Share

ಇಲ್ಲಿಗೆ ಕಥೆಯ ಮುಗಿಸಲಾಗಿದೆ
ಕಾದಂಬಿನಿ ಕಾಲಂ

 

 

 

 

 

 

 

 

 

 

 

ಉದ್ದಕ್ಕೂ ಅಸ್ಪೃಶ್ಯರೆಂದು ಮುಟ್ಟದೆ ದೂರಕ್ಕಟ್ಟಿದರೂ ಮರೆಯಲ್ಲಿ ತಳ ಸಮುದಾಯದ ಹೆಣ್ಣು ದೇಹಗಳನ್ನು ಯಾರು ಬೇಕಾದರೂ ನುಗ್ಗಬಹುದಾದ ಬೇಲಿಯಿಲ್ಲದ ಹೊಲಗಳೆಂದೇ ಮೇಲ್ಜಾತಿಗಳವರು ಭಾವಿಸಿದಂತಿದೆ.

 

 

ರ ಗದ್ದಲದಿಂದ ತುಸು ದೂರದಲ್ಲಿರೋಣವೆನಿಸಿ ನಾವಲ್ಲಿ ಮನೆ ತೆಗೆದುಕೊಂಡಿದ್ದೆವು. ಅಲ್ಲಿ ಕಡುಬಡ ದಲಿತರ ಅಪ್ರಾಪ್ತ ಹೆಣ್ಣುಮಗಳೊಬ್ಬಳು ಮೇಲ್ಜಾತಿಯ ಯುವಕನಿಂದ ಅತ್ಯಾಚಾರಕ್ಕೊಳಗಾಗಿ ಬಸಿರಾಗಿದ್ದಳು. ದಿನ ತುಂಬುವ ಹೊತ್ತಲ್ಲಿ ಗುಟ್ಟು ರಟ್ಟಾಗಿ ಬಾಲೆಯ ಮನೆಯವರು ಹುಡುಗನಲ್ಲಿ ನ್ಯಾಯಕ್ಕೆ ಪಟ್ಟು ಹಿಡಿದು ಕೂತಿದ್ದರ ವಾಸನೆ ಹಿಡಿದ ಪತ್ರಿಕೆಗಳ ಕೆಲವರು, ಊರಿನ ದೊಡ್ಡ ಹೊಟ್ಟೆಯವರು, ಪುಡಿ ಪುಢಾರಿಗಳು ಆದಿನ ಅವಳ ಮನೆಯಲ್ಲಿ ಜಮಾಯಿಸತೊಡಗಿದರು. ಯಾರದೋ ಯಜಮಾನಿಕೆಯಲ್ಲಿ ಹುಡುಗನ ಕಡೆಯವರೂ ಬಂದು ಸೇರಿಕೊಂಡರು. ಹುಡುಗಿಯ ಮನೆಯವರಲ್ಲಿ ಇದು ಭರವಸೆಯನ್ನೂ ಹುಡುಗನ ಮನೆಯವರಿಗೆ ಇದು ಪುಕ್ಕಲನ್ನೂ ಹುಟ್ಟಿಸಿತ್ತು. ಹುಡುಗಿ ತಲೆ ತಗ್ಗಿಸಿ ಅಪರಾಧಿಯಾಗಿ ನಿಂತಿದ್ದಳು. ಹುಡುಗ ಮಾತ್ರ ನಾಪತ್ತೆಯಾಗಿದ್ದ.

ಆದರೆ ಮಾತುಕಥೆ ಮಾತ್ರ ಹುಡುಗ ಹುಡುಗಿಯನ್ನು ಒಂದು ಮಾಡುವ ಕಡೆಗೆ ಹರಿಯುತ್ತಲೇ ಇಲ್ಲದೆ ಹುಡುಗಿಯೇ ಹುಡುಗನ ಮೈಮೇಲೆ ಬಿದ್ದು ಹೋದಳೆಂದೂ, ಗಂಡಸರು ಏನು ಮಾಡುತ್ತಾರೆಂದೂ, ಆದರೆ ಮರ್ಯಾದೆಯಿಂದ ಇರತಕ್ಕದ್ದು ಹೆಣ್ಣುಗಳ ಜವಾಬ್ದಾರಿಯೆಂದೂ, ಈಗ ನಡೆದಿರುವ ಅಷ್ಟಕ್ಕೂ ಅವಳೇ ನೇರ ಹೊಣೆಯೆಂದೂ ಮಾತುಕಥೆ ನಡೆದಿತ್ತು. ಮೊದಲಿಗೆ ಕಂಪ್ಲೇಂಟು, ಅನ್ಯಾಯ, ಮದುವೆ ಮಾಡಿಸುವುದು ಇಂಥ ಮಾತುಗಳನ್ನು ಸ್ವಲ್ಪ ದೃಢ ದನಿಯಲ್ಲಿ ಕೇಳುವ ಇರಾದೆಯಲ್ಲಿದ್ದ ಅವಳ ಪೋಷಕರ ಸಂಪೂರ್ಣ ದನಿ ಉಡುಗಿ ತಲೆಬಾಗಿ ಕೂರುವಂತಾಯಿತು. ಮೊದಲಿಗೆ ಈ ಎಲ್ಲ ಭರವಸೆ ಕೊಟ್ಟು ಕಂಪ್ಲೇಂಟು, ಕೋರ್ಟು ಕಛೇರಿಗಳ ಹಾದಿ ತಪ್ಪಿಸಿ ಮಾತಿಗೆ ಬಂದಿದ್ದ ಆಸಾಮಿಗಳ ಬಣ್ಣ ಬದಲಾಗಿತ್ತು. ಅವರ ಮಾತೆಲ್ಲ ಹುಡುಗನ ಪರಿವಾರದ ಮಾನ ಕಾಪಾಡುವ ಕಡೆಗೇ ಇದ್ದು ಈ ಮದುವೆಯನ್ನು ನಡೆಯಗೊಡದೆ, ಸುದ್ದಿಯೂ ಆಗಗೊಡದೆ ಒಂದಷ್ಟು ಹಣ ಕೊಟ್ಟು ಕೈ ತೊಳೆದುಕೊಳ್ಳುವ ಕಡೆಗೆ ಹೊರಳಿತ್ತು.

