Share

ಹಾರದ ಹಂಗಿನಲ್ಲಿ ಬಂಧಿಯಾಗುವ ನಗು!
ಸಂಪಾದಕ

 

ಹೆಣ್ಣೊಬ್ಬಳ ಕೊನೆಯಾಸೆ ಎಂಬ ನೆಪದಲ್ಲಿ ಬಣ್ಣವೇರುವುದು,
ಬದುಕಿದ್ದಾಗ ಅವಳನ್ನು ಸುತ್ತುವರಿದು ಕೊಂದ ವ್ಯೂಹದ
ರಹಸ್ಯ ಅಹಂಕಾರವೇ ಆಗಿರುತ್ತದೆ.

 

 

ಶ್ರೀದೇವಿ ಎಂಬ ಅಧ್ಯಾಯವೊಂದು ಭಾರತೀಯ ಚಿತ್ರರಂಗದ ಪಾಲಿಗೆ ಮುಗಿದುಹೋಗಿದೆ. ಅತಿಲೋಕ ಸುಂದರಿ, ಚಾಂದನಿ ಎಂದೆಲ್ಲ ಆಕೆ ನಟಿಸಿದ್ದ ಚಿತ್ರಗಳ ಹೆಸರಿಂದಲೇ ಶ್ರೀದೇವಿ ಎಂಬ ಸೆಲೆಬ್ರಿಟಿಯ ಸಾವಿನ ಸುದ್ದಿಯನ್ನು ರಂಗುಗೊಳಿಸುವ ನಮ್ಮ ಲೋಕಕ್ಕೆ ಶ್ರೀದೇವಿಯೆಂಬ ಹೆಣ್ಣಿನ ಅಂತರಂಗದ ಲೋಕವನ್ನು ನೋಡುವ ಜರೂರು ಕಾಣಿಸುವುದಿಲ್ಲ; ಆ ವ್ಯವಧಾನವೂ ಅದಕ್ಕಿಲ್ಲ.

ಶ್ರೀದೇವಿ ಸಾವು ಸಹಜವೊ ಅಸಹಜವೊ ಎಂಬ ಗೊಂದಲ ಹಾಗೇ ಉಳಿದಿರುವುದರ ನಡುವೆಯೇ, ಅದಕ್ಕೆ ತೆರೆ ಎಳೆಯುವಂಥ ಷರಾ ಬಿದ್ದುಹೋದದ್ದೂ ಆಗಿದೆ. ದೊಡ್ಡ ಕುಟುಂಬವೊಂದರ ಹೆಣ್ಣು ಅಸಹಜ ಸಾವು ಕಂಡರೆ, ಅದಕ್ಕೆ ಆಕಸ್ಮಿಕ ಸಾವು ಎಂಬ ಮುದ್ರೆ ಬೀಳಲು ಬಹಳ ಹೊತ್ತು ಬೇಕಾಗುವುದಿಲ್ಲ. ಶ್ರೀದೇವಿ ವಿಚಾರದಲ್ಲೂ ಇಂಥ ಚಮತ್ಕಾರ ನಡೆದಿದೆಯಾ ಎಂಬ ಅನುಮಾನ ಎದ್ದಿರುವುದು ಹೌದಾದರೂ, ಅದಕ್ಕೆ ಈ ಮಾಯಾಲೋಕದಲ್ಲಿ ಹೆಚ್ಚಿನ ಜಾಗವೇನೂ ಇಲ್ಲ. ಎಲ್ಲವೂ ಮರೆತುಹೋಗುತ್ತದೆ ಇಲ್ಲಿ.

