Share

ಮೋಹದ ಹಯವೇರಿದ ಕಿನ್ನರಿಯರ ಲೋಕದಲ್ಲಿ…
ಕಾದಂಬಿನಿ ಕಾಲಂ

 

 

 

 

 

 

 

 

 

 

ಇಷ್ಟೆಲ್ಲ ಆದ ಬಳಿಕ ಸೋತು ಹಣ್ಣಾಗಿರಬಹುದು ಎಂದುಕೊಂಡರೆ ಅವಳು ಮೊದಲಿಗಿಂತ ದುಪ್ಪಟ್ಟು ಲಕಲಕ ಹೊಳೆಯುತ್ತ ಪಕ್ಕಾ ವ್ಯವಹಾರಸ್ಥಳಂತೆ ನಡೆದುಕೊಳ್ಳತೊಡಗಿದಳು. ಉಳಿದ ಹೆಣ್ಣುಮಕ್ಕಳಾದರೂ ಇವಳಿಗಿಂತ ಭಿನ್ನವಾಗಿಯೇನೂ ಇರಲಿಲ್ಲ.

 

ಪುಟ್ಟ ಊರಿನ ಎರಡು ಬೀದಿಗಳ ಅಷ್ಟೂ ಕ್ವಾರ್ಟರ್ಸ್ ಗಳ ತುಂಬ ಗುತ್ತಿಗೆ ಕೆಲಸದ ನಿಮಿತ್ತ ಬೇರೆ ರಾಜ್ಯಗಳ ಜನ ಬಂದು ನೆಲೆಸಿದ ಮೇಲೆ ಊರಿನಲ್ಲಿ ಪ್ರೇಮದ ವಸಂತಕಾಲವೊಂದು ಅರಳಿ ನಿಗಿನಿಗಿ ಹೊಳೆದಂತೆ ಕಾಣತೊಡಗಿತ್ತು. ಊರಿನ ಅರೆಬರೆ ಓದಿಕೊಂಡು ಮನೆಯಲ್ಲಿ ಕೂತ, ಹೈಸ್ಕೂಲು, ಕಾಲೇಜು ಓದುತ್ತಿದ್ದ, ವಿವಾಹಿತ ಹೆಣ್ಣುಮಕ್ಕಳೆಲ್ಲ ಈ ನಿಗಿಗುಡುವ ಬೆಂಕಿಗೆ ತಮ್ಮನ್ನು ತಾವೇ ಒಡ್ಡಿಕೊಂಡು ಸುಟ್ಟುಕೊಳ್ಳುವ ಪತಂಗಗಳಂತೆ ಮನಸ್ಸನ್ನು ಒಂದೇ ಸಮನೆ ಕಾಡತೊಡಗಿದ್ದರು.

ಈ ಪ್ರೇಮದ ನಶೆಯೇರಿಸಿಕೊಂಡ ಹೆಣ್ಣುಮಕ್ಕಳಿಗೆ ಜಗದ ಪರಿವೆಯೇ ಇಲ್ಲದಿದ್ದರೆ, ಅವರ ಪೋಷಕರಿಗೆ ಇದ್ಯಾವುದರ ಖಬರೇ ಇದ್ದಂತಿರಲಿಲ್ಲ. ಬಾಕಿಯವರಿಗೆ ಇದು ತಮಾಷೆ, ಹೊಟ್ಟೆಕಿಚ್ಚು, ಕುಹಕ, ಚಾಡಿಮಾತು, ಊಹಾಪೋಹ, ಮೋಜಿನ ಹರಟೆ, ಕುತಂತ್ರಗಳಿಗೆ ವಸ್ತುವಾಗಿದ್ದಿತು.

ಹೌದು. ಆ ತರುಣರು ಇದ್ದದ್ದೇ ಹಾಗೆ. ಆರಡಿ ದಾಟಿದ ಎತ್ತರ, ಸದೃಢ ಕಾಯ, ಕೆಂಪನೆ ಮೈಬಣ್ಣ, ಮತ್ತು ಚಂದನೆಯ ಉಡುಗೆ, ಕೈತುಂಬ ಹಣ. ಮೇಲಾಗಿ ವಿದ್ಯಾವಂತ ತರುಣರು. ತರುಣಿಯರೆದೆಯಲ್ಲಿ ಬೆಂಕಿ ಹೊತ್ತಿಕೊಳ್ಳಲು ಇನ್ನೇನು ಬೇಕು? ಆಗಂತುಕರಲ್ಲಿ ಮೂಡುವ ಕುತೂಹಲವೂ ಈ ಕಿಚ್ಚಿಗೆ ಇಂಧನವಾದದ್ದಿದೆ. ಹೀಗೆ ಮೋಹದ ಉನ್ಮತ್ತ ಬಿರುಗಾಳಿಯೊಂದು ಹೆಣ್ಣುಗಳೆದೆಯಲ್ಲಿ ಹಾಯುವಾಗ ಕಿಚ್ಚಿನ ಕಿಡಿಗೆ ಧಗ್ಗನೆ ಬೆಂಕಿಹೊತ್ತಿ ಅವರ ನಿದ್ದೆ, ವಿವೇಚನೆಗಳೆಲ್ಲ ಹಾರಿಹೋಗಿದ್ದವು. ಅವರು ಕನಸುಗಳ ಹುಚ್ಚು ಅಲೆಗಳಲ್ಲಿ ದಿಕ್ಕು ದೆಸೆ ಮರೆತು ತೇಲತೊಡಗಿದ್ದರು. ಆ ದಿನಗಳಲ್ಲಿ ಮನೆಮನೆಗಳಲ್ಲಿ ಬ್ಲ್ಯಾಕ್ ಅಂಡ್ ವೈಟ್ ಟಿವಿಯನ್ನು ಪಕ್ಕಕ್ಕೆ ಸರಿಸಿ ಕಲರ್ ಟೀವಿ ಬಂದು ಕೂರತೊಡಗಿತ್ತು. ಇದು ಪ್ರೇಮಿಗಳ ಕನಸಿಗೆ ರಂಗು ತುಂಬಿದರೆ ಎಸ್ಟಿಡಿ ಬೂತ್ ಗಳಲ್ಲಿ ಮಾತ್ರವಿದ್ದ ಲ್ಯಾಂಡ್ ಲೈನ್ ನಿಧಾನವಾಗಿ ಮನೆ ಮನೆಯ ಸಂಪರ್ಕ ಪಡೆಯತೊಡಗಿ ಪ್ರೇಮಿಗಳ ಎದೆದನಿಯ ಸಂದೇಶವಾಹಕವಾಗತೊಡಗಿತು.

