Share

ಸಾಹಸದ ಆ ನಿಮಿಷಗಳು
ಡಾ. ಪ್ರೇಮಲತ ಬಿ

 

 

 

 

ಮೊದಲ ಬಾರಿಯಾದ್ದರಿಂದ ಕೆಲವೇ ನಿಮಿಷಗಳ ಈ ಜಿಗಿತದ ರೋಚಕತೆ ಒಂದು ತಿಂಗಳ ಕಾಲ ನನ್ನನ್ನು ಆವರಿಸಿದ್ದು ಸುಳ್ಳಲ್ಲ.

 

 

 

 

ಬ್ಯಾಂಕರುಗಳು, ಅಕೌಂಟೆಂಟುಗಳು ವರ್ಷದ ಮೊದಲಿಂದ ಹಿಡಿದು ಮಾರ್ಚಿ ತಿಂಗಳವರೆಗೆ ಭಾರೀ ಬ್ಯುಸಿಯಾಗುವಂತೆ ಇಂಗ್ಲೆಂಡಿನ ಸರ್ಕಾರೀ ದಂತ ವೈದ್ಯಕೀಯ ರಂಗದಲ್ಲೂ ಧಾವಂತ ಕಾಣಿಸಿಕೊಳ್ಳುತ್ತದೆ. ಸರ್ಕಾರದಿಂದ ಗುತ್ತಿಗೆ ಪಡೆದ ಕೆಲಸವನ್ನು ಮಾರ್ಚಿಯ ಕೊನೆಗೆ ಪೂರ್ತಿಗೊಳಿಸದಿದ್ದರೆ ಮುಂದಿನ ವರ್ಷದ ಕಾಂಟ್ರಾಕ್ಟ್ ನ್ನು ಕಳೆದುಕೊಳ್ಳುವ ಭಯದಿಂದ ಭಾರೀ ಬಿರುಸಿನ ಕೆಲಸ ನಡೆಯುತ್ತದೆ. ಏಪ್ರಿಲ್ ವರೆಗಿನ ನನ್ನ ಬಹುತೇಕ ಗಮನ ಅತ್ತ ಹರಿದರೂ ಮರು ತಿಂಗಳು ರಜಾದಂತೆ ಭಾಸವಾಗಿ ಬೇಸರವಾಗಬಲ್ಲದು. ಈ ವರ್ಷವೂ ಹಾಗೆಯೇ ಆಯಿತು. ಇನ್ನೇನು ಮಾಡಲಿ ಎಂದು ಮಿಡುಕುತ್ತಿದ್ದ ನನ್ನ ಪ್ರಕೃತಿಯ ಅರಿವಿರುವ ನನ್ನ ನರ್ಸೊಬ್ಬಳು ನಾನಿರುವ ಗ್ರಾಂಥಮ್ ಎನ್ನುವ ನಗರದ ಸಮೀಪವೇ ಸ್ಕೈ ಡೈವಿಂಗ ಇದೆ, ಯಾಕೆ ಮಾಡಬಾರದು ಎಂದಿದ್ದೇ ತಡ ನನ್ನ ಉತ್ಸಾಹದ ಗರಿಗೆದರಿತು.

ಬದುಕು ಮತ್ತು ಕಾಲ ಎರಡೂ ಕಳೆಯುತ್ತಲೇ ಸಾಗುತ್ತವೆ. ನಡುವೆ ನಾವು ಗಳಿಸುವುದು ಅನುಭವ, ಸಾಧನೆ, ತೃಪ್ತಿ, ಹರ್ಷ, ನೆನಪುಗಳು ಯಾವುದೇ ಇರಬಹುದು. ಅಥವಾ ಎಲ್ಲವೂ ಆಗಿರಬಹುದು, ಒಟ್ಟಿನಲ್ಲಿ ಬದುಕು ನಿಂತ ನೀರಾದರೆ ನನ್ನ ಅಸ್ತಿತ್ವವೂ ಅಳಿಯುತ್ತದೇನೋ ಎಂದು ಮಿಡಿಯುವ ಜೀವ ನನ್ನದು. ವಾರದಲ್ಲಿ ಐದು –ಆರು ದಿನಗಳ ಕೆಲಸ, ಇಬ್ಬರು ಮಕ್ಕಳು, ಮನೆ ಕೆಲಸ, ಓದು –ಬರಹ ಇಷ್ಟು ಮಾತ್ರವಾದರೆ ನನ್ನ ಉತ್ಸಾಹದ ಒರತೆಗೆ ಸಾಕಾಗುವುದಿಲ್ಲ, ಅದರಿಂದ ಆಚೆಗೆ ಇನ್ನೇನಾದರೂ ಇದೆಯೇ ಎನ್ನುವುದೇ ನನ್ನ ಧ್ಯಾನವಾಗುತ್ತದೆ.

ಒಳ್ಳೆಯ ಹವಾಮಾನವಿರುವ ದಿನವೊಂದರಲ್ಲಿ ವಿಮಾನದಲ್ಲಿ 13,500 ಅಡಿಗಳ ಎತ್ತರಕ್ಕೇರಿ ನುರಿತ ಪರಿಣಿತ ಜಿಗಿತಗಾರರೊಡನೆ ಕೂಡಿ ಆಕಾಶದಿಂದ ಜಿಗಿವ ಹುಮ್ಮಸ್ಸಿನಲ್ಲಿ ಒಂದೆರಡು ವಾರಗಳ ಕಾಲ ಖುಷಿಯಾಗಿರುವ ಯೋಚನೆಯೊಡನೆ ಮನಸ್ಸು ಚೇತರಿಸಿಕೊಂಡಿತು. ಆ ಬಗ್ಗೆ ವಿಚಾರವನ್ನು ಕಲೆಹಾಕಹತ್ತಿದೆ. ಜೂನ್ ತಿಂಗಳಲ್ಲಿ ಒಳ್ಳೆಯ ಹವಾಮಾನಕ್ಕಾಗಿ ಕಾಯತೊಡಗಿದೆ. ದಿನ ಬೆಳಗಾದರೆ ನನ್ನ ಮಾತೆಲ್ಲ ಈ ಬಗ್ಗೆಯೇ ಆಗತೊಡಗಿತು. ನನ್ನ ಈ ಉತ್ಸಾಹದ ಸೋಂಕು ನನ್ನ ಸುತ್ತಮುತ್ತಲಿನವರಿಗೂ ಹರಡತೊಡಗಿತು. ಸಾದತ್ ಎನ್ನುವ ನನ್ನ ಸಹೋದ್ಯೋಗಿ ನಾನೂ ಬರುತ್ತೇನೆಂದ. ಆದರೆ ಅದು ಆತ ರಂಜಾನ್ ಹಬ್ಬಕ್ಕಾಗಿ ಉಪವಾಸ ಮಾಡುತ್ತಿದ್ದ ಕಾಲ. ಆತನ ಉಪವಾಸ ಕಳೆಯುವವರೆಗೂ ನಾನೂ ಕಾದದ್ದಾಯ್ತು.