ಶ್ರೀದೇವಿ ಹೇಳಿಕೇಳಿ ಬಣ್ಣದ ಲೋಕದ ಚೆಲುವೆ. ಚಿತ್ರರಂಗದಲ್ಲಿ ಬಹು ಕಾಲ ವಿಜೃಂಭಿಸಿದ್ದ ತಾರೆಯೊಬ್ಬಳೊಳಗಿನ ಹೆಣ್ಣಿನ ತಲ್ಲಣಗಳೇನಿದ್ದವು ಎಂಬುದು ಎಷ್ಟು ನಿಗೂಢವೋ ಅಷ್ಟೇ ಗೌಣವೂ ಆಗಿಬಿಡುವುದು ವಿಪರ್ಯಾಸ. ಇನ್ನೂ ವಿಪರ್ಯಾಸವೆಂದರೆ, ಯಾವುದೇ ಹೆಣ್ಣು ತನ್ನ ನೋವುಗಳನ್ನು ತಾನೇ ಅದುಮಿಟ್ಟುಕೊಂಡು ನಗಬೇಕಾದ ವಿಲಕ್ಷಣ ಪಾತ್ರವನ್ನೇ ನಿರ್ವಹಿಸಬೇಕಾಗಿ ಬರುವುದು. ತನ್ನನ್ನು ಗಮನಿಸುವ ಹೊರಜಗತ್ತಿಗೆ ಸುಂದರವಾಗಿ ಕಾಣಿಸಬೇಕಾದ ಅಥವಾ ಸುಖವಾಗಿದ್ದೇನೆ ಎಂದು ತೋರಿಸಿಕೊಳ್ಳಬೇಕಾದ ಅಗತ್ಯದ ಸುಳಿಯಲ್ಲಿ ಗೊತ್ತಿದ್ದೂ ಸಿಲುಕಿಕೊಳ್ಳುವ ಹೆಣ್ಣು, ಆ ಸೂತ್ರದ ಬಂಧಿಯಾಗಿ ಬದುಕುವ ಪ್ರಮೇಯವೇ ಇರುತ್ತದೆ ಬಹಳ ಸಲ. ಅಂದರೆ ಆಕೆ ತನಗಾಗಿ, ತನ್ನೊಳಗಿನ ನಿಜಕ್ಕೆ ನಿಷ್ಠಳಾಗಿ ಬದುಕಲಾರದೆ, ಬರೀ ನಟಿಸುವ ದುರಂತವನ್ನೇ ಬಾಳುವ ಸ್ಥಿತಿ, ಸನ್ನಿವೇಶ. ಇಡೀ ಬದುಕೇ ನಟನೆಯಾಗುವ ಇಂಥ ಸ್ಥಿತಿ, ಸನ್ನಿವೇಶ ಅದೆಷ್ಟು ಹೆಣ್ಣುಗಳನ್ನು ನಲುಗಿಸಿದೆಯೊ, ನಲುಗಿಸುತ್ತಿದೆಯೊ.

ಹೆಣ್ಣೊಬ್ಬಳು ಬದುಕಿನುದ್ದಕ್ಕೂ ಅದೆಷ್ಟು ಭಾರ ಹೊತ್ತು ನಡೆಯಬೇಕು! ಹೊತ್ತು ಹೆತ್ತು ಹೊರೆವ ಹೆಣ್ಣು ವಿವಿಧ ಬಗೆಗಳಲ್ಲಿ ಮುಂದಿನ ಬದುಕನ್ನೆಲ್ಲ ಭಾರ ಹೊರುವುದರಲ್ಲೇ ಕಳೆದುಬಿಡುತ್ತಾಳೆ. ಈ ಸಮಾಜದ ಆಕ್ಷೇಪಗಳು, ವಕ್ರ ನೋಟ, ಹಸಿದ ಕಣ್ಣುಗಳು, ಟೀಕೆಗಳು, ಅವಮಾನಕ್ಕೀಡುಮಾಡುವ ಸಂದರ್ಭಗಳು ಇವೆಲ್ಲ ಭಾರದ ಬಳಿಕ ಸಾವಿನಲ್ಲೂ ಆಕೆಯನ್ನು ಅನೈತಿಕತೆಯ ಆರೋಪದ ಭಾರ ಹೊರಿಸಿ ಕುಗ್ಗಿಸುವ ಹಿಕಮತ್ತು ನಡೆದುಬಿಡುತ್ತದೆ. ಕಳಂಕವನ್ನು ಒಬ್ಬ ಹೆಣ್ಣಿಗೆ ಕಟ್ಟುವುದಕ್ಕಿಂತ ಸುಲಭ ಕೆಲಸ ಈ ಸಮಾಜಕ್ಕೆ ಇನ್ನಾವುದೂ ಇರಲಾರದು.

