Share

ಎಲ್ಲರಿಗೂ ಗೊತ್ತು; ಯಾರಿಗೂ ಗೊತ್ತಿಲ್ಲ
ಸಂಪಾದಕ

ಒಂದು ಸಂಗತಿ ಹೇಳುವೆ.

ಕಳೆದ ಐದು ವರ್ಷಗಳಿಂದ ಒಂದು ಸಂಬಂಧದಲ್ಲಿರುವ ಯುವತಿಯೊಬ್ಬಳು ಮೂರು ವರ್ಷದ ಹಿಂದೆ ತನ್ನ ಬದುಕಿನಲ್ಲಿ ಬಂದ ಮತ್ತೊಬ್ಬನ ಬಗ್ಗೆ ಹೇಳಿಕೊಳ್ಳುತ್ತಿದ್ದಾಳೆ.

ಆ ಶನಿವಾರ ರಾತ್ರಿ ಪಾರ್ಟಿಯಲ್ಲಿದ್ದ ಅವಳಿಗೆ ಅದ್ಯಾರೋ ತನ್ನತ್ತಲೇ ಆಸೆ ತುಂಬಿಕೊಂಡು ನೋಡುತ್ತಿರುವಂತೆ ಅನ್ನಿಸುತ್ತದೆ. ಹೌದೊ ಅಲ್ಲವೊ ಎಂಬಂತಿದ್ದ ಅದನ್ನು ಖಾತ್ರಿಪಡಿಸಿಕೊಳ್ಳುವಷ್ಟರಲ್ಲಿ ಆತನೇ ಹತ್ತಿರ ಬಂದು ಪರಿಚಯಿಸಿಕೊಳ್ಳುತ್ತಾನೆ. ಸಿಕ್ಕಾಪಟ್ಟೆ ದುಡ್ಡಿರುವವನು. ತರುಣ. ಕಟ್ಟುಮಸ್ತಾಗಿರುವವನು. ಅಷ್ಟೇ ಸುಂದರ.

ಅವನೊಡನೆ ಬೆರೆತು ಕುಣಿಯಲು ಹೆಚ್ಚು ಹೊತ್ತು ಹಿಡಿಯುವುದಿಲ್ಲ. ನಡುರಾತ್ರಿಯವರೆಗೂ ಕುಣಿದ ಬಳಿಕ ಅವನನ್ನು ಕರೆದುಕೊಂಡೇ ತನ್ನ ಮನೆಗೆ ಬರುತ್ತಾಳೆ. ಆ ರಾತ್ರಿ ಅವನೊಂದಿಗೆ ಕಳೆದ ಅನುಭವ ತಾನು ಮತ್ತೆ ಮತ್ತೆ ಬಯಸುವಂಥದ್ದು ಎಂದೇ ಅವಳಿಗೆ ಅನ್ನಿಸುತ್ತದೆ.

ಅದಾಗಿ ಮೂರು ವರ್ಷಗಳು ಕಳೆದಿವೆ. ಆತನೊಂದಿಗಿನ ಸಂಬಂಧ ಅವತ್ತಿನದೇ ತೀವ್ರತೆಯೊಂದಿಗೆ ಮುಂದುವರಿದೇ ಇದೆ. ತನ್ನ ಮೊದಲ ಗೆಳೆಯನ ಜೊತೆಗೂ ಚೆನ್ನಾಗಿಯೇ ಇದ್ದಾಳೆ. ಐದು ವರ್ಷದಿಂದ ಜೊತೆಗಿರುವ ಗೆಳೆಯ ತುಂಬ ಒಳ್ಳೆಯವನು. ಸುಂದರನೂ ಹೌದು. ಅವನ ಬಗ್ಗೆ ತಕರಾರೆತ್ತುವುದಕ್ಕೆ ಅವಳ ಬಳಿ ಕಾರಣಗಳೇ ಇಲ್ಲ. ಅಂಥ ಗೆಳೆಯನ ಜೊತೆಗಿದ್ದೂ ಮತ್ತೊಬ್ಬನೊಂದಿಗೆ ದೈಹಿಕ ಸಂಬಂಧ ತಪ್ಪಲ್ಲವೇ ಎಂದು ಅವಳ ಈ ಕಥೆ ತಿಳಿದ ತಕ್ಷಣ ಹುಟ್ಟುವ ಪ್ರಶ್ನೆಯ ಬಗ್ಗೆಯೂ ಗೊತ್ತು ಅವಳಿಗೆ.

ಅವಳ ಪ್ರಕಾರ, ಇದಾವುದೂ ಅವಳು ಪಕ್ಕಾ ಯೋಜಿಸಿ ಆದದ್ದಲ್ಲ. ಅವನನ್ನು ನೋಡಿದ ತಕ್ಷಣ ಅವಳೊಳಗೊಂದು ಕಿಡಿ ಹೊತ್ತಿಕೊಂಡಿತು. ತಾನು ಈಗಾಗಲೇ ಒಬ್ಬನೊಂದಿಗೆ ಇರುವವಳು ಅನ್ನುವುದು ಆ ಘಳಿಗೆ ಒಂದು ವಿಷಯವೆನ್ನಿಸಲಿಲ್ಲ. ಅದೊಂದು ರಾತ್ರಿ ಬೇರೆಯವನೊಬ್ಬ ಬೇಕು ಅನ್ನಿಸಿಬಿಟ್ಟಿತ್ತು ಅಷ್ಟೆ.

ಬಳಿಕ ಮತ್ತಷ್ಟು ರಾತ್ರಿಗಳನ್ನು ಅವನೊಂದಿಗೆ ಕಳೆಯುತ್ತ ಬಂದಳು. ತಪ್ಪು ಎಂದೆನ್ನಿಸಲೇ ಇಲ್ಲ.