ಜೂನ್ 24 ಭಾನುವಾರದಂದು 12 ಗಂಟೆಗೆ ಲಭ್ಯವಿದ್ದ ಸರತಿಯಲ್ಲಿ ಜಿಗಿಯಲು ನೂರಾರು ಪೌಂಡುಗಳ ಶುಲ್ಕ ತೆತ್ತು (£350) ಸ್ಥಳ ಕಾದಿರಿಸಿ ಈ ಸಾಹಸ ಕ್ರೀಡೆಗಾಗಿ ದೇಹವನ್ನು ಒಂದಷ್ಟು ಅಣಿಗೊಳಿಸತೊಡಗಿದೆ. ಈ ಮಧ್ಯೆ ನಾವು ಕೆಲಸ ಮಾಡುತ್ತಿದ್ದ ಜಾಗದವರು “ಅಯ್ಯೋ, ಒಟ್ಟಿಗೇ ಇಬ್ಬರು ದಂತ ವೈದ್ಯರನ್ನು ಕಳೆದುಕೊಳ್ಳಲು ನಾವು ತಯಾರಿಲ್ಲ” ಎಂದು ಹಲುಬಲು ಶುರುಮಾಡಿದರು. ಅವರಿವರು ಹೀಗೆಯೇ ಜಿಗಿದು ಪ್ರಾಣ ಕಳೆದುಕೊಂಡದ್ದನ್ನು, ಇನ್ಯಾರೋ ಇಳಿಯುವ ಜಾಗದಲ್ಲಿ ಇಳಿಯದೇ ಕಾರು ಪಾರ್ಕೊಂದರಲ್ಲಿ ಬಿದ್ದು ಎರಡೂ ಮಂಡಿಗಳನ್ನು ಮುರಿದುಕೊಂಡ ಕತೆಗಳನ್ನು ಹೇಳತೊಡಗಿದರು. ಅವಿರತ ಕೆಲಸ ಮಾಡುವ ನನ್ನ ಮೈಯಲ್ಲಿ ‘ಏನೋ ಹೊಕ್ಕಿದೆ’ಯೆಂದು ಕೂಡ ಹೇಳಿ ನಕ್ಕರು. ಇವ್ಯಾವುದರಿಂದಲೂ ಬದಲಾಗದ ನಿರ್ಧಾರ ತಿಳಿದ ನಂತರ ನೀನು ಜಿಗಿಯುವುದೇ ಆದರೆ ‘ಬ್ರಿಡ್ಜ್ 2 ಏಡ್’ ಎನ್ನುವ ಸಂಸ್ಥೆಗೆ ಹಣವನ್ನು ದೇಣಿಗೆ ಕೊಡುಬಹುದು ಎಂದು ಫೇಸ್ಬುಕ್ಕಿನ ಹಾಳೆಯೊಂದನ್ನು ತಯಾರು ಮಾಡಿ ಹಣ ಸಂಗ್ರಹಣೆ ಮಾಡತೊಡಗಿದರು.

ಬದುಕಿನ ಒಂದು ಅನುಭಕ್ಕಾಗಿ ಮಾಡುವ ಈ ಸಾಹಸದಲ್ಲಿ ಒಂದು ಒಳ್ಳೆಯ ಉದ್ದೇಶವೂ ಜೊತೆಗೂಡಿತು. ‘ಬ್ರಿಡ್ಜ್ 2 ಏಡ್’ ಎನ್ನುವ ಈ ದಾನ ಸಂಸ್ಥೆ ಅತ್ಯಂತ ಬಡ ಆಫ್ರಿಕಾ ದೇಶಗಳ ಜನರ ಹಲ್ಲುನೋವಿನ ಸಮಸ್ಯೆಗಳಿಗೆ ಉಚಿತ ಚಿಕಿತ್ಸೆ, ಸ್ಥಳೀಯ ಸ್ವಯಂಸೇವಕರಿಗೆ ಈ ನಿಟ್ಟಿನಲ್ಲಿ ತರಬೇತಿ, ಉಪಕರಣಗಳ ಪೂರೈಕೆಯನ್ನು ನಡೆಸುವ ದಾನ ಸಂಸ್ಥೆ. ಇದಕ್ಕಾಗಿ ದಂತವೈದ್ಯರು, ದಾದಿಯರು ಆ ದೇಶಗಳಿಗೆ, ಇಂಗ್ಲೆಡ್ ಮುಂತಾದ ದೇಶಗಳಿಂದ ಪ್ರಯಾಣ ಮಾಡಿ ಸೇವೆ ಮಾಡಿಬರುತ್ತಾರೆ. ವಿದ್ಯುಚ್ಛಕ್ತಿ, ಕುಡಿಯುವ ನೀರು, ರೋಗಿಗಳು ಕೂಡಲು ಒಂದು ದಂತ ಚಿಕಿತ್ಸಾ ಕುರ್ಚಿಯೂ ಇಲ್ಲದಂಥ ಕಡೆ, ಅನ್ನ ಬೇಯಿಸುವ ಪ್ರೆಷರ್ ಕುಕರ್ ಗಳನ್ನೇ ಬಳಸಿ ಉಪಕರಣಗಳನ್ನು ಸ್ವಚ್ಛಗೊಳಿಸಿಕೊಂಡು ವೈದ್ಯಕೀಯ ಕೆಲಸಮಾಡುತ್ತಾರೆ. ಇಂಥವರು ಬಂದರೆ ಸಾಕೆಂದು ಹಳ್ಳಿ ಹಳ್ಳಿಗಳಿಂದ ಬಂದು ಯಮಯಾತನೆಯಲ್ಲಿ ನರಳುತ್ತಿರುವ ಬಡ ಜನರು ಸಾಲುಗಟ್ಟಿ ಸಹಾಯ ಕೋರಿ ನಿಲ್ಲುತ್ತಾರೆ. ಒಮ್ಮೆ ಇವರನ್ನೇ ನಂಬಿ ಬಂದ ತುಂಬು ಗರ್ಭಿಣಿಯ ಪ್ರಸೂತಿ ಕಾರ್ಯವನ್ನು, ಯಾವ ತರಬೇತಿಯೂ ಇಲ್ಲದೆ ಅನಿವಾರ್ಯವಾಗಿ ನಡೆಸಬೇಕಾದ ಪ್ರಸಂಗವನ್ನೂ ಈ ಸಂಸ್ಥೆಯ ಕಾರ್ಯಕರ್ತರು ನೆನೆಯುತ್ತಾರೆ. ಇಂತಹ ಸೇವೆಯ ಉತ್ತಮ ಕಾರ್ಯಕ್ಕಾದರೆ ಹತ್ತು ಬಾರಿ ಬೇಕಾದರೂ ಜಿಗಿಯಬಲ್ಲೆನೆಂದ ನನ್ನ ಡೈವನ್ನು ನೋಡಲು, ಸ್ವತಃ ಜಿಗಿಯಲಾಗದ, ಅಳ್ಳಕ ಎದೆಯ 5 ಜನ ಸಹೋದ್ಯೋಗಿಗಳು ಕೂಡ ಬಂದದ್ದು ವಿಶೇಷ.

