೊಂದಿಗೆ ಸಾಮಾನ್ಯ ದರ್ಜೆಯ ರೈಲು ಪ್ರಯಾಣದ ಮೂಲಕ ಕೈಗೊಂಡ ಭಾರತ ಯಾತ್ರೆಯ ಸಂದರ್ಭದಲ್ಲಿ ಮಾಡಿಕೊಂಡ ಟಿಪ್ಪಣಿಗಳನ್ನು ಆಧರಿಸಿ ಬರೆದ ಪುಟ್ಟ ಪ್ರವಾಸ ಕಥನ. ಇದು ಈಗಾಗಲೇ 12 ಭಾಗಗಳಲ್ಲಿ ಡಿ ಎಸ್ ನಾಗಭೂಷಣ ಅವರ ಸಂಪಾದಕತ್ವದ ‘ನವ ಮಾನವ’ ಸಮಾಜವಾದಿ ಮಾಸಿಕದ (ಈ ಪತ್ರಿಕೆ ನವೆಂಬರ್ 2011ರ ...


Editor's Wall

  • 11 May 2018
    2 months ago No comment

    ಕಾಂಗ್ರೆಸ್ ನಾಯಕರು ಜೈಲಲ್ಲಿ ಭಗತ್ ಸಿಂಗ್ ಭೇಟಿಯಾಗಿರಲಿಲ್ಲವಾ?

    ಭಾರತದ ಪ್ರಥಮ ಪ್ರಧಾನಿ ಜವಾಹರಲಾಲ್ ನೆಹರೂ ಅವರ ಆತ್ಮಚರಿತ್ರೆಯಲ್ಲಿಯೇ, ಅವರು ಭಗತ್ ಸಿಂಗ್ ಭೇಟಿಯಾಗಿದ್ದರೆಂಬುದರ ಕುರಿತ ವಿವರ ಸಿಗುತ್ತದೆ. “ಭಾರತದ ಸ್ವಾತಂತ್ರ್ಯಕ್ಕಾಗಿ ಹೋರಾಡಿದ್ದ ಭಗತ್ ಸಿಂಗ್, ಬಟುಕೇಶ್ವರ್ ದತ್, ವೀರ್ ಸಾವರ್ಕರ್ ಜೈಲಿನಲ್ಲಿದ್ದಾಗ ಅವರನ್ನು ಯಾರಾದರೊಬ್ಬ ಕಾಂಗ್ರೆಸ್ ನಾಯಕರು ಹೋಗಿ ಕಂಡಿದ್ದರಾ? ಆದರೆ ಕಾಂಗ್ರೆಸ್ ನಾಯಕರು ಭ್ರಷ್ಟನೊಬ್ಬ ಜೈಲಿನಲ್ಲಿದ್ದರೆ ಅವನನ್ನು ನೋಡಲು ಹೋಗುತ್ತಾರೆ” ಎಂದು ಪ್ರಧಾನಿ ನರೇಂದ್ರ ಮೋದಿ ಕರ್ನಾಟಕದ ಚುನಾವಣೆ ಪ್ರಚಾರ ಸಭೆಯಲ್ಲಿ ವಾಗ್ದಾಳಿ ನಡೆಸಿದ್ದರು. ಬ್ರಿಟಿಷ್ ...

  • 10 May 2018
    2 months ago No comment

    ಒಂದು ಪುಸ್ತಕ; ವಾರವಿಡೀ ಬಿಡುಗಡೆ!

    ಪುಸ್ತಕವೊಂದನ್ನು ಪ್ರಕಟಿಸಿದ ಬಳಿಕ ಅದರ ಬಿಡುಗಡೆ ಕಾರ್ಯಕ್ರಮವೂ ಕಡ್ಡಾಯವೆಂಬಂಥ ಕಾಲವಿತ್ತು. ಈಗಲೂ ಇಲ್ಲವೆಂದಲ್ಲ. ಆದರೆ ಸಾವಿರ, ಲಕ್ಷದ ಲೆಕ್ಕದಲ್ಲಿ ಹಣ ಸುರಿದು ವ್ಯವಸ್ಥೆ ಮಾಡುವ ಬಿಡುಗಡೆ ಕಾರ್ಯಕ್ರಮವು ಒಂದು ಪುಸ್ತಕದ ಕುರಿತ ಮಾತಿಗೆ ಬೇಕಾದ ಆಪ್ತ ವಾತಾವರಣವನ್ನು ಕಟ್ಟಿಕೊಡುತ್ತದೆಯೇ? ದುಡ್ಡಿನ ವಿಚಾರಕ್ಕಿಂತ ಹೆಚ್ಚಾಗಿ ಕಾರ್ಯಕ್ರಮ ಆಯೋಜನೆ ಬೇಡುವ ಶ್ರಮ ಬಹಳ ದೊಡ್ಡದು. ಹಾಲ್ ಬುಕ್ ಮಾಡಬೇಕಾದಲ್ಲಿಂದ ಹಿಡಿದು, ಅತಿಥಿಗಳನ್ನು ಗೊತ್ತುಮಾಡುವುದು, ಅವರಿಗೆಲ್ಲರಿಗೂ ಹೊಂದುವಂತೆ ದಿನಾಂಕ ನಿಗದಿಪಡಿಸುವುದು, ಆಮಂತ್ರಣ ಪತ್ರಿಕೆ ಪ್ರಕಟಿಸುವುದು, ...