ಶ್ರೀದೇವಿ ಚೆಲುವು ಕಾಯ್ದುಕೊಳ್ಳಲು ಹಲವಾರು ಸರ್ಜರಿಗಳನ್ನು ಮಾಡಿಸಿಕೊಂಡು ನೋಡುವವರ ಕಣ್ತುಂಬುವಾಗ, ಚೆಲುವು ಆಸ್ವಾದಿಸುವ ಯಾರೂ, ಆ ಸರ್ಜರಿಗಳೆಲ್ಲ ತಂದೊಡ್ಡಬಹುದಾದ ಪರಿಣಾಮಗಳ ಬಗ್ಗೆ ಅಯ್ಯೋ ಎಂದು ಆತಂಕಗೊಂಡಿರಲಿಕ್ಕಿಲ್ಲ. ಆದರೆ ಈಗ ಆಕೆಯ ಸಾವಿನ ಎದುರಲ್ಲಿ ದೈಹಿಕ ಚೆಲುವಿನ ಬಗೆಗಿನ ಆಕೆಯ ಮೋಹವನ್ನು ದೂಷಿಸಲಾಗುತ್ತದೆ. ಹೆಣ್ಣೊಬ್ಬಳ ಮೇಲೆ ತಪ್ಪು ಹೊರಿಸುವುದಕ್ಕೆ ಎಂಥ ಹಸಿವು ಈ ಜಗತ್ತಿಗೆ!

ಯೌವನದಲ್ಲಿದ್ದ ಶ್ರೀದೇವಿಯನ್ನು ಅಷ್ಟೇ ಖ್ಯಾತಿಯ ಯೌವನದಲ್ಲಿದ್ದ ಮತ್ತು ಅದಾಗಲೇ ಮತ್ತೊಬ್ಬಳ ಗಂಡನೂ ಆಗಿದ್ದ ನಟನೊಬ್ಬ ಗುಟ್ಟಾಗಿ ಮದುವೆಯಾಗಿದ್ದ ಅಂತಲೂ ಹೇಳುತ್ತಾರೆ. ಆದರೆ ಗುಟ್ಟು ಗುಲ್ಲಾಗಿ, ಪತ್ನಿಯವರೆಗೂ ವಿಚಾರ ಮುಟ್ಟುತ್ತಿದ್ದಂತೆ ಈ ಗುಟ್ಟಿನ ಮದುವೆಯನ್ನು ಮರೆತು ಪತ್ನಿಯ ಬಳಿಗೇ ಹೋಗಿಬಿಡುತ್ತಾನೆ. ಇದು ನಿಜವೇ ಆಗಿದ್ದಲ್ಲಿ, ಇಲ್ಲಿ ಒಬ್ಬ ಹೆಣ್ಣಿನ ಪಾಲಿಗೆ ಅನ್ಯಾಯವಾಗಲಿಲ್ಲ ಎಂಬುದರ ಮಗ್ಗುಲಲ್ಲೇ ಮತ್ತೊಬ್ಬಳು ಅನ್ಯಾಯ ನುಂಗಿಕೊಂಡು ಸುಮ್ಮನಾಗುವಂತಾದುದರ ಬಗ್ಗೆ ಏನೆನ್ನುವುದು? ತಪ್ಪಿನಲ್ಲಿ ಗಂಡು ಹೆಣ್ಣು ಇಬ್ಬರದೂ ಪಾಲಿದ್ದರೂ ತಪ್ಪಿನ ಕಹಿಫಲ ಉಣ್ಣುವುದು ಹೆಣ್ಣು ಮಾತ್ರ.

ಆದರೆ ಅದೇ ಹೆಣ್ಣು ಮನೆಮುರುಕಿ ಎಂಬ ದೂಷಣೆಗೂ ತುತ್ತಾಗುವಂತಾಗುವಂತಾದದ್ದು ಶ್ರೀದೇವಿ ಪಾಲಿಗೆ ಎರಗಿದ್ದ ಆಘಾತ. ರಾಮ್ ಗೋಪಾಲ್ ವರ್ಮಾ ಫೇಸ್ಬುಕ್ಕಿನಲ್ಲಿ ಬರೆದ ‘My love letter to Sridevi’s fans’ ಉಲ್ಲೇಖದಂತೆ, ತಂದೆಯ ದಿಢೀರ್ ಸಾವು, ತಾಯಿ ಒಂದರ ಬೆನ್ನಿಗೊಂದರಂತೆ ತೆಗೆದುಕೊಂಡ ತಪ್ಪು ತೀರ್ಮಾನಗಳು, ಬದುಕಿನಲ್ಲಿ ಬೋನಿ ಕಪೂರ್ ಪ್ರವೇಶ, ಆತ ಮಾಡಿಕೊಂಡ ಸಾಲಕ್ಕೆ ಹೆಗಲು ಕೊಡಬೇಕಾದ ಸಂದರ್ಭ, ಅಭಿಮಾನಿಗಳೆಲ್ಲರ ಪಾಲಿನ ರಾಣಿಯಂತಿದ್ದವಳು ನಿಜಬದುಕಿನಲ್ಲಿ ಅಕ್ಷರಶಃ ಬರಿಗೈಯಾದದ್ದು ಇವೆಲ್ಲವೂ ಶ್ರೀದೇವಿಯ ನಗುವನ್ನು ಕಸಿದುಬಿಟ್ಟಿದ್ದವು. ಅಷ್ಟು ಎತ್ತರಕ್ಕೇರಿದ್ದ ಹೆಣ್ಣು ಒಬ್ಬ ಸೊಸೆಯಾಗಿ ಅತ್ತೆಯಿಂದ ಸಾರ್ವಜನಿಕವಾಗಿ ಒದೆಸಿಕೊಳ್ಳಬೇಕಾಯಿತೆಂದರೆ, ಇನ್ನೇನು ನಗು? ದಾರುಣವೆಂದರೆ, ನೋವನ್ನೆಲ್ಲ ಅದುಮಿಡುವುದಕ್ಕಾಗಿ ಲೇಪಿಸಿಕೊಳ್ಳುವ ಕೃತಕ ನಗೆ ಕೂಡ ಶಾಶ್ವತವಾಗಿ ಬಂಧಿಯಾಗಿಬಿಡುತ್ತದಲ್ಲ, ಹಾರದ ಹಂಗಿನಲ್ಲಿ ಉಳಿವ ಸ್ಥಿರಚಿತ್ರದಲ್ಲಿ!

