Share

ಅವರ ನಡುವೆಯೂ ಕನಸು ಹಂಚೋಣ…
ಪ್ರಸಾದ್ ನಾಯ್ಕ್ ಕಾಲಂ

ಬ್ರಿಟನ್ನಿನಲ್ಲಿ ಜೋ ಕಾಕ್ಸ್ ಭರವಸೆಯ ಹಣತೆಯನ್ನು ಹಚ್ಚಿ ಹೋಗಿದ್ದಾರೆ. ಅದರ ಬೆಳಕು ನಿಧಾನವಾಗಿಯಾದರೂ ವಿಶ್ವದೆಲ್ಲೆಡೆ ವ್ಯಾಪಿಸಲಿದೆ.

 

ಜೋ ಕಾಕ್ಸ್

“ಸಾವಿರಾರು ಮಂದಿ ಒಬ್ಬಂಟಿಗರಾಗಿ ನರಳುತ್ತಿರುವ ಹೊರತಾಗಿಯೂ ಉಳಿದವರು ಈ ಬಗ್ಗೆ ಮರೆತಂತಿರುವುದಾದರೆ ಅಂಥಾ ದೇಶದಲ್ಲಿ ನಾನು ಯಾವತ್ತಿಗೂ ಇರಬಯಸುವುದಿಲ್ಲ” ಎಂದಿದ್ದರು ಜೋ ಕಾಕ್ಸ್.

ಇಂದು ಜೋ ಕಾಕ್ಸ್ ನಮ್ಮೊಂದಿಗಿಲ್ಲ. ಆದರೆ ಅವರ ಕನಸಿನ ಬೀಜವು ಮೊಳಕೆಯೊಡೆದು ಹೆಮ್ಮರವಾಗಿ ಬೆಳೆಯಲು ತಯಾರಾಗಿ ನಿಂತಿದೆ. ಅದು ಇನ್ನೇನಲ್ಲ. ಇತ್ತೀಚೆಗಷ್ಟೇ ಬ್ರಿಟಿಷ್ ಪ್ರಧಾನಮಂತ್ರಿಗಳಾದ ಥೆರೇಸಾ ಮೇ ಆರಂಭಿಸಿದ ‘ಮಿನಿಸ್ಟ್ರಿ ಆಫ್ ಲೋನ್ಲಿನೆಸ್’. ಒಬ್ಬಂಟಿತನಕ್ಕೂ ಒಂದು ಸರಕಾರಿ ಮಂತ್ರಾಲಯ!

2016ರಲ್ಲಿ ಆಗಂತುಕನೊಬ್ಬ ಜೋ ಕಾಕ್ಸ್ ಅವರನ್ನು ಹಾಡಹಗಲೇ ಹತ್ಯೆಗೈದಾಗ ಇಡೀ ಬ್ರಿಟನ್ ಬೆಚ್ಚಿಬಿದ್ದಿತ್ತು. ನಲವತ್ತೊಂದು ಸಾಯುವ ವಯಸ್ಸೇನಲ್ಲ. ಅದರಲ್ಲೂ ಸಮಾಜದಲ್ಲಿ ಏನಾದರೊಂದು ಸಕಾರಾತ್ಮಕ ಬದಲಾವಣೆಯನ್ನು ತರಲೇಬೇಕೆಂಬ ಉತ್ಸಾಹದಲ್ಲಿ ಕಾಲಿಗೆ ಚಕ್ರ ಕಟ್ಟಿಕೊಂಡವರಂತೆ ಓಡಾಡುತ್ತಿದ್ದ, ಲವಲವಿಕೆಯಿಂದ ಕೆಲಸ ಮಾಡುತ್ತಿದ್ದ ಜೋ ರಂಥಾ ಉತ್ಸಾಹಿ ರಾಜಕಾರಣಿಗಳಿಗಂತೂ ಅಲ್ಲವೇ ಅಲ್ಲ. ಪಕ್ಷ ರಾಜಕೀಯವನ್ನೂ ಮೀರಿ ಸಿರಿಯಾ ಸಂತ್ರಸ್ತರ ಬಗ್ಗೆ ಸೇರಿದಂತೆ ಹಲವು ವಿಷಯಗಳ ಕುರಿತಾಗಿ ಸಂಸತ್ತಿನಲ್ಲಿ ದನಿಯೆತ್ತಿದವರು ಈಕೆ. ಜೂನ್ 2016ರಲ್ಲಿ ಹತ್ಯೆಗೊಳಗಾದಾಗ ಜೋ ಒಬ್ಬಂಟಿತನಕ್ಕೆ ಸಂಬಂಧಪಟ್ಟ ಆಯೋಗವೊಂದರ ಕೆಲಸದಲ್ಲಿ ತೊಡಗಿಸಿಕೊಂಡಿದ್ದರು. ದಿನೇ ದಿನೇ ಹೆಚ್ಚುತ್ತಿರುವ ಒಬ್ಬಂಟಿತನದ ಸಮಸ್ಯೆಯ ಬಗ್ಗೆ ಜನಸಾಮಾನ್ಯರಲ್ಲಿ ಜಾಗೃತಿಯನ್ನು ಮೂಡಿಸುವ ಸದುದ್ದೇಶ ಅವರಿಗಿತ್ತು. ಜನಜಾಗೃತಿಯ ನಂತರದ ಹಂತವಾಗಿ ಸಮುದಾಯ ಮತ್ತು ರಾಜಕೀಯ ನಾಯಕತ್ವದ ಶಕ್ತಿಗಳನ್ನು ಬಳಸಿಕೊಂಡು ಈ ಸಮಸ್ಯೆಗೊಂದು ಶಾಶ್ವತ ಪರಿಹಾರವನ್ನು ಕಂಡುಕೊಳ್ಳುವ ದೂರದೃಷ್ಟಿಯೂ ಅವರಿಗಿತ್ತು. ಈ ಕೆಲಸಗಳನ್ನು ಜೋ ಯಾರ್ಕ್ಶೈರ್ ನಲ್ಲಿರುವ ತಮ್ಮ ಚುನಾವಣಾ ಕ್ಷೇತ್ರಗಳಾದ Batley ಮತ್ತು Spenಗಳಿಂದಲೇ ಆರಂಭಿಸಿದ್ದರು ಎಂಬುದನ್ನು ಹೇಳಲೇಬೇಕು.