ಒಬ್ಬರಾದರೂ ದಿನ ತುಂಬಿದ ಹುಡುಗಿಯ ಹೆರಿಗೆ, ಮಗು, ತಾಯಿ ಮಗುವಿನ ಆರೋಗ್ಯ, ಅವರ ಭವಿಷ್ಯ, ಮಾನ, ಪ್ರಾಣ ಯಾವ ಕಡೆಯೂ ಯೋಚಿಸದೆ ಒಂದು ಲಕ್ಷ ರೂಪಾಯಿಗೆ ಡೀಲ್ ಮಾಡಲು ಕೂತರು. ಹುಡುಗನ ಕಡೆಯವರೂ ಗಟ್ಟಿಗರೇ ಆದ್ದರಿಂದ ಅದರ ಮೊತ್ತ ಇಳಿಕೆಯಾಗುತ್ತಲೇ ಹೋಗಿ ಕೊನೆಯಲ್ಲಿ ನಲವತ್ತೈದು ಸಾವಿರಕ್ಕೆ ಬಂದು ನಿಂತಿತು. ಈ ನಲವತ್ತೈದಕ್ಕೆ ಒಂದು ರೂಪಾಯಿ ಕಡಿಮೆಯೂ ಇಲ್ಲ ಹೆಚ್ಚೂ ಇಲ್ಲ. ದರ ಫಿಕ್ಸ್ ಆಗಿದ್ದೇ ಇದ್ದಕ್ಕಿದ್ದಂತೆ ಇನ್ನೊಂದು ಹೊರಳು ಪಡೆದುಕೊಂಡಿತು. ಇಷ್ಟೆಲ್ಲ ಚೌಕಾಶಿ ಮಾಡಿದ್ದ ತಮಗೆ ಇಂತಿಷ್ಟು ಪಾಲು ಬೇಕೆಂದೂ ಇಲ್ಲವಾದಲ್ಲಿ ಪತ್ರಿಕೆಯಲ್ಲಿ ಹುಡುಗನ ಹುಡುಗಿಯ ಫೋಟೋ ಸಮೇತ ಸುದ್ದಿ ಪ್ರಕಟಿಸುವುದಾಗಿಯೂ ಪತ್ರಿಕೆಯವರು ಕೂತರು. ಇದ್ದ ನಲವತ್ತೈದು ಸಾವಿರ ಪಾಲಾಗುತ್ತ ಆಗುತ್ತ ಐದು ಸಾವಿರ ಉಳಿಯಿತು. ಊರಿನ ಪುಂಡ ಬಡ್ಡಿಹಣದವನೊಬ್ಬ ತನಗೆ ಹಣ ಸಿಕ್ಕಲಿಲ್ಲವೆಂದು ಕ್ಯಾತೆ ತೆಗೆದು ಕೂತ. ಕೊನೆಯಲ್ಲಿ ಈ ಐದು ಸಾವಿರ ತನಗೆ ಕೊಟ್ಟಲ್ಲಿ ಮಂಗಳೂರಿಗೆ ಕರೆದೊಯ್ದು ಆಕೆಯ ಹೆರಿಗೆ ಮಾಡಿಸಿ ಆಕೆಯನ್ನು ಯಾರ ಮನೆಯಲ್ಲಾದರೂ ಕೆಲಸಕ್ಕೆ ಬಿಡುವುದಾಗಿ ಹೇಳಿ ಹಣ ಕಿತ್ತುಕೊಂಡ. ಹುಡುಗಿ ಇವನ ಹಿಂದೆ ಮಂಗಳೂರಿಗೆ ಹೋದದ್ದೇನೋ ಹೌದು. ಆಕೆ ಮತ್ತೆ ಹಿಂದಿರುಗಲಿಲ್ಲ. ಆಕೆ ಹೆತ್ತಳೋ ಸತ್ತಳೋ ಎಂಬ ಕುತೂಹಲ ಊರ ಮಂದಿಗೂ ಇರಲಿಲ್ಲ. ಸರಾಗವಾಗಿ ಅವನು ಹೆರಿಗೆ ಮಾಡಿಸಿ ಅವಳನ್ನು ಬೊಂಬಾಯಿಗೆ ಮಾರಿರ್ತಾನೆ ಎಂದು ಮಾತಾಡಿಕೊಂಡರು.

ಮತ್ತೂ ಕೆಲ ವರ್ಷಗಳ ಹಿಂದೆ ಇನ್ನೊಂದೂರಲ್ಲಿ ಇನ್ನೊಂದು ಘಟನೆ ನಡೆದಿತ್ತು. ತಳ ಸಮುದಾಯದ ಆರನೇ ಕ್ಲಾಸಿಗೆ ಹೋಗುವ ಚೀಂಕಲುಕಡ್ಡಿ ಬಾಲೆ ಬಸುರಾಗಿಬಿಟ್ಟಿದ್ದಳು. ಯಾರೆಂದು ಕೇಳುವ ಕುತೂಹಲಕ್ಕೆ ಜನರೂ ಜಮಾಯಿಸಿದ್ದರು. ಆದರೂ ಸುದ್ದಿಯನ್ನು ಪೋಲೀಸ್ ಸ್ಟೇಷನ್ ಮೆಟ್ಟಿಲು ಹತ್ತಲಾಗಲೀ ಯಾವುದೇ ಸಂಘಟನೆಗಳ ಗಮನಕ್ಕೆ ಬಾರದಂತೆ ಎಚ್ಚರ ವಹಿಸಲಾಗಿತ್ತು. ಆಕೆಯ ತಂದೆ ತಾಯಿ ಕೂಲಿ ಕೆಲಸಕ್ಕೆ ಹೋದ ಹೊತ್ತಲ್ಲಿ ಅವಳ ಗುಡಿಸಲಿಗೆ ಕೆಲ ಪಡ್ಡೆ ಹುಡುಗರು, ಗಂಡಸರು ಮುಗಿಬೀಳುತ್ತಿದ್ದರಂತೆ. ಇದನ್ನು ನೋಡಿದವರೂ ಆ ದಿನಗಳಲ್ಲಿ ನೋಡಿಯೂ ನೋಡದಂತಿದ್ದರು. ಇದರ ಫಲವಾಗಿ ಈ ಪುಟ್ಟ ಕೂಸು ಈ ಸ್ಥಿತಿಯಲ್ಲಿ ನಿಂತಿತ್ತು. ಕೋಣೆಯ ಏಕಾಂತದಲ್ಲಿ ಮಗು ಘಾಸಿಗೊಳ್ಳದಂತೆ ಗುಟ್ಟಾಗಿ ಕೇಳಬೇಕಾದ ಪ್ರಶ್ನೆಗಳನ್ನು ತುಂಬಿದ ಜನಜಂಗುಳಿಯಿಂದ ಜೋರು ಜಬರದಸ್ತಿನ ಧ್ವನಿಯಿಂದ ಬಾಲೆಯ ಮೇಲೆ ಎಸೆಯಲಾಯ್ತು. ಹುಡುಗಿ ತನ್ನ ಮನೆಯ ಹತ್ತಿರದ ತಳ ಸಮುದಾಯದವನೇ ಆದರೂ ಅವಳ ಜಾತಿಯವನಲ್ಲದ ಒಬ್ಬ ಜಬ್ಬು ಮುದುಕನನ್ನು ಬೊಟ್ಟುಮಾಡಿದಳು. ಮುದುಕನ ಹೆಂಡತಿ ಮಕ್ಕಳು ಈ ಆರೋಪ ಮುದುಕನ ಮೇಲೇಕೆ? ನಿನ್ನ ಹತ್ತಿರ ಅವನು ಬಂದಿದ್ದು ನಾವು ನೋಡಲಿಲ್ಲವೇ? ಇವನು ಬಂದಿದ್ದು ನಮಗೆ ಗೊತ್ತಿಲ್ಲವೇ? ಎಂದು ಜೋರು ಮಾತಾಡಿದಾಗ ಹುಡುಗಿ ಹೀಗೆ ಉತ್ತರಿಸಿದಳು:

“ಅವರೆಲ್ಲ ಸಾಕ್ಸ್ ಹಾಕಿಕೊಂಡು ಬರುತ್ತಿದ್ದರು. ಇವನು ಹಾಗೆಯೇ…” ಎಂದು.

ಮಾತುಕಥೆ ಇದೆ ಎಂದು ಗೊತ್ತಾಗುತ್ತಿದ್ದಂತೆ ಈ ಮಗುವಿನ ಬಸಿರ ಹೊರೆಯನ್ನು ಎಲ್ಲಿಯಾದರೂ ತಮ್ಮ ತಲೆಗೆ ಕಟ್ಟಿಯಾರೆಂದು ಬಾಲೆಗೆ ಯಾರೋ ಬಾಯಿಪಾಠ ಮಾಡಿಸಿದ ಉತ್ತರವಾಗಿತ್ತು ಅದು. ಕಾಂಡೋಮ್ ಎಂದು ಹೇಳಲೂ ತಿಳಿಯದ ಬಾಲೆ ಹೀಗೆ ಹೇಳಿದ್ದಳು. ಮುಂದೆ ಮೇಲಿನ ಪ್ರಕರಣದಲ್ಲಿ ಹೇಳಿದಂತಹದ್ದೇ ತರಹದಲ್ಲಿ ಮಾತುಕಥೆ ನಡೆದು ‘ನಾಯಿ ಮುಟ್ಟಿದ ಮಡಕೆಯನ್ನು ನಾಯಿ ಕೊರಳಿಗೇ ಕಟ್ಟು’ ಎಂಬ ಗಾದೆಯನ್ನು ಉಲ್ಲೇಖಿಸಿ ತುರ್ತಾಗಿ ಅಲ್ಲಿಯೇ ಮುದುಕನಿಗೆ ಈ ಬಾಲೆಯ ಹಾರ ಬದಲಿಸುವ ಮೂಲಕ ಮದುವೆ ಮಾಡಿಸಿ ಆ ಹೆಣ್ಣು ಮಗುವಿನ ಮೇಲೆ ಎರಗುತ್ತಿದ್ದ ಬಾಕಿ ಆತ್ಮಗಳಿಗೆ ಶಾಂತಿ ಲಭಿಸಿತೆಂದಾಯಿತು.