ಗೆಳೆಯನನ್ನು ತುಂಬ ಪ್ರೀತಿಸುವ ಅವಳಿಗೆ, ಅವನನ್ನು ಇನ್ನಾರೊಂದಿಗೋ ಹೋಲಿಸಿ ನೋಡುವ ಉದ್ದೇಶವಿಲ್ಲ. ಅವನು ಅವನೇ ಎಂಬುದರ ಬಗ್ಗೆ ಅವಳೊಳಗೆ ನಿಖರತೆಯಿದೆ. ಆದರೆ ಆ ಮತ್ತೊಬ್ಬನ ಬಗ್ಗೆ ಮನಸ್ಸು ತುಡಿಯುವಾಗ ಆಕೆ ಅಸಹಾಯಕಳು. ಹಾಸಿಗೆಯಲ್ಲಿ ಮಾತ್ರವಲ್ಲ, ಅದರಾಚೆಗೂ ಅವನು ತಾನು ನಿಜವಾಗಿಯೂ ಬಯಸುವ ಗಂಡಸು ಎನ್ನಿಸಿದೆ. ಪ್ರತಿ ಸಲವೂ ಅವನೆಡೆಗಿನ ತುಡಿತ ಒಂದು ಧಾವಂತದಂತಿರುತ್ತದೆ.

ಗೆಳೆಯನ ಜೊತೆಗಿನ ಸಹವಾಸ ಯಥಾ ಪ್ರಕಾರದ್ದು ಅನ್ನಿಸುವಾಗೆಲ್ಲ ಒಂದು ಬದಲಾವಣೆಗಾಗಿ ಆ ಮತ್ತೊಬ್ಬನ ಕಡೆಗೆ ಓಡುತ್ತಾಳೆ. ಅವನು ತನ್ನೊಂದಿಗಿದ್ದಾನೆಂಬುದು – ಅದು ಆ ಘಳಿಗೆಗಷ್ಟೇ ಸೀಮಿತವಾಗಿದ್ದರೂ, ಅವಳೊಳಗೆ ಹೊಸ ಉತ್ಸಾಹ ತುಂಬುತ್ತದೆ; ಗೆಳೆಯನೊಟ್ಟಿಗಿನ ಬದುಕನ್ನೂ ಉಲ್ಲಸಿತಗೊಳಿಸುತ್ತದೆ. ವಾರದ ಕಡೆಯಲ್ಲೊಂದು ದಿನ ಆ ಮತ್ತೊಬ್ಬನಿಲ್ಲದೇ ಹೋದರೆ ತನಗೆ ಬದುಕೇ ಇಲ್ಲ ಅನ್ನಿಸುವಷ್ಟು ಅವಳು ಆ ಇನ್ನೊಂದು ಸಂಬಂಧದ ವಶವಾಗಿದ್ದಾಳೆ.

ಆ ಮತ್ತೊಬ್ಬನ ಜೊತೆ ವಾರದಲ್ಲೊಮ್ಮೆ ಮಾತ್ರವೇ ಕಳೆಯುವ ನಿಯಮ ಹಾಕಿಕೊಂಡಿರುವ ಅವಳಿಗೆ, ಅದು ತಾನು ತನ್ನ ಗೆಳೆಯನಿಗೆ ಮಾಡುತ್ತಿರುವ ವಂಚನೆಯಲ್ಲ ಎಂದೇ ನಂಬಿಕೆ. ಗೆಳೆಯನೊಂದಿಗಿನ ಸಂಬಂಧ ಸಾಕು ಎನ್ನಿಸದಿರಲು ಮತ್ತು ಅದರಿಂದ ಹೊರಬರುವ ಯೋಚನೆ ಮಾಡದಿರಲು ಆ ಮತ್ತೊಬ್ಬನ ಜೊತೆಗಿನ ಸಂಬಂಧವೇ ಆಸರೆ ಎಂದುಕೊಂಡಿದ್ದಾಳೆ.

ಬದುಕಿನ ಏಕತಾನತೆಯನ್ನು ಮುರಿದು ಖುಷಿ ಕೊಡುವ ಆ ಸಂಬಂಧದ ಬಗ್ಗೆ ಅಪರಾಧಿ ಭಾವನೆಯ ಅಗತ್ಯವಿದೆಯೇ ಎಂಬುದು ಅವಳ ಮನಸ್ಸೊಳಗಿರುವ ಸಮರ್ಥನೆ. ಮಾತ್ರವಲ್ಲ, ತನ್ನ ಗೆಳೆಯ ಮಾಡದೇ ಇದ್ದಿರಬಹುದಾದ ಏನನ್ನಾದರೂ ತಾನು ಮಾಡಿಬಿಟ್ಟಿದ್ದೇನೆ ಎಂದೂ ಅಂದುಕೊಳ್ಳುವುದಿಲ್ಲ ಅವಳು.

ಕಳೆದೈದು ವರ್ಷಗಳಲ್ಲಿ ತನ್ನ ಗೆಳೆಯ ತನ್ನೊಬ್ಬಳನ್ನೇ ನೆಚ್ಚಿಕೊಂಡಿದ್ದಾನೆಂದು ಮುಗ್ಧೆಯಂತೆ ನಂಬುವುದೂ ಇಲ್ಲ. ವಿದೇಶ ಪ್ರವಾಸದಲ್ಲಿರುವಾಗ, ಪಾರ್ಟಿಯ ನೆಪದಲ್ಲಿ ಗೆಳೆಯರೊಡನೆ ಇಡೀ ರಾತ್ರಿ ಹೊರಗಿರುವಾಗ, ತನ್ನನ್ನು ಭೇಟಿಯಾಗುವಷ್ಟೂ ಪುರುಸೊತ್ತೇ ಇಲ್ಲದಿದ್ದಾಗ, ತಾನು ಸಿಟಿಯಿಂದ ಹೊರಗಿರುವಾಗ ಅವನು ಸುಮ್ಮನೆ ಕೂತು ತನ್ನ ಬಗ್ಗೆಯೇ ಯೋಚಿಸುತ್ತ ಕಳೆದುಬಿಡುತ್ತಾನೆಂದು ನಂಬುವ ಅಮಾಯಕಿ ಅವಳಲ್ಲ. ತನಗೆ ಅವನೊಟ್ಟಿಗೆ ಏಕತಾನತೆ ಕಾಡುವಂತೆ ಅವನಿಗೂ ತನ್ನ ವಿಚಾರದಲ್ಲಿ ಏಕತಾನತೆ ಕಾಡಿ, ಅವನೂ ಮತ್ತಾವಳಲ್ಲೋ ಅದಕ್ಕೊಂದು ಹೊರದಾರಿ ಹುಡುಕಿಕೊಂಡಿರದೇ ಇರಲಾರ ಎಂದುಕೊಳ್ಳುತ್ತಾಳೆ. ಇದಕ್ಕಿಂತ ಹೆಚ್ಚಾಗಿ, ತಾನಿಲ್ಲದಿದ್ದಾಗ ಅವನು ಹೀಗೆಲ್ಲ ಇದ್ದರೆ ಅವಳಿಗೆ ಅಭ್ಯಂತರವೇನಿಲ್ಲ ಎಂಬುದು. ತಮ್ಮಿಬ್ಬರ ಮಧ್ಯೆ ಪ್ರೇಮ ಇರುವವರೆಗೂ ನಡುವೆಯೊಮ್ಮೊಮ್ಮೆ ಬದುಕಿಗೆ ಹೊಸ ಹುರುಪು ತುಂಬುವ ಮತ್ತೊಂದು ಲೈಂಗಿಕ ಸಂಬಂಧ ತಪ್ಪಲ್ಲ ಎಂದುಕೊಳ್ಳುತ್ತಾಳೆ.