ಜೋ ಕಾಕ್ಸ್ ರ ಹತ್ಯೆಯ ನಂತರ ಅವರ ಕನಸಿನ ತೇರನ್ನು ಯಶಸ್ವಿಯಾಗಿ ಮುನ್ನಡೆಸಿದವರು ಸಂಸದರಾದ ರೇಶಲ್ ರೀವ್ಸ್ ಮತ್ತು ಸೀಮಾ ಕೆನಡಿ. ಒಬ್ಬಂಟಿತನ ಸಂಬಂಧಿ ಜೋ ಕಾಕ್ಸ್ ಆಯೋಗದ ಚುಕ್ಕಾಣಿಯನ್ನು ಹಿಡಿದು ಮುನ್ನಡೆಸಿದ ಈ ಈರ್ವರು ವರದಿಯನ್ನು ಬಿಡುಗಡೆಗೊಳಿಸಿದರಲ್ಲದೆ ಈ ಬಗ್ಗೆ ಸರಕಾರದ ಗಮನ ಸೆಳೆಯುವಲ್ಲಿ ಯಶಸ್ವಿಯಾಗಿದ್ದರು. “ಒಬ್ಬಂಟಿತನವು ಎಳೆಯರಿಂದ ಹಿಡಿದು ಮುದುಕರನ್ನೂ ಕಾಡಿಸಿದೆ… ಅದೃಷ್ಟವಶಾತ್ ನಮ್ಮನಿಮ್ಮಂತಹ ಜನಸಾಮಾನ್ಯರು ಇದನ್ನು ನಿವಾರಿಸಲು ನೆರವಾಗಬಲ್ಲರು ಕೂಡ. ನೆರೆಕರೆಯವರ ಬಗೆಗಿನ ಚಿಕ್ಕ ಕಾಳಜಿ, ವೃದ್ಧ ಸಂಬಂಧಿಗಳ ಮನೆಗೊಂದು ಭೇಟಿ, ಹಲವು ದಿನಗಳಿಂದ ಭೇಟಿಯಾಗದಿರುವ ಗೆಳೆಯನೊಬ್ಬನಿಗೆ ನೀಡಿರುವ ಭರವಸೆಯಂತೆ ಮಾಡಬೇಕಿರುವ ಒಂದು ಟೆಲಿಫೋನ್ ಕರೆ ಅಥವಾ ಒಂದು ಭೇಟಿ. ಹೀಗೆ ನಿಮ್ಮ ಹೆಜ್ಜೆಯು ಏನು ಬೇಕಾದರೂ ಆಗಬಹುದು” ಎಂದಿದ್ದರು ಜೋ ಕಾಕ್ಸ್. ಈ ಮಹಾತ್ವಾಕಾಂಕ್ಷಿ ಆಯೋಗದ ಬಗ್ಗೆ ಆಕೆಗಿದ್ದ ನಿರೀಕ್ಷೆಗಳು ದೊಡ್ಡ ಮಟ್ಟಿನದ್ದೇ ಎಂದು ಹೇಳಬಹುದು. ಆದರೆ ಈ ಕ್ಷಣಕ್ಕೆ ಸಾಕ್ಷಿಯಾಗಲು ಅವರು ನಮ್ಮೊಂದಿಗಿಲ್ಲದಿರುವುದು ಮಾತ್ರ ವಿಪರ್ಯಾಸ.

ಜೋ ಕಾಕ್ಸ್ ಆಯೋಗವು ತನ್ನ ವರದಿಯಲ್ಲಿ ಹಲವು ಪ್ರಮುಖ ಅಂಶಗಳನ್ನು ಬೆಳಕಿಗೆ ತಂದಿದ್ದಂತೂ ಸತ್ಯ. ಬ್ರಿಟನ್ನಿನಲ್ಲಿ ಒಂಭತ್ತು ಮಿಲಿಯನ್ ಗೂ ಹೆಚ್ಚಿನ ವಯಸ್ಕರು ಒಬ್ಬಂಟಿತನದಿಂದ ಬಳಲುತ್ತಿದ್ದಾರೆ ಎಂಬ ಆಘಾತಕಾರಿ ಮಾಹಿತಿಯನ್ನು ವರದಿಯು ನೀಡಿತ್ತು. ಲಂಡನ್ನಿಗೆ ಬಂದಿಳಿದ 58% ಗೂ ಹೆಚ್ಚಿನ ಪ್ರಮಾಣದ ವಲಸಿಗರ ಸಮಸ್ಯೆಯೂ ಇದಾಗಿತ್ತು. 75 ವರ್ಷಕ್ಕಿಂತ ಹೆಚ್ಚಿನವರಲ್ಲಿ ಮೂವರಲ್ಲೊಬ್ಬರು ಕಾಡುತ್ತಿರುವ ಒಬ್ಬಂಟಿತನದ ಭಾವನೆಗಳನ್ನು ನಿಯಂತ್ರಿಸಲಾರದೆ ಒದ್ದಾಡುತ್ತಿದ್ದರು. ಸರಾಸರಿ 65ರ ವಯಸ್ಸಿನ ಬರೋಬ್ಬರಿ 3.6 ಮಿಲಿಯನ್ ಹಿರಿಯರಿಗೆ ಒಂಟಿತನವನ್ನು ಹೊಡೆದೋಡಿಸಲು ಸಂಗಾತಿಯಾಗಿದ್ದಿದ್ದೆಂದರೆ ಟೆಲಿವಿಷನ್ ಮಾತ್ರ. ಹತ್ತರಲ್ಲಿ ಒಂದಕ್ಕಿಂತಲೂ ಹೆಚ್ಚಿನ ವಯಸ್ಕ ಪುರುಷರು ಒಂಟಿತನದಿಂದ ಬಳಲುತ್ತಿದ್ದರು, ಆದರೆ ಈ ಸಂಗತಿಯನ್ನು ರಹಸ್ಯವಾಗಿಟ್ಟುಕೊಂಡು ಒಳಗೊಳಗೇ ಕೊರಗುತ್ತಿದ್ದರು.

ಟ್ರೇಸಿ ಕ್ರೌಚ್

ಅಂತೂ ಒಂಟಿತನದ ನಿಟ್ಟುಸಿರಿನ ಬಿಸಿ ಬಹುಶಃ ಪ್ರಧಾನಮಂತ್ರಿಯವರಿಗೂ ತಟ್ಟಿರಬೇಕು. ಇವೆಲ್ಲದರ ಫಲವೇ ‘ಮಿನಿಸ್ಟ್ರಿ ಆಫ್ ಲೋನ್ಲಿನೆಸ್’. ಸದ್ಯ ಪ್ರಧಾನಿಯಾದ ಥೆರೇಸಾ ಮೇ ಕ್ರೀಡಾ ಮತ್ತು ನಾಗರಿಕ ವಿಭಾಗವನ್ನು ನೋಡಿಕೊಳ್ಳುತ್ತಿದ್ದ ಮತ್ತೋರ್ವ ಸಮರ್ಥ ಮಹಿಳೆಯಾದ ಟ್ರೇಸಿ ಕ್ರೌಚ್ ರ ಕೈಗೆ ಈ ಹೊಸ ಸರಕಾರಿ ಮಂತ್ರಾಲಯದ ಸಾರಥ್ಯವನ್ನು ನೀಡಿದ್ದಾರೆ. ಇದು ಒಂದು ರೀತಿಯಲ್ಲಿ ಸರಕಾರವು ಜೋ ಕಾಕ್ಸ್ ರಿಗೆ ಸಲ್ಲಿಸಿರುವ ಅರ್ಥಪೂರ್ಣ ಗೌರವಾರ್ಪಣೆಯೂ ಹೌದು.