ನಮ್ಮ ಎರಡೂ ಓಣಿಗಳಲ್ಲಿ, ನಾಯ್ಡು ಎಂಬ ಆಂಧ್ರದ ಯುವಕನಿದ್ದ ಮತ್ತು ಕೆಲ ಕೇರಳಿಗರಿದ್ದರು. ನಮ್ಮದೊಂದೇ ಕನ್ನಡಿಗರ ಮನೆ. ಇನ್ನುಳಿದವರೆಲ್ಲ ಪಂಜಾಬ್, ಹರಿಯಾಣ, ಉತ್ತರಪ್ರದೇಶ, ಅಸ್ಸಾಂ ರಾಜ್ಯದವರು. ಇವರಲ್ಲಿ ಬಹುತೇಕರು ಅವಿವಾಹಿತ ತರುಣರು. ಕೆಲವರು ವಿವಾಹಿತರಾದರೂ ಪತ್ನಿ, ಮಕ್ಕಳನ್ನು ತಮ್ಮ ಊರುಗಳಲ್ಲೇ ಬಿಟ್ಟುಬಂದಿದ್ದರು. ಹೆಂಡಿರನ್ನು ಜೊತೆ ಕರೆದುಕೊಂಡು ಬಂದವರೂ ಇದ್ದರು. ಅಂಥವರಿಗೆ ಸಿಂಗಲ್ ಮನೆಗಳನ್ನು ವಾಸಕ್ಕೆ ಕೊಡಲಾಗಿತ್ತು. ಉಳಿದವರೆಲ್ಲ ಒಂದೊಂದು ಮನೆಯಲ್ಲಿ ಐದಾರು ಯುವಕರು ಒಟ್ಟೊಟ್ಟಾಗಿ ಇರುತ್ತಿದ್ದರು. ಎಲ್ಲರಿಗೂ ಊಟಕ್ಕೆ ಮೆಸ್ ಇತ್ತು. ಈ ಯುವಕರಿಗೆ, ಹಣ, ಕುಡಿತ, ಸೌಕರ್ಯಗಳು, ಮೋಜು ಮಸ್ತಿಗೆ ಬೇಕಾದುದೆಲ್ಲವೂ ಇತ್ತು, ಸಂಗಾತಿಯ ಕೊರತೆಯೊಂದುಳಿದು. ಅವರ ಕಣ್ಣುಗಳು ಕಾಡುಹೂಗಳಂತೆ ಬಿರಿದು ಪರಿಮಳಿಸತೊಡಗಿದ್ದ ಈ ಹೆಣ್ಣುಗಳ ಕಡೆಗೆ ತಮ್ಮ ಮೋಹಕಾಂತದ ನೋಟದ ಬಲೆಯ ಹರವಿ ಕಾಯುತ್ತಿದ್ದರೆ, ಹುಲ್ಲೆಮರಿಗಳೇ ಜಿಗಿಜಿಗಿದು ಪುಟಿಪುಟಿದು ಅದರಲ್ಲಿ ಎಡವಿ ಬೀಳಲು ಪೈಪೋಟಿಯೇ ಶುರುವಾಗಿತ್ತು. ಹೀಗಿರುವಾಗ ವಿವಾಹಿತರಾಗಿದ್ದು ತಮ್ಮ ಬಿಳಿತೊಗಲಿನ ಸುಂದರಾಂಗಿ ಪತ್ನಿಯರನ್ನು ಜೊತೆಯಲ್ಲೇ ಇರಿಸಿಕೊಂಡ ಪುರುಷರೂ ಈ ಹುಲ್ಲೆಗಳನ್ನು ತಮ್ಮ ತೋಳುಗಳಲ್ಲೇ ಕೆಡವಿಕೊಳ್ಳಲು ಹಿಂದೇಟು ಹಾಕಲಿಲ್ಲ.

ನನ್ನ ಮನೆಗೆ ರತ್ನಿಯೆಂಬ ಹುಡುಗಿ ಹಾಲು ಕೊಡಲು ಬರುತ್ತಿದ್ದಳು. ತುಸು ಕಪ್ಪಾದರೂ ದುಂಡು ದುಂಡು ಮೈಯ ಮುದ್ದು ಹುಡುಗಿಯವಳು. ವಯಸ್ಸಿನಲ್ಲಿ ನನಗಿಂತ ಒಂದೆರಡು ವರ್ಷಕ್ಕೆ ದೊಡ್ಡವಳು. ಈ ಪಂಜಾಬಿ ಮಹಿಳೆಯರು ಧರಿಸುತ್ತಿದ್ದ ಪಂಜಾಬಿ ಸೂಟ್ ಹೊಲಿದುಕೊಡುವವರಿಲ್ಲವೆಂದೂ ಒಂದೇ ಒಂದು ಡ್ರೆಸ್ ಹೊಲಿದುಕೊಡಬೇಕೆಂದೂ ಕಾಟ ಕೊಟ್ಟು ಅಂತೂ ನಾನು ಹೊಲಿದುಕೊಟ್ಟಿದ್ದೆ. ಅಷ್ಟರೊಳಗೆ ಹತ್ತಿರದ ನಗರವೊಂದಕ್ಕೆ ಹೋಗಿ ತನ್ನ ತಲೆಗೂದಲನ್ನು ಕತ್ತರಿಸಿಕೊಂಡು ಮಾಲಾಶ್ರೀ ಕಟಿಂಗ್ ಎಂದು ಬೀಗುತ್ತ ಬಂದ ಅವಳು ಪಂಜಾಬಿ ಸೂಟ್ ಧರಿಸಿ ಇದೇ ಪಂಜಾಬಿ ಮಹಿಳೆಯರೆದುರು ತಿರುಗುತ್ತ ತನ್ನ ಕನಸಿನ ಚೆಲುವನ ಹುಡುಕಾಟದಲ್ಲಿ ತೊಡಗಿದ್ದಳು. ಕಾರಣವಿಲ್ಲದೆಯೂ ಪೊಳ್ಳು ನೆವ ಹಿಡಿದು ನನ್ನ ಮನೆಗೆ ಆಕೆ ಬರುತ್ತಿದ್ದಳು. ನನ್ನ ಮನೆಗೆ ಬರುವ ಈ ತರುಣರ ಕಣ್ಣಿಗೆ ಹೇಗಾದರೂ ಕಾಣಿಸಿಕೊಳ್ಳುವ ಉದ್ದೇಶ ನಮಗೆ ಸ್ಪಷ್ಟವಾಗಿ ಗೋಚರಿಸುತ್ತಿತ್ತು.