ಈ ಜಿಗಿತವನ್ನು ಮಾಡುವ ಮುನ್ನ ಯಾವುದೇ ರೀತಿಯ ಹಾನಿಗೆ, ಪ್ರಾಣ ಹೋಗುವುದಕ್ಕೆ ನಾವೇ ಜವಾಬುದಾರರು ಎಂದು ಬರೆದ ಪತ್ರಕ್ಕೆ ಸಹಿ ಮಾಡಿಕೊಡಬೇಕು. ಕಾಲು ಮುರಿದರೆ, ಕಣ್ಣಿನ ರೆಟಿನಾಗಳು ಕಳಚಿ ಬಿದ್ದರೆ, ಸೊಂಟ ಮುರಿದರೆ, ರಕ್ತ ಸ್ರಾವವಾಗಿ ಮಧ್ಯೆ ಮೂರ್ಛೆ ಹೋಗಿ ನೆಲ ಕಚ್ಚಿದರೆ ಎಲ್ಲದ್ದಕ್ಕೂ ನಮ್ಮದೇ ಜವಾಬುದಾರಿ. ನಮ್ಮ ಇಳಿಕೆಯನ್ನು ನಿಯಂತ್ರಿಸಲು ನಮ್ಮ ಜೊತೆಗೇ ನಮ್ಮ ಬೆನ್ನಿಗಂಟಿಕೊಂಡೇ ಜಿಗಿವ ಮಾರ್ಗದರ್ಶಕ ಇಳಿಯುವಾಗ ನಮ್ಮ ಮೇಲೇಯೇ ಬಿದ್ದು ತಮ್ಮ ಎಲ್ಲ ಭಾರವನ್ನೂ ಹೇರಿ ನಮ್ಮನ್ನೂ ನೆಲ ಕಚ್ಚಿಸಿದರೆ ಅದಕ್ಕೂ ನಮ್ಮ ಸಮ್ಮತಿ ಸೂಚಿಸಬೇಕು ಅದನ್ನೆಲ್ಲ ಕಣ್ಣು ಮುಚ್ಚಿ ಮಾಡಿದ್ದಾಯ್ತು!

ವಾರದ ಹಿಂದೆಯಷ್ಟೇ ನನ್ನ ಹುಟ್ಟುಹಬ್ಬವನ್ನು ಆಚರಿಸಿಕೊಂಡಿದ್ದೆ. ಈಗ ನನ್ನ ಜೀವವನ್ನು ಬರೆದುಕೊಟ್ಟು ಸ್ಕೈ ಡೈವಿಂಗ್ ಸೆಂಟರಿನಲ್ಲಿ ಹಾಜರಾಗಿದ್ದೆ. ಕಿವಿಯಿಂದ ಕಿವಿಯವರೆಗೆ ಅರಿವಿಲ್ಲದಂತೆಯೇ ನಗು ತುಂಬಿ ತುಳುಕುತಿತ್ತು. ಗೊತ್ತಿಲ್ಲದ್ದರ ಬಗ್ಗೆ ಭಯವಾಗುವುದು ಸಾಮಾನ್ಯ. ಆದರೆ ಗೊತ್ತಿಲ್ಲದ ಸಾಹಸವನ್ನು ಮಾಡುವಾಗ ಆಗುವ ಅಡ್ರಿನಲಿನ್ ನ ಕಿಕ್ ಈಗ ನನ್ನಲ್ಲಿ ತುಂಬಿಕೊಂಡಿತ್ತು.

ಇದನ್ನೇ ವೃತ್ತಿಯನ್ನಾಗಿಯೋ, ಪ್ರವೃತ್ತಿಯನ್ನಾಗಿಯೋ ಮಾಡಿಕೊಳ್ಳಬೇಕೆಂದರೆ ಇಂತಹ ಸಾಹಸಕ್ಕೆ ತರಬೇತಿಯ ಅಗತ್ಯವಿರುತ್ತದೆ. ಆದರೆ ಒಬ್ಬ ತರಬೇತಿಯುಳ್ಳ ನಿಪುಣ ಆಕಾಶ ಜಿಗಿತಗಾರನ ಜೊತೆಗೆ ಜಿಗಿದಲ್ಲಿ ಇದೇ ಥ್ರಿಲ್ಲನ್ನು ಅನುಭವಿಸಲೂ ಬಹುದು; ಜೊತೆಗೆ ಜೋಪಾನವಾಗಿಯೂ ನೆಲಮುಟ್ಟಬಹುದು. ಇಂತಹ ಆಕಾಶ ಜಿಗಿತವನ್ನು ಟ್ಯಾಂಡಮ್ ಸ್ಕೈ ಡೈವಿಂಗ್ ಅನ್ನುತ್ತಾರೆ. ಯಾವುದೇ ತರಬೇತಿಯಿಲ್ಲದೆ ಈ ಕ್ರಿಡೆಯಲ್ಲಿ ತೊಡಗುವುದು ಮೃತ್ಯುವಿಗೆ ಆಹ್ವಾನವಿತ್ತಂತೆ. ಆದರೆ ಇದನ್ನೂ ಮಾಡಿದ ಇಬ್ಬರು ಸಾಹಸಿಗಳು ಈ ಜಗತ್ತಿನಲ್ಲಿದ್ದಾರೆ.

ಈ ಸಾಹಸ ಮಾಡಲು ಹೋಗಿ ಸತ್ತವರ, ಕಾಲು ಮುರಿದುಕೊಂಡವರ ಬಗ್ಗೆ, ಹಲವು ರೀತಿಯ ಮೂಳೆ ಮುರಿದುಕೊಂಡವರ ಬಗ್ಗೆ ಬೇಕಾದಷ್ಟು ಮಾಹಿತಿಯಿದೆ. ಅಂತೆಯೇ ಪ್ಯಾರಾಶ್ಯೂಟ್ ಗಳು ತೆರೆದುಕೊಳ್ಳದೆ ರಿಸರ್ವ್ ಪ್ಯಾರಾಶ್ಯೂಟ್ ನ್ನು ಉಪಯೋಗಿಸಬೇಕಾದ ತುರ್ತುಗಳು ಕೂಡ ಉಂಟಾಗಬಹುದು. ಅಪಾಯವಿಲ್ಲದ ಸಾಹಸ ಕ್ರೀಡೆಗಳು ಸಾಹಸ ಕ್ರೀಡೆಗಳಾಗಲು ಸಾಧ್ಯವೇ?

ನಾವು ಪ್ರತಿದಿನದ ಅಗತ್ಯ ಎಂದು ಬೈಕನ್ನು ಚಲಾಯಿಸುವುದೋ ಅಥವಾ ಕಾರನ್ನು ನಡೆಸುವುದೋ ಮಾಡುತ್ತೇವೆ. ಇಂತಹ ಪ್ರತಿದಿನ ಕೆಲಸದಲ್ಲಿ ಅಪಘಾತಗಳಾಗುತ್ತವೆ, ಅಂಗಗಳು ಊನವಾಗುತ್ತವೆ. ಪ್ರಾಣಗಳು ಹೋಗುತ್ತವೆ. ಅಮೆರಿಕಾದ 2010ರ ಸರ್ವೆಯ ಪ್ರಕಾರ 3.1 ಮಿಲಿಯನ್ನು ಸ್ಕೈ ಡೈವಿಂಗ್ ನಲ್ಲಿ ಸತ್ತವರ ಸಂಖ್ಯೆ ಕೇವಲ 21 ಜನ. ಅಂದರೆ ಸಾಧ್ಯತೆ 0.0007% ನಷ್ಟು ಕಡಿಮೆ. ಅದೇ ಪ್ರತಿ ಹತ್ತು ಸಾವಿರ ಮೈಲು ಕಾರು ಚಲಾಯಿಸುವಾಗ ನಡೆದ ಅಪಘಾತದಲ್ಲಿ ಮಡಿದವರ ಸಂಖ್ಯೆ 0.0167%. ಇನ್ನೊಂದು ಅರ್ಥದಲ್ಲಿ ಕಾರು ನಡೆಸುವಾಗ ಮಡಿವ ಸಾಧ್ಯತೆ ಸ್ಕೈ ಡೈವಿಂಗ್ ಗೆ ಹೋಲಿಸಿದರೆ 24 ಪಟ್ಟು ಹೆಚ್ಚಿನದು.