ತನ್ನ ಮತ್ತು ತನ್ನ ಗೆಳೆಯನ ನಡುವೆ ಸಂಬಂಧ ಹದಗೆಡದಿರುವಂತೆ ಕಾಯುವ ಮತ್ತೊಂದು ಸಂಬಂಧ, ಉರಿದುಹೋಗುವಷ್ಟು ತೀವ್ರತೆಯ ಆ ಒಂದು ರಾತ್ರಿಯ ಲೈಂಗಿಕ ಸುಖ ಯಾವ ಕಾರಣಕ್ಕಾದರೂ ತಪ್ಪು ಎಂಬುದು ಅವಳ ಪ್ರಶ್ನೆ.

*

ಸಂಬಂಧಗಳ ಕುರಿತ ಪರಿಕಲ್ಪನೆಗಳು ಬದಲಾಗಿರುವ ಈ ಕಾಲದಲ್ಲಿ, ಅದನ್ನು ವ್ಯಾಖ್ಯಾನಿಸಿಕೊಳ್ಳುವ ಇಂಥ ವೈಯಕ್ತಿಕ ನಿಲುವುಗಳೂ ಹಲವು. ಇಲ್ಲಿರುವುದು ನಿಜವಾಗಿಯೂ ಸಂಬಂಧವನ್ನು ಕಾಪಾಡಿಕೊಳ್ಳುವ ಶ್ರದ್ಧೆಯೊ ಅಥವಾ ತೀರಾ ದೈಹಿಕವಾದದ್ದನ್ನು ತಣಿಸಿಕೊಳ್ಳಲು ಹುಡುಕಿಕೊಳ್ಳುವ ಮರೆಯೊ?

ಗೆಳೆಯ ಗೆಳತಿಯರನ್ನು, ಗಂಡ ಹೆಂಡತಿಯರನ್ನು ಬದಲಿಸಿಕೊಂಡು ರುಚಿ ನೋಡುವ ಉನ್ನತ ಸಮಾಜದ ಸಭ್ಯಸ್ಥರ ಖಾಸಗಿ ದರ್ಬಾರುಗಳಿಗೆ ಅಷ್ಟೇ ದೊಡ್ಡ ರಕ್ಷಣೆಯ ಕವಚವೂ ಇರುತ್ತದೆ. ಅಂಥ ಯಾವ ರಕ್ಷಣೆಯೂ ಇಲ್ಲದ ತಳ ಸಮಾಜದವರ ಕಾಳಜಿಯಾಗಲಿ, ಲಾಲಸೆಯಾಗಲಿ ಬಂದು ನಿಲ್ಲುವುದು ಮಾತ್ರ ಬೀದಿಗೆ.

ದೇವಿ ಅಂತ ಒಬ್ಬಳು ಹೆಂಗಸು ಇದ್ದಳು. ಚಿಕ್ಕವರಿದ್ದಾಗ ನಮಗೆ ಕಥೆಗಳನ್ನು ಹೇಳುತ್ತಿದ್ದವಳು. ನಾನು ಕಾಲೇಜು ಓದುತ್ತಿದ್ದ ದಿನಗಳಲ್ಲಿ ಒಂದಿನ ಅವಳು ನಮ್ಮ ಮನೆಗೆ ಬಂದು ನನ್ನ ಅಪ್ಪ ಅಮ್ಮನ ಮುಂದೆ ತುಂಬಾ ಆವೇಶದಿಂದ ತನ್ನ ಮನೆಯ ಗೋಳು ಹೇಳಿಕೊಳ್ಳುತ್ತಿದ್ದಳು. ಕಳೆದ ರಾತ್ರಿ ಅವಳ ಮನೆಯಲ್ಲಿ ಜಗಳವಾಗಿತ್ತು. ಅವಳ ಮಗಳ ಗಂಡ ದೊಡ್ಡ ರಂಪ ಮಾಡಿದ್ದ. ಹೆಂಡತಿ ತನ್ನ ಬಳಿ ಮಲಗಲು ಬರಲಿಲ್ಲ ಎಂಬುದು ರಂಪದ ಕಾರಣವಾಗಿತ್ತು. ಅವಳು ಬರದಿದ್ದರೆ ಏನು, ತಾನಿರಲಿಲ್ಲವೇ ಅನ್ನೋದು ನನ್ನ ಅಪ್ಪ ಅಮ್ಮನ ಮುಂದೆ ದೇವಿ ಎತ್ತುತ್ತಿದ್ದ ಪ್ರಶ್ನೆಯಾಗಿತ್ತು. ಅವಳ ಮಾತು ಕೇಳಿಸಿಕೊಂಡು ಸುಮ್ಮನೆ ಹೂಂಗುಟ್ಟುವಂತೆ ಮಾಡಿದ ನನ್ನ ಅಪ್ಪ ಅಮ್ಮ, ಅವಳು ಹೋದ ಮೇಲೆ ಮುಸಿ ಮುಸಿ ನಗತೊಡಗಿದ್ದರು. ದೇವಿ ಎತ್ತಿದ್ದ, ನೈತಿಕತೆಯೆಂಬುದರ ದುರಹಂಕಾರವನ್ನೇ ಭಂಗಗೊಳಿಸುವಂಥ ಆ ಪ್ರಶ್ನೆಯಲ್ಲಿದ್ದದ್ದು ತೃಷೆಯಾ, ಉನ್ಮತ್ತ ಭಾವವಾ, ಅಥವಾ ಇದಾವುದೂ ಅಲ್ಲದ ಆಳದ ಸಂಕಟ ಮಾತ್ರವಾ?