ಕೆಲ ದಿನಗಳಲ್ಲಿ ಮುದುಕನ ಹೆಂಡಿರು ಮಕ್ಕಳ ಹೊಡೆತ ಬಡಿತದ ನಡುವೆಯೇ ಹೇಗೋ ಹೆರಿಗೆಯಾಗಿ ಕೆಲ ದಿನಗಳಲ್ಲೇ ಹುಡುಗಿ ನಾಪತ್ತೆಯೂ ಆದಳು. ಒಂದೆರಡೇ ವರ್ಷದಲ್ಲಿ ಅದೇ ಬಸ್ ನಿಲ್ದಾಣದಲ್ಲಿ ಮೂಳೆಯ ಹಂದರವಾಗದ ಆ ಹುಡುಗಿ ಇಳಿದಿದ್ದಳು. ಮೈತುಂಬ ರೋಗ ಮೆತ್ತಿಕೊಂಡಿದ್ದ ಹುಡುಗಿ ಅದು ಹೇಗೆ ತನ್ನ ತವರು ಮನೆಯನ್ನು ಸೇರಿದಳೋ ಕಾಣೆ. ಏಡ್ಸ್ ಕಾಯಿಲೆ ತೀವ್ರ ಸ್ವರೂಪ ಪಡೆದುಕೊಂಡಿತ್ತು. ಮುಂಬಯಿಯ ವೇಶ್ಯಾವಾಟಿಕೆಗೆ ತನ್ನನ್ನು ಹೊತ್ತೊಯ್ದು ಮಾರಿದ ಕಥೆಯನ್ನವಳು ನರಳುತ್ತಾ ಹೇಳುತ್ತಿದ್ದಳು. ತಂದೆ ತಾಯಿ ಕೂಡ ಮುಟ್ಟಲು ಹೇಸುತ್ತಿದ್ದ ಬಾಲೆಯನ್ನು ಆ ಊರಿನ ಚರ್ಚಿನ ನರ್ಸ್ ತರಬೇತಿ ಪಡೆದಿದ್ದ ಲೀಲಾ ಎಂಬ ಮಲೆಯಾಳಿ ಕನ್ಯಾಸ್ತ್ರೀ ಪ್ರತಿದಿನ ಸ್ನಾನ ಮಾಡಿಸಿ, ಉಣಿಸಿ, ತಿನಿಸಿ, ಔಷಧ ಕೊಟ್ಟು ಸಾಯುವ ತನಕ ಸೇವೆ ಮಾಡಿದರು. ಈ ಚಿಕಿತ್ಸಾ ಹಂತದಲ್ಲಿಯೇ ನಾನು ಆ ಬಾಲೆಯನ್ನು ಒಂದೆರಡು ಸಲ ಕಂಡು ಬಂದಿದ್ದೆ.

ನಾನು ತುಂಬ ಚಿಕ್ಕವಳಿದ್ದಾಗ ನನ್ನ ಪಕ್ಕದ ಮನೆಯಾಕೆ ಹೆಂಗಸರ ಗುಂಪಲ್ಲಿ ಒಂದು ಸಣ್ಣ ಹುಡುಗಿಯನ್ನು ಊರಿನ ಕೆಲ ಗಂಡಸರು ಒಂದೆಡೆ ಕೂಡಿಹಾಕಿ ನಿತ್ಯ ಅತ್ಯಾಚಾರ ಮಾಡುತ್ತಿದ್ದರೆಂದೂ ಆಕೆಯ ಬೆತ್ತಲು ಶವ ಕೆರೆಯ ಬದಿ ತುಟಿ, ಮೈಕೈ ಗಾಯಗೊಂಡು ಊದಿಕೊಂಡ ಸ್ಥಿತಿಯಲ್ಲಿ ಬಿದ್ದಿದೆಯೆಂದೂ ಹೇಳುತ್ತಿದ್ದಳು. ಹೆಂಗಸರು ಯಾವ ಜಾತಿಯ ಹುಡುಗಿ ಎಂದು ಕೇಳಿದಾಗ ‘ಅನಿ ಕೋಣ್ ಮರಾಂಚೆ!’ (ಇನ್ಯಾರು ಹೊಲೆಯರವಳು) ಎಂದ ಮಾತು ಇನ್ನೂ ಕಿವಿಯಲ್ಲೇ ಇದೆ.

ವಿಜಯಪುರದಲ್ಲಿ ದಾನಮ್ಮ ಎಂಬ ಶಾಲಾ ಬಾಲಕಿಯ ಸಾಮೂಹಿಕ ಅತ್ಯಾಚಾರ ಮತ್ತು ಕೊಲೆಯ ವಿಚಾರವಾಗಿ ನನ್ನ ಗೆಳೆಯರು ಫೇಸ್ಬುಕ್ಕಿನಲ್ಲಿ ‘ಬಕೆಟ್ ಹಿಡಿದು ಪ್ರಕರಣವನ್ನು ಹಾದಿ ತಪ್ಪಿಸಿದರು’ ಎಂದು ಪೋಸ್ಟ್ ಹಾಕಿದ್ದನ್ನು ಕಂಡು ಇದೆಲ್ಲ ನೆನಪುಗಳೂ ಕಣ್ಣೆದುರು ಬಂದವು. ಒಂದು ಕಾಲದಲ್ಲಿ ದೃಶ್ಯ ಮಾಧ್ಯಮ ಇರಲಿಲ್ಲ. ನಂತರ ಅಲ್ಲಿಗೆ ಹೋಗುವ ಹಾದಿ ಗೊತ್ತಿರಲಿಲ್ಲ. ಈಗ ಎಲ್ಲವೂ ಇದೆ, ಎಲ್ಲ ದಾರಿಗಳೂ ಗೊತ್ತಿವೆ. ಆದರೆ ಮೀಡಿಯಾಗಳು ಎಂದೂ ದಲಿತ ದಮನಿತರ ದನಿಯಾಗುವುದಿಲ್ಲ. ಹೋರಾಟಕ್ಕೆ ಮುನ್ನುಗ್ಗುವವರಿದ್ದರೂ ಹೋರಾಟವನ್ನು ನೆಲಕಚ್ಚಿಸುವ ಉಪಾಯಗಳೂ ಈ ನೆಲಕ್ಕೆ ಕರಗತವಾಗಿವೆ.
ಹಾಗೆಂದೇ ಈ ಸಾಲುಗಳನ್ನು ಬರೆದೆ:

ಈ ಕಥೆಗಳು
ಇರುವುದಾದರೂ ಏತಕ್ಕೆಂದು ಭಾವಿಸಿದಿರಿ?
ಅಪ್ಪ ಕಟ್ಟಿಗೆಯ ಹೊರೆಯೊಂದ
ಮುರಿದು ಹಾಕಿ ಎನ್ನುತ್ತಾನೆ,
ಆಗದೆಂದು ಕೈ ಚೆಲ್ಲಿ ಕೂತ ಪುತ್ರರಿಗೆ
ಹೊರೆ ಬಿಡಿಸಿ
ಒಂದೊಂದೇ ಕಟ್ಟಿಗೆಯ ಮುರಿದು
ಹೊರೆಯ ತುಂಡರಿಸಿ ಎಸೆಯುವ
ಜಾಣ್ಮೆಯ ಜಾಣ್ಮೆಯಲಿ ಕಲಿಸುತ್ತಾನೆ..!