ಆಕಾಶ ಜಿಗಿತದ ಅವಘಡಗಳು ಪ್ರತಿ ದಶಕದಲ್ಲೂ ಕಡಿಮೆಯಾಗುತ್ತ ಹೋಗುತ್ತಿವೆ. ಹಾಗಾಗಿ ಪ್ರತಿ ದೇಶದಲ್ಲಿ, ಪ್ರತಿ ಪ್ರವಾಸೀ ತಾಣದಲ್ಲಿ ಹೆಲಿಕಾಪ್ಟರಿನಲ್ಲಿ ಅಥವಾ ಸಣ್ಣ ವಿಮಾನಗಳಲ್ಲಿ ಮೇಲೆ ಹೋಗಿ ಜಿಗಿದು ಬರುವ ಅವಕಾಶಗಳಿವೆ. ಗರಿಷ್ಟ ಮಟ್ಟದ ಭದ್ರತೆ ಒದಗಿಸುವ ಜಾಗಗಳಲ್ಲಿ ಮೊದಲು ಟ್ಯಾಂಡೆಮ್ ಸ್ಕೈ ಡೈವಿಂಗ್ (ಮಾರ್ಗದರ್ಶಕರ ಜೊತೆ) ಮಾಡುವುದು ಒಳಿತು. ಈ ಕ್ರೀಡೆ ನಿಮಗೆ ಒದಗುತ್ತದೆ ಎಂದಲ್ಲಿ ಅದನ್ನು ಹವ್ಯಾಸವನ್ನಾಗಿ ಮಾಡಿಕೊಳ್ಳಬಹುದು. ತೀರಾ ಇತ್ತೀಚೆಗೆ 101 ವರ್ಷ 38 ದಿನಗಳ ವಯಸ್ಸಿನ ಅಮೆರಿಕಾದ ಮಿಲಿಟರಿಯಿಂದ ನಿವೃತ್ತನಾದ ಬ್ರೈಸನ್ ವಿಲ್ಲಿಯಮ್ ವೆರ್ಡನ್ ಹೇಯ್ಸ್ ಎಂಬಾತ 15000 ಅಡಿ ಎತ್ತರದಿಂದ ತನ್ನ ಸಂಸಾರದ ಮೂರು ತಲೆಮಾರುಗಳ ಜನರೊಂದಿಗೆ ಜಿಗಿದು ಹೊಸ ದಾಖಲೆಯನ್ನು ನಿರ್ಮಿಸಿದ್ದಾನೆ. ಒಂದೇ ದಿನದಲ್ಲಿ ಮೂರು ವಿಮಾನಗಳನ್ನು ಬಳಸಿ ಪ್ರತಿ 2.25 ನಿಮಿಷಗಳಿಗೆ ಒಮ್ಮೆ ಒಂದೇ ದಿನದಲ್ಲಿ 640 ಸಾರಿ ಜಿಗಿದ ಖ್ಯಾತಿ ಜೇಯ್ ಸ್ಟೋಕ್ ಎಂಬಾತನಿಗೆ ಸಲ್ಲುತ್ತದೆ. 4 ವರ್ಷದ ಸೌತ್ ಆಫ್ರಿಕಾದ ಟೋನಿ ಸ್ಟಾಡ್ಲರ್ ಪ್ರಪಂಚದ ಆಕಾಶ ಜಿಗಿತ ಮಾಡಿರುವ ಅತಿ ಚಿಕ್ಕ ವಯಸ್ಸಿನ ಬಾಲಕ. ಆದರೆ ಕೆಲವು ಮುಂದುವರಿದ ದೇಶಗಳಲ್ಲಿ 16 ವರ್ಷದವರೆಗೆ ಆಕಾಶ ಜಿಗಿತ ಮಾಡಲು ಅವಕಾಶವಿಲ್ಲ. ಭಾರತದಲ್ಲಿ ಹಲವೆಡೆ ನಿಮ್ಮ ವಯಸ್ಸು 18ರ ಮೇಲಿದ್ದರೆ ಮಾತ್ರ ಜಿಗಿಯಲು ಸಾಧ್ಯ.

ನಮ್ಮ ಸಣ್ಣ ವಿಮಾನ ಮೇಲೆ ಮೇಲೆ ಹೋದಂತೆಲ್ಲ ನನ್ನ ಸಂತೋಷ ಹೆಚ್ಚುತ್ತಿತ್ತು. 13,000 ಅಡಿಗಳ ಎತ್ತರದಲ್ಲಿ ನನ್ನ ಟ್ಯಾಂಡೆಮ್ ಗುರು ತಲೆಗೆ ಟೊಪ್ಪಿ, ಕನ್ನಡಕ ಹಾಕಲು ಹೇಳಿದ. ಅದೇ ವಿಮಾನದಲ್ಲಿ ಬಂದಿದ್ದ ಐದು ಮಂದಿ ನುರಿತ ಜಿಗಿತಗಾರರು ವಿಮಾನದ ಬಾಗಿಲು ತೆರೆಯುತ್ತಿದ್ದಂತೆ ಪುರ್ರೆಂದು ಒಟ್ಟಿಗೆ ಹಾರಿಹೋದರು. ಆಗಸದಲ್ಲಿ ಕೈ ಕೈ ಹಿಡಿದು ಚಿತ್ತಾರ ಬಿಡಿಸಬಲ್ಲ ಪರಿಣಿತ ಜಿಗಿತಗಾರರಿವರು. ಕೊನೆಯವಳು ನಾನು. ಬಾಗಿಲಿಗೆ ಬಂದಂತೆ ಹಸಿರು ಗೀಚಿನ ನೆಲ, ನೀಲ ಆಗಸ, ಭರ್ರೆಂದು ಬಲವಾಗಿ ಬೀಸುವ ಗಾಳಿಯ ಜೊತೆಗೆ ಚಲಿಸುವ ವಿಮಾನದ ಗತಿಯಿಂದ ಕಳಚಿಕೊಂಡು ಜಿಗಿದದ್ದೇ ತಡ ಬಲವಾದ ಗಾಳಿ ಮತ್ತು ಗುರುತ್ವಾಕರ್ಷಣೆಗಳ ಘರ್ಷಣೆಯಲ್ಲಿ ಸಿಕ್ಕ ನಮ್ಮ ದೇಹಗಳು ಗಂಟೆಗೆ 200 ಮೈಲುಗಳ ವೇಗದಲ್ಲಿ ಕೆಳಗೆ ಬೀಳತೊಡಗಿದವು. ವಿಮಾನ ಬಾಗಿ ಇಳಿಯುವಾಗ ಕಿವಿಯಲ್ಲಿ ಕಾಣಿಸಿಕೊಳ್ಳುವ ನೋವು ಬಲಗಿವಿಯನ್ನು ಆವರಿಸುತ್ತಿರುವಂತೆ ಡ್ರೋಗ್ (ವೇಗವನ್ನು ನಿಯಂತ್ರಿಸುವ ಸಣ್ಣ ಬಲೂನು) ನ್ನು ಹಾರಿಸಲಾಯಿತು. ಇದರಿಂದ ನಮ್ಮ ವೇಗ ಗಂಟೆಗೆ 120 ಮೈಲುಗಳಿಗೆ ಇಳಿಯಿತು. ಒಂದಷ್ಟು ಹೊತ್ತು ಕೈಗಳನ್ನು ಬಡಿಯುತ್ತ ಆನಂದಿಸಿದ ನಂತರವಷ್ಟೇ ಪ್ಯಾರಾಶ್ಯೂಟ್ ನ್ನು ಬಿಚ್ಚಿದ್ದು. ಇದು ತೆರೆದುಕೊಳ್ಳುತ್ತಿದ್ದಂತೆ ಇಡೀ ದೇಹವನ್ನು ಪ್ಯಾರಾಶ್ಯೂಟ್ ಲಬಕ್ಕೆಂದು ಮೇಲೆಳೆದುಕೊಂಡು ನಮ್ಮ ವೇಗದ ಜಿಗಿತ ತಟ್ಟನೆ ತಹಬದಿಗೆ ಬಂತು. ನೆಲದಿಂದ ಸುಮಾರು 13,000 ಅಡಿಗಳ ಮೇಲೆ ಗಾಳಿಯನ್ನು ಬಿಟ್ಟರೆ ಯಾವ ಶಬ್ದವೂ ಇರುವುದಿಲ್ಲ. ನಾನು ಸ್ಕೈ ಡೈವಿಂಗ್ ಮಾಡಿದ ದಿನ ನೀಲ ಶುಭ್ರ ಆಕಾಶ. ಹಾಗಾಗಿ ಹಲವಾರು ಮೈಲುಗಳ ದೂರಕ್ಕೂ ನೆಲ ಕಾಣಿಸುತ್ತಿತ್ತು. ಬಲಕ್ಕೂ ಎಡಕ್ಕೂ ಪ್ಯಾರಶ್ಯೂಟು ತಿರುಗುತ್ತಿದ್ದಂತೆ ಗಾಳಿಯನ್ನು ಸೀಳುವ ಮತ್ತದೇ ಹರ್ಷ. ನೆಲದಲ್ಲಿರುವವರಿಗಂತೂ ನಾವು ಈ ದೂರದಿಂದ ಕಾಣುತ್ತಿರಲಿಲ್ಲ. ಇಲ್ಲಿ ನಿಮ್ಮ ಮಾರ್ಗದರ್ಶಕರೊಂದಿಗೆ ಮಾತಾಡಬಹುದು. ಕ್ಷಿತಿಜದವರೆಗೆ ಕಣ್ಣು ಹಾಯಿಸಬಹುದು. ನಿಧಾನವಾಗಿ ಸ್ಕೈ ಡೈವಿಂಗ್ ಮುಗಿಸಿ ನಾವು ನೆಲಕ್ಕಿಳಿಯುವಾಗ ವೇಗವನ್ನು ಹೆಚ್ಚು ಮಾಡಲಾಗುತ್ತದೆ. ಯಾವ ಹಾನಿಯೂ ಇಲ್ಲದೆ ಇಳಿದಾಗ ಇಡೀ ದೇಹ ಮತ್ತು ಮಿದುಳ ಅಯೋಮಯ ಸ್ಥಿತಿಯನ್ನು ಅನುಭವಿಸಿದರೂ ಸಾರ್ಥಕತೆಯ ಭಾವ ಆವರಿಸಿತು. ಮುಂದಿನ ಎರಡು ದಿನಗಳು ಕೂಡ ಇದೇ ಗುಂಗಿನಲ್ಲಿ ಕಳೆದವು.