ಇಂಥದ್ದೊಂದು ವಿಚಿತ್ರ ಹೆಸರಿನ ಸರಕಾರಿ ಮಂತ್ರಾಲಯವನ್ನು ರೂಪಿಸಿ ಥೆರೇಸಾ ಮೇ ಮತ್ತೆ ಸುದ್ದಿಯಾಗಿದ್ದು ಈ ಬಾರಿಯ ವಿಶೇಷ. ಆದರೆ ಥೆರೇಸಾರ ನೇತೃತ್ವದ ಸರಕಾರದ ನಡೆಯು ಸ್ವಾಗತಾರ್ಹ ಎಂಬುದರಲ್ಲಿ ಎರಡು ಮಾತಿಲ್ಲ. ಮಾನಸಿಕ ಆರೋಗ್ಯವನ್ನು ಗಂಭೀರವಾಗಿ ತೆಗೆದುಕೊಳ್ಳಬೇಕಾದ ದೂರದೃಷ್ಟಿಯ ಇಂಥಾ ನಡೆಗಳು ಉಳಿದ ದೇಶಗಳಿಗೂ ಮಾದರಿಯಾಗಲಿ ಎಂಬುದೇ ಆಶಯ.

~ ~ ~

ಅದು ಕ್ವಾರ್ಟ್ಝ್ ಇಂಡಿಯಾ ಕಳೆದ ವರ್ಷವಷ್ಟೇ ಪ್ರಕಟಿಸಿದ್ದ ಒಂದು ವರದಿ.

ಒಬ್ಬಂಟಿತನದಿಂದ ನರಳುತ್ತಿರುವ ಭಾರತದ ಹಿರಿಯ ನಾಗರಿಕರನ್ನು ಉದ್ದೇಶವಾಗಿರಿಸಿಕೊಂಡು ಹೊಸದೊಂದು ಬಗೆಯ ಕೇರ್ ಸೆಂಟರ್ ಗಳು ತಲೆಯೆತ್ತಿದ್ದವು. ಅವುಗಳು ವೃದ್ಧಾಶ್ರಮಗಳಲ್ಲ. ಬದಲಾಗಿ ಏಕಾಂಗಿಯಾಗಿರುವ ವೃದ್ಧರ ಮನೆಗೇ ಒಬ್ಬರು ಹೋಗಿ ಅವರೊಂದಿಗೆ ಒಂದಿಷ್ಟು ಸಮಯವನ್ನು ಕಳೆಯುವುದು. ಅವರೊಂದಿಗೆ ಹರಟೆಯೋ, ವಾಕಿಂಗೋ, ಓದೋ ಇನ್ನೇನೋ ಮಾಡುವುದು. ಅವರ ಮಾತುಗಳಿಗೆ ಕಿವಿಯಾಗುವುದು, ಸಾಧ್ಯವಾದರೆ ಅವರೊಂದಿಗೆ ಸರಳ ಬೋರ್ಡ್ ಗೇಮ್ ಗಳನ್ನಾಡುವುದು. ಅಷ್ಟೇ ಅಲ್ಲದೆ ಆಸಕ್ತ ವೃದ್ಧರಿಗೆ ಸಂಗೀತ, ಚಿತ್ರಕಲೆಗಳನ್ನಲ್ಲದೆ ಸರಳ ಸಂವಹನ ಸ್ಮಾರ್ಟ್ಫೋನ್ ಆಪ್ ಗಳಾದ ವಾಟ್ಸಾಪ್ ಮತ್ತು ಅಂತರ್ಜಾಲದ ಪ್ರಾಥಮಿಕ ಹಂತದ ಬಳಕೆಗಳನ್ನೂ ಕಲಿಸುವುದು. ಹೀಗೆ ಈ ಸಂಸ್ಥೆಗಳ ಕಡೆಯಿಂದ ದಿನನಿತ್ಯವೋ, ಎರಡು ದಿನಗಳಿಗೊಮ್ಮೆಯೋ (ಆಯ್ದ) ಸ್ವಯಂಸೇವಕರು ಬಂದು ವೃದ್ಧರೊಂದಿಗೆ ಸಮಯವನ್ನು ಕಳೆಯುತ್ತಿದ್ದರು. ಇದರಿಂದಾಗಿ ಈ ವೃದ್ಧರನ್ನು ನಿತ್ಯವೂ ಸದ್ದಿಲ್ಲದೆ ಕೊಲ್ಲುತ್ತಿದ್ದ ಒಬ್ಬಂಟಿತನಕ್ಕೆ ಕೊಂಚ ಪರಿಹಾರವೂ ಆಗುತ್ತಿತ್ತು. ಇತ್ತ ಹೀಗೆ ಬರುತ್ತಿದ್ದ ಸ್ವಯಂಸೇವಕರಿಗೆ ಸಂಸ್ಥೆಯಿಂದ ಕೊಡಲಾಗುತ್ತಿದ್ದ ಸಂಭಾವನೆಯಿಂದ ಒಂದಿಷ್ಟು ಸಂಪಾದನೆಯಾಗುವುದಲ್ಲದೆ ಅಸಹಾಯಕ ವೃದ್ಧರಿಗೆ ನೆರವಾದ ಸಾರ್ಥಕತೆಯ ಭಾವವೂ ದಕ್ಕುತ್ತಿತ್ತು.