ಮುಕ್ತ ಸಂಬಂಧ ಎಂಬ ಹೆಸರಿನ ಅನುಕೂಲಕರ ರಾಜಮಾರ್ಗವನ್ನು ಹುಡುಕಿಕೊಂಡಿರುವ ಇವತ್ತಿನ ಮನಃಸ್ಥಿತಿಗಳ ಇದಿರಲ್ಲಿ ದೇವಿ ಎತ್ತಿದ್ದ ಪ್ರಶ್ನೆ ಯಾಕೆ ಕಾಡುತ್ತದೆಂದರೆ, ನೈತಿಕತೆಯನ್ನು ಸಾಬೀತುಪಡಿಸಲು ಅವಕಾಶವೇ ಇದ್ದಿರದ ಚಕ್ರವ್ಯೂಹ ಸ್ಥಿತಿಯಲ್ಲೂ ಹುಟ್ಟಿದ್ದ ಪ್ರಶ್ನೆ ಅದೆಂಬುದಕ್ಕಾಗಿ.

*

ಲೈಂಗಿಕ ಸಂಬಂಧಗಳ ಕುರಿತ ತಾಕಲಾಟಗಳು, ಕಟ್ಟುಪಾಡುಗಳೇ ಇಲ್ಲದ ತೀರಾ ಉನ್ನತ ಅಥವಾ ಶ್ರೀಮಂತ ಸಮಾಜ ಮತ್ತು ತೀರಾ ಕೆಳ ಸ್ತರದ ಸಮಾಜ ಇವೆರಡರಲ್ಲೂ ಇಲ್ಲ. ಅದೇನಿದ್ದರೂ ಮಧ್ಯಮ ವರ್ಗದ ಸಮಾಜವನ್ನು ಕಾಡುವ ಬಿಕ್ಕಟ್ಟು. ಈ ನೈತಿಕತೆ ಅನೈತಿಕತೆಯ ತಾಕಲಾಟದಲ್ಲಿ ತಮಗೆ ತಾವೇ ಹಾಕಿಕೊಂಡ ಚೌಕಟ್ಟಿನೊಳಗೆ ಚಡಪಡಿಸುವವರೂ ಇರುತ್ತಾರೆ; ಚೌಕಟ್ಟು ದಾಟಿ ಮತ್ತೊಂದಕ್ಕೆ ಹಾತೊರೆಯುವವರೂ ಇರುತ್ತಾರೆ. ಮಧ್ಯಮ ವರ್ಗದವರ ಈ ದ್ವಂದ್ವದಲ್ಲೇ ಆಗಲಿ, ಉನ್ನತ ಅಥವಾ ಕೆಳ ಸ್ತರದ ಸಮಾಜದವರಲ್ಲಿನ ಸ್ವೇಚ್ಛೆಯಲ್ಲೇ ಆಗಲಿ ಇರುವ ಒಂದು ಸಾಮಾನ್ಯ ಅಂಶವೆಂದರೆ, ಸದ್ದಿಲ್ಲದೆ ಆವರಿಸಿಕೊಳ್ಳುವ ಕ್ರೌರ್ಯ.

ಶುರುವಿನಲ್ಲಿ ನಾನು ಪ್ರಸ್ತಾಪಿಸಿದ ಉನ್ನತ ವರ್ಗದ ಯುವತಿಯ ಸಂಗತಿಯಲ್ಲಿ, ಇರುವ ಸಂಬಂಧವನ್ನು ಹಾಗೇ ಇರಲು ಬಿಟ್ಟು ಹೊರಗಡೆಯ ಸಂಬಂಧಗಳನ್ನು ಸುಖಕ್ಕೆಂದು ಹುಡುಕಿಕೊಳ್ಳುವ ಕುರಿತದ್ದರ ಸಮ್ಮತಿ ಸಂಕುಚಿತವಲ್ಲದ ಧೋರಣೆಯೆಂಬಂತೆ ಕಂಡರೂ ಅದರ ಹಿನ್ನೆಲೆಯಲ್ಲಿರುವುದು ಒಂದು ಥರದ ಕ್ರೌರ್ಯವೇ.

ನೆತ್ತರ ವಾಸನೆಯಿಲ್ಲದ ಇದೊಂದು ತೆರನಾದರೆ, ಮತ್ತೊಂದು ಸಂಬಂಧದ ಇನ್ನೂ ಅತಿರೇಕಗಳೆಂಥವು ಎಂಬುದನ್ನು ದಿನನಿತ್ಯದ ಅದೆಷ್ಟೋ ಅಪರಾಧ ವರದಿಗಳಲ್ಲಿ ನೋಡುತ್ತಲೇ ಇದ್ದೇವೆ. ಇಲ್ಲೂ ಸಂಬಂಧವನ್ನು ಉಳಿಸಿಕೊಳ್ಳುವ ನೆಪಗಳೇ ಕಡೆಗೆ ರಕ್ತದ ಕಲೆಯಂಟಿಸಿಕೊಂಡು ಸಾಯುವುದು. ಅಕ್ರಮ ಸಂಬಂಧವನ್ನು ಉಳಿಸಿಕೊಳ್ಳುವುದಕ್ಕಾಗಿ ಗಂಡನನ್ನು ಕೊಲ್ಲುವುದು, ಹೆಂಡತಿಯನ್ನು ಹೊಡೆದು ಸಾಯಿಸುವುದು, ಸುಖಕ್ಕೆ ಅಡ್ಡಿಯಾಗುತ್ತಿದೆ ಎಂದು ಹೆತ್ತ ಮಗುವನ್ನೇ ಕೊಂದುಹಾಕುವಷ್ಟು ರಕ್ಕಸತನ ತೋರುವುದು ಇವೆಲ್ಲ ತಳ ಸಮಾಜದಲ್ಲೂ ಇವೆ; ಉನ್ನತ ಸಮಾಜದಲ್ಲೂ ಇವೆ.