ನಮ್ಮ ದೇಶದಲ್ಲಿ ಸಾಮಾನ್ಯ ಜನರಿಗಾಗಿ ಇಂತಹ ಆಕಾಶ ಜಿಗಿತದ ಐದು ಕೇಂದ್ರಗಳಿವೆ. ನಮ್ಮ ರಾಜ್ಯದ ಮೈಸೂರು ಕೂಡ ಇವುಗಳಲ್ಲಿ ಒಂದು. ಚಾಮುಂಡೀ ಬೆಟ್ಟದ ತಪ್ಪಲಲ್ಲಿಯೇ ಇಂತಹ ಕೇಂದ್ರವಿದ್ದು, ವರ್ಷದಲ್ಲಿ ಹಲವು ಕ್ಯಾಂಪುಗಳನ್ನು ಇವರು ನಡೆಸುತ್ತಿದ್ದಾರೆ. ಹಲವು ಬಗೆಯ ಆಕಾಶ ಜಿಗಿತ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳುತ್ತಾರೆ. ಈ ರೀತಿಯ ತರಬೇತುದಾರರೊಟ್ಟಿಗಿನ ಜಿಗಿತವೊಂದಕ್ಕೆ ವಾರಾಂತ್ಯವೋ, ವಾರದ ದಿನವೋ ಎಂಬುದರ ಆಧಾರದ ಮೇಲೆ ಸುಮಾರು 35,000-45,000 ರೂಪಾಯಿಗಳ ಶುಲ್ಕವಿದೆ. ಇದರ ಫೋಟೋ ಮತ್ತು ವಿಡೀಯೋ ಪ್ಯಾಕೇಜಿಂಗ್ ಗಳನ್ನು ಕೂಡ ನೀವು ಕಾದಿರಿಸಬಹುದು. ನಿಮ್ಮ ಈ ವೀಡೀಯೋ ಮಾಡಲು ಮೂರನೇ ವ್ಯಕ್ತಿ ನಿಮ್ಮೊಂದಿಗೆ ಜಿಗಿದು ಈ ವಿಡೀಯೋವನ್ನು ತೆಗೆಯುವುದು ವಿಶೇಷ. ಹಾಗಾಗಿ ಇದು ಎಲ್ಲರಿಗೂ ಎಟುಕುವ ಕ್ರೀಡೆಯಲ್ಲ.

ಮೈಸೂರೇ ಅಲ್ಲದೆ ಮಧ್ಯಪ್ರದೇಶದ ಧಾನ, ಮಹಾರಾಷ್ಟ್ರದ ಆಂಬಿ ವ್ಯಾಲಿ, ಗುಜರಾತಿನ ದೀಸ ಮತ್ತು ಪಾಂಡಿಚೆರಿಯಲ್ಲಿಯೂ ಈ ಸೌಲಭ್ಯಗಳಿವೆ. ಈ ಪ್ರತಿ ಜಾಗದಲ್ಲಿಯೂ ಏರುವ ಎತ್ತರ ಮತ್ತು ಜಿಗಿತದ ಬೆಲೆ ಎರಡರಲ್ಲಿಯೂ ವ್ಯತ್ಯಾಸಗಳಿವೆ. ಕೆಲವೊಂದು ಕಡೆ ಬೇಡಿಕೆಯಿದ್ದಲ್ಲಿ ಮಾತ್ರ ವರ್ಷದಲ್ಲಿ ಈ ಚಟುವಟಿಕೆಗಳು ನಡೆಯುತ್ತವೆ; ಇಲ್ಲವೆಂದರೆ ಇಲ್ಲ. ಹಾಗಾಗಿ ಯಾವುದೇ ಜಾಗವಾಗಲಿ, ಮೊದಲು ಖಚಿತಪಡಿಸಿಕೊಂಡು ಹೋಗುವುದು ಒಳಿತು.

ಹೃದಯದ ಖಾಯಿಲೆಗಳು, ಕಾಲಿನ ಊನಗಳು, ಗರ್ಭಿಣಿಯರು ಮತ್ತು ಇನ್ನಿತರ ಊನಗಳ, ಖಾಯಿಲೆಗಳ ಜನರು ಇದರಲ್ಲಿ ಭಾಗವಹಿಸುವಂತಿಲ್ಲ. ಈ ಸಾಹಸದಲ್ಲಿ ಭಾಗವಹಿಸುವ ಮುನ್ನ ಸರ್ವ ರೀತಿಯಲ್ಲಿಯೂ ಆರೋಗ್ಯವಾಗಿರುವ ಮಂದಿ ಕೂಡ ತಮ್ಮ ಬದುಕಿಗೆ ತಾವೇ ಜವಾಬುದಾರರು ಎಂದು ಬರೆದುಕೊಟ್ಟೇ ಹೋಗಬೇಕು ಎಂದರೆ ಈ ಆಕಾಶ ಜಿಗಿತದ ಅಪಾಯಗಳ ಊಹೆ ನಿಮಗಾಗಬಹುದು.