ಈಗಷ್ಟೇ…
ಹದ್ದು ಹಾರಾಡುವ
ಊರ ಹಾದಿಯಲಿ
ರಕ್ತದ ಮಡುವಲಿ
ಬರ್ಬರವಾಗಿ
ಅತ್ಯಾಚಾರವಾಗಿ ಕೊಲೆಯಾದ
ಪುಟ್ಟ ಬಾಲೆಯೊಬ್ಬಳ ಹೆಣಬಿದ್ದು…

ಅವರು ಚತುರ ಪುತ್ರರು
ಚಾತುರ್ವರ್ಣ್ಯದ ದುರ್ಗಮ ಕವಲುಗಳ
ಒಂದೊಂದಾಗಿ ಪಕ್ಕಕ್ಕೆ ಸರಿಸುತ್ತಾ ಸರಿಸುತ್ತಾ
ಒಳಹೊಕ್ಕು
ಕೆಳಗಿಳಿಯುತ್ತಾ ಇಳಿಯುತ್ತಾ…
ತಳದ
ದಮನಿತ ಕೇರಿಯ
ಗುಡಿಸಲ ಮೂಲೆಯಲಿ
ಒಬ್ಬೊಬ್ಬರನೇ ಕರೆದು
ಒಂದೊಂದಾಗಿ
ಮಾನ, ಪ್ರಾಣ, ಧನದ ತುಣುಕುಗಳೆಸೆದು…
ಕ್ಷಣದೊಳಗೆ
ಆ ಕಟ್ಟಿಗೆ ಹೊರೆಯ ಕಥೆಯ ನೀತಿಗೆ
ಪ್ರಾಯೋಗಿಕ ರೂಪ ಕೊಡಲಾಗಿದೆ
ಮತ್ತು
ಇಲ್ಲಿಗೆ
ಕಥೆಯ
ಮುಗಿಸಲಾಗಿದೆ.

ಉದ್ದಕ್ಕೂ ಅಸ್ಪೃಶ್ಯರೆಂದು ಮುಟ್ಟದೆ ದೂರಕ್ಕಟ್ಟಿದರೂ ಮರೆಯಲ್ಲಿ ತಳ ಸಮುದಾಯದ ಹೆಣ್ಣು ದೇಹಗಳನ್ನು ಯಾರು ಬೇಕಾದರೂ ನುಗ್ಗಬಹುದಾದ ಬೇಲಿಯಿಲ್ಲದ ಹೊಲಗಳೆಂದೇ ಮೇಲ್ಜಾತಿಗಳವರು ಭಾವಿಸಿದಂತಿದೆ. ನನ್ನೂರಿನ ಕ್ರೈಸ್ತ ಜಮೀನ್ದಾರರೂ, ಊರ ಗೌಡರೂ ಮತ್ತೂ ಯಾರು ಯಾರೋ ಆದಿಕರ್ನಾಟಕ ಕೇರಿಯ ಚಿಕ್ಕ ಬಾಲೆಯರಿಂದ ಹಿಡಿದು ಮುಪ್ಪಾನು ಮುದುಕಿಯಾದ ಹೆಣ್ಣುಮಕ್ಕಳನ್ನು ಬಳಸಿಕೊಳ್ಳುತ್ತಿದ್ದ, ಅದರಿಂದಾಗಿ ಮಕ್ಕಳು ಹುಟ್ಟುತ್ತಿದ್ದ, ಬಸಿರು ಬಾಣಂತನಗಳಲ್ಲಿ ಸಾವನ್ನಪ್ಪುತ್ತಿದ್ದ, ರೋಗಗ್ರಸ್ತವಾಗುತ್ತಿದ್ದ ದಾರುಣ ಕಥೆಗಳನ್ನು ನಾನು ಕಂಡಿದ್ದೇನೆ. ಇದನ್ನೇ ನನ್ನ ಕವಿತೆಯಲ್ಲೂ ಹಿಡಿದಿಡಲು ಯತ್ನಿಸಿದ್ದೂ ಇದೆ ನಾನು.

ಪ್ರಿಯಾ…
ಶತ ಶತಮಾನಗಳಿಂದ ಮುಚ್ಚಿರುವ
ನಿನ್ನೆದೆ ಬಾಗಿಲಲಿ
ಈ ಪ್ರೇಮೋನ್ಮತ್ತ ತಪ್ತ ಹೃದಯವನಿಟ್ಟು
ಹಾದಿಯುದ್ದಕೂ ಜೇನಿನೊಳದ್ದಿದ
ತುಟಿಯ ಮುತ್ತುಗಳ ಚೆಲ್ಲಿ
ನಿನ್ನ ಬರುವಿಕೆಯ ಭರವಸೆಯುದ್ದಗಲಕೂ
ನೋಟವ ಹರವಿ
ದಿವ್ಯಾಲಿಂಗನಕೆ ಕಾತರಿಸಿ
ಬಾಹುಗಳ ಚಾಚಿ
ಕಣ್ಣ ಬಾಗಿಲಲೇ ಕಾದುಕೂತಿದ್ದೇನೆ
ಮತ್ತು ನೀನಲ್ಲಿ…!

ಆ ಅಂಗಳದೊಳಗಲ್ಲಲ್ಲಿ
ಹಸಿದ ಕೂಸು ಕುನ್ನಿಗಳು
ದನಿಯಡಗಿ ಮುದುರಿಕೊಂಡ
ಬಾಗಿಲಿರದ ಗುಡಿಸಲೊಳಗೆ
ಕತ್ತಲಾಳದ ಮರ್ಮಸ್ಥಲದ
ದುಃಖದ ಬಿಕ್ಕುಗಳ ಮೇಲೆಲ್ಲ
ನಂಜು ನಖಗಳುಳಿಸಿದ ಗುರುತು…
ಕಳ್ಳ ಹೆಜ್ಜೆಗಳು ಮೆಟ್ಟಿಹೋದ
ಕಗ್ಗತ್ತಲಿಗೀಗ ಬೇಡದ ಇನ್ನೊಂದು
ಕಳ್ಳ ಬಸುರು!