ತನ್ನ ಶವವನ್ನು ಸುಂದರವಾಗಿ ಅಲಂಕರಿಸುವಂತೆ, ರೇಶಿಮೆ ಸೀರೆ ಉಡಿಸುವಂತೆ ಆಕೆ ಆಸೆ ಹೇಳಿಕೊಂಡಿದ್ದರಾ ಅಥವಾ ಅದು ಹುಟ್ಟಿಕೊಂಡ ಕಥೆಯಾ? ಅದೇನೇ ಇರಲಿ, ಆದರೆ ಹೆಣ್ಣೊಬ್ಬಳ ಕೊನೆಯಾಸೆ ಎಂಬ ನೆಪದಲ್ಲಿ ಬಣ್ಣವೇರುವುದು, ಬದುಕಿದ್ದಾಗ ಅವಳನ್ನು ಸುತ್ತುವರಿದು ಕೊಂದ ವ್ಯೂಹದ ರಹಸ್ಯ ಅಹಂಕಾರವೇ ಆಗಿರುತ್ತದೆ ಎಂಬುದು ಮಾತ್ರ ಘೋರ ಸತ್ಯ.

ಮತ್ತು ಇಂಥ ಘೋರ ಸತ್ಯಗಳನ್ನು ಅಡಗಿಸಿಡಲೆಂದೇ ಹೆಣ್ಣನ್ನು ನಿಗೂಢ ಎಂದು ಶಾಸ್ತ್ರ ಬರೆದಿಡಲಾಗಿದೆ.

Share

Leave a comment

Your email address will not be published. Required fields are marked *

Recent Posts More

  • 1 day ago No comment

    ಸವಿತಾ ನಾಗಭೂಷಣ ಪ್ರವಾಸ ಕಥನ | ದಾರಿಯೇ ದೈವ… ವೈಷ್ಣೋದೇವಿ

    ಪ್ರವಾಸಿ ಸವಿತಾ ಕಂಡ ಇಂಡಿಯಾ   ಇದು ನಾನು 2011ರ ಮಾರ್ಚ್ ತಿಂಗಳಲ್ಲಿ ನನ್ನ ಕೆಲ ಗೆಳತಿಯರೊಂದಿಗೆ ಒಂದು ಜನಸಾಮಾನ್ಯರ ಸಮೂಹದೊಂದಿಗೆ ಸಾಮಾನ್ಯ ದರ್ಜೆಯ ರೈಲು ಪ್ರಯಾಣದ ಮೂಲಕ ಕೈಗೊಂಡ ಭಾರತ ಯಾತ್ರೆಯ ಸಂದರ್ಭದಲ್ಲಿ ಮಾಡಿಕೊಂಡ ಟಿಪ್ಪಣಿಗಳನ್ನು ಆಧರಿಸಿ ಬರೆದ ಪುಟ್ಟ ಪ್ರವಾಸ ಕಥನ. ಇದು ಈಗಾಗಲೇ 12 ಭಾಗಗಳಲ್ಲಿ ಡಿ ಎಸ್ ನಾಗಭೂಷಣ ಅವರ ಸಂಪಾದಕತ್ವದ ‘ನವ ಮಾನವ’ ಸಮಾಜವಾದಿ ಮಾಸಿಕದ (ಈ ಪತ್ರಿಕೆ ನವೆಂಬರ್ 2011ರ ...