ನಾವು ನಾಜೂಕಿನಲ್ಲಿ, ಈ ಮೋಹದ ಕುದುರೆಯೇರಿದರೆ ಆಗುವ ಅಪಾಯವನ್ನು ಹೇಳುತ್ತಿದ್ದೆವಾದರೂ ಅವಳು ಕೇಳುವ ಸ್ಥಿತಿಯಲ್ಲಾದರೂ ಎಲ್ಲಿದ್ದಳು? ರತ್ನಿ ನನ್ನಲ್ಲಿ ಪಂಜಾಬಿ ಸೂಟ್ ಹೊಲಿಸಿಕೊಂಡು ಹೋದ ಕೆಲವೇ ದಿನಗಳಲ್ಲೇ ಊರಿನ ಬಹುತೇಕ ಹೆಣ್ಣುಮಕ್ಕಳೆಲ್ಲ ಪಂಜಾಬಿ ಸೂಟಲ್ಲಿ ರಂಗಾಗಿ ತಿರುಗಾಡಹತ್ತಿದ್ದರು. ಈ ಊರಿನ ಹೆಣ್ಣುಮಕ್ಕಳಿಗೆ ಹಿಂದಿ ಬರುತ್ತಿರಲಿಲ್ಲವಾದರೆ, ಈ ಹೊರರಾಜ್ಯದವರಿಗೆ ಕನ್ನಡ ಬರುತ್ತಿರಲಿಲ್ಲ. ಅವರನ್ನು ಕೂಡಿಸುತ್ತಿದ್ದುದು ಮೋಹದ ಭಾಷೆಯೊಂದೆ.

ರತ್ನಿ, ರತ್ನಿಯ ಅಕ್ಕ, ರತ್ನಿಯ ಗೆಳತಿಯರು ನಾ ಮುಂದು ತಾ ಮುಂದು ಎಂಬಂತೆ ಒಬ್ಬರಿಗಿಂತ ಒಬ್ಬರು ಚೆಲುವೆಯರಾಗಿ ಬಿರಿದು ಮುಂಜಾನೆಯ ಜಾಗಿಂಗ್, ಸಂಜೆಯ ವಾಕ್, ರಾತ್ರಿಯ ಗಾಳಿಸೇವನೆ ಎಲ್ಲವನ್ನೂ ನಮ್ಮ ಬೀದಿಯಲ್ಲೇ ಮಾಡುತ್ತಾ, ಈ ಗಂಡಸರೂ ಅದನ್ನೇ ಕಾಯುತ್ತಾ, ಚೆಲ್ಲು ನಡೆ, ಹುಚ್ಚುನಗೆ, ವಾರೆನೋಟ, ಕಣ್ಣ ಭಾಷೆ, ಪಿಸುಮಾತು ನೋಡಿದಷ್ಟೂ ಇತ್ತು, ಕೇಳಿದಷ್ಟೂ ಇತ್ತು.

ಈಗ ನಮ್ಮ ಮನೆಗೆ ರತ್ನಿಯ ಜೊತೆ ಇನ್ನಷ್ಟು ಹುಡುಗಿಯರು ಏನೋ ನೆವ ಹೂಡಿ ಬರತೊಡಗಿದ್ದರು. ಹಾಗೆ ಬಂದವರು ಕಾರಣವಿಲ್ಲದೆ ಈ ತರುಣರ, ಹೆಸರು, ಊರು ಇತ್ಯಾದಿ ಮಾಹಿತಿ ಪಡೆಯಲು ಇನ್ನಿಲ್ಲದಂತೆ ಯತ್ನಿಸುತ್ತಿದ್ದರು. ಸ್ವಲ್ಪ ಸಲುಗೆಯಿಂದ ಮಾತಾಡುವ ಹಂತಕ್ಕೆ ಬಂದಾಗಂತೂ ಯಾವ ಯಾವ ಹುಡುಗಿ/ಹೆಂಗಸು ಯಾರು ಯಾರ ಪ್ರಿಯತಮೆಯರೆಂದೂ, ಅವರು ಕೊಟ್ಟದ್ದು, ತೆಗೆದುಕೊಂಡದ್ದು, ಎಲ್ಲೆಲ್ಲಿ ಸಿಕ್ಕಿಬಿದ್ದದ್ದು ಎಂಬೆಲ್ಲ ವಿವರಗಳನ್ನೂ ಈರ್ಷ್ಯೆಯಿಂದ ಹೇಳತೊಡಗಿದ್ದರು. ನಮಗೆ ನಮ್ಮ ಈ ಯುವಕರ ಕುರಿತು ಚೆನ್ನಾಗಿಯೇ ಗೊತ್ತಿತ್ತು. ನಾಳೆ ಈ ಎಲ್ಲ ಹುಡುಗಿಯರೂ ಮೋಸದ ಕಳ್ಳುಸುಬಿಗೆ ಬೀಳುವರೆಂದು ಖಚಿತವಾಗಿ ತಿಳಿದೇ ಇತ್ತು. ಆದರೆ ಅದನ್ನೆಲ್ಲ ಕೇಳುವ ವ್ಯವಧಾನ ಅವರಿಗೆಲ್ಲಿತ್ತು?

ಒಮ್ಮೊಮ್ಮೆ ಹೇಗಾಗುತ್ತಿತ್ತೆಂದರೆ ನಾವು ಇಂಥವನು ವಿವಾಹಿತ, ಇವನ ಹೆಂಡತಿ, ಮಕ್ಕಳು ಇಂಥಲ್ಲಿ ಇದ್ದಾರೆ ಎಂದರೆ ಹುಡುಗಿಯರು ನಂಬದೇ ನಾವು ಬೇಕೆಂದೇ ಸುಳ್ಳು ಹೇಳಿದೆವೆಂದೂ ತಮ್ಮ ಪ್ರೇಮವನ್ನು ಕಂಡು ನಮಗೆ ಹೊಟ್ಟೆಕಿಚ್ಚೆಂದೂ ಬಗೆದು ನಮ್ಮಿಂದಲೇ ದೂರವಾಗಿದ್ದೂ ಇತ್ತು. ಅರೆಬರೆ ಓದಿ ಮನೆಯಲ್ಲಿ ಕೂತಿದ್ದ ಕೆಲ ಹುಡುಗಿಯರು ಈ ಹೊರರಾಜ್ಯದವರ ಮನೆಗಳಲ್ಲಿ ಕೆಲಸಕ್ಕೆ ಸೇರಿಕೊಂಡರು. ಅಂಥ ಹೆಣ್ಣುಗಳ ಮೇಲೆ ಹದ್ದುಗಣ್ಣುಗಳು ಎರಗತೊಡಗಿದವು. ಊರಿನ ಹೆಣ್ಣುಮಕ್ಕಳ ತಂಟೆಗೆ ಹೋಗಬೇಡಿರೆಂದು ಅದೆಷ್ಟೇ ಹೇಳಿದರೂ ಕೇಳದ ಈ ಹೊರರಾಜ್ಯಗಳ ತರುಣರೊಂದೆಡೆ, ತಾವಾಗಿಯೇ ಬೆಂಕಿಗೆ ಹಾರಿ ಮೈ ಸುಟ್ಟುಕೊಳ್ಳುವ ಊರಿನ ಪತಂಗಗಳೊಂದೆಡೆ. ನಮ್ಮದು ಎಲ್ಲವನ್ನೂ ಕಂಡರೂ ಏನೂ ಮಾಡಲಾರದ ಸ್ಥಿತಿ.