ಹೀಗೆ ದೆಹಲಿ, ಮುಂಬೈ, ಪುಣೆ, ಗುರುಗ್ರಾಮ, ಅಹಮದಾಬಾದ್ ಗಳಂತಹ ಶಹರಗಳಲ್ಲಿ ಆರಂಭವಾಗಿದ್ದ ಇಂಥದ್ದೊಂದು ವ್ಯವಸ್ಥೆಯ ಬಗ್ಗೆ ಕ್ವಾರ್ಟ್ಝ್ ವಿವರವಾಗಿ ಬರೆದಿತ್ತು. ಕ್ವಾರ್ಟ್ಝ್ ಇದಕ್ಕೆ ನೀಡಿದ ಶೀರ್ಷಿಕೆಯೂ ವಿಭಿನ್ನವಾದದ್ದೇ. “ಭಾರತದ ಹಿರಿಯ ನಾಗರಿಕರು ಅದೆಷ್ಟು ಒಬ್ಬಂಟಿಗಳೆಂದರೆ ಜೊತೆಗಾಗಿ ಮೊಮ್ಮಕ್ಕಳನ್ನು ಬಾಡಿಗೆಗೆ ಪಡೆದುಕೊಂಡು ದಿನತಳ್ಳುತ್ತಿದ್ದಾರೆ” ಎಂಬರ್ಥದ ತಲೆಬರಹವನ್ನು ಜಾಲತಾಣವು ನೀಡಿತ್ತು. ಇದು ಸತ್ಯವೂ ಹೌದು. 2012ರಲ್ಲೇ ಪ್ರಸಾದ್ ಭಿಡೆಯವರು ‘ಆಜಿ ಕೇರ್’ ಎಂಬ ಹೆಸರಿನಲ್ಲಿ ಇಂಥದ್ದೊಂದು ಪುಟ್ಟ ವ್ಯವಸ್ಥೆಯನ್ನು ಆರಂಭಿಸಿದ್ದರು. ಮುಂದೆ ದೆಹಲಿಯಲ್ಲಿ ಸಂವೇದನಾ ಸೀನಿಯರ್ ಕೇರ್, ಫಸ್ಟ್ ಸೀನಿಯರ್ಸ್, ಪುಣೆಯಲ್ಲಿ ಮಾಯಾ ಕೇರ್ ಇತ್ಯಾದಿಗಳು ಯಶಸ್ವಿಯಾದವು. ಹೀಗೆ ವೃದ್ಧರನ್ನು ನೋಡಿಕೊಳ್ಳಲು ನೇಮಿಸಲಾಗುವ ಸ್ವಯಂಸೇವಕರನ್ನು ಅವರ ಆಸಕ್ತಿ, ಅರ್ಹತೆ ಮತ್ತು ಪೂರ್ವಾಪರಗಳನ್ನು ಕೂಲಂಕಷವಾಗಿ ಪರಿಶೀಲಿಸಿಯೇ ನೇಮಿಸಲಾಗುತ್ತದೆ ಎಂಬುದು ಗಮನಾರ್ಹ ಅಂಶ.

Union Ministry of Statistics and Program Implementationನ ವರದಿಯಿಂದ ಹಿಂದೂಸ್ತಾನ್ ಟೈಮ್ಸ್ ತೆಗೆದ ಅಂಕಿಅಂಶಗಳ ಪ್ರಕಾರ ಭಾರತದಲ್ಲಿ ಸದ್ಯಕ್ಕಿರುವ ಹಿರಿಯ ನಾಗರಿಕರ ಸಂಖ್ಯೆ 104 ಮಿಲಿಯನ್. ಅದು ಒಟ್ಟು ಜನಸಂಖ್ಯೆಯ 8.6% ಪ್ರತಿಶತದಷ್ಟಾಗುತ್ತದೆ. 2001 ರಿಂದ 2011ರ ನಡುವೆ ಈ ಸಂಖ್ಯೆಯು 36% ದಷ್ಟು ಹೆಚ್ಚಿದೆ. ಹೆಚ್ಚಿದ ಜೀವಿತಾವಧಿ ಮತ್ತು ಕಮ್ಮಿ ಮಕ್ಕಳಿರುವವರ ಸಂಖ್ಯೆಯ ಹೆಚ್ಚಳದ ಬೆನ್ನಿಗೇ ದೇಶದ ಹಿರಿಯ ನಾಗರಿಕರ ಸಂಖ್ಯೆಯೂ ಏರುಮುಖವಾಗಿ ಸಾಗಿದೆ. ಭಾರತದ ಯುವವರ್ಗವನ್ನಷ್ಟೇ ಪರಿಗಣನೆಗೆ ತೆಗೆದುಕೊಂಡರೂ ಮಾನಸಿಕ ಆರೋಗ್ಯದ ಸಮಸ್ಯೆಗಳಿಂದ ಬಳಲುತ್ತಿರುವವರ ಶೇಕಡಾವಾರು ಸಂಖ್ಯೆ ದೊಡ್ಡದಿದೆ. ಇನ್ನು ಬ್ರಿಟನ್ನಿನಲ್ಲಿರುವಂತೆಯೇ ಇತರ ಸಮಸ್ಯೆಗಳನ್ನೊಳಗೊಂಡಂತೆ ಒಬ್ಬಂಟಿತನದ ಸಮಸ್ಯೆಯೊಂದಿಗೆ ಸೆಣಸಾಡುತ್ತಿರುವ ಹಿರಿಯ ನಾಗರಿಕರದ್ದೇ ಒಂದು ವರ್ಗ. ಒಂಟಿತನವು ಬ್ರಿಟಿಷ್ ಸರ್ಕಾರಕ್ಕೆ ಆಗಲೇ ಬ್ರಹ್ಮರಾಕ್ಷಸನಂತೆ ಕಾಡಿಯಾಗಿದೆ. ಮುಂದೆ ಇದು ನಮ್ಮನ್ನು ಕಾಡಿದರೂ ಅಚ್ಚರಿಯಿಲ್ಲ. ಆಧುನಿಕತೆಯ ವೇಗದಲ್ಲಿ ನಾವು ಎತ್ತ ಸಾಗುತ್ತಿದ್ದೇವೆ ಎಂದು ಒಂದು ಕ್ಷಣವಾದರೂ ನಿಂತು ಆತ್ಮಾವಲೋಕನವನ್ನು ಮಾಡಿಕೊಳ್ಳಬೇಕಾದ ಕಾಲಘಟ್ಟವಿದು.

ಒಂಟಿತನವನ್ನು ಒಂದು ಹಂತವೆಂದು ಸಾಮಾನ್ಯವಾಗಿ ಪರಿಗಣಿಸಿ ನಿರ್ಲಕ್ಷಿಸಲಾಗುತ್ತದೆಯಾದರೂ ಇದನ್ನು ಸರಿಯಾದ ಸಮಯದಲ್ಲಿ ಮತ್ತು ಹಂತದಲ್ಲಿ ನಿಯಂತ್ರಣಕ್ಕೆ ತರಲಾಗದಿದ್ದರೆ ಮುಂದೆ ದೊಡ್ಡ ಮಟ್ಟಿನ ಮಾನಸಿಕ ಸಮಸ್ಯೆಗಳಿಗೆ ಕಾರಣವಾಗುವುದಂತೂ ಹೌದು. ಆತಂಕ, ಖಿನ್ನತೆ, ಹೈಪರ್ ಟೆನ್ಷನ್ ಮತ್ತು ಹೃದಯ ಸಂಬಂಧಿ ಸಮಸ್ಯೆಗಳು ಇವುಗಳಲ್ಲಿ ಪ್ರಮುಖವಾದವು. ಇನ್ನು ತೀರಾ ಗಂಭೀರವಾದ ಹಂತಕ್ಕೆ ತಲುಪಿದವರಲ್ಲಿ ಆತ್ಮಹತ್ಯೆಯಂತಹ ಅನಾಹುತಗಳಿಗೂ ಒಂಟಿತನವು ಕಾರಣವಾಗಬಹುದು. ಜೊತೆಗೇ ನೌಕರಿ ಮತ್ತು ಇತರೆ ಉದ್ದೇಶಗಳನ್ನಿಟ್ಟುಕೊಂಡು ಮಹಾನಗರಗಳಿಗೆ ವಲಸೆ ಬರುತ್ತಿರುವ ವರ್ಗದಲ್ಲೂ ಒಂಟಿತನದ ಸಮಸ್ಯೆಗಳು ಗಣನೀಯ ಸಂಖ್ಯೆಯಲ್ಲಿ ದಾಖಲಾಗಿವೆ. ಇಲ್ಲಿ ಜನರು ತಮ್ಮ ಒಂಟಿತನ ಮತ್ತು ಅಭದ್ರತೆಗಳನ್ನು ನೀಗಿಸಿಕೊಳ್ಳಲು ಧೂಮಪಾನ, ಮದ್ಯಪಾನ ಮತ್ತು ಡ್ರಗ್ಸ್ ಇತ್ಯಾದಿ ತರಹೇವಾರಿ ಚಟಗಳಿಗೆ ದಾಸರಾಗುತ್ತಿರುವ ಮಟ್ಟಿನವರೆಗೂ ಪರಿಸ್ಥಿತಿಯು ಬಂದು ನಿಂತಿದೆ.