ಸ್ಕೈ ಡೈವಿಂಗ್ ನಲ್ಲಿಯೂ ನಾನಾ ವಿಧಗಳಿವೆ. ಒಬ್ಬ ತರಬೇತಿಯಿರುವ ನುರಿತ ಜಿಗಿತಗಾರನ ಜೊತೆ ಒಟ್ಟಿಗೆ ಜಿಗಿಯುವುದು, ಒಮ್ಮೆ ತರಬೇತಿ ಮತ್ತು ಲೈಸೆನ್ಸ್ ದೊರೆತ ನಂತರ ಸ್ವತಂತ್ರವಾಗಿ ಜಿಗಿಯುತ್ತ ಆನಂದಿಸುವುದು, ಗುಂಪುಗಳಲ್ಲಿ ಒಟ್ಟಿಗೆ ಜಿಗಿದು ಕೈ ಕೈ ಹಿಟಿದು ನಾನಾ ರೀತಿಯ ಚಿತ್ತಾರಗಳನ್ನು ಆಗಸದಲ್ಲಿ ಬಿಡಿಸುವುದು ಮತ್ತು ಇವೇ ವರ್ಗಗಳಲ್ಲಿ ಅಪಾಯದ ಮಟ್ಟವನ್ನು ಹೆಚ್ಚಿಸಿಕೊಂಡು ನೇರವಾಗಿ ಬೀಳುತ್ತ ಆನಂದಿಸುವುದು -ಹೀಗೆ ನಮ್ಮ ಅಪಾಯದ ಪರಿಧಿಯನ್ನು ಹಿಗ್ಗಿಸಿಕೊಳ್ಳುತ್ತ ಸಾಗುವುದು ಮನುಷ್ಯನ ಸಾಹಸೀ ಗುಣದ ಕಡೆ ಬೆರಳು ತೋರಿಸುತ್ತದೆ.

ಮೊದಲ ಬಾರಿಯಾದ್ದರಿಂದ ಕೆಲವೇ ನಿಮಿಷಗಳ ಈ ಜಿಗಿತದ ರೋಚಕತೆ ಒಂದು ತಿಂಗಳ ಕಾಲ ನನ್ನನ್ನು ಆವರಿಸಿದ್ದು ಸುಳ್ಳಲ್ಲ. ಈ ಕ್ಷಣಗಳ ವಿಡೀಯೋವನ್ನು ಯೂಟ್ಯೂಬಿಗೂ ಏರಿಸಿದೆ.

ಡಾ. ಪ್ರೇಮಲತ ಬಿ

ದಂತವೈದ್ಯೆ. ಕಳೆದ 15 ವರ್ಷಗಳಿಂದ ಇಂಗ್ಲೆಂಡಿನಲ್ಲಿ ವಾಸ. ಬಾಲ್ಯದಿಂದಲೇ ಸಾಹಿತ್ಯದಲ್ಲಿ ಆಸಕ್ತಿ. ಹಲವಾರು ಪತ್ರಿಕೆಗಳಲ್ಲಿ ಬರಹಗಳು ಪ್ರಕಟವಾಗಿವೆ. ಕಥೆ, ಕಾವ್ಯ ಸ್ಪರ್ಧೆಗಳಲ್ಲಿ ಬಹುಮಾನಿತರು.

Share

Leave a comment

Your email address will not be published. Required fields are marked *

Recent Posts More

  • 6 days ago No comment

    ಬಿಜೆಪಿ ವಿರೋಧಿ ರಂಗ: ಪ್ರತಿಪಕ್ಷ ಸಭೆಯಲ್ಲಿ 20 ಪಕ್ಷಗಳು

    ಆರ್ಬಿಐ ,ಸಿಬಿಐ, ಚುನಾವಣಾ ಆಯೋಗದಂಥ ಸಂಸ್ಥೆಗಳನ್ನು ಕೇಂದ್ರ ಸರ್ಕಾರ ದುರ್ಬಳಕೆ ಮಾಡಿಕೊಳ್ಳುತ್ತಿರುವ ಬಗ್ಗೆ ಸಭೆಯಲ್ಲಿ ನಾಯಕರು ಕಟುವಾಗಿ ಟೀಕಿಸಿದರು.   ಮಹತ್ವದ ಬೆಳವಣಿಗೆಯೊಂದರಲ್ಲಿ ಬಿಜೆಪಿಗೆ ಪ್ರತಿಶಕ್ತಿಯನ್ನು ಕಟ್ಟುವ ಯತ್ನವಾಗಿ ನಡೆದ ಪ್ರತಿಪಕ್ಷ ಸಭೆಗೆ 20 ಪಕ್ಷಗಳ ನಾಯಕರು ಹಾಜರಾಗಿದ್ದರು. ಅಷ್ಟೇ ಅಚ್ಚರಿಯ ವಿಚಾರವೆಂದರೆ, ಈ ಸಭೆಗೆ ಸಮಾಜವಾದಿ ಪಕ್ಷ (ಎಸ್ಪಿ) ಮತ್ತು ಬಹುಜನ ಸಮಾಜವಾದಿ ಪಕ್ಷ (ಬಿಎಸ್ಪಿ)ದಿಂದ ಯಾವುದೇ ಮುಖಂಡರು ಆಗಮಿಸಿರಲಿಲ್ಲ. ಡಿ.10ರಂದು, ಪಂಚರಾಜ್ಯ ಚುನಾವಣೆ ಫಲಿತಾಂಶ ಪ್ರಕಟಗೊಳ್ಳುವ ...

  • 1 week ago No comment

    ಅರ್ಧನಾರಿ ಕಥೆಯ ಮತ್ತೆರಡು ಭಾಗಗಳು

    ‘ಮಧೋರುಬಗನ್’ (ಅರ್ಧನಾರಿ) ಎಂಬ ಕಾದಂಬರಿ ಬರೆವ ಮೂಲಕ ಬಲಪಂಥೀಯರ ಕೆಂಗಣ್ಣಿಗೆ ಗುರಿಯಾಗಿದ್ದ ಖ್ಯಾತ ತಮಿಳು ಲೇಖಕ ಪೆರುಮಾಳ್ ಮುರುಗನ್ ಈಗ ಆ ಕಾದಂಬರಿಯ ಮತ್ತೆರಡು ಭಾಗಗಳ ಪ್ರಕಟಣೆಯೊಂದಿಗೆ ಸುದ್ದಿಯಾಗಿದ್ದಾರೆ. ಆ ಕಾದಂಬರಿಯ ಕೆಲವು ಭಾಗಗಳು ಧಾರ್ಮಿಕ ಭಾವನೆಗೆ ಧಕ್ಕೆಯುಂಟುಮಾಡಿವೆ ಎಂದು ಆರೋಪಿಸಿದ್ದ ಬಲಪಂಥೀಯ ಕಾರ್ಯಕರ್ತರು ಹಲ್ಲೆಯೆಸಗಿದಾಗ, ತಮ್ಮ ಬರವಣಿಗೆ ಮೇಲೆ ಸ್ವಯಂ ನಿಷೇಧ ಹೇರಿಕೊಂಡಿದ್ದ ಮುರುಗನ್, ಇದೀಗ ಆ ಕಾದಂಬರಿ ಮುಗಿದಲ್ಲಿಂದಲೇ ಆರಂಭಿಸಿ ಮತ್ತೆರಡು ಭಾಗಗಳನ್ನು ಹೊರತಂದಿದ್ದಾರೆ. ಮೊದಲ ...