  • 6 days ago One Comment

    ಅಜ್ಜಿಗೇನು ಬೇಕು ಅಂತ ಅಜ್ಜಂಗೇನು ಗೊತ್ತು!

            ಕಥನ         ಅಜ್ಜ ಪೆನ್ಷನ್ ತರೋದಕ್ಕೆ ಅಂತ ಪೇಟೆಗೆ ಹೋಗಿದ್ದ. ಅಷ್ಟರಲ್ಲಿ ಮನೆ ಬಾಗಿಲಲ್ಲಿ ಕಾರು ಬಂದು ನಿಂತಿತು. ಕಾರಲ್ಲಿ ಅಜ್ಜಿಯ ಮಗ, ಸೊಸೆ ಮತ್ತೆ ಆರು ವರ್ಷದ ಮೊಮ್ಮಗ ಬಂದಿದ್ರು. ಅಜ್ಜಿಗೆ ಖುಷಿ ತಡೆಯಕ್ಕಾಗದೇ ಅಡಿಗೆ ಮನೆ ಸಂದಿ ಮೂಲೇನೆಲ್ಲಾ ಹುಡುಕಿದ್ಲು. ದಡಾ ಬಡಾ ಸದ್ದು ಮಾಡಿದ್ಲು, ಸರಾಪರಾ ಸದ್ದು ಮಾಡಿದ್ಲು. ಅಡುಗೆ ಮನೆಯಿಂದ ಕೊತಾಕೊತಾ ಸದ್ದು ...

  • 1 week ago No comment

    ವಸಂತದ ನೆನಪು; ಮಾಗುವ ಹುರುಪು!

      ಜಗತ್ತಿನ ಬಗ್ಗೆ ತಿಳಿಯುತ್ತ ಸಾಗಿ, ನಮಗೆ ಈ ಜಗತ್ತು ಹೀಗೆ ನಡೆಯುತ್ತಿದೆ ಅಂತ ಅರಿತುಕೊಳ್ಳುವವರೆಗಿನದು ಮಧ್ಯವಯಸ್ಸಿನ ಕಾಲ. ನಾವು ಅಲ್ಲಿಯವರೆಗೆ, ಕಲಿತದ್ದು, ಕೇಳಿದ್ದು, ನಮಗೆ ತಿಳಿದಿದ್ದು ಎಲ್ಲವೂ ಬದಲಾಗುವ ವೇಳೆಗೆ ನಮಗೆ ವಯಸ್ಸಾಗಿಬಿಟ್ಟಿರುತ್ತದೆ. ಕಾಲದಲ್ಲಿ ಹೊಸ ಚಿಗುರು ಟಿಸಿಲೊಡೆದಿರುತ್ತದೆ.     ಕುಣಿದಾಡುವಷ್ಟು ಚೈತನ್ಯವಿರುವ ಯೌವನಕ್ಕೂ, ಕುಂದಿದ ಶಕ್ತಿಯ ಇಳಿಗಾಲದ ವೃದ್ಧಾಪ್ಯಕ್ಕೂ ನಡುವೆ ಬರುವುದು ಮಧ್ಯವಯಸ್ಸು! ಹುಟ್ಟು, ಬದುಕು ,ಸಾವು ಎಲ್ಲರಿಗೂ ಬರುತ್ತದೆ. ಬದುಕನ್ನು ಹಲವರು ಸಾಧನೆಗಳ ...