ಒಂದು ರಾತ್ರಿ ನಮ್ಮ ಆಫೀಸಿನ ಕಟ್ಟಡದಲ್ಲಿ ಗಲಾಟೆ ಶುರುವಾಗಿತ್ತು. ಕುಡಿದು ಗಲಾಟೆ ಮಾಡಿಕೊಳ್ಳುವುದು ಹೊಸದಲ್ಲವಾದ ಕಾರಣ ಸುಮ್ಮನೆ ಮಲಗಿದೆವು. ನಡುರಾತ್ರಿ ಒಂದು ಹೆಣ್ಣು ದನಿ ನಮ್ಮ ಓಣಿಯಲ್ಲಿ ‘ಮೇರೆ ಪತಿಕೋ ಬಚಾವ್’ ಎಂದು ಕೂಗುತ್ತಾ ಓಡುತ್ತಿದ್ದಳು. ನಾವೆಲ್ಲ ಗಾಬರಿಬಿದ್ದು ಹೊರಗೋಡಿ ನೋಡಿದರೆ ಇದೇ ಊರಿನ ಬೋಟಿ ಮಂಜಪ್ಪನ ಮಗಳು ರಾಧ! ಅರೆ ಇವಳಿಗ್ಯಾವ ಪತಿಯಪ್ಪಾ ಎಂಬುದು ಒಂದು ಅಚ್ಚರಿಯಾದರೆ, ಇವಳು ಯಾವಾಗ ಹಿಂದಿ ಕಲಿತಳಪ್ಪಾ ಎಂದು ಇನ್ನೊಂದು ಬೆರಗು. ಮರುದಿನ ಬೆಳಗ್ಗೆ ಆಫೀಸಿನ ಟೇಬಲಿನ ಮೇಲೆಲ್ಲ ಹೆಪ್ಪುಗಟ್ಟಿನಿಂತ ರಕ್ತ! ಯಾರ್ಯಾರು ಹೊಡೆದುಕೊಂಡು ಸತ್ತರೋ ಎಂದು ನೋಡಿದರೆ ಇಬ್ಬರು ಸರದಾರರು ಒಬ್ಬ ಚೌಹಾಣನೊಂದಿಗೆ ಬಡಿದಾಡಿ ಮೂಗು ಮುಸುಡಿ ಒಡೆದುಕೊಂಡು ರಕ್ತರಂಪಾಟವಾಗಿತ್ತು.

ಪರವಿಂದರ್ ಸಿಂಗ್ ಎಂಬ ವಿವಾಹಿತನ ಮನೆಗೆ ಈ ರಾಧಾ ಕೆಲ ದಿನಗಳಿಂದ ಕೆಲಸ ಮಾಡುತ್ತಿದ್ದಳು. ಈ ಪರವಿಂದರನಿಗೆ ರಂಭೆಯಂತಹ ಪತ್ನಿಯಿದ್ದೂ ನಾಲ್ಕು ಅಡಿ ಎತ್ತರದ ಚೀಂಕಲುಕಡ್ಡಿ ಹುಡುಗಿಯ ಜೊತೆ ಚಕ್ಕಂದ ನಡೆಸಿದ್ದನಂತೆ. ಅವನು ವಿವಾಹಿತನೆಂದು ತ್ರಿವೇಣಿ ಚೌಹಾಣನೆಡೆಗೆ ಈ ಹುಡುಗಿ ಹೊರಳಿದ್ದಳಂತೆ. ಅವನೋ ಆರೂವರೆ ಅಡಿಯ ದೈತ್ಯ ಆಸಾಮಿಯಾಗಿದ್ದು, ಇಬ್ಬರು ಮಕ್ಕಳ ತಂದೆಯಾಗಿದ್ದ. ಒಬ್ಬ ಮಗನನ್ನು ಹದಿನೈದರ ಹರೆಯದಲ್ಲೇ ಮದುವೆಯನ್ನೂ ಮಾಡಿದ್ದ. ಹೆಂಡತಿ ಮಗ, ಸೊಸೆಯಂದಿರ ಜೊತೆ ಊರಲ್ಲಿದ್ದರೂ ತಾನು ಅವಿವಾಹಿತನೆಂದು ರಾಧಾಳೆದುರು ಸುಳ್ಳು ಹೇಳಿದ್ದಿರಬಹುದು. ಇವರಲ್ಲಿ ಯಾರನ್ನು ರಾಧೆ ಪತಿ ಎಂದು ಕರೆದಿದ್ದಿರಬಹುದು ಎಂಬ ಕುತೂಹಲ ನಮ್ಮನ್ನು ಕಾಡತೊಡಗಿತು. ಒಟ್ಟಿನಲ್ಲಿ ಆ ರಾತ್ರಿ ಈ ರಾಧೆಗಾಗಿ ನಡೆದ ಕಾಳಗದಲ್ಲಿ ರಕ್ತ ಹರಿದು ಹೆಪ್ಪುಗಟ್ಟಿ, ಕೆಲವೇ ದಿನಗಳಲ್ಲಿ ಪರವಿಂದರ್ ಸಿಂಗ್ ಮೇಲಿನ ಸೇಡಿನ ಹಗೆಯಲ್ಲಿ ತ್ರಿವೇಣಿ ಚೌಹಾಣ ಈ ರಾಧೆಯನ್ನು ವರಿಸಿಯೇಬಿಟ್ಟ.

ಮದುವೆಯಾದ ಆರಂಭದಲ್ಲಿ ಒಮ್ಮೆ ಮುಂಬೈ ದರ್ಶನ ಮಾಡಿ, ಉತ್ತರದವರಂತೆ ಕಾಲಲ್ಲಿ ಅಗಲವಾದ ಕಾಲುಚೈನು ಧರಿಸಿ, ಬೈತಲೆಯ ನಡುವೆ ಸಿಂಧೂರ ತುಂಬಿಕೊಂಡು, ಜಿಗಿಬಿಗಿ ಹೊಳೆಯುವ ಸೀರೆಯುಟ್ಟು ತಲೆತುಂಬ ಸೆರಗುಹೊದ್ದು ಡೌಲಿನಿಂದ ಹರಕುಮುರುಕು ಹಿಂದಿ ಮಾತಾಡುತ್ತಾ ಊರಿಗೆ ಮರಳಿದ ಸೌಭಾಗ್ಯವೊಂದುಳಿದು ಅವಳಿಗೆ ಸಿಕ್ಕಿದ್ದು ನಿತ್ಯ ಹೊಡೆತ, ಬಡಿತ, ಜಗಳ, ಗಲಾಟೆ ಮಾತ್ರವೇ ಅನಿಸುತ್ತದೆ. ಇಲ್ಲೊಬ್ಬಳು ಸವತಿಯಿದ್ದಾಳೆಂದು ತಿಳಿದು ಉತ್ತರದಿಂದ ಬಂದಿಳಿದ ಅವನ ಮೊದಲ ಪತ್ನಿಯೂ ಜುಟ್ಟು ಜಡೆ ಹಿಡಿದೆಳೆದು ರಾಧೆಯನ್ನು ಜಕಂಗೊಳಿಸಿ ಹೋಗಿದ್ದ ಪ್ರಸಂಗವೂ ನಡುವೆ ನಡೆದುಹೋಯಿತು.