  • 1 week ago No comment

    170ಕ್ಕೂ ಹೆಚ್ಚು ಭತ್ತದ ತಳಿಗಳ ಜೋಪಾನ ಮಾಡಿದ್ದ ಜಯರಾಮನ್

    ಬೀಜಗಳ ಸಂರಕ್ಷಣೆ, ತಮಿಳ್ನಾಡಿನಾದ್ಯಂತ ಕೃಷಿಯಲ್ಲಿ ಸ್ಥಳೀಯ ಶೈಲಿಯ ಅಳವಡಿಕೆ ಮತ್ತು ಬೀಜ ಪ್ರಭೇದಗಳನ್ನು ಉತ್ತೇಜಿಸುವ ಕೆಲಸದಲ್ಲಿ ಜಯರಾಮನ್ ತೊಡಗಿಸಿಕೊಡಿದ್ದರು.   ಭಾರತದ ಕೃಷಿ ಕ್ಷೇತ್ರದಲ್ಲಿ ಪ್ರಮುಖ ಹೆಸರಾಗಿದ್ದ, ನೂರಾರು ಭತ್ತದ ತಳಿಗಳ ಪುನಶ್ಚೇತನಕ್ಕೆ ಕಾರಣರಾಗಿದ್ದ ತಮಿಳ್ನಾಡಿನ ಕೆ ಆರ್ ಜಯರಾಮನ್ ನಿಧನರಾಗಿದ್ದಾರೆ. ಅವರು ಕ್ಯಾನ್ಸರಿನಿಂದ ಬಳಲುತ್ತಿದ್ದರು. ನೆಲ್ (ಭತ್ತವನ್ನು ತಮಿಳಿನಲ್ಲಿ ಹೀಗೇ ಕರೆಯುತ್ತಾರೆ) ಎಂದೇ ಹೆಚ್ಚು ಪರಿಚಿತರಾಗಿದ್ದ ಜಯರಾಮನ್, 170 ಕ್ಕಿಂತಲೂ ಹೆಚ್ಚು ಸ್ಥಳೀಯ ಭತ್ತದ ವೈವಿಧ್ಯಗಳನ್ನು ಪುನಶ್ಚೇತನಗೊಳಿಸಿದ್ದುರ. ...

  • 1 week ago No comment

    ಅಲೆಗಳಾಗುವ ಹಾಡು

        ಕವಿಸಾಲು         ಕನಸುಗಳ ಜಾತ್ರೆ, ಮನಸುಗಳ ಹಬ್ಬ ಎಲ್ಲ ನಿಶ್ಯಬ್ದ, ಮೌನದಲಿ ಮನ ಬಿಡಿಸಿದ ಮೂರ್ತ ರೂಪಕ್ಕೆ ತದ್ರೂಪು ನಿನ್ನದೇ ಸೊಬಗು ಸುರಿವ ಮಳೆ, ಬೀಸೋ ಗಾಳಿ ಒದ್ದೆಯಾದ ಒಡಲಿನಲಿ ಉರಿವ ನನ್ನೆದೆಯ ಮೇಲೆ ಚಿತ್ತಾರ ಬಿಡಿಸುತ್ತವೆ ನಿನ್ನ ಬೆರಳು ಕರಿಕಪ್ಪು ಚಳಿ ರಾತ್ರಿಯಲಿ ಒಂದಪ್ಪುಗೆಯ ಧ್ಯಾನದಲಿ ಬೆನ್ನ ಸುಳಿ ಸೀಳಿ ಮೇಲೇರುವ ನಡುಕದಲಿ ನಿನ್ನೆದೆಯ ಹರವು ಯಾರೋ, ಯಾವತ್ತೋ ಮರಳ ...

  • 2 weeks ago No comment

    ಹೊಸ್ತಿನ ಹಗಲು

    ಕವಿಸಾಲು   ಬಯಲ ಗದ್ದೆಯ ಭತ್ತದ ಕದರು ರೈತರ ಬೆವರ ಬಸಿಯುವ ಕೊಯಿಲು ಕಂಬಳಕಿಂಪಿನ ಪಾಂಗಿನ ಅಮಲು ಹೊಡತಲೆ ಹಗಣದ ಕವಳದ ಸಾಲು ಆಚರಿಸುತಿದೆ ಹೊಸ್ತಿನ ಹಗಲು. ನೇಗಿಲ ಬುಡದಲಿ ಸಸಿಬುಡ ಬೇರು ಕದರಿನ ನಡುವಲಿ ಗಂಧದ ಕೆದರು ಮಣ್ಣೊಳಗ್ಹುದುಗಿದ ಎರೆಹುಳು ಪಾಡು ಹರಡಿದ ಗಿಣಿಗಳ ಹಾಡಿನ ಜಾಡು ಆಚರಿಸುತಿದೆ ಹೊಸ್ತಿನ ಹಗಲು. ಮಣ್ಣಿನ ಬಣ್ಣದ ಮನಸಿನ ತೆವಲು ಕೆಂದರಕಿ ಹೂವಿನ ಕಮಾನು ಹೊಸಿಲು ಹೂಡುವ ಎತ್ತಿನ ಅಡಸಲ ...


Editor's Wall

  • 08 December 2018
    1 week ago No comment

    170ಕ್ಕೂ ಹೆಚ್ಚು ಭತ್ತದ ತಳಿಗಳ ಜೋಪಾನ ಮಾಡಿದ್ದ ಜಯರಾಮನ್

    ಬೀಜಗಳ ಸಂರಕ್ಷಣೆ, ತಮಿಳ್ನಾಡಿನಾದ್ಯಂತ ಕೃಷಿಯಲ್ಲಿ ಸ್ಥಳೀಯ ಶೈಲಿಯ ಅಳವಡಿಕೆ ಮತ್ತು ಬೀಜ ಪ್ರಭೇದಗಳನ್ನು ಉತ್ತೇಜಿಸುವ ಕೆಲಸದಲ್ಲಿ ಜಯರಾಮನ್ ತೊಡಗಿಸಿಕೊಡಿದ್ದರು.   ಭಾರತದ ಕೃಷಿ ಕ್ಷೇತ್ರದಲ್ಲಿ ಪ್ರಮುಖ ಹೆಸರಾಗಿದ್ದ, ನೂರಾರು ಭತ್ತದ ತಳಿಗಳ ಪುನಶ್ಚೇತನಕ್ಕೆ ಕಾರಣರಾಗಿದ್ದ ತಮಿಳ್ನಾಡಿನ ಕೆ ಆರ್ ಜಯರಾಮನ್ ನಿಧನರಾಗಿದ್ದಾರೆ. ಅವರು ಕ್ಯಾನ್ಸರಿನಿಂದ ಬಳಲುತ್ತಿದ್ದರು. ನೆಲ್ (ಭತ್ತವನ್ನು ತಮಿಳಿನಲ್ಲಿ ಹೀಗೇ ಕರೆಯುತ್ತಾರೆ) ಎಂದೇ ಹೆಚ್ಚು ಪರಿಚಿತರಾಗಿದ್ದ ಜಯರಾಮನ್, 170 ಕ್ಕಿಂತಲೂ ಹೆಚ್ಚು ಸ್ಥಳೀಯ ಭತ್ತದ ವೈವಿಧ್ಯಗಳನ್ನು ಪುನಶ್ಚೇತನಗೊಳಿಸಿದ್ದುರ. ...