ದಕ್ಷಿಣ ಅಮೇರಿಕಾದ ಮೆರಿಲ್ಯಾಂಡ್ ನಲ್ಲಿ ಗುಲಾಮಳಾಗಿದ್ದ ಹ್ಯಾರಿಯೇಟ್ ಬಾಯ್ಲೇ ಎಂಬುವವಳ ಮಗನಾಗಿದ್ದ ಫ್ರೆಡ್ರಿಕ್ ಡೊಗ್ಲಾಸ್ ತನ್ನ ಆತ್ಮಕಥನದಲ್ಲಿ ಇಂಥಹದ್ದೇ ದಾರುಣ ಕಥೆಯನ್ನು ಬರೆಯುತ್ತಾರೆ. ಆತ ತನ್ನ ತಾಯಿ ಗುಲಾಮಳಾಗಿದ್ದ ಬಿಳಿಯ ಒಡೆಯನೇ ತನ್ನ ತಂದೆ ಇದ್ದಿರಬಹುದೆಂದು ಊಹಿಸುತ್ತಾನೆ. ತನ್ನ ಬಾಲ್ಯದಲ್ಲಿ ತನ್ನ ತಾಯಿ ಬರಿಗಾಲಲ್ಲಿ ನಡೆದು ಹನ್ನೆರಡು ಮೈಲು ದೂರದ ಒಡೆಯನ ಹೊಲಕ್ಕೆ ತಾನು ನಿದ್ದೆಯಿಂದ ಏಳುವ ಮೊದಲೇ ಕೆಲಸಕ್ಕೆ ಹೋಗಿರುತ್ತಿದ್ದಳೆಂದೂ ತಾನು ನಿದ್ದೆಹೋದ ಎಷ್ಟೋ ಹೊತ್ತಿನ ಬಳಿಕ ಕೆಲಸದಿಂದ ಮರಳುತ್ತಿದ್ದಳೆಂದೂ ಐದು ಸಲಕ್ಕಿಂತ ಹೆಚ್ಚು ಸಲ ತಾನು ತಾಯಿಯನ್ನೇ ಕಂಡಿರಲಿಲ್ಲವೆಂದೂ ಕಂಡಿದ್ದಾದರೂ ಅತೀ ಸಣ್ಣ ಅವಧಿಯಲ್ಲಾದ ಕಾರಣ ತಾಯಿಯ ಕುರಿತು ವಿವರಿಸುವ ಶಕ್ತಿ ತನಗಿಲ್ಲವೆಂದೂ, ಹೀಗೆಯೇ ಆಕೆ ಸತ್ತುಹೋದಳೆಂದೂ ಕರುಳು ಕತ್ತರಿಸುವಂತೆ ಬರೆಯುವ ಅವರು, ತನ್ನ ತಾಯಿಯನ್ನು ಜಮೀನ್ದಾರರು ಲೈಂಗಿಕವಾಗಿ ಬರ್ಬರವಾಗಿ ನಡೆಸಿಕೊಳ್ಳುತ್ತಿದ್ದ ಬಗೆಯನ್ನೂ, ಆ ಬಡತನ, ಹಸಿವು, ರೋಗ ರುಜಿನಗಳ ಬದುಕನ್ನೂ ವಿವರಿಸುವಾಗ ನಮ್ಮ ತಳ ಸಮುದಾಯದ ಹೆಣ್ಣುಗಳ ಕಥೆ ಇದಕ್ಕಿಂತ ಭಿನ್ನವೇನಲ್ಲ ಅನಿಸಿಬಿಡುತ್ತದೆ. ಆದರೆ ನಮ್ಮಲ್ಲಿ ಇಂಥದ್ದನ್ನು ದಾಖಲಿಸಿದ್ದು ತುಂಬ ವಿರಳ. ದಲಿತ ಬರಹಗಾರರಿಗೆ ತಾವು ಕಂಡುಂಡ ಇಂಥ ದಾರುಣ ಬದುಕನ್ನು ಬರೆದುಕೊಳ್ಳಲು ಇಲ್ಲಿಯವರೆಗೂ ಸಾಧ್ಯವಾಗದಿರುವುದು ನೋವಿನ ಸಂಗತಿ.

ಪರಿಶಿಷ್ಟ ಜಾತಿ ಮತ್ತು ಪಂಗಡಗಳ ದೌರ್ಜನ್ಯ ತಡೆ ಕಾಯ್ದೆಯ ಅನುಷ್ಠಾನದ 2016ರ ವರದಿಯ ಪ್ರಕಾರ ನಮ್ಮ ರಾಜ್ಯದಲ್ಲಿಯೇ ಪ್ರತಿ ಎರಡು ದಿನಗಳಲ್ಲಿ ಒಬ್ಬ ದಲಿತ ಮಹಿಳೆ ಅತ್ಯಾಚಾರಕ್ಕೆ ಒಳಗಾಗುತ್ತಾಳೆ. 1912 ದಲಿತ ದೌರ್ಜನ್ಯ ಪ್ರಕರಣಗಳೂ, 78 ಕೊಲೆಗಳೂ, 164 ಅತ್ಯಾಚಾರಗಳೂ, ಇತರೆ 1670 ಪ್ರಕರಣಗಳೂ ನಡೆದಿರುವುದು ದಾಖಲಾಗಿದೆ. ದಾಖಲಾಗದೆ ಮುಚ್ಚಿಹಾಕಲ್ಪಟ್ಟ ಪ್ರಕರಣಗಳು ಇನ್ನೆಷ್ಟೋ.

ದಲಿತ ಹೆಣ್ಣುಗಳ ಮೇಲಿನ ದೌರ್ಜನ್ಯಗಳ ಕುರಿತು ಸೊಲ್ಲೆತ್ತಿದಾಗೆಲ್ಲ, ಇದಕ್ಕೆ ಜಾತಿಯನ್ನೇಕೆ ಅಂಟಿಸುತ್ತೀರಿ? ಹೆಣ್ಣೆಂದರೆ ಸಾಲದೆ? ಎಂದೊಂದು ದಿಕ್ಕು ತಪ್ಪಿಸುವ ಮಾತು ಕೇಳಿಬರುವುದಿದೆ. ನಾನು ಈ ಜಾತಿ ಸೂಚಿಸುವುದನ್ನು ಬಲವಾಗಿ ಸಮರ್ಥಿಸಲು ಕಾರಣಗಳಿವೆ. ಸರಳವಾಗಿ ಇದನ್ನು ವಿವರಿಸುವುದಾದರೆ ನಮ್ಮ ಮನೆಯಲ್ಲಿಯೇ ಒಂದು ಮಗು ಬೇರೆಲ್ಲ ಮಕ್ಕಳಿಗಿಂತ ಭಿನ್ನವಾಗಿದ್ದು ಅದರ ವಿಕಸನ ಕುಂಠಿತವಾಗಿದ್ದರೆ, ತರಗತಿಯಲ್ಲಿ ಒಂದಷ್ಟು ಮಕ್ಕಳು ಕಲಿಕೆಯಲ್ಲಿ ಹಿಂದುಳಿದಿದ್ದರೆ, ಒಂದು ಊರಿಡೀ ಅಭಿವೃದ್ಧಿ ಕಂಡಿದ್ದು ಕೆಲ ಪ್ರದೇಶಗಳು ಹಿಂದುಳಿದಿದ್ದರೆ ಅವುಗಳನ್ನು ಗುರುತಿಸಿ ವಿಶೇಷ ಆದ್ಯತೆ ಕೊಡುವುದು ಹೇಗೆ ಅನಿವಾರ್ಯವೋ ಅಂಥಹದ್ದೇ ತುರ್ತು ಜರೂರತ್ತುಗಳು ಇಲ್ಲಿಯೂ ಇವೆ.