ನಮ್ಮ ಮನೆಗೆ ಹಾಲು ಹಾಕುವ ರತ್ನಿಯ ಅಕ್ಕ ತನ್ನ ಮನೆಯನ್ನೇ ತೊರೆದು ಈ ನಮ್ಮ ಯುವಕರಲ್ಲೇ ಒಬ್ಬನ ಜೊತೆ ಮದುವೆಯೇ ಆಗದೆ ಉಳಿದುಬಿಟ್ಟದ್ದೂ ಆಯಿತು. ‘ಅವನೆಲ್ಲಿ ಮದುವೆ ಆಗ್ತಾನೆ? ಒಂದು ದಿನ ಕೈಕೊಟ್ಟು ಊರುಬಿಟ್ಟು ಹೋಗ್ತಾನೆ’ ಎಂದು ಜನ ಮಾತಾಡಿಕೊಂಡರು. ಎಷ್ಟೋ ಹುಡುಗಿಯರು ಅಲ್ಲಿ ಇಲ್ಲಿ ಸಿಕ್ಕಿಬಿದ್ದರು, ಬಸಿರಾದರು, ಆಸ್ಪತ್ರೆಯಲ್ಲಿ ಕಂಡೆವು, ಮೆಡಿಕಲ್ ಶಾಪಿನಲ್ಲಿ ಕಂಡೆವು ಎಂದೆಲ್ಲ ತರಾವರಿ ಕಥೆಗಳು ಊರ ಬೀದಿಗಳಲ್ಲಿ ಸುಂಟರಗಾಳಿಯಂತೆ ತಿರುಗುತ್ತಿದ್ದವು.

ಹೀಗಿರುವಾಗ ನಮ್ಮ ಮನೆಗೆ ಹಾಲು ಹಾಕುವ ಹುಡುಗಿ ರತ್ನಿ ನಮ್ಮ ಮನೆಯೆದುರಿನ ಪಪ್ಪಾಯ ಮರವನ್ನೇ ನೋಡುತ್ತಾ ತನಗೆ ಪಪ್ಪಾಯ ತಿನ್ನುವಾಸೆಯಾಗಿದೆ ಎಂದು ಕುಯ್ದು ಹಣ್ಣಾಗದ ಪಪ್ಪಾಯವನ್ನೇ ಕರಕರನೆ ಕಡಿದು ಇಡೀ ಪಪ್ಪಾಯವನ್ನು ತಿಂದು ಮುಗಿಸಿ ಮನೆಗೂ ಒಂದೆರಡು ಕಾಯಿ ಹೊತ್ತುಹೋದ ಸೋಜಿಗವನ್ನು ನೋಡಿದಾಗಲೇ ಒಬ್ಬರು, ‘ಆ ಹುಡುಗಿ ಹೊಟ್ಟೆಗೆ ಅಷ್ಟು ಬಿಗಿಯಾಗಿ ಟವೆಲ್ ಕಟ್ಟಿಕೊಂಡಿದ್ದಳು ಗಮನಿಸಿದಿರಾ?’ ಎಂದು ಮತ್ತೇನೋ ಹುಳುಬಿಟ್ಟಿದ್ದರು.

ದಿನೇ ದಿನೇ ಅವಳ ಹೊಟ್ಟೆ ಉಬ್ಬತೊಡಗಿತ್ತು. ಕೂತ ಕೂತಲ್ಲೇ ಅಳಹತ್ತಿದ್ದಳು. ಕಾರಣ ಕೇಳಿದರೆ ಮುಖ ಎತ್ತಲೋ ತಿರುಗಿಸಿ ಯಾವುದೋ ಕಟ್ಟುಕಥೆ ಅರುಹುತ್ತಿದ್ದಳು. ನಿಜ ಹೇಳಿದ್ದರೆ ‘ನಮ್ಮ ಮಾತು ಕೇಳಿದ್ದರೆ ಈ ಸ್ಥಿತಿ ಬರುತ್ತಿತ್ತಾ?’ ಎಂದು ನಾವು ಕೇಳಬಹುದು ಎಂದೇನೋ ಅನಿಸುತ್ತಿರಬಹುದು ಅವಳಿಗೆ. ಇದ್ದಕ್ಕಿದ್ದ ಹಾಗೆ ಊರಿಗೆ ಹೋಗಿಬಿಟ್ಟಳು.

ಒಂದು ದಿನ ಉತ್ತರ ಭಾರತದ ಇಬ್ಬರು ಕುಡಿದ ಮತ್ತಲ್ಲಿ ಮಾತಾಡಿಕೊಂಡ ಮಾತೊಂದು ಅಂತೂ ಇಂತೂ ನಮ್ಮ ತನಕ ಬಂದೇ ಬಂತು. ಅದೇನೆಂದರೆ, ಬಲವಂತ್ ವಾಲಿಯಾ ಎಂಬುವವನಿಂದ ಬಸಿರಾದ ರತ್ನಿ ಮದುವೆಯಾಗುವಂತೆ ಮೊದ ಮೊದಲಿಗೆ ಅವನಲ್ಲಿ ದುಂಬಾಲುಬಿದ್ದು, ಅವನು ‘ರಂಡಿ ಲಡ್ಕಿ ಹೈ ತೂ’ ಎಂದು ಥೂಕರಿಸಿ ಬಿಟ್ಟಮೇಲೆ ಬಸಿರಿಳಿಸಲು ಹಣಕ್ಕಾಗಿ ಹೋರಾಟ ನಡೆಸಿದ್ದಳೆಂದೂ ಅವನು ಕೊಡದೆ ಸತಾಯಿಸುತ್ತಾ ದಿನೇ ದಿನೇ ಇವಳ ಹೊಟ್ಟೆಯುಬ್ಬುತ್ತಾ ಅವಳು ಕುಲ್ಜೀತ್ ಸಿಂಗನಲ್ಲಿ ಅಳಲು ತೋಡಿಕೊಂಡಳಂತೆ. ಅವನು ಹಣವನ್ನು ಕೊಡುತ್ತೇನೆಂದು ಅಂತೂ ಒಪ್ಪಿ ಅವಳ ಆ ಪರಿಸ್ಥಿತಿಯಲ್ಲೂ ಅವಳನ್ನು ಒಮ್ಮೆ ಬಳಸಿಕೊಂಡು ಮುನ್ನೂರು ರುಪಾಯಿ ತೆತ್ತನಂತೆ.