ಜೋ ಕಾಕ್ಸ್ ಆಯೋಗದ ವರದಿಯಲ್ಲಿ ದಾಖಲಾಗಿರುವ ಪ್ರಕಾರ ಒಂಟಿತನದಿಂದ ಬಳಲುತ್ತಿರುವವರಿಗೆ ತಮ್ಮ ಕೈಲಾದ ಸಹಾಯವನ್ನು ತಮ್ಮ ದೈನಂದಿನ ಜೀವನದಲ್ಲಿ ಪ್ರತಿಯೊಬ್ಬರೂ ಮಾಡಬಹುದು ಎಂಬುದನ್ನು 81% ಕ್ಕೂ ಹೆಚ್ಚು ಜನರು ಒಪ್ಪಿಕೊಂಡಿದ್ದಾರೆ. ಹೀಗಾಗಿಯೇ ಈ ವರದಿಯು ಸಮಸ್ಯೆಯ ನಿವಾರಣೆಯ ಸಂಪೂರ್ಣ ಭಾರವನ್ನು ಸರಕಾರದ ತಲೆಯ ಮೇಲಷ್ಟೇ ಹೊರಿಸದೆ ಸಮುದಾಯಗಳ ಮಟ್ಟಿನವರೆಗೂ ತಂದಿದೆ. ವರದಿಯೇ ಹೇಳಿರುವಂತೆ ‘Great Wirral Door Knock’, ‘Reconnections’ ಮತ್ತು ‘Action for Children’ನಂತಹ ಸ್ಥಳೀಯ ತಂಡಗಳು, ಕಾರ್ಯಕ್ರಮಗಳು ಇಂಥಾ ಹೆಜ್ಜೆಗಳನ್ನಿರಿಸಿ ಯಶಸ್ವಿಯೂ ಆಗಿವೆ.

ಬ್ರಿಟನ್ನಿನಲ್ಲಿ ಜೋ ಕಾಕ್ಸ್ ಭರವಸೆಯ ಹಣತೆಯನ್ನು ಹಚ್ಚಿ ಹೋಗಿದ್ದಾರೆ. ಅದರ ಬೆಳಕು ನಿಧಾನವಾಗಿಯಾದರೂ ವಿಶ್ವದೆಲ್ಲೆಡೆ ವ್ಯಾಪಿಸಲಿದೆ ಎಂಬ ಆಶಾವಾದ ನನ್ನದು.

ಪ್ರಸಾದ್ ನಾಯ್ಕ್

ಮೂಲತಃ ದಕ್ಷಿಣ ಕನ್ನಡದ ಕಿನ್ನಿಗೋಳಿಯವರು. ಪ್ರತಿಷ್ಠಿತ ನ್ಯಾಷನಲ್ ಇನ್ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿ ಸುರತ್ಕಲ್ (ಎನ್.ಐ.ಟಿ.ಕೆ) ನಿಂದ 2011ರಲ್ಲಿ ಸಿವಿಲ್ ಇಂಜಿನಿಯರಿಂಗ್ ವಿಭಾಗದಲ್ಲಿ ಪದವಿ. ಕಳೆದ ಐದು ವರ್ಷಗಳಿಂದ ಜಲ ಸಂಪನ್ಮೂಲ ಇಲಾಖೆ, ಭಾರತ ಸರ್ಕಾರದ ಅಧೀನದಲ್ಲಿರುವ ಪ್ರತಿಷ್ಠಿತ ಸಂಸ್ಥೆಯೊಂದರಲ್ಲಿ ಸೇವೆ ಸಲ್ಲಿಸುತ್ತಿದ್ದಾರೆ. ಗುರುಗ್ರಾಮ್ ಆದ ಹರಿಯಾಣದ ಗುರ್ಗಾಂವ್ ಮತ್ತು ರಾಷ್ಟ್ರರಾಜಧಾನಿಯಾದ ನವದೆಹಲಿಯಲ್ಲಿ ಐದು ವರ್ಷಗಳ ಕಾಲ ಸೇವೆ ಸಲ್ಲಿಸಿದ ನಂತರ, ಸದ್ಯಕ್ಕೆ ದೂರದ ಆಫ್ರಿಕಾದ ದಕ್ಷಿಣ ಭಾಗದಲ್ಲಿರುವ `ರಿಪಬ್ಲಿಕ್ ಆಫ್ ಅಂಗೋಲಾ’ ದೇಶದ ವೀಜ್ ಎಂಬ ಪುಟ್ಟ ಪಟ್ಟಣದಲ್ಲಿ, ವಿಶ್ವಬ್ಯಾಂಕ್ ಪ್ರಾಯೋಜಿತ ಸ್ಥಳೀಯ ಸರ್ಕಾರದ ಯೋಜನೆಯೊಂದರಲ್ಲಿ ನಿಯುಕ್ತಿಗೊಂಡು ನೆಲೆಸಿದ್ದಾರೆ.