  • 30 November 2018
    2 weeks ago No comment

    ರಕ್ಕಸ ವ್ಯೂಹದಲ್ಲಿ ಹೆಣ್ಣಿನ ಹೋರಾಟ

    ಮನೆಯೊಳಗೇ ಹಂತಕರಿದ್ದರೆ ಮಹಿಳೆ ಇನ್ನೆಲ್ಲಿ ಹೋಗಬೇಕು ಎಂಬುದೇ ದೊಡ್ಡ ಪ್ರಶ್ನೆ. ಬಹಳಷ್ಟು ಮಹಿಳೆಯರ ಪಾಲಿಗೆ ತಪ್ಪಿಸಿಕೊಳ್ಳುವುದಕ್ಕೊಂದು ತಾಣವೇ ಇಲ್ಲ.    2017ರಲ್ಲಿ ಇಡೀ ಜಗತ್ತಿನಲ್ಲಿ ಕೊಲೆಯಾದ ಒಟ್ಟು ಮಹಿಳೆಯರು 87 ಸಾವಿರ. ಇದರಲ್ಲಿ ಕುಟುಂಬ ಸದಸ್ಯರು ಇಲ್ಲವೆ ಗಂಡ, ಪ್ರಿಯಕರ, ಪರಿಚಿತರಿಂದ ಹತ್ಯೆಯಾದ ಮಹಿಳೆಯರ ಸಂಖ್ಯೆಯೇ 50 ಸಾವಿರ. ಈ ಬೆಚ್ಚಿಬೀಳಿಸುವ ಅಂಕಿಅಂಶವನ್ನು ಬಯಲು ಮಾಡಿರುವುದು ವಿಶ್ವಸಂಸ್ಥೆಯು ಮೊನ್ನೆ ನ.25ರಂದು ಬಿಡುಗಡೆ ಮಾಡಿರುವ ಅಧ್ಯಯನ ವರದಿ. ನವೆಂಬರ್ 25, ...

  • 29 November 2018
    2 weeks ago No comment

    ರೈತರ ಸಂಕಟಗಳಿಗೆ ಸಿಗುವುದೆ ಮುಕ್ತಿ?

      ಕಳೆದ ವರ್ಷದ ನಾಸಿಕ್-ಮುಂಬಯಿ ಕಿಸಾನ್ ಲಾಂಗ್ ಮಾರ್ಚ್ ಅನ್ನೇ ಪ್ರೇರಣೆಯಾಗಿಟ್ಟುಕೊಂಡು ‘ಸಿಂಗೂರು- ರಾಜಭವನ್ ಕಿಸಾನ್ ಮುಕ್ತಿಮಾರ್ಚ್’ ಆಯೋಜಿಸಲಾಗಿದೆ. ಅಖಿಲಭಾರತ ಕಿಸಾನ್ ಸಭಾದ ಜನರಲ್ ಸೆಕ್ರೆಟರಿ ಹನ್ನಾನ್ ಮೊಲ್ಲಾ ಅವರು ‘ಅಧಿಕಾರಕ್ಕೆ ಬರಬೇಕೆನ್ನುವ ರಾಜಕೀಯ ಪಕ್ಷಗಳು ರೈತರ ಸಂಕಟಗಳಿಗೆ ಜೊತೆಯಾಗುವ ವಿಚಾರದಲ್ಲಿ ತಮ್ಮ ನಿಲುವನ್ನು ಸ್ಪಷ್ಟಪಡಿಸಲಿ’ ಎಂದಿದ್ದಾರೆ.     ಕಳೆದ ಇಪ್ಪತ್ತು ವರ್ಷಗಳಲ್ಲಿ 3 ಲಕ್ಷ ರೈತರ ಆತ್ಮಹತ್ಯೆಗಳಾಗಿವೆ ಎನ್ನುವುದು ಭಾರತದ ರೈತರ ಸಂಕಟಗಳ ತೀವ್ರತೆಯನ್ನು ತೋರಿಸುತ್ತದೆ. ನರೇಂದ್ರ ...

  • 09 November 2018
    1 month ago No comment

    ಹೊಸ ಕಾಲದ ಹರಕೆಯ ಕುರಿಗಳು!

      ಅಮಾಯಕತೆಯನ್ನು ಮತ್ತೆ ಮತ್ತೆ ಮೌನಕ್ಕೆ ಕಟ್ಟಿಹಾಕುವ ಇವತ್ತಿನ ಸಂದರ್ಭದಲ್ಲಿ, ಮಾತು ಸೋಲದಂತೆ ಕಾಯುವುದಕ್ಕೆ ಮೌನದ ಜರೂರು ಇನಿತಾದರೂ ಇದೆ ಎಂದು ನಂಬುವುದೂ ಸಾಧ್ಯವಿಲ್ಲ.     ಗೆಳೆಯರೊಬ್ಬರು ಕೆಲ ದಿನಗಳ ಹಿಂದೆ, ನಿಮ್ಮ ಇಷ್ಟದ ಮೂರ್ನಾಲ್ಕು ಕಥೆಗಳನ್ನು ಹೆಸರಿಸಿ ಎಂದು ಕೇಳಿದರು. ನಾನು ಯೋಚಿಸಿದೆ. ಇಷ್ಟದ ಯಾವುದೇ ಕೃತಿಯನ್ನು ನಮ್ಮೊಳಗೇ ಗುರುತಿಸಿಕೊಳ್ಳುವುದು ಸುಲಭ ಮತ್ತು ಅದು ನಮಗೆ ಆಪ್ತವಾಗುವಂಥದ್ದು. ಆದರೆ ಯಾಕೆ ಇಷ್ಟ ಎಂದು ವಿವರಿಸಬೇಕಾಗಿ ಬಂದಾಗಲೇ ...

  • 28 October 2018
    2 months ago No comment

    ಪ್ರಸ್ತಾಪ | #MeToo: ‘ಮಾತು’ ಎದುರಿಸುತ್ತಿರುವ ಬಿಕ್ಕಟ್ಟು

      ದಮನಿತ ದನಿಯೊಂದು ಮಾತಾದಾಗ ಎಲ್ಲ ಕಾಲದಲ್ಲೂ ಎದುರಾಗುತ್ತಲೇ ಬಂದ ಬಿಕ್ಕಟ್ಟಿನ ಸನ್ನಿವೇಶವೇ ಈಗ #MeToo ಅಭಿಯಾನಕ್ಕೂ ಎದುರಾಗಿರುವುದು.     ಕಳೆದ ಹಲವು ದಿನಗಳಿಂದ #MeToo ಅಭಿಯಾನ ಪಡೆಯುತ್ತಿರುವ ತೀವ್ರತೆ, ಹೆಣ್ಣಿನ ದನಿಗೆ ಈ ಸಮಾಜದ ಕಿವಿ ನಿಧಾನವಾಗಿಯಾದರೂ ತೆರೆದುಕೊಳ್ಳುತ್ತಿರುವುದಕ್ಕೆ ಸಾಕ್ಷಿಯಂತೆ ಕಾಣಿಸುತ್ತಿದೆ. ಆದರೆ ಅಪಸ್ವರಗಳು ಅದೇ ಹೆಣ್ಣಿನ ದನಿಯನ್ನು ಅಡಗಿಸುವಷ್ಟೇ ಗಟ್ಟಿಯಾದ ಅಬ್ಬರದೊಂದಿಗಿರುವುದೂ ಸುಳ್ಳಲ್ಲ. ಪತ್ರಕರ್ತೆ ಪ್ರಿಯಾ ರಮಾನಿ ಪತ್ರಿಕೋದ್ಯಮದಲ್ಲಿ ಲೈಂಗಿಕ ಕಿರುಕುಳ ಅನುಭವಿಸಿ ನೊಂದ ...