ಪ್ರೇಮಿಯೊಂದಿಗೆ ಸೇರಿ ಗಂಡನನ್ನು ಕೊಂದು ಸಿಕ್ಕಿಬಿದ್ದ ಬಳಿಕ ಆಂಧ್ರದ ಹೆಣ್ಣುಮಗಳೊಬ್ಬಳು, ಕೊಲ್ಲುವಾಗ ತಾನು ಆತನ ಕಾಲುಗಳನ್ನು ಮಿಸುಕಾಡುವುದಕ್ಕೇ ಆಗದ ಹಾಗೆ ಗಟ್ಟಿಯಾಗಿ ಹಿಡಿದುಕೊಂಡಿದ್ದೆ ಎಂದು ನಗುನಗುತ್ತ ಮಾಧ್ಯಮಗಳ ಕೆಮರಾ ಮುಂದೆ ಹೇಳಿದ್ದಳು. ಉನ್ನತ ಸಮಾಜದ ಗಂಡು ಹೆಣ್ಣುಗಳು ಮತ್ತೊಂದು ಸಂಬಂಧಕ್ಕಾಗಿ ಹೆಂಡತಿ ಅಥವಾ ಗಂಡನನ್ನು ಕೊಲ್ಲಲು ರೂಪಿಸಿದ್ದ ತಂತ್ರಗಳು ಪೊಲೀಸರ ಮುಂದೆ ಬಯಲಾದಾಗ ಬೆಚ್ಚಿಬೀಳುವ ಹಾಗಾಗುತ್ತದೆ.

ಸಂಬಂಧವೆಂಬುದು ಕ್ರೌರ್ಯದ ಸುಳಿಯಲ್ಲಿ ಸಿಲುಕುವುದು ವಾಂಛೆಯ ಗೀಳಿನಿಂದಾಗಿ. ಅದಿಲ್ಲದೆ ಇರಲಾರೆ ಎಂಬ ಸ್ಥಿತಿ ಕರುಳ ಕುಡಿಯನ್ನೂ ಹೊಸಕಿಹಾಕುವ ಹಂತಕ್ಕೆ ಕರೆದೊಯ್ದುಬಿಡುವುದೆಂದರೆ ಎಂಥ ವಿಪರ್ಯಾಸ ನೋಡಿ. ಸಂಬಂಧ ಎಂಬುದು ಗಂಡು ಹೆಣ್ಣಿನ ನಡುವಿನ ಭಾವನಾತ್ಮಕ ಬೆಸುಗೆ ಎಂಬುದಕ್ಕಿಂತ ದೈಹಿಕವಾದುದೆಂದೇ ಅರ್ಥ ಪಡೆಯುವ ಅಥವಾ ದೈಹಿಕವಾದದ್ದು ಮಾತ್ರವಾಗುವ ಯಾವುದೇ ಕಾಲ ಮತ್ತು ಸಮಾಜದಲ್ಲಿನ ವಿಪರ್ಯಾಸ ಇದು.

ವಾಂಛೆಗೆ ಬಿದ್ದು ಹುಟ್ಟಿಕೊಂಡ ಸಂಬಂಧಗಳಲ್ಲಿ ಕಾಣಿಸುವ ಇನ್ನೂ ಒಂದು ಆಯಾಮ ಜಾತಿ ಮತ್ತು ಅಧಿಕಾರ ಬಲದ ನೆರಳಿನದ್ದು. ಇಲ್ಲಿ ತಲತಲಾಂತದಿಂದ ನಡೆದುಕೊಂಡ ಬಂದ ಲೈಂಗಿಕ ಶೋಷಣೆಯ ಮುಖವನ್ನೂ ಕಾಣುವುದು ಸಾಧ್ಯ. ಮೇಲ್ಜಾತಿಯ ಅಥವಾ ಅಧಿಕಾರಸ್ಥ ಗಂಡು ಹೆಣ್ಣುಗಳು ಕೆಳವರ್ಗದ ಇಲ್ಲವೆ ದುರ್ಬಲ ಸ್ಥಾನದಲ್ಲಿರುವ ಹೆಣ್ಣು ಗಂಡುಗಳನ್ನು ತಮ್ಮ ತೃಷೆಗೆ ಬಳಸಿಕೊಳ್ಳುವ ಮತ್ತು ತೀರಾ ವಿಷಮ ಸ್ಥಿತಿಯಲ್ಲಿ ಕೊಲ್ಲುವುದಕ್ಕೂ ಹೇಸದ ಕ್ರೌರ್ಯದ ಬೇಕಾದಷ್ಟು ಕಥೆಗಳು ನಡೆದುಹೋಗಿವೆ, ನಡೆಯುತ್ತಲೂ ಇವೆ. ಮೇಲ್ಜಾತಿಯ ಗಂಡಸೊಬ್ಬ ಹೆಣ್ಣಾಳನ್ನು ಲೈಂಗಿಕವಾಗಿ ಶೋಷಿಸುತ್ತಿದ್ದರೆ, ಅವನ ಹೆಂಡತಿಯಾದವಳು ಗಂಡಾಳಿನ ಜೊತೆ ಲೈಂಗಿಕ ಸುಖಕ್ಕಾಗಿ ಮಲಗುವ ಕರಾಳತೆ. ಕಡೆಗೆ ಮರ್ಯಾದೆ ಹೋಗುವ ಪರಿಸ್ಥಿತಿ ಬಂದರೆ ಅದಕ್ಕೆ ಬಲಿಯಾಗುವುದು ಕೆಳವರ್ಗದ ಪ್ರೇಮಿಯೇ. ದೊಡ್ಡವರಾದವರು ಏನೂ ಆಗಿಯೇ ಇಲ್ಲವೆಂಬಂತೆ ನಿರಾಳವಾಗಿ ಮೆರೆಯುತ್ತಾರೆ. ಅವರ ಕಣ್ಣು ಮತ್ತೊಂದು ಬೇಟೆಯನ್ನು ಹುಡುಕುತ್ತಿರುತ್ತದೆ.