ದಲಿತರ ಬಡತನ, ಅತ್ಯಂತ ನಿಕೃಷ್ಟ ಸ್ಥಾನಮಾನ, ದಲಿತ ಹೆಣ್ಣುಗಳೆಂದೊಡನೆ ಬೇಲಿಯಿಲ್ಲದ ಹೊಲವೆಂಬಂತೆ ದಾಳಿಯಿಡುವುದು, ಹೋರಾಡಲು ಅವರಲ್ಲಿ ಹಣಬಲವಿಲ್ಲದಿರುವುದು, ತಮ್ಮ ಮೇಲೆ ನಡೆಯುವ ಲೈಂಗಿಕ ದೌರ್ಜನ್ಯಗಳನ್ನು ವಿರೋಧಿಸಲು ಅರಿವಿನ ಕೊರತೆಯಿರುವುದು, ತಳ ಸಮುದಾಯಗಳ ದೌರ್ಬಲ್ಯಗಳನ್ನೇ ದೌರ್ಜನ್ಯಕ್ಕೆ ಬಳಸಿಕೊಳ್ಳುವುದು, ಅನೇಕ ಮೌಢ್ಯ ಅಥವ ನಂಬಿಕೆಗಳ ಹೇರಿಕೆಗಳ ಮೂಲಕ ಅವರನ್ನು ಇಂಥದ್ದಕ್ಕೆ ಒಡ್ಡುವುದು ಇಂಥ ಅನೇಕ ಕಾರಣಗಳಿಂದಾಗಿ ಆ ಹೆಣ್ಣುಗಳು ಈ ದೌರ್ಜನ್ಯಗಳಿಗೆ ಅನ್ಯಾಯಗಳಿಗೆ ತುತ್ತಾಗುತ್ತಿದ್ದಾರಾದರೆ ಈ ಅಸಮಾನ ಸಾಮಾಜಿಕ, ಆರ್ಥಿಕ, ಧಾರ್ಮಿಕ ಪರಿಸರದಲ್ಲಿ ದಲಿತ, ತಳ ಸಮುದಾಯಗಳ ಜಾತಿಗಳ ಹೆಸರಿಂದಲೇ ಗುರುತಿಸಿ ನ್ಯಾಯ ಒದಗಿಸುವುದೂ ಅಷ್ಟೇ ಮುಖ್ಯವಾಗುತ್ತದೆ. ದಲಿತ ಸಮುದಾಯದವರೆಂಬ ಕಾರಣದಿಂದಲೇ ಪ್ರಕರಣಗಳನ್ನು ಮುಚ್ಚಿಹಾಕುವಾಗ ದಲಿತ ಸಮುದಾಯದವರೆಂಬ ಹೆಸರಿನಲ್ಲೇ ನ್ಯಾಯ ಕೇಳುವುದೂ ಹೋರಾಡುವುದೂ ಅಷ್ಟೇ ಅನಿವಾರ್ಯವೂ ಆಗುತ್ತದೆ. ಮೇಲ್ಜಾತಿಯ ಹೆಣ್ಣುಗಳ ಮೇಲೆ ಇಂಥ ಪ್ರಕರಣಗಳಾದಾಗ ಏಳುವ ಹೋರಾಟದ ಕೂಗಿಗೂ ದಲಿತರೆಂಬ ಕಾರಣಕ್ಕೆ ಸದ್ದಡಗಿ ಉಡುಗಿ ಹೋಗುವ ದನಿಯ ಕ್ಷೀಣತೆಗೂ ಇರುವ ವ್ಯತ್ಯಾಸವನ್ನು ಇಲ್ಲಿ ತುಲನೆ ಮಾಡಿ ನೋಡುವುದು ಅನಿವಾರ್ಯವಾಗುತ್ತದೆ.

ನಿರಂತರವಾಗಿ ನಡೆದುಬಂದದ್ದಕ್ಕೆ ಎಂದೂ ಕ್ಷಮೆಯಿಲ್ಲ. ಈಗ ದಾನಮ್ಮಳ ಸಾಮೂಹಿಕ ಅತ್ಯಾಚಾರವಾಗಿ ಸಾವಾಗಿದೆ. ಈ ಹೋರಾಟವು ಬಲ ಪಡೆಯಬೇಕು, ವ್ಯಾಪಕತೆ ಪಡೆಯಬೇಕು ಈ ಹೋರಾಟಕ್ಕೆ ಮಾಧ್ಯಮಗಳೂ, ಪಕ್ಷಭೇದ ಮರೆತು ಎಲ್ಲ ರಾಜಕೀಯ ಪಕ್ಷಗಳೂ, ಸಂಘಟನೆಗಳೂ, ಜನಸಾಮಾನ್ಯರೂ ಒಗ್ಗೂಡಬೇಕು. ಅಪರಾಧಿಗಳಿಗೆ ತಕ್ಕ ಶಿಕ್ಷೆಯಾಗಿ ಕಾನೂನು ಸುವ್ಯವಸ್ಥೆಗಳ ಮೇಲೆ ನಂಬಿಕೆ ಹುಟ್ಟುವಂತಾಗಬೇಕು. ದಾನಮ್ಮಳ ಸಾವೇ ಕೊನೆಯ ಸಾವಾಗಲಿ. ಮುಂದೆಂದೂ ಇಂತಹ ಘೋರ ಘಟಿಸದಿರಲಿ. ಅದಕ್ಕೆ ದಾನಮ್ಮಳ ಸಾವಿನ ಹೋರಾಟವೇ ಕಾರಣವಾಗಲಿ ಎಂದು ಆಶಿಸುತ್ತೇನೆ.

ಕಾದಂಬಿನಿ

ಹೈಡ್ರೋ ಇಂಜಿನಿಯರ್ಸ್ ಕಂಪನಿಯಲ್ಲಿ ಆಫೀಸ್ ಎಕ್ಸಿಕ್ಯೂಟೀವ್. ಬಿಡುವಿನ ವೇಳೆಯಲ್ಲಿ ಬರೆಯುವ ಹವ್ಯಾಸ. ಕೆಲವು ಪತ್ರಿಕೆಗಳಲ್ಲಿ ಬರಹಗಳು ಪ್ರಕಟವಾಗಿವೆ.

Share

Leave a comment

Your email address will not be published. Required fields are marked *

Recent Posts More

  • 7 days ago No comment

    ನಮ್ಮ ಕಣ್ಣುಗಳೇಕೆ ಭಾರವಾಗುತ್ತಿವೆ?

          ಕವಿಸಾಲು           ತಿರುಕನ ಕನಸಲ್ಲ ನನ್ನದು ತಿರುಕನಲ್ಲ ಕಣ್ರಿ ನಾನು ನಿಮ್ಮ ಮರುಕ ಗಿರುಕ ಎಲ್ಲಾ ನನಗೆ ಹಿಡಿಸಲ್ಲ ಅವ್ರು ಕೋಟೆ ಕಟ್ಟಿ ನ್ಯಾಯ ನೀತಿಗಳ ತಮ್ಮಲ್ಲೆ ಬಚ್ಚಿಟ್ಟು ಒಳಗೆ ಬೆಚ್ಚಗೆ ಕೂತಿರಬಹುದು ನ್ಯಾಯಕ್ಕೆ ಕನ್ನ ಹಾಕೋ ನಾನು ತಿರುಕ ಹೇಗೆ ಆಗಬೇಕು? ತಿರುಕನದೇನೋ ಕನಸಿತ್ತು ನನ್ನದು ಕೂಡಾ ಕನಸೆಂದು ಆ ಕೋಟೆ ಒಳಗಿರುವವರು ಕನವರಿಸುತ್ತಿರಬಹುದು ಬೂದಿ ಮುಚ್ಚಿದ ...

  • 1 week ago No comment

    ಕೊಂಕಣಿ ಪ್ರತಿಭೆಯನ್ನರಸಿ ಕರ್ನಾಟಕಕ್ಕೆ ಬಂದ ಪ್ರಶಸ್ತಿ

        ಅತಿಥಿ           ಈ ಬಾರಿ ಕರ್ನಾಟಕವು ಎರಡು ಕೇಂದ್ರ ಸಾಹಿತ್ಯ ಅಕಾಡೆಮಿ ಯುವ ಪುರಸ್ಕಾರಗಳನ್ನು ತನ್ನ ಮಡಿಲಿಗೆ ಹಾಕಿಕೊಂಡಿತು ಎಂದರೆ ಅಚ್ಚರಿಯಾಗಬಹುದು. ಆದರೂ ಇದು ಸತ್ಯ. ಪ್ರಮಾದವೇನಾದರೂ ಆಯಿತೇ? ಒಂದೇ ಪುರಸ್ಕಾರವನ್ನು ಇಬ್ಬರಿಗೆ ಹಂಚಿರಬಹುದೇ? ಎಂದೆಲ್ಲ ಯೋಚಿಸಿ ತಲೆ ಕೆರೆದುಕೊಳ್ಳುತ್ತಿದ್ದೀರಾ? ಇಲ್ಲಿದೆ ನೋಡಿ ಉತ್ತರ. ಕನ್ನಡಕ್ಕೆ 2018ರ ಕೇಂದ್ರಸಾಹಿತ್ಯ ಅಕಾಡೆಮಿಯ ಯುವ ಪುರಸ್ಕಾರ ಘೋಷಣೆಯಾದಾಗಲೇ ಕರ್ನಾಟಕದ ಕೊಂಕಣಿ ಕವಯತ್ರಿ ವಿಲ್ಮಾ ...