ಹಣ ಪಡೆದು ಊರುಬಿಟ್ಟ ಅವಳು ಕೆಲದಿನಗಳಲ್ಲೇ ಮತ್ತೆ ಹೊರೆಯಿಳಿಸಿಕೊಂಡು ನೀಸೂರಾಗಿ ಊರಿಗೆ ಮರಳಿದಳು. ಇಷ್ಟೆಲ್ಲ ಆದ ಬಳಿಕ ಸೋತು ಹಣ್ಣಾಗಿರಬಹುದು ಎಂದುಕೊಂಡರೆ ಅವಳು ಮೊದಲಿಗಿಂತ ದುಪ್ಪಟ್ಟು ಲಕಲಕ ಹೊಳೆಯುತ್ತ ಪಕ್ಕಾ ವ್ಯವಹಾರಸ್ಥಳಂತೆ ನಡೆದುಕೊಳ್ಳತೊಡಗಿದಳು. ಉಳಿದ ಹೆಣ್ಣುಮಕ್ಕಳಾದರೂ ಇವಳಿಗಿಂತ ಭಿನ್ನವಾಗಿಯೇನೂ ಇರಲಿಲ್ಲ. ಹೀಗೆ ಹುಚ್ಚು ಮೋಹದ ಉನ್ಮತ್ತ ಕುದುರೆ ಸ್ವಚ್ಛಂದದಲ್ಲಿ ಹಾರುತ್ತಿತ್ತು. ಹಾರುತ್ತಲೇ ಇತ್ತು. ಹೆಣ್ಣುಮಕ್ಕಳು ಕಾಣದ ಕಳ್ಳುಸುಬಿನಲ್ಲಿ ಮೆಲ್ಲ ಮೆಲ್ಲನೆ ಹೂತುಹೋಗುತ್ತಲೇ ಇದ್ದರು.

ಕಾದಂಬಿನಿ

ಹೈಡ್ರೋ ಇಂಜಿನಿಯರ್ಸ್ ಕಂಪನಿಯಲ್ಲಿ ಆಫೀಸ್ ಎಕ್ಸಿಕ್ಯೂಟೀವ್. ಬಿಡುವಿನ ವೇಳೆಯಲ್ಲಿ ಬರೆಯುವ ಹವ್ಯಾಸ. ಕೆಲವು ಪತ್ರಿಕೆಗಳಲ್ಲಿ ಬರಹಗಳು ಪ್ರಕಟವಾಗಿವೆ.

Share

Leave a comment

Your email address will not be published. Required fields are marked *

Recent Posts More

  • 1 week ago No comment

    ಕವಿಸಾಲು | ಇಂಡೋನೇಶಿಯಾ

        ಕವಿಸಾಲು         ಕಿಚ್ಚೆದ್ದು ಕುಣಿವ ನೀರು ಬಿರುಗಾಳಿ ತುಂಬಿದ ಒಡಲು ಎತ್ತೊಯ್ದು ಬಿಸಾಡಿ ಇಳೆಗೆ ಎದೆಯಿಳಿಸಿದೆ ಕಡಲು ನಡುಗಿಬಿಟ್ಟಳೆ ವಸುಂಧರೆ ಶತಕೋಟಿ ಬಿರುಕು ಬಿಟ್ಟು ಸುನಾಮಿಯ ಕೋಪಕ್ಕೆ ವಿಕಾರವಾಗಿ ಬೊಬ್ಬಿರಿದು ಊಳಿಟ್ಟು ಜೀವ ಜಲ, ಉಸಿರ ಗಾಳಿ ಹುಚ್ಚೆದ್ದು ಕುಣಿದು ಅಪ್ಪಳಿಸಿದ ಆಘಾತಕ್ಕೆ ಕಂಗೆಟ್ಟು ತತ್ತರಿಸಿವೆ ಪ್ರಾಣಿ, ಮನುಜ ಕುಲ ಮಾಡು ಹಾರಿ, ಕಂಬಗಳು ಕುಸಿದು ನೆಲಕಚ್ಚಿವೆ ಮಾನವನ ಬೀಡು ಕತ್ತರಿಸಿ ...

  • 1 week ago No comment

    ಕವಿಸಾಲು | ತಡವಿಲ್ಲದಿರಲಿ ಇನ್ನು…

        ಕವಿಸಾಲು         ದಾಳಿಗಳಿಗೆ ಮುಕ್ಕಾದ ಮಂದಿರವಿದು ಕುಸಿದು ಕುಳಿತ ದ್ವಾರಪಾಲಕರು ಎತ್ತರದ ಗೋಡೆಗಳ, ಎಚ್ಚರಿಕೆಯ ಗಂಟೆಗಳು ಕೂಡ ಮೌನವಿಂದು ಮನ ನಿರ್ಮಿಸಿದ ಹೆಬ್ಬಾಗಿಲುಗಳು ಒಲವ ಸಿರಿಗೆ ಚೇತರಿಸಿ ತೆರೆದ ಗಳಿಗೆ ಎತ್ತರದ ಹೊಸ್ತಿಲುಗಳ ತಡೆಯ ದಾಟಿ ತಲುಪಬೇಕಿದೆಯಷ್ಟೆ ಬಯಕೆ ಗುರಿಯನ್ನು ದಟ್ಟ ಹಸಿರಿನ ಕಾಡು, ಆಗಸದ ನೀಲಿ ಬಿಳಿಯ ಮೋಡಗಳ, ಬಿಸಿಲ ಬೆಳಕಿನ ನಡುವೆ ಬಯಲ ಸ್ವೇಚ್ಛೆಯ, ತಿಳಿಗಾಳಿ ತವಕದಲಿ ಬಂಧನಗಳ ...