*

ಈ ಅತಿ ತಣ್ಣಗಿನ ಕ್ರೌರ್ಯ ಏನು? ಇಲ್ಲಿ ಉಳಿವಿನ ಪ್ರಶ್ನೆಯೊಂದು ಯಾರನ್ನೋ ಕೊಲ್ಲುವುದಕ್ಕಾಗಿ ಹೊಂಚಿರುತ್ತದೆ. ಸಂಬಂಧವನ್ನು ಕಾಯುವ ಉದ್ದೇಶವೆಂಬುದು ಅಲ್ಲೆಲ್ಲೋ ಸತ್ತುಹೋಗಿರುತ್ತದೆ. ನಾವು ದುರಂತ ಎಂದು ಬಣ್ಣಿಸುವ ಈ ಕಥೆಯಲ್ಲಿ ಮತ್ತಾರದೋ ಸುಖದ ಬೇಳೆ ಬೇಯುತ್ತಿರುತ್ತದೆ.

ಇದು ಎಲ್ಲರಿಗೂ ಗೊತ್ತು; ಯಾರಿಗೂ ಗೊತ್ತಿಲ್ಲ.

Share

Leave a comment

Your email address will not be published. Required fields are marked *

Recent Posts More

  • 2 weeks ago No comment

    ಕವಿಸಾಲು | ಇಂಡೋನೇಶಿಯಾ

        ಕವಿಸಾಲು         ಕಿಚ್ಚೆದ್ದು ಕುಣಿವ ನೀರು ಬಿರುಗಾಳಿ ತುಂಬಿದ ಒಡಲು ಎತ್ತೊಯ್ದು ಬಿಸಾಡಿ ಇಳೆಗೆ ಎದೆಯಿಳಿಸಿದೆ ಕಡಲು ನಡುಗಿಬಿಟ್ಟಳೆ ವಸುಂಧರೆ ಶತಕೋಟಿ ಬಿರುಕು ಬಿಟ್ಟು ಸುನಾಮಿಯ ಕೋಪಕ್ಕೆ ವಿಕಾರವಾಗಿ ಬೊಬ್ಬಿರಿದು ಊಳಿಟ್ಟು ಜೀವ ಜಲ, ಉಸಿರ ಗಾಳಿ ಹುಚ್ಚೆದ್ದು ಕುಣಿದು ಅಪ್ಪಳಿಸಿದ ಆಘಾತಕ್ಕೆ ಕಂಗೆಟ್ಟು ತತ್ತರಿಸಿವೆ ಪ್ರಾಣಿ, ಮನುಜ ಕುಲ ಮಾಡು ಹಾರಿ, ಕಂಬಗಳು ಕುಸಿದು ನೆಲಕಚ್ಚಿವೆ ಮಾನವನ ಬೀಡು ಕತ್ತರಿಸಿ ...

  • 2 weeks ago No comment

    ಕವಿಸಾಲು | ತಡವಿಲ್ಲದಿರಲಿ ಇನ್ನು…

        ಕವಿಸಾಲು         ದಾಳಿಗಳಿಗೆ ಮುಕ್ಕಾದ ಮಂದಿರವಿದು ಕುಸಿದು ಕುಳಿತ ದ್ವಾರಪಾಲಕರು ಎತ್ತರದ ಗೋಡೆಗಳ, ಎಚ್ಚರಿಕೆಯ ಗಂಟೆಗಳು ಕೂಡ ಮೌನವಿಂದು ಮನ ನಿರ್ಮಿಸಿದ ಹೆಬ್ಬಾಗಿಲುಗಳು ಒಲವ ಸಿರಿಗೆ ಚೇತರಿಸಿ ತೆರೆದ ಗಳಿಗೆ ಎತ್ತರದ ಹೊಸ್ತಿಲುಗಳ ತಡೆಯ ದಾಟಿ ತಲುಪಬೇಕಿದೆಯಷ್ಟೆ ಬಯಕೆ ಗುರಿಯನ್ನು ದಟ್ಟ ಹಸಿರಿನ ಕಾಡು, ಆಗಸದ ನೀಲಿ ಬಿಳಿಯ ಮೋಡಗಳ, ಬಿಸಿಲ ಬೆಳಕಿನ ನಡುವೆ ಬಯಲ ಸ್ವೇಚ್ಛೆಯ, ತಿಳಿಗಾಳಿ ತವಕದಲಿ ಬಂಧನಗಳ ...

  • 4 weeks ago No comment

    ಸ್ವಿಟ್ಜರ್ಲ್ಯಾಂಡಿನ ಕಣ್ಮಣಿ – ಲ್ಯೂಸರ್ನ್

        ನಾನಾ ಆಕರ್ಷಣೆಗಳಿರುವ ಈ ನಗರ ಪ್ರವಾಸಿಗರನ್ನು ಸೂಜಿಗಲ್ಲಿನಂತೆ ಆಕರ್ಷಿಸುತ್ತದೆ. ಸ್ವಲ್ಪವೂ ಬೇಸರ ತರಿಸದ ಸುಂದರ ಸ್ವಿಸ್ ನಗರಿ.         “ನಾಳೆ ಸ್ವಿಟ್ಜರ್ಲ್ಯಾಂಡ್” ಎಂದ ಕೂಡಲೇ ಬಸ್ಸಿನಲ್ಲಿ ಹರ್ಷೋದ್ಗಾರ! ಯೂರೋಪಿನ ಪ್ರವಾಸದಲ್ಲಿದ್ದ ನಮಗೆಲ್ಲ ಸ್ವಿಟ್ಜರ್ಲ್ಯಾಂಡ್ ಹೆಸರು ಇಂಪಾಗಿ ಕೇಳಿಸಲು ಕಾರಣಗಳು ಹಲವು. ಮೈಲುಗಟ್ಟಲೆ ಹಸಿರು ನೆಲ, ಹಚ್ಚಹಸಿರು ತುಂಬಿದ ಬೆಟ್ಟಗಳು, ಪರ್ವತಗಳಲ್ಲಿನ ಹಿಮ ಕರಗಿ ಜುಳಜುಳನೆ ಹರಿವ ತಿಳಿ ಬೂದು, ಬಿಳಿ ಬಣ್ಣದ ...