  • 2 weeks ago No comment

    ಸಾಹಸದ ಆ ನಿಮಿಷಗಳು

            ಮೊದಲ ಬಾರಿಯಾದ್ದರಿಂದ ಕೆಲವೇ ನಿಮಿಷಗಳ ಈ ಜಿಗಿತದ ರೋಚಕತೆ ಒಂದು ತಿಂಗಳ ಕಾಲ ನನ್ನನ್ನು ಆವರಿಸಿದ್ದು ಸುಳ್ಳಲ್ಲ.         ಬ್ಯಾಂಕರುಗಳು, ಅಕೌಂಟೆಂಟುಗಳು ವರ್ಷದ ಮೊದಲಿಂದ ಹಿಡಿದು ಮಾರ್ಚಿ ತಿಂಗಳವರೆಗೆ ಭಾರೀ ಬ್ಯುಸಿಯಾಗುವಂತೆ ಇಂಗ್ಲೆಂಡಿನ ಸರ್ಕಾರೀ ದಂತ ವೈದ್ಯಕೀಯ ರಂಗದಲ್ಲೂ ಧಾವಂತ ಕಾಣಿಸಿಕೊಳ್ಳುತ್ತದೆ. ಸರ್ಕಾರದಿಂದ ಗುತ್ತಿಗೆ ಪಡೆದ ಕೆಲಸವನ್ನು ಮಾರ್ಚಿಯ ಕೊನೆಗೆ ಪೂರ್ತಿಗೊಳಿಸದಿದ್ದರೆ ಮುಂದಿನ ವರ್ಷದ ಕಾಂಟ್ರಾಕ್ಟ್ ನ್ನು ಕಳೆದುಕೊಳ್ಳುವ ...

  • 3 weeks ago No comment

    ಪ್ರಸಾದ್ ಪಟ್ಟಾಂಗ | ಫಿಫಾ ಫಿವರ್

    ಅಂದು ಎಲ್ಲರ ಕಣ್ಣುಗಳೂ ಬೇರೇನನ್ನೋ ದಿಟ್ಟಿಸುತ್ತಿದ್ದವು. ಅದೊಂದು ಸುಂದರ ರೆಸ್ಟೊರೆಂಟ್. ಆವರಣದ ಒಳಗೂ ಹೊರಗೂ ಬಂದವರಿಗೆ ಕುಳಿತುಕೊಳ್ಳಲು ಸಾಕಷ್ಟು ಜಾಗವಿರುವಂಥದ್ದು. ಜೊತೆಗೇ ಒಂದು ಪುಟ್ಟ ಮೈದಾನದಂತಿರುವ ಜಾಗವನ್ನೂ, ಈಜುಕೊಳವನ್ನೂ ಹೊಂದಿರುವ ಸುಸಜ್ಜಿತ ರೆಸ್ಟೊರೆಂಟ್. ನಾನು ಪ್ರತೀ ತಿಂಗಳು ಲುವಾಂಡಾಗೆ ಬಂದಿಳಿದಾಗಲೆಲ್ಲಾ ಇಲ್ಲಿಯ ಸಿಬ್ಬಂದಿಯೇ ನನಗೆ ಅನ್ನದಾತರು. ಹೀಗಾಗಿ ಎಲ್ಲೆಲ್ಲೂ ನನಗೆ ಪರಿಚಿತ ಮುಖಗಳೇ. ಅಂದು ಮಾತ್ರ ಸಿಬ್ಬಂದಿಯೊಬ್ಬ ಗಡಿಬಿಡಿಯಲ್ಲಿ ನನ್ನ ಆರ್ಡರ್ ಬರೆದುಕೊಂಡು ಅಷ್ಟೇ ಅವಸರದಲ್ಲಿ ಖಾದ್ಯಗಳನ್ನು ತಂದಿಟ್ಟು ...

  • 3 weeks ago No comment

    ಸವಿತಾ ನಾಗಭೂಷಣ ಪ್ರವಾಸ ಕಥನ | ದಾರಿಯೇ ದೈವ… ವೈಷ್ಣೋದೇವಿ

    ಪ್ರವಾಸಿ ಸವಿತಾ ಕಂಡ ಇಂಡಿಯಾ   ಇದು ನಾನು 2011ರ ಮಾರ್ಚ್ ತಿಂಗಳಲ್ಲಿ ನನ್ನ ಕೆಲ ಗೆಳತಿಯರೊಂದಿಗೆ ಒಂದು ಜನಸಾಮಾನ್ಯರ ಸಮೂಹದೊಂದಿಗೆ ಸಾಮಾನ್ಯ ದರ್ಜೆಯ ರೈಲು ಪ್ರಯಾಣದ ಮೂಲಕ ಕೈಗೊಂಡ ಭಾರತ ಯಾತ್ರೆಯ ಸಂದರ್ಭದಲ್ಲಿ ಮಾಡಿಕೊಂಡ ಟಿಪ್ಪಣಿಗಳನ್ನು ಆಧರಿಸಿ ಬರೆದ ಪುಟ್ಟ ಪ್ರವಾಸ ಕಥನ. ಇದು ಈಗಾಗಲೇ 12 ಭಾಗಗಳಲ್ಲಿ ಡಿ ಎಸ್ ನಾಗಭೂಷಣ ಅವರ ಸಂಪಾದಕತ್ವದ ‘ನವ ಮಾನವ’ ಸಮಾಜವಾದಿ ಮಾಸಿಕದ (ಈ ಪತ್ರಿಕೆ ನವೆಂಬರ್ 2011ರ ...


Editor's Wall

  • 11 May 2018
    2 months ago No comment

    ಕಾಂಗ್ರೆಸ್ ನಾಯಕರು ಜೈಲಲ್ಲಿ ಭಗತ್ ಸಿಂಗ್ ಭೇಟಿಯಾಗಿರಲಿಲ್ಲವಾ?

    ಭಾರತದ ಪ್ರಥಮ ಪ್ರಧಾನಿ ಜವಾಹರಲಾಲ್ ನೆಹರೂ ಅವರ ಆತ್ಮಚರಿತ್ರೆಯಲ್ಲಿಯೇ, ಅವರು ಭಗತ್ ಸಿಂಗ್ ಭೇಟಿಯಾಗಿದ್ದರೆಂಬುದರ ಕುರಿತ ವಿವರ ಸಿಗುತ್ತದೆ. “ಭಾರತದ ಸ್ವಾತಂತ್ರ್ಯಕ್ಕಾಗಿ ಹೋರಾಡಿದ್ದ ಭಗತ್ ಸಿಂಗ್, ಬಟುಕೇಶ್ವರ್ ದತ್, ವೀರ್ ಸಾವರ್ಕರ್ ಜೈಲಿನಲ್ಲಿದ್ದಾಗ ಅವರನ್ನು ಯಾರಾದರೊಬ್ಬ ಕಾಂಗ್ರೆಸ್ ನಾಯಕರು ಹೋಗಿ ಕಂಡಿದ್ದರಾ? ಆದರೆ ಕಾಂಗ್ರೆಸ್ ನಾಯಕರು ಭ್ರಷ್ಟನೊಬ್ಬ ಜೈಲಿನಲ್ಲಿದ್ದರೆ ಅವನನ್ನು ನೋಡಲು ಹೋಗುತ್ತಾರೆ” ಎಂದು ಪ್ರಧಾನಿ ನರೇಂದ್ರ ಮೋದಿ ಕರ್ನಾಟಕದ ಚುನಾವಣೆ ಪ್ರಚಾರ ಸಭೆಯಲ್ಲಿ ವಾಗ್ದಾಳಿ ನಡೆಸಿದ್ದರು. ಬ್ರಿಟಿಷ್ ...

  • 10 May 2018
    2 months ago No comment

    ಒಂದು ಪುಸ್ತಕ; ವಾರವಿಡೀ ಬಿಡುಗಡೆ!