ಚಿತ್ರಕಲೆ ಮತ್ತು ಓದಿನ ಪಯಣದಲ್ಲೇ ಖುಷಿಯಾಗಿದ್ದ ಇವರಿಗೆ, “ತಾನೂ ಬರೆಯಬಲ್ಲೆ” ಎಂಬ ಸಂಗತಿಯ ಅರಿವಾದ ನಂತರದ ದಿನಗಳಿಂದ, ಅಂದರೆ ಕಳೆದ ನಾಲ್ಕೈದು ವರ್ಷಗಳಿಂದ ಬರೆಯುತ್ತಾ ಬಂದಿದ್ದಾರೆ. ಇವರ ಕಥೆಗಳು, ಲೇಖನಗಳು, ಪ್ರಬಂಧಗಳು, ಲಲಿತ ಪ್ರಬಂಧಗಳು, ಮಿನಿ ಸರಣಿ ಬರಹಗಳು, ವ್ಯಕ್ತಿಚಿತ್ರಗಳು, ಅನುವಾದಗಳು ಕನ್ನಡದ ವಿವಿಧ ಅಂತರ್ಜಾಲ ಪತ್ರಿಕೆಗಳಲ್ಲಿ ಪ್ರಕಟವಾಗಿವೆ. ಓದುವ ಮತ್ತು ಆಗಾಗ ಬರೆಯುವ ಹೊರತಾಗಿ, ಪ್ರವಾಸದ ಹೆಸರಿನಲ್ಲಿ ದೇಶ ಸುತ್ತುವ ಮತ್ತು ವ್ಯಂಗ್ಯಚಿತ್ರಗಳನ್ನು ಬರೆಯುವ ಹವ್ಯಾಸ.

Share

Leave a comment

Your email address will not be published. Required fields are marked *

Recent Posts More

  • 16 hours ago No comment

    ಕ್ರೈಸ್ತರ ಪ್ರಾರ್ಥನಾ ಅಭಿಯಾನದ ಕರೆಯ ಸುತ್ತಮುತ್ತ

        ಪ್ರಸ್ತಾಪ     ಹುಸಿ ರಾಷ್ಟ್ರ ಭಕ್ತಿಯಲ್ಲಿ ಆರ್ಭಟಿಸುವ ಹಿಂದುತ್ವದ ಸ್ವಘೋಷಿತ ವಾರಸುದಾರರು ಮಾತೆತ್ತಿದರೆ ಕ್ರೈಸ್ತರನ್ನು ಈ ದೇಶದವರಲ್ಲ, ಅವರನ್ನು ದೇಶದಿಂದ ಒದ್ದೋಡಿಸಬೇಕು ಎನ್ನುವಂತೆ ವರ್ತಿಸುತ್ತಾರೆ. ಆದರೆ ಸ್ವಾತಂತ್ರ್ಯ ದಿನಾಚರಣೆ, ಗಣರಾಜ್ಯೋತ್ಸವ ಹೀಗೆ ಪ್ರತಿ ರಾಷ್ಟ್ರೀಯ ಹಬ್ಬಗಳನ್ನೂ ಧ್ವಜಾರೋಹಣ ಮಾಡಿ ರಾಷ್ಟ್ರಗೀತೆ ಹಾಡಿ ಆಚರಿಸಿಯೇ ಧಾರ್ಮಿಕ ಚಟುವಟಿಕೆಯನ್ನು ಶುರುಮಾಡುವ ಕ್ರೈಸ್ತರಿಂದ ಕಲಿಯುವುದು ಬೇಕಾದಷ್ಟಿದೆ. ಆಸ್ಪತ್ರೆ, ಶಿಕ್ಷಣ, ಸಮಾಜ ಸುಧಾರಣೆಯ ಕಾರ್ಯಗಳಲ್ಲಿ ಕ್ರೈಸ್ತ ಸಂಸ್ಥೆಗಳು ಮಾಡುವ ಸೇವೆಯನ್ನು ...

  • 16 hours ago No comment

    ಚಿತ್ರದಲ್ಲಿನ ಹೆಂಗಸು

      ಕವಿಸಾಲು               ತಲೆಮಾರುಗಳ ಸ್ಥಿರತೆ ಕಮಾನ ಬಿಲ್ಲಿನಂತೆ ಬಾಗಿದ ಹುಬ್ಬುಗಳಲಿ ತೂಗಿ ಕಂದು ಕಣ್ಣುಗಳ ಆಳದಲ್ಲೆಲ್ಲೋ ಅಡಗಿದ ಇನಿತಿನಿತು ಬಾಲ್ಯದ ಭಯಗಳ ನಡುವೆ ಇಣುಕುವ ವಿನಯದಿ ವಿಧೇಯ ಹೆಂಗಸಿದ್ದಾಳೆ, ಆಳಲ್ಲ ಬಾಯೆಂಬ ಬಾಯಿ ಅಚ್ಚುಕಟ್ಟಾಗಿ ಪಳಗಿ ಸರಿಯೆಂಬುದ ದಿಟ್ಟವಾಗಿ ಅರುಹಿ ಉದ್ದುದ್ದ ಭಾಷಣಗಳ ಕಟ್ಟಿಟ್ಟು ತೂಗಿ ಬಿಡಿಸಲಾಗದ ಒಗಟಿನ ಜೀವನ ಸೌಂದರ್ಯವ ಆಸ್ವಾದಿಸುವಲ್ಲಿ ಜೀವಂತವಿದ್ದಾಳೆ, ಕಳೆಯಿಲ್ಲ ಶಿರವೆಂಬ ಶಿಖರವ ...

  • 7 days ago No comment

    ಕೊನಾರ್ಕ್ ‘ಕಾಲ ದೇಗುಲ’

      ಪ್ರವಾಸಿ ಸವಿತಾ ಕಂಡ ಇಂಡಿಯಾ   ಇದು ನಾನು 2011ರ ಮಾರ್ಚ್ ತಿಂಗಳಲ್ಲಿ ನನ್ನ ಕೆಲ ಗೆಳತಿಯರೊಂದಿಗೆ ಒಂದು ಜನಸಾಮಾನ್ಯರ ಸಮೂಹದೊಂದಿಗೆ ಸಾಮಾನ್ಯ ದರ್ಜೆಯ ರೈಲು ಪ್ರಯಾಣದ ಮೂಲಕ ಕೈಗೊಂಡ ಭಾರತ ಯಾತ್ರೆಯ ಸಂದರ್ಭದಲ್ಲಿ ಮಾಡಿಕೊಂಡ ಟಿಪ್ಪಣಿಗಳನ್ನು ಆಧರಿಸಿ ಬರೆದ ಪುಟ್ಟ ಪ್ರವಾಸ ಕಥನ. ಇದು ಈಗಾಗಲೇ 12 ಭಾಗಗಳಲ್ಲಿ ಡಿ ಎಸ್ ನಾಗಭೂಷಣ ಅವರ ಸಂಪಾದಕತ್ವದ ‘ನವ ಮಾನವ’ ಸಮಾಜವಾದಿ ಮಾಸಿಕದ (ಈ ಪತ್ರಿಕೆ ನವೆಂಬರ್ ...