  • 1 week ago No comment

    ಸವಿತಾ ನಾಗಭೂಷಣ ಪ್ರವಾಸ ಕಥನ | ಬಂಗಾರದ ಹೊಳಪು, ಬೇಗುದಿಯ ನೆನಪು…

    ಪ್ರವಾಸಿ ಸವಿತಾ ಕಂಡ ಇಂಡಿಯಾ   ಇದು ನಾನು 2011ರ ಮಾರ್ಚ್ ತಿಂಗಳಲ್ಲಿ ನನ್ನ ಕೆಲ ಗೆಳತಿಯರೊಂದಿಗೆ ಒಂದು ಜನಸಾಮಾನ್ಯರ ಸಮೂಹದೊಂದಿಗೆ ಸಾಮಾನ್ಯ ದರ್ಜೆಯ ರೈಲು ಪ್ರಯಾಣದ ಮೂಲಕ ಕೈಗೊಂಡ ಭಾರತ ಯಾತ್ರೆಯ ಸಂದರ್ಭದಲ್ಲಿ ಮಾಡಿಕೊಂಡ ಟಿಪ್ಪಣಿಗಳನ್ನು ಆಧರಿಸಿ ಬರೆದ ಪುಟ್ಟ ಪ್ರವಾಸ ಕಥನ. ಇದು ಈಗಾಗಲೇ 12 ಭಾಗಗಳಲ್ಲಿ ಡಿ ಎಸ್ ನಾಗಭೂಷಣ ಅವರ ಸಂಪಾದಕತ್ವದ ‘ನವ ಮಾನವ’ ಸಮಾಜವಾದಿ ಮಾಸಿಕದ (ಈ ಪತ್ರಿಕೆ ನವೆಂಬರ್ 2011ರ ...

  • 2 weeks ago No comment

    ಪ್ರಸಾದ್ ನಾಯ್ಕ್ ಪಟ್ಟಾಂಗ | ನನಗೂ ಒಬ್ಬ ಗೆಳೆಯ ಬೇಕು…

    ಆ ಘಟನೆಯನ್ನು ನೆನಪಿಸಿಕೊಂಡಾಗಲೆಲ್ಲಾ ಈಗಲೂ ನಗು ಉಕ್ಕುಕ್ಕಿ ಬರುತ್ತದೆ. ಅಂದು ವಿಚಿತ್ರ ಘಟನೆಯೊಂದು ನಡೆದಿತ್ತು. ಅವು ನನ್ನ ಕಾಲೇಜಿನ ದಿನಗಳು. ಮಂಗಳೂರಿನ ಶಾಪಿಂಗ್ ಮಾಲ್ ಒಂದಕ್ಕೆ ಮಧ್ಯಾಹ್ನದ ಊಟಕ್ಕೆಂದು ಬಂದಿದ್ದ ನಾನು ಫುಡ್ ಕೋರ್ಟಿನಲ್ಲಿ ಸುಮ್ಮನೆ ಅಡ್ಡಾಡುತ್ತಿದ್ದೆ. ಎತ್ತ ಹೋಗಬೇಕೆಂದು ತಿಳಿಯದೆ ಸುಮ್ಮನೆ ಒಂದು ಕೌಂಟರಿನತ್ತ ನಡೆದು ಬೇಕಿದ್ದದ್ದನ್ನು ಆರ್ಡರ್ ಮಾಡಿದೆ. ಕೆಲಸವಿಲ್ಲದೆ ನೊಣ ಹೊಡೆಯುತ್ತಿದ್ದ ಆ ಹೆಂಗಸಿಗೆ ನನ್ನ ಆಗಮನವು ಅಂಥಾ ಉತ್ಸಾಹವೇನೂ ತರಲಿಲ್ಲವಾದರೂ ನಾನು ಹೇಳಿದ್ದನ್ನೆಲ್ಲಾ ...


Editor's Wall

  • 11 May 2018
    1 month ago No comment

    ಕಾಂಗ್ರೆಸ್ ನಾಯಕರು ಜೈಲಲ್ಲಿ ಭಗತ್ ಸಿಂಗ್ ಭೇಟಿಯಾಗಿರಲಿಲ್ಲವಾ?

    ಭಾರತದ ಪ್ರಥಮ ಪ್ರಧಾನಿ ಜವಾಹರಲಾಲ್ ನೆಹರೂ ಅವರ ಆತ್ಮಚರಿತ್ರೆಯಲ್ಲಿಯೇ, ಅವರು ಭಗತ್ ಸಿಂಗ್ ಭೇಟಿಯಾಗಿದ್ದರೆಂಬುದರ ಕುರಿತ ವಿವರ ಸಿಗುತ್ತದೆ. “ಭಾರತದ ಸ್ವಾತಂತ್ರ್ಯಕ್ಕಾಗಿ ಹೋರಾಡಿದ್ದ ಭಗತ್ ಸಿಂಗ್, ಬಟುಕೇಶ್ವರ್ ದತ್, ವೀರ್ ಸಾವರ್ಕರ್ ಜೈಲಿನಲ್ಲಿದ್ದಾಗ ಅವರನ್ನು ಯಾರಾದರೊಬ್ಬ ಕಾಂಗ್ರೆಸ್ ನಾಯಕರು ಹೋಗಿ ಕಂಡಿದ್ದರಾ? ಆದರೆ ಕಾಂಗ್ರೆಸ್ ನಾಯಕರು ಭ್ರಷ್ಟನೊಬ್ಬ ಜೈಲಿನಲ್ಲಿದ್ದರೆ ಅವನನ್ನು ನೋಡಲು ಹೋಗುತ್ತಾರೆ” ಎಂದು ಪ್ರಧಾನಿ ನರೇಂದ್ರ ಮೋದಿ ಕರ್ನಾಟಕದ ಚುನಾವಣೆ ಪ್ರಚಾರ ಸಭೆಯಲ್ಲಿ ವಾಗ್ದಾಳಿ ನಡೆಸಿದ್ದರು. ಬ್ರಿಟಿಷ್ ...