    ಪುಸ್ತಕವೊಂದನ್ನು ಪ್ರಕಟಿಸಿದ ಬಳಿಕ ಅದರ ಬಿಡುಗಡೆ ಕಾರ್ಯಕ್ರಮವೂ ಕಡ್ಡಾಯವೆಂಬಂಥ ಕಾಲವಿತ್ತು. ಈಗಲೂ ಇಲ್ಲವೆಂದಲ್ಲ. ಆದರೆ ಸಾವಿರ, ಲಕ್ಷದ ಲೆಕ್ಕದಲ್ಲಿ ಹಣ ಸುರಿದು ವ್ಯವಸ್ಥೆ ಮಾಡುವ ಬಿಡುಗಡೆ ಕಾರ್ಯಕ್ರಮವು ಒಂದು ಪುಸ್ತಕದ ಕುರಿತ ಮಾತಿಗೆ ಬೇಕಾದ ಆಪ್ತ ವಾತಾವರಣವನ್ನು ಕಟ್ಟಿಕೊಡುತ್ತದೆಯೇ? ದುಡ್ಡಿನ ವಿಚಾರಕ್ಕಿಂತ ಹೆಚ್ಚಾಗಿ ಕಾರ್ಯಕ್ರಮ ಆಯೋಜನೆ ಬೇಡುವ ಶ್ರಮ ಬಹಳ ದೊಡ್ಡದು. ಹಾಲ್ ಬುಕ್ ಮಾಡಬೇಕಾದಲ್ಲಿಂದ ಹಿಡಿದು, ಅತಿಥಿಗಳನ್ನು ಗೊತ್ತುಮಾಡುವುದು, ಅವರಿಗೆಲ್ಲರಿಗೂ ಹೊಂದುವಂತೆ ದಿನಾಂಕ ನಿಗದಿಪಡಿಸುವುದು, ಆಮಂತ್ರಣ ಪತ್ರಿಕೆ ಪ್ರಕಟಿಸುವುದು, ...

  • 03 May 2018
    2 months ago No comment

    ಕಾದಂಬಿನಿ ಕಾಲಂ | ಏನಿಲ್ಲದಿದ್ದರೂ ಬದುಕು ದೂಡಬೇಕು

                      ಆಗೆಲ್ಲ ತಪಸ್ಸು ಮಾಡುವ, ದೇವರು ಪ್ರತ್ಯಕ್ಷವಾಗುವ ಮತ್ತು ಕೇಳಿದ ವರ ಕೊಡುವ ಕಥೆಗಳು ಮಸ್ತು ಚಾಲ್ತಿಯಲ್ಲಿದ್ದ ಕಾರಣ ನಾನು ದೇವರನ್ನು ಕಾಣುವ ಹಟಕ್ಕೆ ಬಿದ್ದು ತಪಸ್ಸು ಮಾಡುತ್ತಿದ್ದೆ.   ನನ್ನ ಜೊತೆ ಇವೆಲ್ಲ ಯಾವ ಕಾರಣಕ್ಕೆ ಘಟಿಸಿತ್ತೋ ಅರಿಯೆ. ಬಾಲ್ಯದಲ್ಲಿ ನಮ್ಮ ಮನೆಗೆ ನೆರೆಮನೆಯ ಒಬ್ಬ ಹೆಂಗಸು ಬರುತ್ತಿದ್ದರು. ಮೂಕಕ್ಕ ಎಂದು ಅವರನ್ನು ಎಲ್ಲರೂ ಕರೆಯುತ್ತಿದ್ದುದು. ...

  • 30 April 2018
    3 months ago No comment

    ಅತ್ಯಾಚಾರ, ಹೋರಾಟದ ಐದು ವರ್ಷಗಳು ಮತ್ತು ಆ ಪುಟ್ಟ ಗೂಡು

    ತನ್ನ ಬದುಕಿನ ಅಮೂಲ್ಯ ಘಳಿಗೆಯೇ ಇಂಥದೊಂದು ಘಟನೆಗೆ ಬಲಿಯಾದ ಆಘಾತದಲ್ಲಿರುವ ಆಕೆ ಒಮ್ಮೆ ಗೆಲುವಾದವಳಂತೆ ಕಂಡರೂ ಮತ್ತೆ ಗಂಭೀರಳಾಗುತ್ತಾಳೆ. ಎಷ್ಟು ಬೇಕೋ ಅಷ್ಟೇ ಮಾತು. ಕಟ್ಟಿಕೊಂಡಿದ್ದ ಕನಸೂ ಒಡೆದುಹೋಗಿದೆ.   ಅನ್ಯಾಯದ ವಿರುದ್ಧದ ಹೋರಾಟ, ಸಮಾಜದೆದುರು ದೊಡ್ಡ ಮನುಷ್ಯನಂತೆ ಕಾಣಿಸಿಕೊಳ್ಳುವ ಮುಖವಾಡ ತೊಟ್ಟುಕೊಂಡ ಮತ್ತು ಸಾಧ್ಯವಿರುವಷ್ಟೂ ವಾಮಮಾರ್ಗಗಳಿಂದ ಎಲ್ಲರನ್ನೂ ಎಲ್ಲವನ್ನೂ ನಿಯಂತ್ರಣದಲ್ಲಿಟ್ಟುಕೊಳ್ಳಬಲ್ಲಂಥ ಅತ್ಯಂತ ಬಲಿಷ್ಠ ದುಷ್ಟನೊಬ್ಬನನ್ನು ಎದುರುಹಾಕಿಕೊಳ್ಳುವ ದಿಟ್ಟತನ ಹೇಗೆ ಅಗಾಧ ಸಾಗರದ ನಟ್ಟ ನಡುವಿನ ಒಂದು ಸಣ್ಣ ...

  • 28 April 2018
    3 months ago No comment

    ಮೈಬಣ್ಣವೆಂಬ ಮಾನದಂಡ ಮತ್ತು ‘ವಿಪ್ಲವ’ ಮನಃಸ್ಥಿತಿಯ ರಾಜಕಾರಣ

    ಈ ‘ವಿಪ್ಲವ’ ಮನಃಸ್ಥಿತಿ ಅಧಿಕಾರಸ್ಥವಾದುದಾಗಿದೆ. ದೇವರು, ಧರ್ಮದ ಹೆಸರಲ್ಲಿ ಒಡೆಯುವುದನ್ನು ತನ್ನ ಪರಮೋನ್ನತಿ ಎಂಬಂತೆ ಭ್ರಮಿಸುವ ಈ ಕುರೂಪವು ಮನುಷ್ಯರ ಮೇಲೆ ಮನುಷ್ಯರನ್ನು ಎತ್ತಿಕಟ್ಟುತ್ತದೆ. ಹೆಣ್ಣಿನ ಮೇಲೆ ಹೆಣ್ಣನ್ನೇ ಅಸ್ತ್ರವಾಗಿ ಪ್ರಯೋಗಿಸುವ ಹುನ್ನಾರಗಳ ಮೂಲಕ, ನಿಜವಾದ ಸೌಂದರ್ಯವನ್ನು ನಾಶಗೈಯುತ್ತಿದೆ. 21 ವರ್ಷಗಳ ಕೆಳಗೆ ಅಂದರೆ 1997ರಲ್ಲಿ ವಿಶ್ವಸುಂದರಿ ಪಟ್ಟ ಗೆದ್ದ ಡಯಾನಾ ಹೇಡನ್ ಮೈಬಣ್ಣದ ಬಗ್ಗೆ ಅತಿ ಕೀಳು ಅಭಿರುಚಿಯಿಂದ ಮಾತನಾಡಿದ ತ್ರಿಪುರಾ ಮುಖ್ಯಮಂತ್ರಿ ವಿಪ್ಲವ್ ಕುಮಾರ್ ದೇವ್ ...