  • 1 week ago No comment

    ಅಳಿದುಳಿದ ಊರಿನ ಹೂದೋಟದೊಳಗೆ

      ಕವಿಸಾಲು       ಯಾವ ಕತ್ತಿಯೂ ಕತ್ತರಿಸದಿರಲಿ! ಹಗಲು ಸೂರ್ಯನ ಬಿಸಿಲ ಕುಣಿಕೆ ಬಿಗಿಬಿಗಿ ಉರಿಯುವ ನಿಗಿನಿಗಿ ಕೆಂಡ ಭಸ್ಮವಾಗಿಬಿಡುವ ಭಯದ ಕಂಪನ ಬಿಸಿಯುಸಿರೂ ಧಗೆಯಾಗಿ ಅರಳಿದ ಮಲ್ಲೆಹೂಗಳು ಸುಟ್ಟು ಕರಕಲಾಗಿ ರಕ್ಕಸ ಗಣಕೊ ಭಾರೀ ಭೋಜನದೌತಣ ಭವಿಷ್ಯದ ಕಂದಮ್ಮಗಳ ಕತ್ತು ಹಿಚುಕಿ ಭ್ರೂಣಗಳ ಕಲೆಸಿಹಾಕಿ ಕಟ್ಟಬಯಸಿದ ಭವ್ಯ ಸೌಧಗಳ ಬುನಾದಿಗಳಡಿಯಲ್ಲಿ ಅಸ್ಥಿಪಂಜರಗಳ ರಾಶಿ ಒರೆಯಲ್ಲವಿತ ಕತ್ತಿಗಳು ಬಯಲಿಗೆ ಬಂದು ಒಳಕೋಣೆಯ ಸಂಚುಗಳು ಹೊಂಚುಹಾಕಿ ಕೊಲ್ಲುವ ...

  • 2 weeks ago No comment

    ಕಾದಂಬಿನಿ ಕಾಲಂ | ಜಾನೂ ಎಂದು ಕರೆಯುತ್ತೇನೆ!

                      ನಾನು ಸಾಹಿತಿಯಾಗುವ ಕನಸನ್ನು ಕಣ್ಣಿಗೆ ಮೆತ್ತಿಕೊಂಡು ಬೆಳೆದವಳಲ್ಲ. ಜಗತ್ತಿನೊಡನೆ ಒಡನಾಡುವಾಗ ನನ್ನೊಳಗೆ ನಡೆಯುವ ಯುದ್ಧವನ್ನು ಅಭಿವ್ಯಕ್ತಿಸಲು ಬರಹ ಅನಿವಾರ್ಯವಾಗಿತ್ತಷ್ಟೇ!   ಬಾಲ್ಯದಲ್ಲಿ ಪ್ರಾಣಿ ಪಕ್ಷಿ, ಮಕ್ಕಳ ಅಥವಾ ಕಾರ್ಟೂನು ಚಿತ್ರಗಳು ಊರಿನ ಸಿನೆಮಾ ಟೆಂಟಿಗೆ ಬಂದಾಗ ಶಿಕ್ಷಕರು ವಿದ್ಯಾರ್ಥಿಗಳನ್ನು ಕರೆದೊಯ್ದು ಕಡಿಮೆ ದುಡ್ಡಿನಲ್ಲಿ ಸಿನೆಮಾ ತೋರಿಸುತ್ತಿದ್ದರು. ಇಲ್ಲವೇ ರಜೆಯಲ್ಲಿ ನನ್ನ ಮಾಮನ ಥಿಯೇಟರಿನಲ್ಲಿ ಅಂಥ ಸಿನೆಮಾ ...


Editor's Wall

  • 11 May 2018
    2 weeks ago No comment

    ಕಾಂಗ್ರೆಸ್ ನಾಯಕರು ಜೈಲಲ್ಲಿ ಭಗತ್ ಸಿಂಗ್ ಭೇಟಿಯಾಗಿರಲಿಲ್ಲವಾ?

    ಭಾರತದ ಪ್ರಥಮ ಪ್ರಧಾನಿ ಜವಾಹರಲಾಲ್ ನೆಹರೂ ಅವರ ಆತ್ಮಚರಿತ್ರೆಯಲ್ಲಿಯೇ, ಅವರು ಭಗತ್ ಸಿಂಗ್ ಭೇಟಿಯಾಗಿದ್ದರೆಂಬುದರ ಕುರಿತ ವಿವರ ಸಿಗುತ್ತದೆ. “ಭಾರತದ ಸ್ವಾತಂತ್ರ್ಯಕ್ಕಾಗಿ ಹೋರಾಡಿದ್ದ ಭಗತ್ ಸಿಂಗ್, ಬಟುಕೇಶ್ವರ್ ದತ್, ವೀರ್ ಸಾವರ್ಕರ್ ಜೈಲಿನಲ್ಲಿದ್ದಾಗ ಅವರನ್ನು ಯಾರಾದರೊಬ್ಬ ಕಾಂಗ್ರೆಸ್ ನಾಯಕರು ಹೋಗಿ ಕಂಡಿದ್ದರಾ? ಆದರೆ ಕಾಂಗ್ರೆಸ್ ನಾಯಕರು ಭ್ರಷ್ಟನೊಬ್ಬ ಜೈಲಿನಲ್ಲಿದ್ದರೆ ಅವನನ್ನು ನೋಡಲು ಹೋಗುತ್ತಾರೆ” ಎಂದು ಪ್ರಧಾನಿ ನರೇಂದ್ರ ಮೋದಿ ಕರ್ನಾಟಕದ ಚುನಾವಣೆ ಪ್ರಚಾರ ಸಭೆಯಲ್ಲಿ ವಾಗ್ದಾಳಿ ನಡೆಸಿದ್ದರು. ಬ್ರಿಟಿಷ್ ...

  • 10 May 2018
    2 weeks ago No comment

    ಒಂದು ಪುಸ್ತಕ; ವಾರವಿಡೀ ಬಿಡುಗಡೆ!

    ಪುಸ್ತಕವೊಂದನ್ನು ಪ್ರಕಟಿಸಿದ ಬಳಿಕ ಅದರ ಬಿಡುಗಡೆ ಕಾರ್ಯಕ್ರಮವೂ ಕಡ್ಡಾಯವೆಂಬಂಥ ಕಾಲವಿತ್ತು. ಈಗಲೂ ಇಲ್ಲವೆಂದಲ್ಲ. ಆದರೆ ಸಾವಿರ, ಲಕ್ಷದ ಲೆಕ್ಕದಲ್ಲಿ ಹಣ ಸುರಿದು ವ್ಯವಸ್ಥೆ ಮಾಡುವ ಬಿಡುಗಡೆ ಕಾರ್ಯಕ್ರಮವು ಒಂದು ಪುಸ್ತಕದ ಕುರಿತ ಮಾತಿಗೆ ಬೇಕಾದ ಆಪ್ತ ವಾತಾವರಣವನ್ನು ಕಟ್ಟಿಕೊಡುತ್ತದೆಯೇ? ದುಡ್ಡಿನ ವಿಚಾರಕ್ಕಿಂತ ಹೆಚ್ಚಾಗಿ ಕಾರ್ಯಕ್ರಮ ಆಯೋಜನೆ ಬೇಡುವ ಶ್ರಮ ಬಹಳ ದೊಡ್ಡದು. ಹಾಲ್ ಬುಕ್ ಮಾಡಬೇಕಾದಲ್ಲಿಂದ ಹಿಡಿದು, ಅತಿಥಿಗಳನ್ನು ಗೊತ್ತುಮಾಡುವುದು, ಅವರಿಗೆಲ್ಲರಿಗೂ ಹೊಂದುವಂತೆ ದಿನಾಂಕ ನಿಗದಿಪಡಿಸುವುದು, ಆಮಂತ್ರಣ ಪತ್ರಿಕೆ ಪ್ರಕಟಿಸುವುದು, ...