  • 1 month ago No comment

    ಕವಿಸಾಲು | ಒಲವಿನಾಟ

        ಕವಿಸಾಲು       ಶರದೃತು ತೂರಿದ ಪುಂಡ ಗಾಳಿಗೆ ಎಲೆಗಳೆಲ್ಲ ಹಾರಿ ಉದುರಿ ಮಳೆಗೆ, ಬಿಸಿಲ ಝಳಕ್ಕೆ ಒಡಲನೊಡ್ಡಿ ಹಾಡೋ ಹಕ್ಕಿಯ ಗೂಡು ಬರಿದು ಮೈಯ ಕೊಂಕಿಸಿ, ತಲೆಯ ಹೊರಳಿಸಿ ಚಳಿಯ ಮುಸುಕಿನಲ್ಲಿ ಕಂಪಿಸಿದ ಮರಕ್ಕೆ ಚಿಗುರ ಬಯಕೆಯ ನಸು ಪುಳಕ ಹಸಿರ ಉಸಿರಿನ, ಹಕ್ಕಿ ಹಾಡಿನ ಕನಸ ಹೊದಿಕೆಯ ಬಿಸಿ ಒಡಲು ತುಂಬಲು ಬಯಕೆಯಾಗಿ ಟೊಂಗೆ-ರೆಂಬೆಗಳಲಿ ಕವನ ಸದ್ದು ಗದ್ದಲವಿಲ್ಲದೆ ಇತ್ತ ಒಲವಿನೋಲೆಯ ...

  • 1 month ago No comment

    ಕವಿಸಾಲು | ನಕ್ಷತ್ರ ನಾವೆ

      ಕವಿಸಾಲು       ಮೋಡವೇ ಮನೆಯೊಳಗೆ ಇಳಿದಂತೆ ದಟ್ಟವಾದ ಹೊಗೆ ಮನೆಜಂತಿಗಳ ತುಂಬಾ ನೇತುಕೊಂಡಿದೆ ಚುಕ್ಕಿಗಳೇ ಮನೆಯ ಜಂತಿಗಳಲಿ ಯಾತ್ರೆ ಹೊರಟಂತೆ ಕಂಡರು ಮಿನುಕು ಹುಳುಗಳ ಹಾಗೆ ಚಿಮಣಿದೀಪದ ನೆರಳು ಸದಾ ಬೆನ್ನಿಗೆ ಗೋಡೆಗಳು ಅಕ್ಷರಶಃ ಬೂದಿಗುಡ್ಡದಂತೆ ಕಪ್ಪುಕಾಡಿಗೆಗಳ ಹಾಗೆ ಗೋಚರ ಬಾಗಿಲು ಕಿಟಕಿಗಳ ಮೂಲಕ ಬುಸುಗುಡುವ ಹೊಗೆ ಉಗಿಬಂಡಿಯ ಕಾಲಚಕ್ರದಲಿ ದಿನಗಳ ದೂಡಿದಂತೆ ಹೊಗೆಯ ಬೇಗೆಯಲಿ ಅವಳೆಂದೂ ಎದೆಗುಂದಲಿಲ್ಲ ಹಣೆಯ ಬೆವರಿನ ಗಟ್ಟಿ ತಾಜಾತನದ ...


Editor's Wall

  • 31 August 2018
    2 months ago No comment

    ಪ್ರಸಾದ್ ಪಟ್ಟಾಂಗ | ಓದು ಮಗು ಓದು…

        “ಮಕ್ಕಳಿಗಾಗಿ ಒಂದು ಪುಸ್ತಕ ಮಾಡಬೇಕಲ್ಲಾ… ಪಠ್ಯದಾಚೆಗೂ ಅವರು ಏನೇನು ಓದಬಹುದು ಎಂಬುದರ ಬಗ್ಗೆ ತಿಳಿಸುವಂಥದ್ದು” ಎಂದು ಟೆಲಿಫೋನ್ ಕರೆಯ ಮತ್ತೊಂದು ತುದಿಯಲ್ಲಿ ಅಂದು ಹೇಳುತ್ತಿದ್ದರು ಮಿತ್ರರಾದ ಗಣೇಶ್ ಕೋಡೂರು. ಓದು, ಬರವಣಿಗೆ, ಫೋಟೋಗ್ರಫಿ, ಪ್ರವಾಸ, ಕಾರ್ಯಕ್ರಮ, ಸಮಾಜಸೇವೆ, ಪ್ರಕಟಣೆ… ಹೀಗೆ ಎಲ್ಲದರಲ್ಲೂ ತೊಡಗಿಕೊಂಡಿರುವ ಗಣೇಶ್ ಅವರದ್ದು ಇದೊಂದು ಹೊಸ ಪ್ರಾಜೆಕ್ಟ್ ಇರಬೇಕು ಎಂದು ತಕ್ಷಣ ಅಂದುಕೊಂಡೆ ನಾನು. ಸದಾ ಕ್ರಿಯಾಶೀಲರಾಗಿರುವ ಗಣೇಶ್ ಕೋಡೂರು ಒಂದಲ್ಲಾ ಒಂದು ...

  • 30 August 2018
    2 months ago No comment

    ಕಾದಂಬಿನಿ ಕಾಲಂ | ತಮ್ಮ ಶವಪೆಟ್ಟಿಗೆಗೆ ತಾವೇ ಹೊಡೆದುಕೊಂಡ ಮೊದಲ ಮೊಳೆ

                        ಬಹುದೊಡ್ಡ ಪ್ರಜಾಪ್ರಭುತ್ವದ ಅಖಂಡ ಭಾರತವನ್ನು ಅಷ್ಟು ಸುಲಭವಾಗಿ ಸರ್ವಾಧಿಕಾರದ ಹಿಡಿತದಲ್ಲಿ ಬಂಧಿಸುವುದು ಸಾಧ್ಯವಿಲ್ಲ.   2019ರ ಲೋಕಸಭಾ ಚುನಾವಣೆಯ ಪೂರ್ವದಲ್ಲಿ ಅತ್ಯಂತ ಕಳವಳಕಾರಿ ಘಟನಾವಳಿಗಳು ಜರುಗುತ್ತಾ ಈ ದೇಶದ ಪ್ರಜ್ಞಾವಂತ ನಾಗರೀಕರ ಕಣ್ಣೆದುರು ಭಯದ ನೆರಳು ಕವಿಯುವಂತೆ ಮಾಡುತ್ತಿವೆ. ದೇಶದೊಳಗೆ ಕೊಲೆ, ಹಲ್ಲೆ, ಅತ್ಯಾಚಾರ, ಗಲಭೆ, ಸುಳ್ಳು ಸುದ್ಧಿ ಹಬ್ಬಿಸುವುದು, ಆತಂಕ ಸೃಷ್ಟಿಸುವುದು ಇನ್ನೂ ...