  • 10 May 2018
    2 months ago No comment

    ಒಂದು ಪುಸ್ತಕ; ವಾರವಿಡೀ ಬಿಡುಗಡೆ!

    ಪುಸ್ತಕವೊಂದನ್ನು ಪ್ರಕಟಿಸಿದ ಬಳಿಕ ಅದರ ಬಿಡುಗಡೆ ಕಾರ್ಯಕ್ರಮವೂ ಕಡ್ಡಾಯವೆಂಬಂಥ ಕಾಲವಿತ್ತು. ಈಗಲೂ ಇಲ್ಲವೆಂದಲ್ಲ. ಆದರೆ ಸಾವಿರ, ಲಕ್ಷದ ಲೆಕ್ಕದಲ್ಲಿ ಹಣ ಸುರಿದು ವ್ಯವಸ್ಥೆ ಮಾಡುವ ಬಿಡುಗಡೆ ಕಾರ್ಯಕ್ರಮವು ಒಂದು ಪುಸ್ತಕದ ಕುರಿತ ಮಾತಿಗೆ ಬೇಕಾದ ಆಪ್ತ ವಾತಾವರಣವನ್ನು ಕಟ್ಟಿಕೊಡುತ್ತದೆಯೇ? ದುಡ್ಡಿನ ವಿಚಾರಕ್ಕಿಂತ ಹೆಚ್ಚಾಗಿ ಕಾರ್ಯಕ್ರಮ ಆಯೋಜನೆ ಬೇಡುವ ಶ್ರಮ ಬಹಳ ದೊಡ್ಡದು. ಹಾಲ್ ಬುಕ್ ಮಾಡಬೇಕಾದಲ್ಲಿಂದ ಹಿಡಿದು, ಅತಿಥಿಗಳನ್ನು ಗೊತ್ತುಮಾಡುವುದು, ಅವರಿಗೆಲ್ಲರಿಗೂ ಹೊಂದುವಂತೆ ದಿನಾಂಕ ನಿಗದಿಪಡಿಸುವುದು, ಆಮಂತ್ರಣ ಪತ್ರಿಕೆ ಪ್ರಕಟಿಸುವುದು, ...

  • 03 May 2018
    2 months ago No comment

    ಕಾದಂಬಿನಿ ಕಾಲಂ | ಏನಿಲ್ಲದಿದ್ದರೂ ಬದುಕು ದೂಡಬೇಕು

                      ಆಗೆಲ್ಲ ತಪಸ್ಸು ಮಾಡುವ, ದೇವರು ಪ್ರತ್ಯಕ್ಷವಾಗುವ ಮತ್ತು ಕೇಳಿದ ವರ ಕೊಡುವ ಕಥೆಗಳು ಮಸ್ತು ಚಾಲ್ತಿಯಲ್ಲಿದ್ದ ಕಾರಣ ನಾನು ದೇವರನ್ನು ಕಾಣುವ ಹಟಕ್ಕೆ ಬಿದ್ದು ತಪಸ್ಸು ಮಾಡುತ್ತಿದ್ದೆ.   ನನ್ನ ಜೊತೆ ಇವೆಲ್ಲ ಯಾವ ಕಾರಣಕ್ಕೆ ಘಟಿಸಿತ್ತೋ ಅರಿಯೆ. ಬಾಲ್ಯದಲ್ಲಿ ನಮ್ಮ ಮನೆಗೆ ನೆರೆಮನೆಯ ಒಬ್ಬ ಹೆಂಗಸು ಬರುತ್ತಿದ್ದರು. ಮೂಕಕ್ಕ ಎಂದು ಅವರನ್ನು ಎಲ್ಲರೂ ಕರೆಯುತ್ತಿದ್ದುದು. ...