  • 3 weeks ago No comment

    ಸ್ವಿಟ್ಜರ್ಲ್ಯಾಂಡಿನ ಕಣ್ಮಣಿ – ಲ್ಯೂಸರ್ನ್

        ನಾನಾ ಆಕರ್ಷಣೆಗಳಿರುವ ಈ ನಗರ ಪ್ರವಾಸಿಗರನ್ನು ಸೂಜಿಗಲ್ಲಿನಂತೆ ಆಕರ್ಷಿಸುತ್ತದೆ. ಸ್ವಲ್ಪವೂ ಬೇಸರ ತರಿಸದ ಸುಂದರ ಸ್ವಿಸ್ ನಗರಿ.         “ನಾಳೆ ಸ್ವಿಟ್ಜರ್ಲ್ಯಾಂಡ್” ಎಂದ ಕೂಡಲೇ ಬಸ್ಸಿನಲ್ಲಿ ಹರ್ಷೋದ್ಗಾರ! ಯೂರೋಪಿನ ಪ್ರವಾಸದಲ್ಲಿದ್ದ ನಮಗೆಲ್ಲ ಸ್ವಿಟ್ಜರ್ಲ್ಯಾಂಡ್ ಹೆಸರು ಇಂಪಾಗಿ ಕೇಳಿಸಲು ಕಾರಣಗಳು ಹಲವು. ಮೈಲುಗಟ್ಟಲೆ ಹಸಿರು ನೆಲ, ಹಚ್ಚಹಸಿರು ತುಂಬಿದ ಬೆಟ್ಟಗಳು, ಪರ್ವತಗಳಲ್ಲಿನ ಹಿಮ ಕರಗಿ ಜುಳಜುಳನೆ ಹರಿವ ತಿಳಿ ಬೂದು, ಬಿಳಿ ಬಣ್ಣದ ...

  • 1 month ago No comment

    ಕವಿಸಾಲು | ಒಲವಿನಾಟ

        ಕವಿಸಾಲು       ಶರದೃತು ತೂರಿದ ಪುಂಡ ಗಾಳಿಗೆ ಎಲೆಗಳೆಲ್ಲ ಹಾರಿ ಉದುರಿ ಮಳೆಗೆ, ಬಿಸಿಲ ಝಳಕ್ಕೆ ಒಡಲನೊಡ್ಡಿ ಹಾಡೋ ಹಕ್ಕಿಯ ಗೂಡು ಬರಿದು ಮೈಯ ಕೊಂಕಿಸಿ, ತಲೆಯ ಹೊರಳಿಸಿ ಚಳಿಯ ಮುಸುಕಿನಲ್ಲಿ ಕಂಪಿಸಿದ ಮರಕ್ಕೆ ಚಿಗುರ ಬಯಕೆಯ ನಸು ಪುಳಕ ಹಸಿರ ಉಸಿರಿನ, ಹಕ್ಕಿ ಹಾಡಿನ ಕನಸ ಹೊದಿಕೆಯ ಬಿಸಿ ಒಡಲು ತುಂಬಲು ಬಯಕೆಯಾಗಿ ಟೊಂಗೆ-ರೆಂಬೆಗಳಲಿ ಕವನ ಸದ್ದು ಗದ್ದಲವಿಲ್ಲದೆ ಇತ್ತ ಒಲವಿನೋಲೆಯ ...

  • 1 month ago No comment

    ಕವಿಸಾಲು | ನಕ್ಷತ್ರ ನಾವೆ

      ಕವಿಸಾಲು       ಮೋಡವೇ ಮನೆಯೊಳಗೆ ಇಳಿದಂತೆ ದಟ್ಟವಾದ ಹೊಗೆ ಮನೆಜಂತಿಗಳ ತುಂಬಾ ನೇತುಕೊಂಡಿದೆ ಚುಕ್ಕಿಗಳೇ ಮನೆಯ ಜಂತಿಗಳಲಿ ಯಾತ್ರೆ ಹೊರಟಂತೆ ಕಂಡರು ಮಿನುಕು ಹುಳುಗಳ ಹಾಗೆ ಚಿಮಣಿದೀಪದ ನೆರಳು ಸದಾ ಬೆನ್ನಿಗೆ ಗೋಡೆಗಳು ಅಕ್ಷರಶಃ ಬೂದಿಗುಡ್ಡದಂತೆ ಕಪ್ಪುಕಾಡಿಗೆಗಳ ಹಾಗೆ ಗೋಚರ ಬಾಗಿಲು ಕಿಟಕಿಗಳ ಮೂಲಕ ಬುಸುಗುಡುವ ಹೊಗೆ ಉಗಿಬಂಡಿಯ ಕಾಲಚಕ್ರದಲಿ ದಿನಗಳ ದೂಡಿದಂತೆ ಹೊಗೆಯ ಬೇಗೆಯಲಿ ಅವಳೆಂದೂ ಎದೆಗುಂದಲಿಲ್ಲ ಹಣೆಯ ಬೆವರಿನ ಗಟ್ಟಿ ತಾಜಾತನದ ...


Editor's Wall

  • 31 August 2018
    2 months ago No comment

    ಪ್ರಸಾದ್ ಪಟ್ಟಾಂಗ | ಓದು ಮಗು ಓದು…

        “ಮಕ್ಕಳಿಗಾಗಿ ಒಂದು ಪುಸ್ತಕ ಮಾಡಬೇಕಲ್ಲಾ… ಪಠ್ಯದಾಚೆಗೂ ಅವರು ಏನೇನು ಓದಬಹುದು ಎಂಬುದರ ಬಗ್ಗೆ ತಿಳಿಸುವಂಥದ್ದು” ಎಂದು ಟೆಲಿಫೋನ್ ಕರೆಯ ಮತ್ತೊಂದು ತುದಿಯಲ್ಲಿ ಅಂದು ಹೇಳುತ್ತಿದ್ದರು ಮಿತ್ರರಾದ ಗಣೇಶ್ ಕೋಡೂರು. ಓದು, ಬರವಣಿಗೆ, ಫೋಟೋಗ್ರಫಿ, ಪ್ರವಾಸ, ಕಾರ್ಯಕ್ರಮ, ಸಮಾಜಸೇವೆ, ಪ್ರಕಟಣೆ… ಹೀಗೆ ಎಲ್ಲದರಲ್ಲೂ ತೊಡಗಿಕೊಂಡಿರುವ ಗಣೇಶ್ ಅವರದ್ದು ಇದೊಂದು ಹೊಸ ಪ್ರಾಜೆಕ್ಟ್ ಇರಬೇಕು ಎಂದು ತಕ್ಷಣ ಅಂದುಕೊಂಡೆ ನಾನು. ಸದಾ ಕ್ರಿಯಾಶೀಲರಾಗಿರುವ ಗಣೇಶ್ ಕೋಡೂರು ಒಂದಲ್ಲಾ ಒಂದು ...