  • 26 August 2018
    2 months ago No comment

    ಗೆದ್ದು ಬೀಗುತ್ತಿರುವ ದುಷ್ಟ ರಾಜಕೀಯ ಮತ್ತು ಅಮರ್ತ್ಯ ಸೇನ್ ಮಾತುಗಳು

        ಜನರನ್ನೇ ಕೊಲ್ಲಲು ಜನಪ್ರಭುತ್ವವನ್ನು ದುರ್ಬಳಕೆ ಮಾಡಿಕೊಳ್ಳುವ ದುಷ್ಟತನಕ್ಕೆ ಕೊನೆಗಾಲ ಯಾವಾಗ?     “ಪ್ರಜಾಪ್ರಭುತ್ವ ಅಪಾಯದಲ್ಲಿರುವ ಈ ಹೊತ್ತಿನಲ್ಲಿ ಎಲ್ಲ ಕೋಮುವಾದಿಯೇತರ ಮತ್ತು ಬಿಜೆಪಿಯೇತರ ಶಕ್ತಿಗಳು ಒಂದಾಗಿ 2019ರ ಲೋಕಸಭಾ ಚುನಾವಣೆಯನ್ನು ಎದುರಿಸಬೇಕಿದೆ ಮತ್ತು ಇವುಗಳ ಜೊತೆಗೂಡಲು ಎಡಪಕ್ಷಗಳು ಹಿಂಜರಿಯಕೂಡದು.” ಇವು ನೊಬೆಲ್ ಪ್ರಶಸ್ತಿ ಪುರಸ್ಕೃತ ಅರ್ಥಶಾಸ್ತ್ರಜ್ಞ ಅಮರ್ತ್ಯ ಸೇನ್ ಅವರ ಮಾತುಗಳು. “ನಾವು ಸರ್ವಾಧಿಕಾರವನ್ನು, ಸರ್ವಾಧಿಕಾರಿ ಧೋರಣೆಯನ್ನು ವಿರೋಧಿಸಲೇಬೇಕಾಗಿದೆ. ಕೋಮುವಾದಿ ಬಲಪಂಥೀಯ ಪಡೆಗಳನ್ನು ವಿರೋಧಿಸಲು ...

  • 26 August 2018
    2 months ago No comment

    ಕಡು ಭಯಂಕರ ಕತ್ತಲೊಳಗೆ ಅವಳಂಥ ಅದೆಷ್ಟು ಜೀವಗಳೊ!

      ಅವಳೊಳಗೀಗ ಕನಸುಗಳೇ ಇಲ್ಲ. ಮಿಂಚು ಸ್ಫುರಿಸಬೇಕಿದ್ದ ಕಣ್ಣುಗಳಲ್ಲಿ ನಾಳೆಗಳನ್ನು ಚಿಂತಿಸುವ ಯಾತನೆ ಮಾತ್ರವೇ ಸರಿದಾಡುತ್ತಿದೆ.       ಒಂದು ವರದಿಯ ಪ್ರಕಾರ, ಕಳೆದ ಏಪ್ರಿಲ್ ಹೊತ್ತಿಗೆ ಹತ್ತಿರ ಹತ್ತಿರ ಏಳು ಲಕ್ಷದಷ್ಟು ರೋಹಿಂಗ್ಯಾಗಳು ಬಾಂಗ್ಲಾದೇಶದೊಳಕ್ಕೆ ಸೇರಿಕೊಂಡಿದ್ದಾರೆ. ಅವರಲ್ಲಿ ಅರ್ಧಕ್ಕರ್ಧದಷ್ಟು ಮಕ್ಕಳೇ. ಆ ಮಕ್ಕಳೆಲ್ಲ ಒಂದಲ್ಲ ಒಂದು ರೀತಿಯಲ್ಲಿ ದೈಹಿಕವಾಗಿ ಮತ್ತು ಭಾವನಾತ್ಮಕವಾಗಿ ದಮನಿತರು. ಆ ಮಕ್ಕಳ – ಅದರಲ್ಲೂ ಹೆಣ್ಣುಮಕ್ಕಳ ಬದುಕು ಎಂಥ ನರಕಮಯ ಎಂಬುದನ್ನು ...

  • 23 August 2018
    2 months ago No comment

    ಕಾದಂಬಿನಿ ಕಾಲಂ | ದುರ್ಬಲ ಗಳಿಗೆಗಳನ್ನೇ ಹೊಂಚುವ ಹದ್ದುಗಣ್ಣುಗಳೆದುರು ಹೆಣ್ಣು ದೇಹ

                        ಲೋಕದ ನೀತಿಯೇ ಅದಲ್ಲವೇ? ತನ್ನ ಮೂಗಿನ ನೇರಕ್ಕೆ ನ್ಯಾಯ ವಿತರಿಸುವುದು ಮತ್ತು ದುರ್ಬಲರನ್ನೇ ಅಲ್ಲವೇ ಬಲಿಗಂಬಕ್ಕೇರಿಸುವುದು?   ‘ಟೈಟಾನಿಕ್’ ಎನ್ನುವುದು ವಿಕೋಪದ ಸಂದರ್ಭದಲ್ಲಿ ಬಲಿಷ್ಠರ ಕೈ ಹೇಗೆ ಮೇಲಾಗುತ್ತದೆನ್ನುವುದಕ್ಕೆ ಒಂದು ಸಶಕ್ತ ರೂಪಕ. ಅಂಥಲ್ಲಿ ಕೆಳಗಿನವರನ್ನು ತುಳಿಯುವ, ಅವರ ಸವಲತ್ತುಗಳನ್ನು ಕಬಳಿಸಲು ಹವಣಿಸುವ ವಿಕರಾಳ ಆಟವೊಂದು ನಿರಾತಂಕವಾಗಿ ಜರುಗುತ್ತದೆ. ನೆನ್ನೆ ರಾತ್ರಿ ಒಬ್ಬ ಯುವಕ ...