  • 30 April 2018
    2 months ago No comment

    ಅತ್ಯಾಚಾರ, ಹೋರಾಟದ ಐದು ವರ್ಷಗಳು ಮತ್ತು ಆ ಪುಟ್ಟ ಗೂಡು

    ತನ್ನ ಬದುಕಿನ ಅಮೂಲ್ಯ ಘಳಿಗೆಯೇ ಇಂಥದೊಂದು ಘಟನೆಗೆ ಬಲಿಯಾದ ಆಘಾತದಲ್ಲಿರುವ ಆಕೆ ಒಮ್ಮೆ ಗೆಲುವಾದವಳಂತೆ ಕಂಡರೂ ಮತ್ತೆ ಗಂಭೀರಳಾಗುತ್ತಾಳೆ. ಎಷ್ಟು ಬೇಕೋ ಅಷ್ಟೇ ಮಾತು. ಕಟ್ಟಿಕೊಂಡಿದ್ದ ಕನಸೂ ಒಡೆದುಹೋಗಿದೆ.   ಅನ್ಯಾಯದ ವಿರುದ್ಧದ ಹೋರಾಟ, ಸಮಾಜದೆದುರು ದೊಡ್ಡ ಮನುಷ್ಯನಂತೆ ಕಾಣಿಸಿಕೊಳ್ಳುವ ಮುಖವಾಡ ತೊಟ್ಟುಕೊಂಡ ಮತ್ತು ಸಾಧ್ಯವಿರುವಷ್ಟೂ ವಾಮಮಾರ್ಗಗಳಿಂದ ಎಲ್ಲರನ್ನೂ ಎಲ್ಲವನ್ನೂ ನಿಯಂತ್ರಣದಲ್ಲಿಟ್ಟುಕೊಳ್ಳಬಲ್ಲಂಥ ಅತ್ಯಂತ ಬಲಿಷ್ಠ ದುಷ್ಟನೊಬ್ಬನನ್ನು ಎದುರುಹಾಕಿಕೊಳ್ಳುವ ದಿಟ್ಟತನ ಹೇಗೆ ಅಗಾಧ ಸಾಗರದ ನಟ್ಟ ನಡುವಿನ ಒಂದು ಸಣ್ಣ ...

  • 28 April 2018
    2 months ago No comment

    ಮೈಬಣ್ಣವೆಂಬ ಮಾನದಂಡ ಮತ್ತು ‘ವಿಪ್ಲವ’ ಮನಃಸ್ಥಿತಿಯ ರಾಜಕಾರಣ

    ಈ ‘ವಿಪ್ಲವ’ ಮನಃಸ್ಥಿತಿ ಅಧಿಕಾರಸ್ಥವಾದುದಾಗಿದೆ. ದೇವರು, ಧರ್ಮದ ಹೆಸರಲ್ಲಿ ಒಡೆಯುವುದನ್ನು ತನ್ನ ಪರಮೋನ್ನತಿ ಎಂಬಂತೆ ಭ್ರಮಿಸುವ ಈ ಕುರೂಪವು ಮನುಷ್ಯರ ಮೇಲೆ ಮನುಷ್ಯರನ್ನು ಎತ್ತಿಕಟ್ಟುತ್ತದೆ. ಹೆಣ್ಣಿನ ಮೇಲೆ ಹೆಣ್ಣನ್ನೇ ಅಸ್ತ್ರವಾಗಿ ಪ್ರಯೋಗಿಸುವ ಹುನ್ನಾರಗಳ ಮೂಲಕ, ನಿಜವಾದ ಸೌಂದರ್ಯವನ್ನು ನಾಶಗೈಯುತ್ತಿದೆ. 21 ವರ್ಷಗಳ ಕೆಳಗೆ ಅಂದರೆ 1997ರಲ್ಲಿ ವಿಶ್ವಸುಂದರಿ ಪಟ್ಟ ಗೆದ್ದ ಡಯಾನಾ ಹೇಡನ್ ಮೈಬಣ್ಣದ ಬಗ್ಗೆ ಅತಿ ಕೀಳು ಅಭಿರುಚಿಯಿಂದ ಮಾತನಾಡಿದ ತ್ರಿಪುರಾ ಮುಖ್ಯಮಂತ್ರಿ ವಿಪ್ಲವ್ ಕುಮಾರ್ ದೇವ್ ...