  • 30 August 2018
    2 months ago No comment

    ಕಾದಂಬಿನಿ ಕಾಲಂ | ತಮ್ಮ ಶವಪೆಟ್ಟಿಗೆಗೆ ತಾವೇ ಹೊಡೆದುಕೊಂಡ ಮೊದಲ ಮೊಳೆ

                        ಬಹುದೊಡ್ಡ ಪ್ರಜಾಪ್ರಭುತ್ವದ ಅಖಂಡ ಭಾರತವನ್ನು ಅಷ್ಟು ಸುಲಭವಾಗಿ ಸರ್ವಾಧಿಕಾರದ ಹಿಡಿತದಲ್ಲಿ ಬಂಧಿಸುವುದು ಸಾಧ್ಯವಿಲ್ಲ.   2019ರ ಲೋಕಸಭಾ ಚುನಾವಣೆಯ ಪೂರ್ವದಲ್ಲಿ ಅತ್ಯಂತ ಕಳವಳಕಾರಿ ಘಟನಾವಳಿಗಳು ಜರುಗುತ್ತಾ ಈ ದೇಶದ ಪ್ರಜ್ಞಾವಂತ ನಾಗರೀಕರ ಕಣ್ಣೆದುರು ಭಯದ ನೆರಳು ಕವಿಯುವಂತೆ ಮಾಡುತ್ತಿವೆ. ದೇಶದೊಳಗೆ ಕೊಲೆ, ಹಲ್ಲೆ, ಅತ್ಯಾಚಾರ, ಗಲಭೆ, ಸುಳ್ಳು ಸುದ್ಧಿ ಹಬ್ಬಿಸುವುದು, ಆತಂಕ ಸೃಷ್ಟಿಸುವುದು ಇನ್ನೂ ...

  • 26 August 2018
    2 months ago No comment

    ಗೆದ್ದು ಬೀಗುತ್ತಿರುವ ದುಷ್ಟ ರಾಜಕೀಯ ಮತ್ತು ಅಮರ್ತ್ಯ ಸೇನ್ ಮಾತುಗಳು

        ಜನರನ್ನೇ ಕೊಲ್ಲಲು ಜನಪ್ರಭುತ್ವವನ್ನು ದುರ್ಬಳಕೆ ಮಾಡಿಕೊಳ್ಳುವ ದುಷ್ಟತನಕ್ಕೆ ಕೊನೆಗಾಲ ಯಾವಾಗ?     “ಪ್ರಜಾಪ್ರಭುತ್ವ ಅಪಾಯದಲ್ಲಿರುವ ಈ ಹೊತ್ತಿನಲ್ಲಿ ಎಲ್ಲ ಕೋಮುವಾದಿಯೇತರ ಮತ್ತು ಬಿಜೆಪಿಯೇತರ ಶಕ್ತಿಗಳು ಒಂದಾಗಿ 2019ರ ಲೋಕಸಭಾ ಚುನಾವಣೆಯನ್ನು ಎದುರಿಸಬೇಕಿದೆ ಮತ್ತು ಇವುಗಳ ಜೊತೆಗೂಡಲು ಎಡಪಕ್ಷಗಳು ಹಿಂಜರಿಯಕೂಡದು.” ಇವು ನೊಬೆಲ್ ಪ್ರಶಸ್ತಿ ಪುರಸ್ಕೃತ ಅರ್ಥಶಾಸ್ತ್ರಜ್ಞ ಅಮರ್ತ್ಯ ಸೇನ್ ಅವರ ಮಾತುಗಳು. “ನಾವು ಸರ್ವಾಧಿಕಾರವನ್ನು, ಸರ್ವಾಧಿಕಾರಿ ಧೋರಣೆಯನ್ನು ವಿರೋಧಿಸಲೇಬೇಕಾಗಿದೆ. ಕೋಮುವಾದಿ ಬಲಪಂಥೀಯ ಪಡೆಗಳನ್ನು ವಿರೋಧಿಸಲು ...

  • 26 August 2018
    2 months ago No comment

    ಕಡು ಭಯಂಕರ ಕತ್ತಲೊಳಗೆ ಅವಳಂಥ ಅದೆಷ್ಟು ಜೀವಗಳೊ!

      ಅವಳೊಳಗೀಗ ಕನಸುಗಳೇ ಇಲ್ಲ. ಮಿಂಚು ಸ್ಫುರಿಸಬೇಕಿದ್ದ ಕಣ್ಣುಗಳಲ್ಲಿ ನಾಳೆಗಳನ್ನು ಚಿಂತಿಸುವ ಯಾತನೆ ಮಾತ್ರವೇ ಸರಿದಾಡುತ್ತಿದೆ.       ಒಂದು ವರದಿಯ ಪ್ರಕಾರ, ಕಳೆದ ಏಪ್ರಿಲ್ ಹೊತ್ತಿಗೆ ಹತ್ತಿರ ಹತ್ತಿರ ಏಳು ಲಕ್ಷದಷ್ಟು ರೋಹಿಂಗ್ಯಾಗಳು ಬಾಂಗ್ಲಾದೇಶದೊಳಕ್ಕೆ ಸೇರಿಕೊಂಡಿದ್ದಾರೆ. ಅವರಲ್ಲಿ ಅರ್ಧಕ್ಕರ್ಧದಷ್ಟು ಮಕ್ಕಳೇ. ಆ ಮಕ್ಕಳೆಲ್ಲ ಒಂದಲ್ಲ ಒಂದು ರೀತಿಯಲ್ಲಿ ದೈಹಿಕವಾಗಿ ಮತ್ತು ಭಾವನಾತ್ಮಕವಾಗಿ ದಮನಿತರು. ಆ ಮಕ್ಕಳ – ಅದರಲ್ಲೂ ಹೆಣ್ಣುಮಕ್ಕಳ ಬದುಕು ಎಂಥ ನರಕಮಯ ಎಂಬುದನ್ನು ...

  • 23 August 2018
    2 months ago No comment

    ಕಾದಂಬಿನಿ ಕಾಲಂ | ದುರ್ಬಲ ಗಳಿಗೆಗಳನ್ನೇ ಹೊಂಚುವ ಹದ್ದುಗಣ್ಣುಗಳೆದುರು ಹೆಣ್ಣು ದೇಹ

                        ಲೋಕದ ನೀತಿಯೇ ಅದಲ್ಲವೇ? ತನ್ನ ಮೂಗಿನ ನೇರಕ್ಕೆ ನ್ಯಾಯ ವಿತರಿಸುವುದು ಮತ್ತು ದುರ್ಬಲರನ್ನೇ ಅಲ್ಲವೇ ಬಲಿಗಂಬಕ್ಕೇರಿಸುವುದು?   ‘ಟೈಟಾನಿಕ್’ ಎನ್ನುವುದು ವಿಕೋಪದ ಸಂದರ್ಭದಲ್ಲಿ ಬಲಿಷ್ಠರ ಕೈ ಹೇಗೆ ಮೇಲಾಗುತ್ತದೆನ್ನುವುದಕ್ಕೆ ಒಂದು ಸಶಕ್ತ ರೂಪಕ. ಅಂಥಲ್ಲಿ ಕೆಳಗಿನವರನ್ನು ತುಳಿಯುವ, ಅವರ ಸವಲತ್ತುಗಳನ್ನು ಕಬಳಿಸಲು ಹವಣಿಸುವ ವಿಕರಾಳ ಆಟವೊಂದು ನಿರಾತಂಕವಾಗಿ ಜರುಗುತ್ತದೆ. ನೆನ್ನೆ ರಾತ್ರಿ ಒಬ್ಬ ಯುವಕ ...