  • 03 May 2018
    3 months ago No comment

    ಕಾದಂಬಿನಿ ಕಾಲಂ | ಏನಿಲ್ಲದಿದ್ದರೂ ಬದುಕು ದೂಡಬೇಕು

                      ಆಗೆಲ್ಲ ತಪಸ್ಸು ಮಾಡುವ, ದೇವರು ಪ್ರತ್ಯಕ್ಷವಾಗುವ ಮತ್ತು ಕೇಳಿದ ವರ ಕೊಡುವ ಕಥೆಗಳು ಮಸ್ತು ಚಾಲ್ತಿಯಲ್ಲಿದ್ದ ಕಾರಣ ನಾನು ದೇವರನ್ನು ಕಾಣುವ ಹಟಕ್ಕೆ ಬಿದ್ದು ತಪಸ್ಸು ಮಾಡುತ್ತಿದ್ದೆ.   ನನ್ನ ಜೊತೆ ಇವೆಲ್ಲ ಯಾವ ಕಾರಣಕ್ಕೆ ಘಟಿಸಿತ್ತೋ ಅರಿಯೆ. ಬಾಲ್ಯದಲ್ಲಿ ನಮ್ಮ ಮನೆಗೆ ನೆರೆಮನೆಯ ಒಬ್ಬ ಹೆಂಗಸು ಬರುತ್ತಿದ್ದರು. ಮೂಕಕ್ಕ ಎಂದು ಅವರನ್ನು ಎಲ್ಲರೂ ಕರೆಯುತ್ತಿದ್ದುದು. ...

  • 30 April 2018
    3 months ago No comment

    ಅತ್ಯಾಚಾರ, ಹೋರಾಟದ ಐದು ವರ್ಷಗಳು ಮತ್ತು ಆ ಪುಟ್ಟ ಗೂಡು

    ತನ್ನ ಬದುಕಿನ ಅಮೂಲ್ಯ ಘಳಿಗೆಯೇ ಇಂಥದೊಂದು ಘಟನೆಗೆ ಬಲಿಯಾದ ಆಘಾತದಲ್ಲಿರುವ ಆಕೆ ಒಮ್ಮೆ ಗೆಲುವಾದವಳಂತೆ ಕಂಡರೂ ಮತ್ತೆ ಗಂಭೀರಳಾಗುತ್ತಾಳೆ. ಎಷ್ಟು ಬೇಕೋ ಅಷ್ಟೇ ಮಾತು. ಕಟ್ಟಿಕೊಂಡಿದ್ದ ಕನಸೂ ಒಡೆದುಹೋಗಿದೆ.   ಅನ್ಯಾಯದ ವಿರುದ್ಧದ ಹೋರಾಟ, ಸಮಾಜದೆದುರು ದೊಡ್ಡ ಮನುಷ್ಯನಂತೆ ಕಾಣಿಸಿಕೊಳ್ಳುವ ಮುಖವಾಡ ತೊಟ್ಟುಕೊಂಡ ಮತ್ತು ಸಾಧ್ಯವಿರುವಷ್ಟೂ ವಾಮಮಾರ್ಗಗಳಿಂದ ಎಲ್ಲರನ್ನೂ ಎಲ್ಲವನ್ನೂ ನಿಯಂತ್ರಣದಲ್ಲಿಟ್ಟುಕೊಳ್ಳಬಲ್ಲಂಥ ಅತ್ಯಂತ ಬಲಿಷ್ಠ ದುಷ್ಟನೊಬ್ಬನನ್ನು ಎದುರುಹಾಕಿಕೊಳ್ಳುವ ದಿಟ್ಟತನ ಹೇಗೆ ಅಗಾಧ ಸಾಗರದ ನಟ್ಟ ನಡುವಿನ ಒಂದು ಸಣ್ಣ ...

  • 28 April 2018
    3 months ago No comment

    ಮೈಬಣ್ಣವೆಂಬ ಮಾನದಂಡ ಮತ್ತು ‘ವಿಪ್ಲವ’ ಮನಃಸ್ಥಿತಿಯ ರಾಜಕಾರಣ

    ಈ ‘ವಿಪ್ಲವ’ ಮನಃಸ್ಥಿತಿ ಅಧಿಕಾರಸ್ಥವಾದುದಾಗಿದೆ. ದೇವರು, ಧರ್ಮದ ಹೆಸರಲ್ಲಿ ಒಡೆಯುವುದನ್ನು ತನ್ನ ಪರಮೋನ್ನತಿ ಎಂಬಂತೆ ಭ್ರಮಿಸುವ ಈ ಕುರೂಪವು ಮನುಷ್ಯರ ಮೇಲೆ ಮನುಷ್ಯರನ್ನು ಎತ್ತಿಕಟ್ಟುತ್ತದೆ. ಹೆಣ್ಣಿನ ಮೇಲೆ ಹೆಣ್ಣನ್ನೇ ಅಸ್ತ್ರವಾಗಿ ಪ್ರಯೋಗಿಸುವ ಹುನ್ನಾರಗಳ ಮೂಲಕ, ನಿಜವಾದ ಸೌಂದರ್ಯವನ್ನು ನಾಶಗೈಯುತ್ತಿದೆ. 21 ವರ್ಷಗಳ ಕೆಳಗೆ ಅಂದರೆ 1997ರಲ್ಲಿ ವಿಶ್ವಸುಂದರಿ ಪಟ್ಟ ಗೆದ್ದ ಡಯಾನಾ ಹೇಡನ್ ಮೈಬಣ್ಣದ ಬಗ್ಗೆ ಅತಿ ಕೀಳು ಅಭಿರುಚಿಯಿಂದ ಮಾತನಾಡಿದ ತ್ರಿಪುರಾ ಮುಖ್ಯಮಂತ್ರಿ ವಿಪ್ಲವ್ ಕುಮಾರ್ ದೇವ್ ...