  • 03 May 2018
    3 weeks ago No comment

    ಕಾದಂಬಿನಿ ಕಾಲಂ | ಏನಿಲ್ಲದಿದ್ದರೂ ಬದುಕು ದೂಡಬೇಕು

                      ಆಗೆಲ್ಲ ತಪಸ್ಸು ಮಾಡುವ, ದೇವರು ಪ್ರತ್ಯಕ್ಷವಾಗುವ ಮತ್ತು ಕೇಳಿದ ವರ ಕೊಡುವ ಕಥೆಗಳು ಮಸ್ತು ಚಾಲ್ತಿಯಲ್ಲಿದ್ದ ಕಾರಣ ನಾನು ದೇವರನ್ನು ಕಾಣುವ ಹಟಕ್ಕೆ ಬಿದ್ದು ತಪಸ್ಸು ಮಾಡುತ್ತಿದ್ದೆ.   ನನ್ನ ಜೊತೆ ಇವೆಲ್ಲ ಯಾವ ಕಾರಣಕ್ಕೆ ಘಟಿಸಿತ್ತೋ ಅರಿಯೆ. ಬಾಲ್ಯದಲ್ಲಿ ನಮ್ಮ ಮನೆಗೆ ನೆರೆಮನೆಯ ಒಬ್ಬ ಹೆಂಗಸು ಬರುತ್ತಿದ್ದರು. ಮೂಕಕ್ಕ ಎಂದು ಅವರನ್ನು ಎಲ್ಲರೂ ಕರೆಯುತ್ತಿದ್ದುದು. ...

  • 30 April 2018
    4 weeks ago No comment

    ಅತ್ಯಾಚಾರ, ಹೋರಾಟದ ಐದು ವರ್ಷಗಳು ಮತ್ತು ಆ ಪುಟ್ಟ ಗೂಡು

    ತನ್ನ ಬದುಕಿನ ಅಮೂಲ್ಯ ಘಳಿಗೆಯೇ ಇಂಥದೊಂದು ಘಟನೆಗೆ ಬಲಿಯಾದ ಆಘಾತದಲ್ಲಿರುವ ಆಕೆ ಒಮ್ಮೆ ಗೆಲುವಾದವಳಂತೆ ಕಂಡರೂ ಮತ್ತೆ ಗಂಭೀರಳಾಗುತ್ತಾಳೆ. ಎಷ್ಟು ಬೇಕೋ ಅಷ್ಟೇ ಮಾತು. ಕಟ್ಟಿಕೊಂಡಿದ್ದ ಕನಸೂ ಒಡೆದುಹೋಗಿದೆ.   ಅನ್ಯಾಯದ ವಿರುದ್ಧದ ಹೋರಾಟ, ಸಮಾಜದೆದುರು ದೊಡ್ಡ ಮನುಷ್ಯನಂತೆ ಕಾಣಿಸಿಕೊಳ್ಳುವ ಮುಖವಾಡ ತೊಟ್ಟುಕೊಂಡ ಮತ್ತು ಸಾಧ್ಯವಿರುವಷ್ಟೂ ವಾಮಮಾರ್ಗಗಳಿಂದ ಎಲ್ಲರನ್ನೂ ಎಲ್ಲವನ್ನೂ ನಿಯಂತ್ರಣದಲ್ಲಿಟ್ಟುಕೊಳ್ಳಬಲ್ಲಂಥ ಅತ್ಯಂತ ಬಲಿಷ್ಠ ದುಷ್ಟನೊಬ್ಬನನ್ನು ಎದುರುಹಾಕಿಕೊಳ್ಳುವ ದಿಟ್ಟತನ ಹೇಗೆ ಅಗಾಧ ಸಾಗರದ ನಟ್ಟ ನಡುವಿನ ಒಂದು ಸಣ್ಣ ...

  • 28 April 2018
    4 weeks ago No comment

    ಮೈಬಣ್ಣವೆಂಬ ಮಾನದಂಡ ಮತ್ತು ‘ವಿಪ್ಲವ’ ಮನಃಸ್ಥಿತಿಯ ರಾಜಕಾರಣ

    ಈ ‘ವಿಪ್ಲವ’ ಮನಃಸ್ಥಿತಿ ಅಧಿಕಾರಸ್ಥವಾದುದಾಗಿದೆ. ದೇವರು, ಧರ್ಮದ ಹೆಸರಲ್ಲಿ ಒಡೆಯುವುದನ್ನು ತನ್ನ ಪರಮೋನ್ನತಿ ಎಂಬಂತೆ ಭ್ರಮಿಸುವ ಈ ಕುರೂಪವು ಮನುಷ್ಯರ ಮೇಲೆ ಮನುಷ್ಯರನ್ನು ಎತ್ತಿಕಟ್ಟುತ್ತದೆ. ಹೆಣ್ಣಿನ ಮೇಲೆ ಹೆಣ್ಣನ್ನೇ ಅಸ್ತ್ರವಾಗಿ ಪ್ರಯೋಗಿಸುವ ಹುನ್ನಾರಗಳ ಮೂಲಕ, ನಿಜವಾದ ಸೌಂದರ್ಯವನ್ನು ನಾಶಗೈಯುತ್ತಿದೆ. 21 ವರ್ಷಗಳ ಕೆಳಗೆ ಅಂದರೆ 1997ರಲ್ಲಿ ವಿಶ್ವಸುಂದರಿ ಪಟ್ಟ ಗೆದ್ದ ಡಯಾನಾ ಹೇಡನ್ ಮೈಬಣ್ಣದ ಬಗ್ಗೆ ಅತಿ ಕೀಳು ಅಭಿರುಚಿಯಿಂದ ಮಾತನಾಡಿದ ತ್ರಿಪುರಾ ಮುಖ್ಯಮಂತ್ರಿ ವಿಪ್ಲವ್ ಕುಮಾರ್ ದೇವ್ ...